Oku Rhuyungukamwo n’Obuzigire bwa Yehova

1. Bici rhwakajira lyo rhushagalusa Yehova?

ORHANYE ohe muntu mulebe oba ozigire engalo yago-yago eri nyinja bwenene na ya kumurhabala. Wanavunika omurhima bwenene erhi oyo muntu akarhôla kone eyo ngalo, ayirhabike, analeke okuyirhanyako! Oku bundi, kobinali wanashagaluka bwenene erhi oyo muntu akakolesa bwinja eyo ngalo n’okukuvuga omunkwa kuli yo. Bici olo lwiganyo lurhuyigirizize? Yehova ahânyire Omugala oku bunguke bwirhu. Agwasirwe abe anashagaluke bwenene erhi rhuyerekana oku rhuvuzire omunkwa kw’eyo ngalo nyinja bwenene n’oku buzigire bwage bwamushumyagya ahâne engombôlo!​—Yn. 3:16; Rm. 5:7, 8.

2. Bici rhwaganirira mw’eci cigabi?

² Cikone oku akasanzi kali kagera, rhwanarhondera rhwabona nka rhwal’ishinganine okuhâbwa engalo y’engombôlo. Kwanaba nka kurhabika engalo ya Yehova omu depo. Rhwanaba rhushagalukire okuba nayo, cikone rhuyihire aha rhurhacikayibona. Ly’oko kurharhuhikiraga, rhugwasirwe rhukavuga Yehova na Yezu Kristu omunkwa ngasi mango kw’ebi barhujirire. Eci cigabi canarhurhabala okujira ntyo. Rhwaganirira oku rhuyungukamwo n’engombôlo ene n’oku rhwakayunguka nayo omu mango gayisha. Kandi rhwabona oku rhwakajira lyo rhuvuga Yehova omunkwa oku buzigire bwage, ci bwenene omu migobe y’embere n’ey’enyuma z’olusiku lw’Okukengera olufû lwa Yezu.

OKU RHUYUNGUKAMWO N’ENGOMBÔLO ENE

3. Njira nguma ehi rhuli rhwayungukamwo n’engombôlo ene?

³ Rhukola rhuli rhwayunguka n’enterekêro y’engombôlo ya Yezu. Kwa lwiganyo, kugerera engombôlo, Yehova anababalire ebyaha birhu. Arhaba asezibwe okurhubabalira. Cikone aba alonzize okujira ntyo. Omuzihi w’ennanga ayimbire ntya omu kumuvuga omunkwa: “Nyamuzinda oba mwinja Muhanyi, bulya oba mubidu w’okubabalira.”​—Enna. 86:5, Mashi Bible; 103:3, 10-13.

4. Bunguke bwa bandi bwarhumaga Yehova ahâna engombôlo? (Luka 5:32; 1 Timoteyo 1:15)

⁴ Bantu baguma na baguma banaciyumva oku barhashinganini okubabalirwa na Yehova. Kobinali, nta muguma muli rhwe oshinganine okubabalirwa. Entumwa Paolo yal’ihugûsirwe oku ‘erhal’ikwanine izîno ly’entumwa.’ Ciru akaba ntyo, Paolo ayushwire ntya: “Eri nshôkano [lukogo lurhashinganinwi, NWT] ya Nyamuzinda yanjiraga okûla ndi.” (1 Kr. 15:9, 10) Erhi rhuciyunjuza ebyaha birhu, Yehova anarhubabalire. Bulya gurhi? Arhali bulya rhushinganine okubabalirwa, cikone bulya aba arhuzigire. Erhi akaba onalibuzibwe n’entanya z’okuciyumva oku orhashinganini obabalirwe, okengere oku Yehova ahânyire engombôlo, arhali oku bunguke bw’abantu barhajira caha, cikone oku bunguke bw’abanya-byaha baciyunjuzize.​—Osome Luka 5:32; 1 Timoteyo 1:15.

5. Ka hali omuntu muli rhwe oshinganine arhanye oku Yehova agwasirwe arhubabalire? Ohugûle.

⁵ Nta muntu muli rhwe oshinganine arhanye oku Yehova agwasirwe arhubabalire mpu bulya kone rhukola rhugwerhe myaka minji rhuli rhwamukolera. Kobinali, Yehova anashagalukire akasanzi koshi rhwamajira rhuli rhwamukolera n’obwishwekerezi. (Hb. 6:10) Arhuhîre Omugala nka ngalo ya kone, c’arhali nka malipo oku mikolo rhwamujirire. Co cirhumire kuli kubi okurhanya oku bulya rhwamakajira binji omu mukolo gwa Yehova, ashinganine arhubabalire. Erhi rhwakaba n’entanya za ntyo, rhwanaba rhuli rhwaderha oku Kristu afîrire busha.​—Oshushanye n’Abagalasiya 2:21.

6. Bici byakag’irhuma Paolo ajira binji bwenene omu mukolo gwa Yehova?

⁶ Paolo al’imanyire oku arhal’ishinganine olukogo lwa Mungu. Bulya gurhigi akag’ijira binji bwenene omu mukolo gwa Yehova? Arhakag’ijira ntyo mpu ly’ayerekana oku ashinganine okubabalirwa, cikone ly’ayerekana oku avuzire Yehova omunkwa oku lukogo lwage lurhashinganinwi. (Ef. 3:7) Aka Paolo, rhugendekire rhwakolera Yehova n’obushiru, arhali mpu lyo rhushinganana olukogo lwage, cikone lyo rhuyerekana oku rhumuvuzire omunkwa kuli lo.

7. Yindi njira ehi rhuli rhwayungukamwo n’engombôlo ene? (Abaroma 5:1; Yakobo 2:23)

⁷ Eyindi njira rhuli rhwayungukamwo n’engombôlo ene, kuli kuba ngasi muguma wirhu anaba n’obwîra bwa hofi-hofi haguma na Yehova.a Nk’oku rhwaganiriraga omu cigabi c’embere, erhi rhuburhwa nta bwîra rhwagwerhe haguma na Mungu. Cikone enyanya z’engombôlo, rhwanaba n’“omurhûla na Nyamuzinda” na muli ntyo rhwanamuyegera.​—Osome Abaroma 5:1; Yakobo 2:23.

8. Bulya gurhi rhushinganine rhuvuge Yehova omunkwa oku lukengwa lw’isala?

⁸ Orhanye kuli kantu kaguma kone lugenda obwîra bwirhu haguma na Yehova, kuli kuderha, olukengwa lw’isala. Yehova anayumve arhali amasala g’abantu bage gone amango barhimanine haguma, cikone kandi n’amasala ngasi muguma wirhu ajira amango ali yene. Isala linarhulirize omurhima gwirhu n’okurhuha omurhûla gw’obukengere, cikone isala lirhalusire bwenene okuba bufumu bwinja kone. Lyanazibuhya obwîra bwirhu haguma na Yehova. (Enna. 65:2; Yk. 4:8; 1 Yn. 5:14) Amango Yezu ali hano igulu, akag’isalira ngasi mango bulya al’imanyire oku Yehova akag’imuyumvirhiza, n’oku isala lyakagendekire lyazibuhya obwîra bwage haguma n’Ishe. (Lk. 5:16) Rhuvuzire omunkwa bwenene okubona oku kugerera enterekêro ya Yezu, rhwanaba bîra ba Yehova na ciru rhwanamuganiza kugerera isala!

OKU RHWAKAYUNGUKAMWO N’ENGOMBÔLO OMU MANGO GAYISHA

9. Gurhi engombôlo yalerheramwo abakozi bishwekerezi ba Mungu obunguke omu mango gayisha?

⁹ Gurhi abakozi bishwekerezi ba Yehova bayungukamwo n’engombôlo omu mango gayisha? Bayish’ihâbwa obuzine bw’ensiku n’amango. Bantu banji banarhanye oku oko kurhankahashikana bulya hamagera ebihumbi by’emyaka bene bantu bali bafâ. Cikone omuhigo gwa Yehova gwa kurhenga aha murhondero kuli bene bantu kuli kulama ensiku n’amango. Nka Adamu arhajiraga ecaha, nta muntu wankarhanyize oku obuzine bw’ensiku n’amango biri bilorho. Na ciru akaba ene biri byabonekana nka birhankahashikana okulama ensiku n’amango, rhwanayemera n’obwalagale oku rhwanalame ensiku n’amango bulya rhumanyire oku Yehova alipire ibeyi linene bwenene, ko kuderha, obuzine bw’Omugala muzigirwa ly’oko kuhashikana.​—Rm. 8:32.

10. Bici abashîge amavurha n’ebindi bibuzi bali balindirira?

¹⁰ Ciru akaba obuzine bw’ensiku n’amango kali kantu kaba omu mango gayisha, Yehova alonzize rhukaburhanyako mwa gano mango. Abashîge amavurha bali balindirira akalamo kinja bwenene k’empingu omu mango bayish’iba bali barhegeka igulu haguma na Kristu. (Maf. 20:6) Ebindi bibuzi biri byalindirira okulama omw’igulu paradizo lirhayish’ibemwo amalumwa n’amalibuko. (Maf. 21:3, 4) K’oli muguma w’omu bindi bibuzi bigwerhe obulangalire bw’okuyish’ilama ensiku n’amango hano igulu? Okuba n’obuzine empingu kurhalushiri olo luhembo! Ako ko kalamo bene bantu bal’irheganyizibwe kurhenga aha murhondero. Akalamo okw’igulu kayish’irhushagalusa bwenene.

11-12. Migisho ehi miguma na miguma yayish’iba omu Paradizo rhwakarhanyako ene? (Olole n’enfoto.)

¹¹ Orhanye oku akalamo kawe kayish’iyorha omu paradizo hano igulu. Orhakac’iyoboha endwala erhi olufû. (Iz. 25:8; 33:24) Yehova ayish’ihikiriza ngasi irala lishinganine ogwerhe. Bici olonzize oyish’iyiga? K’olonzize oyish’iyiga lugenda ensimba erhi orhunyunyi? K’olonzize oyish’iyiga lugenda okuziha combo cilebe c’omuziki erhi lugenda okucapa? Buzira karhinda, hayish’iba obulagirire bw’abantu b’okucapa e plans z’enyumpa, abubasi, abahinzi, n’abashwesi. Kobinali, kandi hayish’iba obulagirire bw’abantu b’okulunga okuboko n’okushibirira emikolo nka okurheganya ebiryo, okutula ebyombo, n’ab’okujira amajardé n’okugashibirira. (Iz. 35:1; 65:21) Bulya wayish’ilama ensiku n’amango, wayish’iba n’akasanzi k’okuvumbula ngasi bulenga wakarhanyako.

¹² Gwayish’iba mwishingo munji bwenene okuyegereza abantu bayish’ifûka! (Ebj. 24:15) Kandi, orhanye kunganaci wayish’ishagalukira okuyiga binji bwenene lugenda Yehova omu kulabiriza emikolo yage minji bwenene y’obulemi. (Enna. 104:24; Iz. 11:9) Na kulusha byoshi, rhwayish’ishagalukira bwenene okuharamya Yehova buzira kuba n’entanya z’okucitumuza ciru n’ehitya! Ka wanaguza eyo migisho y’amango gayisha erhi “amasîma g’ecaha ga nsiku nsungunu” garhuma? (Hb. 11:25) Nanga ciru n’ehitya! Eyo migisho eri minja bwenene kulusha ngasi kantu rhugwasirwe rhuciyime ene. Okengere oku igulu Paradizo, burhabêre ensiku zoshi bulangalire bw’amango gayisha. Kobinali lyayish’ihaba, rhwanayish’ililamako ngasi lusiku luja oku nkuba. Nta kaguma ka mw’ebyo bintu kakahashikine nka Yehova arharhuzigiraga bwenene kuhika ahâna Omugala ngombôlo!

OYEREKANE OKU OVUZIRE OMUNKWA OKU BUZIGIRE BWA YEHOVA

13. Gurhi rhwakayerekanamwo oku rhuvuzire Yehova omunkwa oku buzigire bwage? (2 Abakorinti 6:1)

¹³ Gurhi rhwakayerekanamwo oku rhuvuzire Yehova omunkwa okuba ahânyire engombôlo? Omu kuhira omukolo gwage oku nafasi ntanzi omu kalamo kirhu. (Mt. 6:33) Kobinali, Yezu afîre “lyo abalamire barhag’ilama kuli bone, cikwone balame kuli olya wafâga anafûka erhi bo barhumire.” (2 Kr. 5:15, Mashi Bible) Buzira karhinda, rhurhalonzizi rhuleke omuhigo gw’olukogo lurhashinganinwi lwa Yehova gugere busha.​—Osome 2 Abakorinti 6:1.

14. Gurhi rhwakalangaliramwo Yehova n’okukulikira obulongozi bwage?

¹⁴ Kandi rhwanayerekana oku rhuvuzire omunkwa oku buzigire bwa Yehova omu kumulangalira n’omu kukulikira obulongozi bwage. Omu njira nci? Amango rhukola rhwarhôla emihigo lugenda masomo manganaci rhwasoma, erhi kazi kahi rhushinganine rhuyemere, rhugwasirwe rhurhanye kw’ebi Yehova alonzize rhujire. (1 Kr. 10:31; 2 Kr. 5:7) Erhi rhurhôla emihigo eyimangire oku buyemere bwirhu, akantu kinja bwenene kanabe: obuyemere bwirhu muli Yehova n’obwîra bwirhu haguma naye bunasêre ciru bwenene. N’obulangalire bwirhu bw’okulama ensiku n’amango bunazibuhe.​—Rm. 5:3-5; Yk. 2:21, 22.

15. Gurhi rhwakayerekanamwo oku rhuvuzire Yehova omunkwa omu migobe y’embere n’ey’enyuma z’olusiku lw’Okukengera olufû lwa Yezu?

¹⁵ Haciri eyindi njira rhwakayerekanamwo oku rhuvuzire Yehova omunkwa oku buzigire bwage. Kuli kujira ebi rhwakanahasha byoshi omu migobe y’embere n’ey’enyuma z’olusiku lw’Okukengera olufû lwa Yezu guno mwaka, lyo rhuyeresa Yehova kunganaci rhuvuzire omunkwa oku ngombôlo. Ahanyuma n’okupanga okuja oku ntimanano y’Okukengera olufû lwa Yezu, rhwanalalika abandi lyo bayisha kw’eyo ntimanano. (1 Tm. 2:4) Ohugûlire abantu walalika ebyayish’ijirikana aha Kukengera olufû lwa Yezu. Wanabona oku kuli kwinja okuyereka abantu evideo edesire Bici Byarhumaga Yezu Afâ? n’edesire Rhukakengera Olufû lwa Yezu ziri oku jw.org. Abagula bashinganine barhôle emipango y’okulalika abalesire emikolo y’ecigamba. Orhanye oku mwishingo guba empingu na hano igulu erhi bibuzi bilebe omu bibuzi bya Yehova byahezire bishumibwa okugaluka omu buso bwage! (Lk. 15:4-7) Aha Kukengera olufû lwa Yezu, rhucihangane okulamusanya arhali rhwene na nnene, ci bwenene okulamusa abahyahya n’abagwerhe nsiku nyinji barhayisha oku ntimanano. Rhulonzize baciyumve bayegerezibwe!​—Rm. 12:13.

16. Bulya gurhi rhushinganine rhucihirireho emipango y’okujira binji omu mukolo gw’amahubiri omu migobe y’embere n’ey’enyuma z’olusiku lw’Okukengera olufû lwa Yezu?

¹⁶ Ka wanajira binji bwenene omu mikolo y’ekiroho omu migobe y’embere n’ey’enyuma z’olusiku lw’Okukengera olufû lwa Yezu? Okujira ntyo eri njira nyinja y’okuyereka Yehova na Yezu oku rhubavuzire omunkwa kw’ebi barhujirire byoshi. Oku rhwacihâna bwenene omu mukolo gwa Yehova, ko rhwanacibonera bwenene oburhabale bwage, n’enyanya z’oko, obulangalire bwirhu muli ye bwazibuha bwenene. (1 Kr. 3:9) Kandi ocihirireho eprograme y’okusoma obusomi bw’Ebibliya buyerekire Okukengera olufû lwa Yezu onayihikirize, nk’oku bupanzirwe omu broshire Rhusome Amandiko Ngasi Lusiku erhi nk’oku bupanzirwe omu ibugu ly’entimanano y’omu kagarhi k’omugobe. Nkaba ciru wanacishoga okukolesa omu programe y’ifunzo lyawe amandiko gapanzirwe aho.

17. Bici bishagalusa Yehova bwenene? (Olole n’ecisanduku cidesire “Enjira Rhwakayerekanamwo oku Rhuvuzire Omunkwa oku Buzigire bwa Yehova.”)

¹⁷ Okuderha okuli, nkaba akanga kawe karhakuyemerere okujira ngasi kantu rhwaganirire mw’eci cigabi. Cikone okengere oku Yehova arhalola binganaci wahânyire omu kubigerera kw’ebi abandi bahânyire; anabone ebiri omu murhima gwawe. Anashagaluke bwenene erhi abona oli wamuvuga omunkwa kurhenga oku murhima enyanya z’engalo yage nyinja bwenene y’engombôlo.​—1 Sam. 16:7; Mk. 12:41-44.

18. Bulya gurhi rhuvuzire Yehova Nnâmahanga na Yezu Kristu omunkwa?

¹⁸ Engombôlo yone erhuhashisa okubabalirwa ebyaha birhu, okuba n’obwîra bwinja haguma na Yehova, n’okuba n’obulangalire bw’obuzine bw’ensiku n’amango. Lekagi rhukayeresa Yehova ensiku zoshi oku rhumuvuzire omunkwa oku buzigire bwage, bwamushumyagya ajire bihashikane kuli rhwe okuba n’eyo migisho. (1 Yn. 4:19) Kandi lekagi rhukayereka Yezu oku rhumuvuzire omunkwa, bulya arhuzigire bwenene kuhika ahâna obuzine bwage oku bunguke bwirhu!​—Yn. 15:13.