Engombôlo: Luhembo Lwinja Lwa Nnamahanga

1, 2. (a) Luhembo luhi obona lwa bulagirire bwenene? (b) Bulya gurhi engombôlo luba luhembo lwa bulagirire bwenene Nnamahanga arhuhîre?

LUHEMBO lwinja luhi bakola bakuhire omu kalamo kawe? Oluhembo lurhaba luhunyire mpu lube lwa ngulo nene. Erhi oluhembo lwa kakushagalula, erhi luhikirize amalagirire gawe, onalushagalukire bwenene.

² Nnamahanga arhuhîre oluhembo. Cikoki hali oluhembo rhuba rhulagirirekwo bwenene. Luba luhembo lwinja bwenene Nnamahanga ahîre bene bantu. Mw’eci cigabi, rhwayiga oku Yehova arhumîre Yezu hanw’igulu lyo rhuyish’ihasha okulama emyaka n’emyaka. (Osome Mateyo 20:28) Erhi Yehova ahâna Yezu oku abe ngombôlo, ayerekâna oku aba arhuzigîre bwenene.

ENGOMBÔLO BYO BICI?

3. Bulya gurhi rhufâ?

³ Engombôlo eba njira Yehova akolesâgya ly’arhukula omu caha n’omu lufû. (Abefezi 1:7) Lyo rhumanya bwinja bulya gurhi engombôlo eri ya bulagirire bwenene, rhukwanine rhumanye ebya jirikanâga mira omw’ishwa ly’Edeni. Ababusi birhu barhanzi, Adamu na Eva bajîra ecaha. Bulya bajijîre ecaha, bafîre. Nirhu rhunafê bulya rhwayîmire eco caha.​—Olole amahugûlo nomero 9 gali oku bukurasa bwa 210.

4. Adamu ye wâli ndi? Na bici Yehova âl’imuhire?

⁴ Erhi Yehova alêma omulume murhanzi, Adamu, alimuhîre akantu kinja bwenene: obuzîne bwimana. Adamu âl’igwerhe obukengere bwinja n’omubiri mwimana. Arhakalwazîre, erhi kushosihala ciru arhakanafîre. Bulya Yehova ye walemaga Adamu, âli nk’ishe. (Luka 3:38) Akâg’imuganiza ngasi mango n’oku muhugulira ngasi kantu akajijîre. Alimuhîre n’omukolo mwinja.​—Omurhondêro 1:28-30; 2:16, 17.

5. Ebibliya edesire oku Adamu alemîrwe oku “nshusho ya Nnamahanga.’’ oko kw’okuderha gurhi?

⁵ Adamu alemîrwe oku “nshusho ya Nnamahanga.” (Omurhondêro 1:27) Alemîrwe n’amorhere gali nka aga Nnamahanga: kwa lwiganyo obuzigire, obwenge, obushinganyanya n’obuhashe. Nnamahanga kandi âl’imuhire oluhuma lw’okucishoga. Adamu arhalemâgwa nka mashini. Agwêrhe oluhuma lw’okucishoga aminja erhi amabi. Acicishogâga okukenga Nnamahanga, akalamîre ensiku n’amango omu Paradizo.

6. (a) Erhi Adamu alêka okurhumikira Nnamahanga, bici ahezîze? (b) Bulya Adamu alesîre okurhumikira Nnamahanga, bici arhulerhîre nka bana bage?

⁶ Erhi Adamu agomêra Nnamahanga ahâbwa obuhane bw’okufâ. Ahêza bintu binji bwenene: Obwira bwago-bwago agwêrhe haguma na Nnamahanga, obuzîne bwage bwimana n’eparadizo âl’ilamiremwo. (Omurhondêro 3:17-19) Bulya Adamu na Eva bacishozîre okurharhumikira Nnamahanga, barhacigwêrhe bulangalire. Kugerera oku magosa ga Adamu, “ecaha cadwîrhwe en’igulu naco ecaha caburha olufû, n’olufû [. . .] lwayahukira abantu boshi, bulya boshi bakozîre ecaha.” (Abaroma 5:12) Erhi Adamu ajîra ecaha, “acigûza” nka mujà w’ecaha n’olufû. N’irhu “arhugûza” rhwaba bajà akage. (Abaroma 7:14) Ka haciri obulangalire boshi boshi kuli rhwê? Neci. Yehova ahâna engombôlo!

7, 8. Engombôlo byo bici?

⁷ Engombôlo byo bici? Engombôlo lir’ibeyi wakalyula lyo bashwekula lebè erhi kugombola kantu kalebe. Omu Bibliya, engombôlo lir’ibeyi lyankalyulira ebyasherezibâgwa.

⁸ Adamu asherezîze bintu binji erhi ajîra ecaha n’erhi arhuyahukiza olufû. Rhweshi rhurhali bimana, co cirhumire ntaye yeshi yeshi wakagalwîre ebi Adamu asherezâgya. Cikoki Yehova arhegânya enjira y’okurhugombôla kurhenga omu caha n’omu lufû. Rhubonage gurhi ahanâga engombôlo n’emigisho eyo ngombôlo yakarhulerhera.

GURHI YEHOVA AHÂNAGA ENGOMBÔLO?

9. Owakalyulîre eyo ngombôlo, al’ishinganine abe n’obuzîne buyosire gurhi?

⁹ Ntaye muli rhwê wakalyulîre engombôlo. Bulya gurhi? Bulya rhweshi rhurhali bimana. (Ennanga 49:7, 8, NWT) Adamu ahezîze obuzîne bwimana âl’igwerhe. Owakalyulîre eyo ngombôlo âl’ishinganine naye abe muntu ogwerhe obuzîne bwimana. Co cirhuma ehamagalwa “ngombôlo eshinganine.” (1 Timoteyo 2:6) Engombôlo yâl’ishinganine eyumanane n’obuzîne bwimana Adamu ahezâgya.

10. Gurhi Yehova ahanâgamwo engombôlo?

¹⁰ Gurhi Yehova ahanyîremwo engombôlo? Arhûma ah’igulu Omugala âl’izigîre bwenene oyu alemaga embere z’ebindi byoshi. (1 Yowane 4:9, 10) Yezu ayemêra okurhenga hw’Ishe, arhenga emunda âl’ilamire, empingu. (Abafilipi 2:7) Yehova ahâmisa obuzîne bwa Yezu kurhenga empingu, abuhamikîza ah’igulu. Yezu abusîrwe, âli muntu mwimana, arhagwêrhe caha.​—Luka 1:35.

11. Gurhi muntu muguma abîremwo ngombôlo y’abantu boshi?

¹¹ Bulya omulume murhanzi, Adamu, arharhumikirâga Nnamahanga, abantu boshi bahêza obulyo bw’okuba n’obuzîne bwimana. Cikoki kabyakahashikîne muntu muguma akul’iburha lyoshi lya Adamu omu lufû? Neci. (Osome Abaroma 5:19) Yezu arhasag’ijira caha, ahâna obuzîne bwage bw’imana bube ngombôlo. (1 Abakorinti 15:45) Obuzîne bwage bwimana bwarhabîre okucungula iburha lya Adamu lyoshi omu lufû.​—1 Abakorinti 15:21, 22.

12. Bulya gurhi byâl’ihunyire Yezu arhindibuke ntyo?

¹² Ebibliya ehugwîre oku Yezu arhindibusîre bwenene embere afê. Ahumbagulizîbwa buzira bonjo, akomêrhwa mw’emisumari oku murhi na kandi ayumva amalumwa manji embere afê. (Yowane 19:1, 16-18, 30) (olole amahugûlo nomero 15 gali oku bukurasa bwa 213) Bulya gurhi byâl’ihunyire Yezu arhindibuke ntyo? Bulya Shetani âl’idesîre oku nk’omuntu ali omu mazibu arhakabera mwishwekerezi kuli Nnamahanga. Yezu ayerekîne oku byanahashikana omuntu mwimana abere mwishwekerezi kuli Nnamahanga ciru akaba ali omu mazibu manji. Yehova ashagalukîre Yezu bwenene!​—Emigani 27:11.

13. Gurhi engombôlo yalyulirwemwo?

¹³ Gurhi engombôlo yakalyulîrwemwo? Omu nsiku 14, z’omwezi gwa Nizani/mwezi muguma omu myezi y’abayahudi, mwaka gwa 33, Yehova alêka abashombanyi ba Yezu bamuyirhe. (Abahabraniya 10:10) Nsiku isharhu enyuma z’aho, erhi Yehova afûla Yezu, amujîra malahika. Enyuma z’aho, Yezu agalûka empingu âha Yehova akantu kw’obulagirire: Obuzîne bwage bwimana. Kw’okuderha, ahâna obuzîne bwage bwimana erhi rhwerhurhumire. (Abahabraniya 9:24) Bulya engombôlo yalyulîrwe, rhukola rhugwerhe obulyo bw’okurhenga omu bujà bw’ecaha n’olufû.​—Osome Abaroma 3:23, 24.

EMIGISHO ENGOMBÔLO YAKARHULERHERA

14, 15. Bici rhukwanine rhujire lyo ebyaha birhu bibabalirwa?

¹⁴ Rhwanayunguka n’oluhembo lwinja lwa Nnamahanga kurhondera ene, n’omu nsiku zayisha. Rhulole gurhi byakahashikana ntyo.

¹⁵ Ebyaha birhu byanababalirwa. Kurhaba kulembu okujira ebinja. Rhunakajira amagosa, hali amango rhuderha erhi rhujire ebibi. Bici rhwakajira lyo rhubabalirwa? Rhushinganine rhugaye ebi rhwajijire. Nakandi, rhukwanine, rhube birhohye, rhunashenge Yehova arhubabalire. Ntyo rhwanayemera oku ebyaha birhu bibabalirwe.​—Abakolosi 1:13, 14; 1 Yowane 1:8, 9.

16. Bici rhukwanine okujira lyo rhuba n’entimanya nyinja?

¹⁶ Rhugwerhe entimanya/zamiri zicire. Erhi entimanya zirhu zirhubwira oku rhwajijire kubi, rhunaciyumve babusha bwenene. Ciru hali akasanzi rhuciyumva kubi bwenene. Cikoki rhurhavunikaga omurhima. Yehova alonzize rhumubwire okubiyerekire obuzamba bwirhu, n’amazibu girhu. (Abahabraniya 4:14-16) Rhukwanine rhuyemere, oku erhi rhwakamusengera mpu arhubabalire, anarhuyumva n’okurhubabalira. (Abahabraniya 9:13, 14) Omu ntyo, rhwanayumvikana na Nnamahanga.

17. Migisho ehi Nnamahanga ayish’irhuha kugerera engombôlo?

¹⁷ Rhugwerhe obulangalire bw’okulama ensiku n’amango. ‘Bulya oluhembo lw’ecaha, luba lufû, ci engalo ya Nyamuzinda buba buzîne bw’ensiku n’amango muli Nnâhamwirhu Yezu Kristu.’ (Abaroma 6:23) Bulya Yezu arhufîrire, rhugwerhe obulangalire bw’okuyish’ilama emyaka n’emyaka n’okuyish’iba n’amagala mimana. (Amafulûlo 21:3, 4) Cikoki, bici rhwakajira lyo Nnamahanga ayish’irhuha kw’eyo migisho?

GURHI WAKAYEREKANAMWO OKU OSHAGALUKIRE ENGOMBÔLO

18. Gurhi rhumanyiremwo oku Yehova aba arhuzigîre?

¹⁸ Erhi bakarhuha oluhembo lwinja, rhunashagaluke. Engombôlo lw’oluhembo lwinja bwenene. Rhukwanine rhuyereke Yehova oku rhushagalukîre bwenene oluhembo lwage. Olwandiko lwa Yowane 3:16 ludesire ntya: ‘Neci, Nnamahanga azigîre igulu, kuhika ahâna Omugala cusha.’ Yehova aba arhuzigîre bwenene co carhumaga arhûha eby’obulagirire âl’igwerhe: Omugala. Yezu naye aba arhuzigîre, co carhumaga ayemêra arhufîra. (Yowane 15:13) Engombôlo ekwanine erhuyemeze oku Yehova na Yezu baba barhuzigîre bwenene.​—Abagalasiya 2:20.

19, 20. (a) Gurhi wakabamwo mwira wa Yehova? (b) Gurhi wakayerekana oku ogwerhe obuyemere omu ngombôlo?

¹⁹ Rhwayizîre oku Yehova ab’ayunjwire buzigire. Cikoki gurhi rhwakabamwo bira bage? Cikwone kurhaba kulembu okuba mwira w’omuntu orhamanyiri. Yowane 17:3 adesire oku rhukwanine rhurhangire rhwayiga okumanya Yehova. Erhi wakarhondera waciyigiriza kuli ye, wanagendekera wamuzigira, wanasima okugendekera wamushagalula, mwanaba bira. Rhuyumvirhage oku kuli kwa bulagirire ogendekere waciyigiriza Ebibliya.​—1 Yowane 5:3.

²⁰ Obe n’obuyemere omu ngombôlo. Ebibliya edesire oku “Oyemera Omugala agwerhe obuzîne bw’ensiku n’amango.” (Yowane 3:36) “Okuba n’obuyemere” kw’okuderha gurhi? Kuli kujira ebi Yezu arhubwizire rhujire. (Yowane 13:15) Okuderha omukanwa kwone mpu rhuzigire Yezu, kurhakayerekana oku kobinali rhumuzigîre. Ebijiro birhu byo byakayerekana oku rhugwerhe obuyemere muli Yezu. Yakobo 2:26 adesire ntya: ‘Obuyemere burhagwerhi bijiro buba cifû.’

21, 22. (a) Bulya gurhi rhushinganine okukâba ngasi mwaka aha Kukengera olufû lwa Yezu Kristu? (b) Bici bya ganirirwa omu cigabi ca 6 n’eca 7?

²¹ Obe aha Kukengera olufû lwa Yezu Kristu. Yezu alonzize rhukakengera oku ahânyire obuzîne bwage bwimana bube ngombôlo erhi rhwerhurhumire. Ebijingo embere afê, abwîra abaganda bage ntya: “Mukâjira ntyo kube kukankengera.” (Osome Luka 22:19) Ntyo kw’Abahamirizi ba Yehova bajira ngasi mwaka. Banakajira idinye lihamagalwa “Kukengera” erhi “Ishega lya Nyakasane.” (1 Abakorinti 11:20; Mateyo 26:26-28) Erhi wakakaba aha Kukengera olufû lwa Yezu ngasi mwaka, muli okwo erhi oli wayerekana oku oshagalukir’engombôlo n’obuzigire bunene Yehova na Yezu bakujirakwo.​—Olole amahugûlo nomero 16 gali oku bukurasa bwa 214.

²² Nta lundi luhembo lwinja lwakaba nk’engombôlo. (2 Abakorinti 9:14, 15) Eyo ngombôlo yayish’iyungula ciru n’emiliyoni y’abantu bafîre. Ecigabi ca 6 n’eca 7, byayish’iganirira gurhi oko kwayish’ihashikanamwo.