ISOMO LYA 44
Ka Nnâmahanga Anashagalukire Ensiku Nkulu Zoshi?
Yehova aba alonzize rhushagalukire akalamo, anasima rhucishagalule kasanzi kalebe. Cikone ka Nnâmahanga anashagalukire ensiku nkulu zoshi? Gurhi rhwakajira lyo rhuyerekana oku rhuzigire Yehova okubiyerekire eby’ensiku nkulu?
1. Bulya gurhi nsiku nkulu nyinji zirhashagalusa Yehova?
Wanasomerwa okuyumva oku nsiku nkulu nyinji zijirwa zirhaba zipatine n’Amandiko erhi zarhondezibagwa n’abapagani. Ezo nsiku nkulu zarhengaga omw’idîni ly’obunywesi. Zanaba zigwerhe olushangi n’eby’obukurungu erhi zanaba ziyimangire oku nyigirizo ziderha mpu obugumaguma burhafâ. Nsiku nkulu nguma na nguma zijira olushangi n’obuyemere burhagwerhi nda na mugongo erhi kuyemera oku bintu bilebe binajirikane kw’iragi kone. (Izaya 65:11) Yehova ahanwire abakozi bage ntya: ‘Muciyegûle . . . mumanye mwankahuma oku kantu karhacîri.’—2 Abakorinti 6:17.a
2. Gurhi Yehova aciyumva okubiyerekire ensiku nkulu ziha bene bantu obukuze?
Yehova arhubwizire oku rhumanye rhwakaja omu murhego gw’‘okucikubagira omuntu.’ (Osome Yeremiya 17:5.) Hali nsiku nkulu nguma nguma zijirwa lyo baha abarhegesi erhi basoda irenge. Ezindi zinajirwe lyo bakuza ecimanyiso c’ecihugo erhi lyo bakengera amango ishanja lilebe lyahâbagwa oluhûma. (1 Yowane 5:21) N’ezindi zinajirwe lyo baha irenge ikubuliro ly’ecipolitike erhi lindi ikubuliro ly’abantu. Gurhi Yehova akaciyumva erhi rhwakaha omuntu obukuze erhi ikubuliro lilebe liri lyahalira entanya zirhapatini n’obulonza bwage?
3. Bijiro bici bijirwa oku nsiku nkulu byakarhuma Nnâmahanga arhazishagalukira?
Ebibliya ehanzize ‘endalwe n’okulya obudambye [amadinye garhalusize olugero, NWT], n’okunywa buzira lugero.’ (1 Petro 4:3) Oku nsiku nkulu nguma na nguma abantu barhacihasha na kandi banakajira ebintu bigalugalu. Lyo rhugendekera rhwaba bîra ba Yehova, rhushinganine rhuleke ebyo bijiro bibi.
HUMBIRIRA LY’OHUGÛKWA
Olole gurhi wakashagalusa Yehova omu kurhôla emihigo minja lugenda ensiku nkulu n’amadinye.
4. Oyake okujira ensiku nkulu zirhakuza Yehova
Osome Abefezi 5:10, na buzinda oganirire er’idoso:
Bici rhushinganine rhurhang’imanya bwinja lyo rhuhiga erhi rhwajira lusiku lukulu lulebe erhi rhurhalujire?
Emunda oba olamire, nsiku nkulu zihi abantu bayo balugijira?
K’orhanyize oku Yehova anashagalukire ezo nsiku nkulu?
Kwa lwiganyo, k’okola ocidosize gurhi Nnâmahanga aciyumva okubiyerekire ensiku nkulu z’okuburhwa? Ntaho Ebibliya eyerekine oku mukozi mulebe wa Nnâmahanga ajijire olusiku lukulu lw’okuburhwa, cikone eganirire nsiku nkulu ibirhi z’okuburhwa zajiragwa n’abantu barhakagiharamya Yehova. Osome Omurhondêro 40:20-22 na Mateyo 14:6-10. Buzinda oganirire aga madoso:
Bici bishushine byajijirwe mw’ezo nsiku nkulu ibirhi?
Nk’oku eyo myanzi y’Ebibliya eyerekine, gurhi orhanyize Yehova aciyumva lugenda ensiku nkulu z’okuburhwa?
Cikone wanacidosa ntya: ‘Ka kobinali Yehova anashagaluka erhi kugaya erhi nakacilunga n’abandi omu kujira olusiku lukulu lw’okuburhwa erhi lundi lusiku lukulu lulebe lurhapatini n’Ebibliya?’ Osome Olubungo 32:1-8. Buzinda, olole EVIDEO onaganirire aga madoso gakulikire.
Bulya gurhi rhushinganine okumanya ebi Yehova ayemire?
Gurhi rhwakajiramwo ntyo?
Amadoso rhwakacidosa lyo rhumanya erhi lusiku lukulu lulebe lunashagaluse Yehova erhi lurhamushagalusa
Ka luyimangire oku nyigirizo z’obunywesi? Ly’obona ishuzo, olongereze gurhi olo lusiku lukulu lwarhondezibagwa.
Ka lunakuze bene bantu, ikubuliro lilebe erhi cimanyiso cilebe c’ishanja? Yehova yene rhushinganine rhukuze, rhunalangalire oku yene wanayuse amazibu goshi gali mw’er’igulu.
K’enkomêdu n’ebijiro bijirwa kw’olo lusiku biba bipinzire amakanuni g’Ebibliya? Rhushinganine rhugendekere rhwaba n’olugenzi lwinja erhi lucîre.
5. Orhabale abandi bakenge obuyemere bwawe
Kwanaba kuzibu okulahira enshumi z’abandi amango bali bakushumika oku ojire olusiku lukulu Yehova arhashagalukira. Obahugûlire bulya gurhi orhajira lusiku lukulu lulebe, wanajira ntyo n’obutûdu n’obukenge. Ly’obona gurhi wakajira ntyo, olole EVIDEO.
Osome Mateyo 7:12, na buzinda oganirire aga madoso:
Nk’oku olo lwandiko luyerekine, k’oshinganine ohanze abantu b’omu mulala gwawe barhali Bahamirizi oku barhajiraga lusiku lukulu lulebe?
Bici wakajira ly’oyereka abantu b’omu mulala gwagwe oku obazigire onabashagalukire ciru ankaba orhajijiri haguma nabo idinye lya lusiku lukulu lulebe?
6. Yehova aba asimire rhube n’omwishingo omu kalamo kirhu
Yehova aba alonzize rhukaba n’akasanzi k’okucishagalusa haguma n’abantu b’omu mulala n’abîra birhu. Osome Omuhanûzi 8:15, na buzinda oganirire er’idoso:
Gurhi olo lwandiko luyerekinemwo oku Yehova aba alonzize rhube n’obushagaluke?
Yehova aba alonzize abakozi bage bakageza akasanzi kw’okucishagalusa haguma n’abandi. Olole EVIDEO ly’obona gurhi abakozi ba Yehova bajira omu mango g’entimanano nkulu y’omw’igulu lyoshi.
Osome Abagalasiya 6:10, na buzinda oganirire aga madoso:
Ka kuli kwa bulagirire okujira idinye ly’ensiku nkulu bantu banji baba bazigire lyo rhukajirira abandi “aminja”?
Bici byakarhuma rhwaba n’obushagaluke bwenene, ka kukaha abandi bintu bilebe bulya luli lusiku lukulu erhi bulya osimire okukabaha n’obulonza?
Bahamirizi ba Yehova banji banapange okucishagalusa haguma n’abana babo mango malebe ciru banabahe oluhembo. Akaba nawe ogwerhe abana, bintu bihi byago-byago wakabajirira ly’obashagalusa?
HALI ABANTU BADERHA NTYA: “Aha lusiku lukulu lulebe lwarhondereraga harhali habulagirire. Cikone akantu k’obulagirire kuli kucishagalula haguma n’abantu b’omu mulala n’abîra.”
Gurhi wakabashuza?
KWA BOFOFI
Yehova aba alonzize rhushagaluke haguma n’abantu b’omu mulala gwirhu n’abîra. Cikone aba alonzize rhuyake okujira ensiku nkulu zirhamushagalusa.
Okucikengeza
Madoso gahi wakacidosa gakakurhabala okumanya erhi Yehova anashagalukire lusiku lukulu lulebe erhi arhalushagalukira?
Gurhi wakajira ly’orhabala abantu b’omulala gwawe bahugûkwe bulya gurhi orhajira idinye lya lusiku lukulu lulebe?
Bici bikurhabire okumanya oku Yehova aba alonzize rhube n’omwishingo rhunashagalukire akalamo?
OCIYIGIRIZE KWA BULÎRI
Olole nsiku nkulu ndebe Abakristu b’okuli barhajira.
“Juu ya Nini Mashahidi wa Yehova Hawafanyake Sikukuu Fulani?” (Mwanzi guli oku jw.org)
Olole ebirhuma rhuyemera oku Nnâmahanga arhashagalukira olusiku lukulu lw’okuburhwa.
Olole gurhi abana bazigira Yehova bakamushagalusa amango gʼensiku nkulu.
Bakristu banji b’okuli bahizire oku barhakajira olusiku lukulu lwa Noweri. Gurhi baciyumva lugenda ogo muhigo barhôzire?
“Walipata Jambo Nzuri Zaidi Kuliko Noeli” (Ilabiro ly’Akalalizi, ly’omu lusiku 1/12/2012)
a Olole Amahugûlo ga 5 ly’obona ebi wakajira amango abantu bali bajira lusiku lukulu lulebe.