Oyemere oku Yehova Aba Akuzigire

1. Bici byarhumaga wacihâna emwa Yehova? (Olole n’enfoto.)

KA WANAKENGERA amango wacihânaga emwa Yehova? Warhôzire ogo muhigo bulya wahikire okumumanya wanamuzigira. Wamulaganyize oku wahira obulonza bwage oku nafasi ntanzi omu kalamo kawe n’oku wagendekera wamuzigira n’omurhima gwawe goshi, obugumaguma bwawe boshi, obukengere bwawe boshi, n’emisi yawe yoshi. (Mk. 12:30) Kurhenga ago mango, obuzigire bwawe kuli ye bwagendekire bwayushûka bwenene. Gurhigi wakashuza erhi muntu mulebe akakudosa erhi, “Ka kobinali oba ozigire Yehova?” Buzira kurhindira, wanashuza erhi, “Mba muzigire bwenene kulusha ngasi muntu yeshi-yeshi na kulusha ngasi kantu!”

2-3. Bici Yehova aba alonzize rhuyemere, na bici rhwaganirira mw’eci cigabi? (Yeremiya 31:3, Mashi Bible)

² Gurhigi wakashuza erhi muntu mulebe akakudosa erhi, “K’oba oyemire n’obwalagale oku Yehova aba akuzigire?” Ka wanarhindira okushuza, nkaba omu kurhanya oku orhashinganini okuzigirwa na Yehova? Mwali wirhu muguma wakag’iciyumva arhazigirwi erhi ali murho adesire ntya: “Manyire oku mba nzigire Yehova. Ntagwerhi karhinda koshi-koshi lugenda oko. Cikoki, kanji-kanji nankacidosa erhi Yehova aba anzigire.” Cikone gurhi Yehova aciyumva kobinali okubikuyerekire?

³ Yehova alonzize oyemere n’obwalagale oku aba akuzigire. (Osome Yeremiya 31:3, Mashi Bible.) Kobinali, Yehova akukulwire emwage. N’erhi ocihâna emwage n’okubatizibwa, wahâbwa kantu kalebe kinja bwenene, ko kuderha, obuzigire bwage bwishwekerezi. Oko kuhugwîre oku aba akuzigire bwenene arhakanakuleka ciru n’ehitya. Obo buzigire bunamushumye okubona abakozi bage bishwekerezi, kukuhiramwo nawe, oku bali ‘buhirhi bwage yene.’ (Mal. 3:17) Yehova alonzize oyemere n’obwalagale oku aba akuzigire nk’oku entumwa Paolo yal’iyemire n’obwalagale oku al’iyizigire. Paolo al’iyemire n’obwalagale oku Yehova al’imuzigire n’oko kwarhuma ayandika ntya: “Mmanyire kwinja oku ciru olufû erhi buzine, ciru bama-lahika erhi amami, ciru gano mango erhi amango gayisha, ciru amahashe, oli emalunga, oli omu idaho, nta ciremwa ciru n’eciguma cankahasha okurhunanûla oku buzigire bwa Nyamuzinda.” (Rm. 8:38, 39) Mw’eci cigabi, rhwaganirira bulya gurhi rhulagirire oku kuzibuhya obuyemere bwirhu oku Yehova aba arhuzigire n’ebyakarhurhabala lyo rhujira ntyo.

BULYA GURHI KULI KWA BULAGIRIRE BWENENE OKUYEMERA OKU YEHOVA ABA AKUZIGIRE?

4. Gurhi rhwakalwisamwo buguma bw’omu mengehushu madarhi ga Shetani?

⁴ Erhi rhwakayemera oku Yehova aba arhuzigire, rhwanalwisa buguma omu ‘mengehushu’ ga Shetani. (Ef. 6:11) Shetani ajira ngasi kantu akanahasha koshi ly’arhuma rhwaleka okukolera Yehova. Buguma omu mengehushu madarhi bwenene ga Shetani kuba kugendekeza obunywesi oku Yehova arhaba arhuzigire. Orhayibagiraga ciru n’ehitya oku Shetani anakakolesa ngasi bulyo abwine. Kanji-kanji anarhurhere amango rhurhagwerhi misi, nkaba amango rhuli rhwaciyumva kubi bwenene omu kandalala enyanya z’ebyabaga omu mango gageraga, enyanya z’amazibu gali garhuhikira mwa gano mango, erhi enyanya z’okuyoboha lugenda ebyakarhukira omu mango gayisha. (Mig. 24:10) Shetani aba nka ntale eri yalongereza oku yagwarhamwo ensimba erhagwerhi misi y’okucihalira. Co cirhumire, anakalonza okurhugwarha amango rhuvunisire omurhima ly’arhulekesa okukolera Yehova. Cikone erhi rhwakagendekera rhwazibuhya obuyemere bwirhu oku Yehova aba arhuzigire, rhwanaba n’obuhashe bw’‘okuhagalika’ Shetani n’emirhego yage y’obwengehushu n’enjira zage.​—1 Pt. 5:8, 9; Yk. 4:7.

5. Bulya gurhi kuli kwa bulagirire bwenene kuli we okuciyumva oku Yehova akuzigire ananakubone oku oli wa bulagirire bwenene?

⁵ Erhi rhwakayemera oku Yehova aba arhuzigire, rhwanamuyegerera bwenene. Bici birhumire rhwaderha ntyo? Yehova arhulemire n’irala ly’okuzigira n’okuzigirwa. Erhi omuntu arhuyeresa obuzigire, oko kunarhushumye okumuyeresa nirhu obuzigire. Co cirhumire, oku rhwagendekera rhwaciyumva Yehova arhuzigire n’okurhubona ba bulagirire, ko nirhu rhwagendekera rhwamuzigira bwenene. (1 Yn. 4:19) N’oku rhwagendekera rhwayushûla obuzigire bwirhu kuli ye, ko anagendekera ayushûla obuzigire bwage kuli rhwe. Ebibliya erhubwizire ntya n’obwalagale: “Yegeri Nyamuzinda, naye amuyegerera.” (Yk. 4:8) Gurhigi rhwakazibuhyamwo obuyemere bwirhu oku Yehova aba arhuzigire?

BICI BYAKARHURHABALA LYO RHUYEMERA OKU YEHOVA ABA ARHUZIGIRE?

6. Erhi akaba orhayemiri n’obwalagale oku Yehova aba akuzigire, bici wakajira?

⁶ Ogendekere washenga Yehova akurhabale ohugûkwe oku aba akuzigire. (Lk. 18:1; Rm. 12:12) Ohûne Yehova kanji ngasi lusiku erhi akaba kuli kwa bulagirire, akurhabale okacibona nk’oku akubona. Kobinali, nkaba kwanaba kuzibu okuyemeza omurhima guli gwacitumuza oku Yehova aba akuzigire. Cikone okengere oku Yehova alushire omurhima gwawe. (1 Yn. 3:19, 20) Akumanyire bwinja bwenene kulusha oku oba ocimanyire; anabone ebi orhankahash’ibona. (1 Sam. 16:7; 2 Nga. 6:30) Co cirhumire, orharhindiraga ‘okumuhirako’ entanya zawe, onamuhûne akurhabale ly’oyemera oku aba akuzigire. (Enna. 62:8, Mashi Bible) Enyuma z’aho, ojire kushimbana n’amasala gawe omu kukolesa amahano gakulikire.

7-8. Gurhi Ennanga zirhuyemezizemwo n’obwalagale oku Yehova aba arhuzigire?

⁷ Olangalire ebi Yehova adesire. Kugerera iroho lyage litagatifu, alongozize abayandikaga Ebibliya lyo baganirira oku ayorha kobinali. Orhanye oku njira nyinja omuzihi w’ennanga Daudi aganiriragamwo Yehova. Ayandika ntya: “Yehova aba hofi n’emirhima egayire; anacungule abavunisire omurhima.” (Enna. 34:18, NWT) Amango ovunisire omurhima, nkaba wanaciyumva oku olekerirwe. Cikone Yehova alaganyize oku omu kasanzi ka ntyo, anabe ali hofi nawe bulya anabone oku omulagirireko bwenene kulusha agandi mango goshi. Omu lundi lulanga, Daudi ayandisire ntya: “Orhôle emirenge yani oyigunje omu ndaha.” (Enna. 56:8, Mashi Bible) Yehova anabone amango ogayire onali waciyumva kubi. Anakushibirire bwenene ananashibirire amazibu gali gakuhikira. Nka kula ngasi murhonyi gw’amishi guli omu ndaha y’omuntu oli wabalama omw’irungu guba gwa bulagirire bwenene, ko n’oko emirenge orhoza eba ya bulagirire bwenene kuli Yehova, ananakengere ngasi mango oyumva amalumwa n’okulaka. Olwandiko lw’Ennanga 139:3 ludesire ntya: “[Yehova] enjira zani zoshi nta nguma ohabire.” Yehova anabone enjira zawe zoshi, cikone anasegeze obwenge oku bintu binja ojira. (Hb. 6:10) Bulya gurhi? Bulya anabone oku ngasi bushiru ojira ly’omushagalusa buba bwa bulagirire bwenene.a

⁸ Kugerera ago mandiko g’okurhuliriza gali omu Kanwa kage kalongozibagwa n’iroho lyage litagatifu, Yehova ali nk’oli waderha ntya: “Nnonzize omanye kunganaci mba nkuzigire bwenene na kunganaci nkushibirira.” Cikone nk’oku rhwayigaga embere, Shetani anakagendekeza obunywesi oku Yehova arhaba akuzigire. Co cirhumire, erhi mango malebe wakaba ogwerhe akarhinda lugenda obuzigire bwa Yehova kuli we, okarhôla hisanzi hitya onacidose ntya: ‘Ndi nalangalira, k’“ishe w’obunywesi” erhi “Nyamuzinda w’okunali”?’​—Yn. 8:44; Enna. 31:5, Mashi Bible.

9. Bici Yehova ayemezize n’obwalagale abamuzigira? (Olubungo 20:5, 6)

⁹ Orhanye bwenene lugenda oku Yehova ajirira abamuyeresa obuzigire. Orhanye kw’ebi Yehova abwiraga Musa n’Abaisraheli. (Osome Olubungo 20:5, 6.) Yehova alaganyize oku agendekera ayeresa abamuzigira obuzigire bwishwekerezi. Ezo nderho zirhuyemezize n’obwalagale oku Mungu wirhu mwishwekerezi arhakabula ciru n’ehitya bwazigira abakozi bage bamuzigira. (Lush. 7:9) Erhi akaba hali mango maguma na maguma oba olagirire oku kuyemezibwa n’obwalagale oku Yehova aba akuzigire, okarhôla hisanzi hitya onacidose ntya: ‘Ka mba nzigire Yehova?’ Enyuma z’aho, orhanye kuli oku: Erhi akaba oba omuzigire onali wajira okwawe koshi ly’omushagalusa, wanayemera n’obwalagale oku aba akuzigire bwenene. (Dan. 9:4; 1 Kr. 8:3) Kuli kuderha oku, erhi akaba orhagwerhi karhinda koshi-koshi oku oba ozigire Yehova, cakarhuma waba n’akarhinda oku aba akuzigire? Wanayemera loshi-loshi oku ensiku zoshi akuzigira arhakanakuleka.

10-11. Gurhi Yehova aba alonzize okabona engombôlo? (Abagalasiya 2:20)

¹⁰ Okarhanya bwenene oku ngombôlo. Enterekêro y’engombôlo ya Yezu Kristu yo ngalo y’obulagirire bwenene kulusha zoshi Yehova amakaha bene bantu. (Yn. 3:16) Cikone, ka Yehova arhumire Omugala ly’akufîra nawe? Neci! Rhuganirire ebyahikiraga entumwa Paolo. Okengere oku ajijire ebyaha bizibu bwenene embere abe Mukristu anal’igwasirwe agendekere alwisa obuzamba bwage. (Rm. 7:24, 25; 1 Tm. 1:12-14) Ciru akaba ntyo, Paolo ahikire okubona oku engombôlo eri ngalo Yehova ahânaga erhi ye orhuma. (Osome Abagalasiya 2:20.) Okengere oku Yehova alongozize Paolo n’iroho litagatifu ly’ayandika ezo nderho. Na ngasi kantu kaba omu Bibliya kayandisirwe lyo karhuyigiriza. (Rm. 15:4) Enderho za Paolo ziyerekine gurhi Yehova alonzize okabona engombôlo; alonzize okayibona oku eri ngalo ahânyire erhi we orhuma. Erhi wakahikira okubona engombôlo nk’oko Paolo akag’iyibona, wanazibuhya obuyemere bwawe oku Yehova aba akuzigire.

¹¹ Rhuvuzire Yehova omunkwa okubona arhumire Yezu hanw’igulu ly’arhufîra. Cikone akandi kantu karhumaga Yezu ayisha hanw’igulu, kwali kuyigiriza abandi okuli lugenda Mungu. (Yn. 18:37) Oko okuli kuhiziremwo oku Yehova aciyumva lugenda abana bage.

OKU YEZU ARHURHABALAMWO LYO RHUYEMERA OKU YEHOVA ABA ARHUZIGIRE

12. Bulya gurhi rhwanayemera ebi Yezu adesire lugenda Yehova?

¹² Amango Yezu ali hanw’igulu, akag’ishagalukira okuyeresa abantu oku Yehova ayorha. (Lk. 10:22) Rhwanayemera n’obwalagale ebi Yezu adesire lugenda Yehova. Bulya gurhi? Bulya Yezu alamire empingu haguma na Yehova kasanzi kanji bwenene embere ayishe en’igulu. (Kl. 1:15) Yezu acibwinire kunganaci Ishe aba amuzigire. Na kandi abwine gurhi Ishe akag’iyeresa bamalahika bishwekerezi obuzigire n’oku akag’ibuyeresa bene bantu bishwekerezi boshi okw’igulu. Gurhi Yezu arhurhabalamwo lyo rhuyemera oku Mungu aba arhuzigire?

13. Gurhi Yezu alonzize rhukabona Yehova?

¹³ Yezu aba alonzize rhukabona Yehova nk’oku amubona. Omu Enjili, Yezu aganirire Yehova nka “Larha,” kanji bwenene. N’erhi aba ali aganira n’abumvirhiza bage, akolesize enderho nka “Sho” erhi “Sho w’empingu.” (Mt. 5:16; 6:26) Omu Bibliya​—Tafsiri ya Ulimwengu Mupya y’Ifunzo y’Ecifaransa, amahugûlo g’idako oku Mateyo 5:16 gadesire ntya: “Abakozi ba Yehova ba mîra bakag’ikolesa mazino manji g’ecikono omu kuganirira Yehova n’omu kumuganiza, gahiziremwo ‘Ogala-byoshi,’ ‘Ow’Enyanya Bwenene,’ na ‘Mulemi Mukulu,’ cikone Yezu akag’ikolesa kanji-kanji oluderho lulembu lwanal’imanyikine ‘Larha,’ luyerekine obwîra bwa hofi-hofi buba egarhi ka Yehova n’abakozi bage.” Oko kuyerekine n’obwalagale oku Yezu alonzize rhukabona Yehova nk’oku amubona, ko kuderha, nka Larha wirhu w’obuzigire, oba ozigire abana bage bwenene. Lekagi rhuganirire nyiganyo ibirhi Yezu akolesizemwo oluderho “Larha.”

14. Gurhi Yezu ayerekinemwo oku ngasi muguma muli rhwe aba wa ngulo ndarhi omu masu ga Larha wirhu w’omu mpingu? (Mateyo 10:29-31) (Olole n’enfoto.)

¹⁴ Burhangiriza, rhuganirire enderho za Yezu ziri omu Mateyo 10:29-31. (Osome.) Nta mango ebitora erhi rhufunzi byanazigire erhi kuharamya Yehova. Ciru akaba ntyo, Larha wirhu anabone oku ehifunzi higuma hiri hya ngulo ndarhi na ntyo anamanye amango hyarhogire oku idaho. Oko kuyerekine kunganaci ashibirira omukozi wage mwishwekerezi omukolera enyanya z’obuzigire n’okumubona oku ali wa ngulo ndarhi! Lugenda enderho “ciru emviri z’irhwe linyu zoshi ziri nganje,” amahugûlo g’ifunzo omu Biblia​—Tafsiri ya Ulimwengu Mupya y’Ifunzo y’Ecifaransa oku mulongo gwa 30 gadesire ntya: “Okuba Yehova aba amanyire ebintu bisungunu-ngunu bya ntyo kunarhuyemeze n’obwalagale oku anashibirire bwenene ngasi mwanafunzi wa Yezu.” Kobinali, Yezu alonzize rhuyemere n’obwalagale oku ngasi muguma muli rhwe aba wa ngulo ndarhi omu masu ga Larha wirhu w’omu mpingu.

15. Bici enderho za Yezu ziri omu Yowane 6:44 zikuyigirizize lugenda Sho w’omu mpingu?

¹⁵ Olabe olwiganyo lwa kabirhi Yezu akolesizemwo oluderho “Larha.” (Osome Yowane 6:44.) Sho w’empingu yenene akulongwire, erhi kukukulula n’obuzigire omu okuli. Bici byarhumaga ajira ntyo? Bulya abwine muli we omurhima mwinja. (Ebj. 13:48) Amahugûlo g’ifunzo omu Biblia​—Tafsiri ya Ulimwengu Mupya y’Ifunzo y’Ecifaransa oku Yowane 6:44, gadesire oku Yezu nkaba akag’irhanya oku nderho za Yeremiya ziri omu lwandiko lwirhu lw’omusingi: “Nakuyegereza aha burhambi bwani . . . n’obuzigire bunene [bwishwekerezi, NWT].” (Yer. 31:3, Mashi Bible; oshushanye na Hozeya 11:4.) Orhanye kw’ebi oko kuhugwîre. Larha wirhu w’obuzigire w’omu mpingu agendekire abona ebinja muli we, ebi orhankahasha wacibonamwo wenene.

16. (a) Bici Yezu arhuyigirizize, na bulya gurhi rhushinganine rhumulangalire? (b) Bici byakakuyemeza n’obwalagale oku Yehova ye Larha mwinja bwenene olagirireko? (Olole n’ecisanduku cidesire, “Larha Rhulagirireko Rhweshi.”)

¹⁶ Omu kuganirira Yehova nka Larha, Yezu ali nk’owakag’iderha ntya: “Yehova arhali Larha niene; cikone nawe ali Sho. Nankuyemezize oku akuzigire anakushibirire bwenene.” Co cirhumire, erhi mango malebe wakaciyumva nka Yehova arhaba akuzigire, orhôle hisanzi hitya onacidose ntya: ‘Ka ntashinganini ndangalire enderho za Mugala wa Larha omumanyire bwinja bwenene onaderha okuli ensiku zoshi?’​—1 Pt. 2:22.

OGENDEKERE WAZIBUHYA OBUYEMERE BWAWE OKU YEHOVA ABA AKUZIGIRE

17. Bulya gurhi rhugwasirwe rhugendekere rhwazibuhya obuyemere bwirhu oku Yehova aba arhuzigire?

¹⁷ Rhushinganine rhugendekere rhwazibuhya obuyemere bwirhu oku Yehova aba arhuzigire. Nk’oku rhwayizire embere, omushombanyi wirhu mwengehushu, Shetani, ali ajira ebi akanahasha byoshi ly’arhushumika rhuleke okukolera Yehova. Kugerera obushiru bwage bw’okuzambanya omuhigo gwirhu, Shetani agendekera acihangana okunyihya obulangalire bwirhu omu buzigire bwa Yehova kuli rhwe. Rhurhagwasirwi rhuleke Shetani ahime!​—Ayu. 27:5.

18. Gurhi wakazibuhyamwo obuyemere bwawe omu buzigire bwa Yehova?

¹⁸ Ly’ozibuhya obuyemere bwawe omu buzigire bwa Yehova, ogendekere wamuhûna akurhabale ly’ocibona nk’oku akubona. Orhanye bwenene lugenda oku abandisi b’Ebibliya balongozibagwa n’iroho baganirire obuzigire bwage bunji. Okengere oku ensiku zoshi Yehova azigira omuntu omuzigire. Orhanye bwenene lugenda oku wakabonamwo engombôlo nka ngalo yawe wenene. Onalangalire enderho za Yezu zikuyemezize n’obwalagale oku Yehova aba Sho w’omu mpingu. Muli ntyo erhi omuntu akakudosa erhi: “K’oyemire n’obwalagale oku Yehova aba akuzigire?” wanashuza n’obwalagale erhi: “Neci, aba anzigire! Nani nanjire okwani koshi ngasi lusiku lyo nyerekana obuzigire bwani kuli ye!”