ECIGABI C’OKUYIGA CA 4
LWIMBO 18 Rhuvuzire Omunkwa oku Ngombôlo
Bici Engombôlo Erhuyigirizize?
“Obuzigire bwa Nyamuzinda kuli rhwe bwamanyikine.”—1 YN. 4:9.
EBI ECI CIGABI CISEGIZE
Ebi engombôlo eyerekine lugenda amorhere minja bwenene ga Yehova na Yezu Kristu.
1. Gurhi rhuyungukamwo omu kuja oku ntimanano y’Okukengera olufû lwa Yezu ngasi mwaka?
KOBINALI, oyemire oku engombôlo eba ngalo y’ibeyi linji bwenene! (2 Kr. 9:15) Bulya Yezu ahânyire obuzine bwage nterekêro, wanaba n’obwîra bwa hofi-hofi haguma na Yehova Mungu. Kandi wanaba n’obulangalire bw’obuzine bw’ensiku n’amango. Okuyerekana oku rhuvuzire omunkwa oku ngombôlo n’oku rhuvuzire Yehova omunkwa washumibagwa n’obuzigire ly’ayihâna, kushinganine bwenene! (Rm. 5:8) Lyo rhugendekera rhwayerekana oku rhuvuzire omunkwa n’okurhayibagira ciru n’ehitya ebi Yehova na Yezu barhujirire, Yezu arhurhegesire rhukaja oku ntimanano y’Okukengera olufû lwage ngasi mwaka.—Lk. 22:19, 20.
2. Bici rhwaganirira mw’eci cigabi?
2 Mw’ogu mwaka, entimanano y’Okukengera olufû lwa Yezu yajirwa Lwa Kalindarhu, nsiku 12 Mwezi gwa 4, 2025. Buzira karhinda, rhweshi rhuli rhwapanga okuja kw’eyo ntimanano. Rhwayunguka bwenene erhi, omu migobe y’embere n’ey’enyuma z’olusiku lw’Okukengera olufû lwa Yezu, rhwakarhôla akasanzi k’okurhanya bwenenea kw’ebi Yehova n’Omugala barhujirire. Mw’eci cigabi, rhwaganirira ebi engombôlo erhuyigirizize lugenda Yehova n’Omugala. Ecigabi cikulikire carhurhabala rhuhugûkwe gurhi rhwakayungukamwo n’eyo ngombôlo na gurhi rhwakayerekanamwo omunkwa gwirhu kuli yo.
EBI ENGOMBÔLO ERHUYIGIRIZIZE LUGENDA YEHOVA
3. Gurhi olufû lwa muntu muguma lwakacungwiremwo emiliyoni y’abantu? (Olole n’enfoto.)
3 Engombôlo erhuyigirizize lugenda obushinganyanya bwa Yehova. (Lush. 32:4) Omu njira nci? Orhanye k’oku: Erhi Adamu agomera Mungu, aba munya-byaha anahikira aha afâ, nirhu rhwayimire omu caha cage cirhuma rhwafâ. (Rm. 5:12) Lyo Yehova arhucungula kurhenga omu caha n’olufû, arhôla omupango lyo Yezu ahâna engombôlo. Cikone, gurhi enterekêro ya muntu muguma mwimana yakacungwiremwo emiliyoni y’abantu? Entumwa Paolo ehugwîre ntya: “Omu kuyanga [kuvuna] amarhegeko kwa muntu muguma yene [Adamu] kwajiraga olubaga lwoshi okuba banyabyaha, kwo n’okwo omu kuyumva amarhegeko kw’omuntu muguma yene [Yezu] kwajiramwo bantu banji okuba bashinganyanya.” (Rm. 5:19, Mashi Bible; 1 Tm. 2:6) Kugerera ezo nderho, Paolo adesire oku bene bantu boshi baba banya-byaha bananafê bulya muntu muguma mwimana arharhumikiraga Mungu. Co cirhumire, ly’abantu boshi bacungulwa kurhenga omu caha n’olufû, byahûnyire muntu muguma mwimana arhumikire Nnâmahanga.
Muntu muguma arhumire rhwaba baja b’ecaha n’olufû. Ko n’oko, muntu muguma arhulikuzize mw’obo buja (Olole ecifungo ca 3)
4. Bulya gurhi Yehova arhalekaga kone abantu b’omurhima mwinja b’omw’iburha lya Adamu balame ensiku n’amango?
4 Ka kobinali Yezu al’igwasirwe afê ly’arhuciza? Ka Yehova arhakahizire kone okuleka abantu b’omurhima mwinja b’omw’iburha lya Adamu balame ensiku n’amango? Nkaba rhwanarhanya oku, okujira ntyo, yo yakabire njira nyinja y’okuyusa ago mazibu. Cikone oko kurhapatini n’obushinganyanya bwimana bwa Yehova. Bulya Yehova aba mushinganyanya, arhakacishozire ciru n’ehitya okulekerera eco cijiro ca Adamu c’obwalagale c’okurharhumikira.
5. Bulya gurhi rhwanayemera n’obwalagale oku ensiku zoshi Yehova ajira ebishinganine?
5 Gurhigi byakabire Yehova acilekage bwahâna engombôlo n’okurhakolesa obushinganyanya bwage omu kuleka abana ba Adamu barhali bimana balame ensiku n’amango? Nkaba abantu bakakazir’irhanya oku Mungu analeka okukolesa obushinganyanya bwage omu kandi kanga. Kwa lwiganyo, abantu bakabire n’akarhinda erhi kobinali Yehova ahikiriza ebiragane byage byoshi. Rhurhashinganini rhuyobohe oku byanaba ntyo. Okubona Yehova akolesize obushinganyanya, ciru akaba okujira ntyo kwamuhûnyire binji bwenene, ko kuderha, kuhâna Omugala muzigirwa nterekêro, oko kurhuyemezize n’obwalagale oku ensiku zoshi ajira ebishinganine.
6. Njira nguma ehi engombôlo eyerekanamwo obuzigire bwa Yehova? (1 Yowane 4:9, 10)
6 Ciru akaba engombôlo erhurhabire rhuhugûkwe oku Yehova aba wa bushinganyanya, kandi enarhurhabale ciru bwenene okuhugûkwa obuzigire bunji ajira kuli rhwe. (Yn. 3:16; osome 1 Yowane 4:9, 10.) Enyigirizo z’engombôlo zirhayerekini kone oku Yehova aba alonzize rhube n’obuzine bw’ensiku n’amango, cikone kandi ziyerekine oku aba alonzize rhube cigabi c’omulala gwage. Orhanye k’oku: Erhi Adamu ajira ecaha, Yehova amukaga omu mulala gwage gujijirwe n’abakozi bage. Enyanya z’oko, rhweshi rhwabusirwe embuga z’omulala gwa Mungu. Cikone kugerera engombôlo, Yehova anababalire ebyaha birhu na buzinda ayish’ihira bene bantu boshi bayerekana obuyemere banarhumikira omu mulala gwage. Ciru n’ene, rhwanaba n’obwîra bwinja haguma na Yehova na haguma n’abirhu bemezi. Kobinali, Yehova aba arhuzigire bwenene!—Rm. 5:10, 11.
7. Gurhi amalibuko Yezu alemberaga garhurhabiremwo okuhugûkwa kunganaci Yehova aba arhuzigire?
7 Rhwanahugûkwa bwinja kunganaci Yehova aba arhuzigire, erhi rhwakarhanya kw’ebi okuhâna engombôlo kwamuhûnyire. Shetani anaderhe oku nta mukozi wa Yehova wakabêra mwishwekerezi kuli ye erhi akaba kuli kuzibu okujira ntyo. Lyo Yehova ayerekana oku Shetani aba munywesi, alesire Yezu alibuke embere afê. (Ayu. 2:1-5; 1 Pt. 2:21) Yehova abwine erhi abantu b’amadîni bakag’ihagalika Yezu bali bamushekera, erhi abasoda bamushurha emikoba, n’erhi akomerherwa oku murhi. Enyuma z’aho, Yehova abona oku Omugala muzigirwa alibukaga bwenene kuhika afâ. (Mt. 27:28-31, 39) Yehova al’igwerhe obuhashe bw’okuyimanza ebyo omu kasanzi koshi akanalonzize. Kwa lwiganyo, erhi abashombanyi bage baderha ntya: “Lero Nyamuzinda amulikuzagye akaba amuzigira!,” Yehova akajijire ntyo. (Mt. 27:42, 43) Cikone, Yehova acijirage ntyo, engombôlo erhakalyuzirwe rhwakanabêzire buzira bulangalire. Co cirhumire, Yehova alesire Omugala alembere amalibûko kuhika arhengamwo omûka.
8. Ka Yehova aciyumvirhe kubi omu kubona Omugala ali alibuka? Ohugûle. (Olole n’enfoto.)
8 Rhurhashinganini rhurhanye oku bulya Mungu aba ogala byoshi, arhakaciyumva bwinja erhi kubi! Alemire bene bantu n’obuhashe bw’okuciyumva bwinja erhi kubi, na bulya Ebibliya edesire oku arhulemire oku nshusho yage, oko kuyerekine oku naye anaciyumve bwinja erhi kubi. Ebibliya edesire oku Abaisraheli ‘bamugayisize’ ‘banamujira burhe.’ (Enna. 78:40, 41) Kandi, orhanye oku mwanzi guganirire Abrahamu na Izaki. Okengere oku Abrahamu ahûnyirwe ahâne nterekêro omugala muguma yene al’igwerhe. (Murh. 22:9-12; Hb. 11:17-19) Orhanye kunganaci Abrahamu agwasirwe abe aciyumvirhe kubi bwenene erhi aba ali acirheganya okuyirha Izaki omu kumushosha akere. Yehova agwasirwe abe aciyumvirhe ciru kubi bwenene kulusha Abrahamu, erhi aba ali abona oku Omugala ali alibuzibwa n’abantu barhal’iyobohire Mungu kuhika bamuyirha!—Olole oku jw.org evideo edesire Oyige Obuyemere Bwabo—Abrahamu, Cigabi ca 2.
Yehova aciyumvirhe kubi bwenene erhi abona Omugala ali alibuzibwa (Olole ecifungo ca 8)
9. Bici olwandiko lw’Abaroma 8:32, 38, 39 lukurhabire okuhugûkwa lugenda obuzigire bunji bwenene Yehova akujirako we n’abinyu bemezi?
9 Engombôlo erhuyigirizize oku nta muntu oba orhuzigire bwenene nk’oku Yehova arhuzigira, ciru n’omuntu w’omu mulala gwirhu oba orhuzigire bwenene erhi omwîra wirhu mwinja bwenene arhankarhuzigira akage. (Osome Abaroma 8:32, 38, 39.) Buzira karhinda, Yehova aba arhuzigire bwenene kulusha oku rhucizigira rhwenene. K’olonzize olame ensiku n’amango? Arhali we lonzize ntyo bwenene kulusha Yehova. K’oba olonzize ebyaha byawe bibabalirwe? Yehova ye lonzize okubibabalira kulusha oku oba olonzize. Ebi arhuhûnyire byone, kuli kuyemera engalo yage nyinja omu kuyerekana obuyemere n’okumurhumikira. Kobinali, engombôlo eba eyerekine kunganaci Mungu aba arhuzigire bwenene. N’omw’igulu lihyahya, rhwayish’iyiga ciru binji bwenene lugenda obuzigire bwa Yehova.—Muh. 3:11.
EBI ENGOMBÔLO ERHUYIGIRIZIZE LUGENDA YEZU
10. (a) Bici byababazize Yezu ciru bwenene lugenda oku akanizirwemwo? (b) Njira zihi Yezu acêsizemwo izino ly’Ishe? (Olole n’ecisanduku cidesire “Obwishwekerezi bwa Yezu Bwacêsize Izino lya Yehova.”)
10 Yezu anashibirire bwenene irenge ly’Ishe. (Yn. 14:31) Yezu, aciyumvirhe kubi bwenene omu kurhanya oku okushobekwa oku ajacire Mungu n’okunigwa nka nyakola-maligo, byakazinzize izino ly’Ishe. Co carhumire asalira ntya: “Larha akaba kwankahashikana, aka kabehe kangere kuli!” (Mt. 26:39) Omu kubêra mwishwekerezi kuli Yehova kuhika okufâ, Yezu acêsize izino ly’Ishe.
11. Gurhi Yezu ayerekinemwo obuzigire bunji oku bantu? (Yowane 13:1)
11 Kandi engombôlo erhuyigirizize oku Yezu anashibirire bwenene abantu, ci bwenene abanafunzi bage. (Mig. 8:31; osome Yowane 13:1.) Kwa lwiganyo, Yezu al’imanyire oku bigabi bilebe by’omukolo gwage hanw’igulu byakabire bizibu bwenene, ci bwenene okufâ olufû lw’amalumwa manji. Cikone, ahikirizize ebyo bintu bizibu byoshi arhali mpu bulya kone Yehova al’imuhîre omukolo gw’okujira ntyo, cikone na bulya al’izigire abantu bwenene. Yezu ayerekine obuzigire bunji oku bantu omu kubahubiri, omu kubayigiriza, n’omu kubarhabala. Ciru n’omu budufu bw’embere z’okufâ kwage, Yezu aciha akasanzi k’okushuka entumwa zage amagulu, abayigiriza anababwira nderho nyinji z’okubarhuliriza n’okubaha omurhima. (Yn. 13:12-15) Buzinda erhi ali oku murhi gw’amalibuko, aciha kasanzi kasungunu ly’aha nyakola-maligo wali hofi afê obulangalire, anarhôla emipango lyo nnina Mariya ashibirirwa. (Lk. 23:42, 43; Yn. 19:26, 27) Muli ntyo, obuzigire bunji bwa Yezu bwayerekinwe arhali kugerera olufû lwage lone, cikone kandi na kugerera akalamo kage koshi hanw’igulu.
12. Bici Yezu agendekire arhujirira?
12 Ciru akaba Kristu afîre “liguma ho na hoshi aho,” acigendekire arhujirira bintu binji. (Rm. 6:10, Mashi Bible) Bintu bihi ali arhujirira? Agendekire akolesa akasanzi n’obushiru ly’engombôlo erhulerhera obunguke. Orhanye oku bintu binji ali ajira. Ali akola nka Mwami wirhu, nka Kuhani wirhu Mukulu, na cirhwe c’ecigamba. (1 Kr. 15:25; Ef. 5:23; Hb. 2:17) Ayimangire omukolo gw’okushubuza abashîge amavurha n’obuso bunene, mukolo gwayish’ihwa embere amalibuko madarhi gahwe.b (Mt. 25:32; Mk. 13:27) Kandi ali ajira okwage koshi ly’abakozi bage bishwekerezi balisibwa bwinja kiroho muli zino nsiku nzinda. (Mt. 24:45) Omu Burhegesi bwage boshi bw’Emyaka Cihumbi, agendekera akola oku bunguke bwirhu. Kobinali Yehova ahânyire Omugala oku bunguke bwirhu!
ORHALEKAGA CIRU N’EHITYA OKUYIGA
13. Gurhi okurhanya bwenene kwakakurhabalamwo ogendekere wayiga lugenda obuzigire Mungu na Kristu bajira kuli rhwe?
13 Wanagendekera wayiga lugenda obuzigire Yehova Mungu na Yezu bajira kuli rhwe erhi wakagendekera waburhanyako bwenene. Nkaba omu migobe y’embere n’ey’enyuma z’olusiku lw’Okukengera olufû lwa Yezu muli guno mwaka, wanasoma bwinjinja citabu ciguma c’e Enjili erhi binji. Orhalonzagya okusoma myanzi minji bwenene oku liguma. Ahali h’okujira ntyo, okasoma bunyi-bunyi n’okulonza ebindi birhumire birhushumize rhuzigire Yehova na Yezu. Kandi, okaganirira abandi ebi oli wayiga.
14. Kushimbana n’Ennanga 119:97, gurhi okujira obusagasi kwakarhurhabala rhugendekere rhwayiga lugenda engombôlo n’ezindi nyigirizo? (Olole n’enfoto.)
14 Erhi akaba okola ogwerhe myaka minji omu okuli, nkaba wanacidosa erhi byanahashikana ovumbule ebintu bihyahya lugenda emyanzi emanyikine bwenene, nk’obushinganyanya bwa Mungu, obuzigire bwage, n’engombôlo. Okuderha okuli, ebi rhwakayiga lugenda eyo myanzi n’eyindi birhagwerhi buzinda. Bicigi wakajira? Okasoma n’okuyiga emyanzi minja bwenene eba omu bicapo birhu. Erhi wakabona olwandiko orhahugûsirwi bwinja, ojire obusagasi. Enyuma z’aho, omu lusiku loshi, orhanye bwenene kw’ebi wavumbwire na kw’ebi bikuyigirizize lugenda Yehova, Omugala, n’obuzigire bwabo kuli we.—Osome Ennanga 119:97.
Ciru akaba rhukola rhugwerhe myaka minji omu okuli, rhwanagendekera rhwayiga ebintu bihyahya byakarhuma rhwavuga omunkwa bwenene oku ngombôlo (Olole ecigungo ca 14)
15. Bulya gurhi rhushinganine rhugendekere rhwalongereza ebintu bihyahya kurhenga omu Bibliya?
15 Orhavunikaga omurhima erhi akaba orhapasiri kantu kalebe kahyahya erhi ka kushagalusa amango oli wasoma erhi amango oli wajira obusagasi. Omu njira ndebe, oli nk’omuntu oli walonza enoro. Omu njira y’obulembedu, abalonza enoro banageze nsa nyinji erhi nsiku nyinji embere babone ciru ehivumbi hisungunu hy’enoro. Ciru akaba ntyo, barharhama bulya ngasi hivumbi hisungunu hy’enoro hiba hya ngulo ndarhi bwenene kuli bo. Nirhu, ngasi kantu kahyahya rhuyiga kurhenga omu Bibliya, kaba ka ngulo ndarhi bwenene ciru kulusha enoro! (Enna. 119:127; Mig. 8:10) Co cirhumire obe wa kulembera, okanakenga eprograme yawe y’okusoma Ebibliya.—Enna. 1:2.
16. Gurhi rhwakayigamwo olwiganyo lwa Yehova na Yezu?
16 Amango oli wayiga, okalonza enjira wakakolesamwo ebi wayizire. Kwa lwiganyo, oyige obushinganya bwa Yehova omu kujirira abandi buzira kabôlo. Oyige obuzigire bwa Yezu kuli Ishe n’oku bandi omu kuyemera okulibuka erhi izino lya Yehova lirhuma n’omu kucihâna bwenene enyanya z’abinyu Bakristu. Kandi oyige olwiganyo lwa Yezu omu kuhubiri abandi, lyo nabo baba n’obulyo bw’okuyemera engalo ya Yehova y’engulo ndarhi.
17. Bici rhwaganirira omu cigabi cikulikire?
17 Oku rhwagendekera rhwahugûkwa n’okushagalukira bwenene engombôlo, ko rhwanagendekera rhwazigira bwenene Yehova n’Omugala. Rhukajira ntyo, nabo barhuzigira bwenene. (Yn. 14:21; Yk. 4:8) Lekagi rhukakolesa ngasi kantu Yehova arhuha lyo rhugendekera rhwayiga lugenda engombôlo. Omu cigabi cikulikire, rhwayiga njira ndebe rhwakayungukamwo kugerera engombôlo n’oku rhwakayerekanamwo oku rhuvuzire Yehova omunkwa oku buzigire bwage.
LWIMBO 107 Rhube n’Obuzigire Aka Mungu
a AMAHUGÛLO GA LUDERHO LUGUMA: “Okurhanya bwenene” kuhugwîre okusegeza entanya zawe oku mwanzi mulebe, n’okuyiga binji bwenene lugenda ogo mwanzi ly’oguhugûkwa bwinja.
b Okushubuzibwa kw’ebintu “emalunga [erhi, empingu]” Paolo adesire, kuganirirwe omu Abefezi 1:10, kuli lubero n’okushubuzibwa kw’“abarhôle [erhi, bishogwa]” Yezu aganirire omu Mateyo 24:31 n’omu Marko 13:27. Paolo akag’iganirira akasanzi Yehova acishoga abagala b’ekiroho omu kubashîga amavurha kugerera iroho lyage litagatifu. Yezu akag’iganirira amango Abakristu bashîge amavurha baciri hanw’igulu bashubuzibwa haguma empingu omu mango g’amalibuko madarhi.