Oyemere n’Obwirhohye oku Hali ebi Orhamanyiri

1. Buhashe buhi Yehova arhuhîre, na bulya gurhi?

YEHOVA arhulemire n’obuhashe bw’okurhanya, okuba n’obumanye, okuhash’ihugûkwa ebintu, n’okukolesa obwenge. Bici byarhumire arhulema ntyo? Alonzize ‘rhumanyîrire Nnâmahanga’ n’okumukolera n’obuhashe bwirhu bw’okurhanya.​—Mig. 2:1-5, Mashi Bible; Rm. 12:1.

2. (a) Bici rhushinganine rhuhugûkwe okubirhuyerekire? (Ayubu 37:23, 24) (Olole n’enfoto.) (b) Gurhi rhuyungukamwo erhi rhuyemera n’obwirhohye oku hali ebi rhurhamanyiri?

² Ciru akaba rhujira obuhashe bw’okuyiga, hali ebi rhurhaba rhumanyire. (Osome Ayubu 37:23, 24.) Orhanye oku lwiganyo lwa Ayubu. Yehova amudosize madoso manji gayerekanaga oku hali bintu binji arhal’imanyire. Ago madoso garhuma aba mwirhohye ganamurhabala akubûle entanya zage. (Ayu. 42:3-6) Nirhu rhunayunguke erhi rhuyemera n’obwirhohye oku rhurhaba rhumanyire ngasi kantu. Obwirhohye bwa ntyo bunarhushumye okulangalira oku Yehova arhufulûlira ebi kobinali rhulagirireko okumanya lyo rhuhash’irhôla emihigo y’obwenge.​—Mig. 2:6.

3. Bici rhwaganirira mw’eci cigabi?

³ Mweci cigabi, rhwaganirira bintu biguma na biguma rhurhaba rhumanyire n’amazibu oko kwakalerha. Kandi rhwaganirira bulya gurhi kuli kwinja okubona rhurhaba rhumanyire bintu bilebe. Okuganirira ebyo bintu kwarhurhabala rhulangalire bwenene oku Yehova, “ojira obumanye burhali mw’ishembo,” anarhubwire ebi kobinali rhulagirireko okumanya.​—Ayu. 37:16, Mashi Bible.

RHURHAMANYIRI MANGACI OBUZINDA BWAYISHA

4. Kushimbana na Mateyo 24:36, kantu kaguma kahi rhurhaba rhumanyire?

⁴ Osome Mateyo 24:36. Rhurhamanyiri mangaci obuzinda bw’er’igulu libi bwayisha. Ciru na Yezu, amango ali hano igulu, arhal’imanyire “olusiku n’ako kasanzi.”a Enyuma z’aho, abwizire entumwa zage oku Yehova, Murhambo Mukulu w’Akasanzi, abisire “oku bulonza bwage” erhi buhashe bwage, akasanzi bintu bilebe byaba. (Ebj. 1:6, 7) Yehova ahizireho akasanzi obuzinda bw’er’igulu bwahika, cikone rhurhagwerhi obuhashe bw’okumanya n’obwalagale mangaci oko kwaba.

5. Okuba rhurhamanyiri mangaci obuzinda bwayisha, mazibu gahi oko kwakarhulerhera?

⁵ Kushimbana n’ebi Yezu adesire, rhurhamanyiri kasanzi kanganaci rhushinganine okulinda kuhika obuzinda buhike. Nkaba oko kwanarhuma rhwabula obulembedu erhi kuvunika omurhima, ci bwenene erhi akaba rhukola rhugwerhe kasanzi kalebe rhuli rhwalinda olusiku lwa Yehova. Erhi nkaba kwanaba kuzibu kuli rhwe okulembera okushekerwa n’abantu b’omu mulala gwirhu erhi n’abandi bantu. (2 Pt. 3:3, 4) Byanahashikana rhurhanye oku rhucimanyage olusiku obuzinda bwayisha, rhwakabire ba kulembera bwenene kwakanabire kulembu kuli rhwe okulembera okushekerwa.

6. Bulya gurhi kuli kwinja okuba rhurhamanyiri amango obuzinda bwayisha?

⁶ Kulya kuba Yehova arharhubwiziri kobinali mangaci obuzinda bwayisha, rhugwerhe obulyo bw’okuyerekana oku rhunamukolere bulya rhumuzigire rhunamulangalire. Rhurhakolera Yehova rhunagwerhe lusiku lulebe luzinda omu bukengere, nka kuno obuyemere bwirhu muli ye bugwerhe olusiku bwahwa. Ahali h’okusegeza bwenene obwenge bwirhu oku mango “Olusiku lwa Nyamuzinda” lwayisha, rhunajire bwinja okubusegeza kw’ebi olo lusiku lwayish’ihikiriza. Omu kujira ntyo, rhunagendekere rhwazibuhya obwishwekerezi bwirhu kuli Mungu n’okujira ebi rhwakanahasha byoshi lyo rhumushagalusa.​—2 Pt. 3:11, 12.

7. Bici rhumanyire?

⁷ Kuli kwa bulagirire okusegeza obwenge kw’ebi rhukola rhumanyire. Rhumanyire oku ensiku nzinda zarhonderaga omu mwaka gwa 1914. Yehova ahânyire malebi manji g’Ebibliya gayerekine arhali ogo mwaka gone cikone kandi gaganirire amahugûlo lugenda ebyakabire enyuma z’aho. Bulya ago malebi gahikirire, rhuyemire n’obwalagale oku “olusiku ludârhi lw’obukunizi bwa Nyakasane [Yehova, NWT] luli hofi.” (Sof. 1:14) Kandi rhumanyire omukolo Yehova alonzize rhujire, ko kuderha, okubwira bantu banji nk’oku byakanahashikana lugenda ‘omwanzi mwinja gw’Obwami.’ (Mt. 24:14, NWT) Ogo mwanzi guli gwayalizibwa omu bihugo 240 ntya n’omu ndimi zilushire 1 000. Rhurhalagiriri oku kumanya “olusiku n’ako kasanzi” lyo rhuba n’obushiru bw’okuyaliza ogo mwanzi gw’okuyokola obuzine.

RHURHAMANYIRI GURHI YEHOVA AJIRA LY’ARHURHABALA

8. Bici enderho “omukolo gwa Nyamuzinda” ziganirire? (Omuhanûzi 11:5)

⁸ Rhurhaba rhumanyire ensiku zoshi “omukolo gwa Nyamuzinda.” (Osome Omuhanûzi 11:5.) Ezo nderho ziganirire ebi Yehova ajira bibe erhi ebi aleka bihike ly’ahikiriza obulonza bwage. Rhurhankamanya n’obwalagale bulya gurhi Yehova analeka kantu kalebe kahikire erhi gurhi kobinali ajira ly’arhurhabala. (Enna. 37:5) Rhurhankahugûkwa obumanye bwa ntyo nka kula rhurhankahugûkwa oku omwana aja akula omu nda ya nnina, kantu abantu basoma esiyanse barhasag’ihugûkwa bwinjinja.

9. Enyanya z’okuba rhurhamanyiri ebi Yehova ajira ly’arhurhabala, mazibu gahi rhwakaba nago?

⁹ Okurhamanya kwirhu gurhi Yehova ajira ly’arhurhabala, kwanarhuma rhwarhindira okurhôla mihigo milebe. Nkaba ciru rhwanarhindira okucihâna lyo rhujira binji omu mukolo gw’amahubiri, kwa lwiganyo okulama akalamo karhahûnyiri binji erhi okuhamira ahali obulagirire bunji bwenene bw’abahubiri b’Obwami. Erhi nkaba rhwanacidosa erhi rhuciyemirwe na Mungu erhi akaba rhurhali rhwahikira emihigo yirhu y’eciteokrasi, erhi akaba rhurhali rhwabona amalehe minja bwenene lugenda omukolo muzibu rhuli rhwajira omu mahubiri, erhi amango rhwamarhimanana n’amazibu omu mukolo gw’eciteokrasi.

10. Okurhamanya gurhi Yehova ajira ly’arhurhabala, morhere gahi g’obulagirire kurhuma rhwaba nago?

¹⁰ Okurhamanya kwirhu gurhi Yehova ajira ly’arhurhabala kunarhume rhwaba n’amorhere g’obulagirire, nk’obwirhohye n’olugero. Rhunahikire okuhugûkwa oku entanya za Yehova n’enjira zage ziba zilushire bwenene ezirhu. (Iz. 55:8, 9) Kandi rhunayige okulangalira Yehova bwenene omu kumuyegemera lyo rhubêrwa. Erhi rhuba n’amalehe minja omu mukolo gw’amahubiri erhi omu mukolo mulebe gw’eciteokrasi, kobinali rhunahe Yehova irenge. (Enna. 127:1; 1 Kr. 3:7) Erhi akaba ebintu birhagendesiri nk’oku rhwal’irhanyize, rhushinganine rhukengere oku Yehova ali abona byoshi. (Iz. 26:12) Rhunajire ecirhu cigabi, rhunanagendekere rhwalangalira oku Yehova naye ajira ecage cigabi. Rhuyemire n’obwalagale oku Yehova arhuha obulongozi rhulagirireko ciru akaba arhajijiri ntyo omu njira y’ecisomerine nk’oku akag’ijira kasanzi kalebe omu mango ga mîra.​—Ebj. 16:6-10.

11. Bici rhumanyire byakarhurhabala?

¹¹ Rhumanyire oku ensiku zoshi Yehova aba wa buzigire, mushinganyanya na munya-bwenge. Rhumanyire oku anabone oku ebi rhumujirira n’ebi rhujirira abirhu bemezi biba bya bulagirire bwenene. Rhunamanyire oku ensiku zoshi Yehova anahembe balya baba bishwekerezi kuli ye.​—Hb. 11:6.

RHURHAMANYIRI EBYABA IRHONDO

12. Kushimbana na Yakobo 4:13, 14, bici rhurhamanyiri?

¹² Osome Yakobo 4:13, 14. Okuderha okuli, rhurhamanyiri gurhi akalamo kirhu kaba irhondo. Mw’er’igulu, rhunarhibukirwe n’“obuhanya.” (Muh. 9:11) Enyanya z’oko, rhurhankamanya erhi emihigo yirhu yahikirira erhi ciru rhwaciyish’iba rhuzine lyo rhubona oku emihigo yirhu yahikirira.

13. Gurhi okurhamanya bwinja-bwinja ebyaba omu mango gayisha kwakarhuma rhwaciyumva?

¹³ Kwanaba kuzibu kuli rhwe okulembera enyanya z’okuba rhurhamanyiri bwinja-bwinja ebyaba omu mango gayisha. Gurhi byakabamwo ntyo? Nkaba rhwanayoboha lugenda ebyakahikira, n’oko kwanarhuma rhwaheza omwishingo. Obuhanya bwa ho n’aho, n’ebintu rhurhal’imanyire oku byaba byanarhulerhera amababale n’okurhuma rhwaba burhe. N’erhi ebi rhwal’ilangalire byakaba birhahikirire, rhwanavunika omurhima n’okuheza obushiru.​—Mig. 13:12.

14. Bici omwishingo gwirhu gw’okunali guba guyegemire? (Olole n’enfoto.)

¹⁴ Erhi rhulembera amalibuko, rhunabe n’obuhashe bw’okuyerekana oku ciru mazibu gahi gakarhuhikira, rhunakolere Larha wirhu w’empingu enyanya z’obuzigire, c’arhali enyanya z’okucikaliza. Emyanzi eba omu Bibliya eyerekine oku rhurhashinganini rhulangalire oku Yehova arhulanga oku mazibu goshi n’oku arhapanga embere z’akasanzi ebyarhuhikira omu kalamo kirhu. Amanyire oku omwishingo gwirhu gurhayegemiri okumanya kwirhu ngasi kantu karhuhikira omu mango gayisha. Lubero n’oko, guyegemire okulongereza obulongozi bwage n’okumurhumikira. (Yer. 10:23) Omu kulongereza obulongozi bwage amango rhuli rhwarhôla emihigo, rhunabe rhuli rhwaderha ntya n’obwalagale: “Nyakasane [Yehova, NWT] akalonza, rhwaba rhucirimwo omûka, rhujire kantu kalebe na kalebe.”​—Yk. 4:15.

15. Bici rhumanyire lugenda amango gayisha?

¹⁵ Ciru akaba rhurhamanyiri ebyaba ngasi lusiku, rhumanyire oku Yehova arhulaganyize obuzine bw’ensiku n’amango, ebe empingu erhi hano igulu. Rhumanyire oku arhankanywerha n’oku ntaco cakamuhanza okuhikiriza ebiragane byage byoshi. (Tt. 1:2) Yene ye ‘wakamanyisa okwayishibâ, n’ebirhasagibâho, anabe abiderha mîra embere bwenene.’ Ebi alebaga byoshi byakabire omu mango ga mîra byahikirire, n’ebi alebire byoshi byaba omu mango gayisha nabyo byahikirira. (Iz. 46:10) Rhumanyire buzira karhinda koshi-koshi oku nta kantu kakahanza Yehova okurhuzigira. (Rm. 8:35-39) Arhuha obwenge, oburhulirize, n’obuhashe rhulagirireko lyo rhulembera ngasi mazibu gakarhuhikira. Rhwanayemera n’obwalagale oku Yehova arhurhabala n’okurhugisha.​—Yer. 17:7, 8.

RHURHAKAHUGÛKWA BWINJINJA KUNGANACI YEHOVA ABA ARHUMANYIRE

16. Nk’oku biyerekinwe omu Ennanga 139:1-6, bumanye buhi Yehova ajira rhurhankahugûkwa bwinjinja?

¹⁶ Osome Ennanga 139:1-6. Omulemi wirhu amanyire ngasi kantu okubirhuyerekire. Amanyire bulya gurhi rhurhanya omu njira ndebe n’okuciyumva kulebe. Anabe amanyire ebi rhuderha n’ebiri omu murhima gwirhu, anabe amanyire ngasi kantu rhujira na bulya gurhi rhukajira. Mwami Daudi adesire oku ensiku zoshi Yehova ajira obuhashe bw’okurhurhabala anaba mubidu okujira ntyo. Biri bya kusomeza bwenene okubona Nyakasane Murhegesi Mukulu Bwenene w’igulu lyoshi, Mulemi ogala-byoshi w’empingu n’igulu, anarhushibirire bwenene oko koshi! Daudi adesire ntya: “Obumanye buli ntyo bunsômîre bwenene, buntalusire bwenene, ntakabuyumva.”​—Enna. 139:6.

17. Bulya gurhi nkaba kwanaba kuzibu okuyemera oku Yehova aba arhumanyire bwinjinja?

¹⁷ Nkaba enyanya z’omulala rhwakuliragamwo, enkomedu z’emwirhu, erhi obwemere rhwagwerhe embere, kwanaba kuzibu kuli rhwe okubona Yehova nka Larha w’obuzigire orhushibirira. Erhi nkaba rhwanaciyumva oku amagosa girhu ga mîra gali magalugalu bwenene na ntyo nta mango Yehova akalonza arhumanye n’oku ali kulî bwenene na nirhu. Hali amango ciru Daudi naye aciyumvirhe ntyo. (Enna. 38:18, 21) Erhi nkaba omuntu oli wacihangana bwenene ly’ashanja akalamo kage n’okulama akalamo kashagalusize Nnâmahanga, anacidosa ntya: ‘Erhi akaba Nnâmahanga aba ahugûsirwe kobinali oku nyorha, gurhigi akalonza ndahire akalamo kabonekana kinja kuli nie?’

18. Gurhi rhuyungukamwo omu kuyemera oku Yehova aba arhumanyire bwinja bwenene kulusha oku rhuba rhucimanyire? (Olole n’enfoto.)

¹⁸ Rhwanayiga okuyemera oku Yehova aba arhumanyire bwinja bwenene kulusha oku rhuba rhucimanyire n’oku anabona muli rhwe ebinja rhurhankahash’ibona. Anabone amagosa girhu, cikone anabe amanyire bantu ba gurhi rhulonzize rhube, anaba arhuzigire. (Rm. 7:15) Erhi rhuhikira okuhugûkwa bwinja oku Yehova anabone ebinja muli rhwe, oko kunarhuhe emisi rhulagirireko lyo rhumukolera n’obwishwekerezi n’okujira ntyo n’omwishingo.

19. Bici rhumanyire buzira karhinda koshi-koshi lugenda Yehova?

¹⁹ Rhumanyire oku Yehova aba buzigire. Harhali karhinda koshi-koshi lugenda oko. (1 Yn. 4:8) Rhumanyire oku amakanuni gage mashinganyanya ganayerekane obuzigire bwage kuli rhwe, n’oku ensiku zoshi aba arhulongize akalamo kinja bwenene. Rhumanyire oku Yehova aba alonzize rhube n’obuzine bw’ensiku n’amango. Ahânyire engombôlo ly’oko kuhashikana. Engalo y’engombôlo erhuyemezize n’obwalagale oku rhwanahasha okushagalusa Yehova, ciru akaba rhunajire amagosa. (Rm. 7:24, 25) Rhunamanyire oku “Nyamuzinda alushire omurhima gwirhu, anayishi byoshi.” (1 Yn. 3:19, 20) Yehova aba amanyire ngasi kantu okubirhuyerekire, anaba alangalire oku rhwanahasha okujira obulonza bwage.

20. Bici byakarhurhabala okuyaka amahangayiko garhali ga bulagirire?

²⁰ Yehova arharhufulikaga omwanzi goshi-goshi rhulagirireko kobinali okumanya. Erhi rhuyemera n’obwirhohye oko, rhunayake okuhangayika kurhali kwa bulagirire enyanya z’ebi rhurhankahash’imanya, rhwananasegeza obwenge bwirhu oku biri by’obulagirire kobinali. Omu kujira ntyo, rhunayerekane oku obulangalire bwirhu boshi buba muli Yehova, “muntu ogwerhe obumanye nkana.” (Ayu. 36:4) Ciru akaba okuhugûkwa kwirhu bintu biguma na biguma ene kuli kwa lugero, rhuli rhwalindirira okuyiga ensiku n’amango ebintu bihyahya kurhenga emwa Mungu wirhu Mukulu na lugenda ye.​—Muh. 3:11.