Omu Njira Nci Enterekêro ya Yezu Eri ‘Ngombôlo Kuli Bantu Banji’?
Ishuzo ly’Ebibliya
Enterekêro y’engombôlo ya Yezu eba njira Yehova akolesa ly’ayokola erhi kuciza bene bantu kurhenga omu caha n’omu lufû. Ebibliya eganirire omuko gwa Yezu gwabulagagwa nk’ibeyi ly’engombôlo. (Abefezi 1:7; 1 Petro 1:18, 19) Cocarhumaga Yezu aderha oku ayishaga ‘ly’ahâna obuzine bwage bube bwa kuchungula bantu banji.”—Mateyo 20:28, Mashi Bible.
Bulya gurhi okuhâna “Engombôlo kuli bantu banji” kwali kwa bulagirire?
Adamu, mulume murhanzi alemirwe mwimana, erhi buzira caha. Agwerhe obulangalire bw’okulama ensiku n’amango cikone abuheza erhi acishoga okurharhumikira Nnâmahanga. (Omurhondêro 3:17-19) Erhi aburha abana abayahukiza eco caha n’okurhaba bimana. ( Abaroma 5:12) Co cirhumire Ebibliya eyerikine oku Adamu ‘aciguzize’ ye n’abana bage omu buja bw’ecaha n’olufû. (Abaroma 7:14, Mashi Bible) Bulya barhacir’ibimana, ntaye wakahashir’igalula ebi Adamu ahezagya.—Ennanga 49:7, 8.
Nnâmahanga ayumviza iburha lya Adamu obonjo bulya lirhacigwerhe bulangalire. (Yowane 3:16) Cikone, bulya Nnâmahanga aba mushinganyanya omu marhegeko gage, arhalolaga ebyo byaha kone buzira kujira akantu koshi-koshi. (Ennanga 89:14; Abaroma 3:23-26) Nnâmahanga aba azigire bene bantu, cocarhumaga ahâna kantu kalebe kakalipire ebi ebyo byaha byabo byadwirhe, arhanali lyo bibabalirwa kone ci lyo birhenzibwa loshi. (Abaroma 5:6-8) Engombôlo k’ako kantu.
Gurhi engombôlo ekola?
Omu Bibliya, oluderho “ngombôlo” luhiziremo ebi bintu bisharhu:
Kuli kulyula.—Emibalè 3:46, 47.
Enacungula erhi kufungira.—Olubungo 21:30.
Eba epatine n’ibeyi ly’ebishinganine bilyulwe.a
Rhulole gurhi engombôlo ya Yezu ehikirizamwo ebi bintu bisharhu.
Okulyula. Ebibliya edesire oku Abakristu ‘kugulwa baguzirwe.’ (1 Abakorinti 6:20; 7:23) Muko gwa Yezu gwabagulaga, kugerera ogo muko, ‘acungwire [abantu] abaha Nyamuzinda b’omu ngasi mulala, omu ngasi lulimi luderhwa n’omu ngasi ishanja.’—Amafulûlo 5:8, 9.
Okushwekula. Enterekêro ya Yezu enahâne ‘obucunguzi’ kurhenga omu caha.—1 Abakorinti 1:30; Abakolosi 1:14; Abahabraniya 9:15.
Eba epatine n’ibeyi. Enterekêro Yezu ahânaga eba epatine n’ebi Adamu ahezagya. K’okuderha, obuzine bwimana. (1 Abakorinti 15:21, 22, 45, 46) Ebibliya edesire ntya: “Omu kuyanga amarhegeko kwa muntu muguma yene [Adamu] kwajira olubaga lwoshi okuba banyabyaha, kwo n’okwo omu kuyumva amarhegeko kw’omuntu muguma yene [Yezu Kristu] kwajira mwo bantu banji okuba bashinganyanya.” (Abaroma 5:19, Mashi Bible) Oko kuhugwîre gurhi olufû lwa muntu muguma yakaba ngombôlo oku byaha bya bantu banji. Yezu ahânaga enterekêro lyo “acungula abantu boshi” bajira okwabo koshi lyo ebalerhera obunguke.—1 Timoteyo 2:5, 6, Mashi Bible.
a Omu Bibliya, oluderho lwahindwîrwe “ngombôlo” luba luyerekire entanya z’ibeyi, erhi kantu k’akamaro kalyulagwa. Kwa lwiganyo, oluderho lw’Ecihabraniya ka·pharʹ luhugwîre ‘kubwikira.’ (Omurhondêro 6:14, NWT) Lunakakolesibwa omukuganirira okubwikira ecaha. (Ennanga 65:3) Izino koʹpher lirhenzire m’olo luderho, liyerekire ibeyi lyakalyulwa ly’omuntu abwikira eco caha. (Olubungo 21:30) Ko n’oko, oluderho lw’Ecigiriki lyʹtron, lulug’ihindûlwa “ngombôlo,” lwanacib’iderhwa “ibeyi ly’okucungula.” (Mateyo 20:28; The New Testament in Modern Speech, ya R. F. Weymouth) Abandisi Bagiriki bakag’ikolesa olo luderho omukuganirira ebyakag’ilyulwa lyo bashwekula omushwekwa bagwarhaga okw’ivita erhi omuja.