Bulya Gurhi Abahamirizi ba Yehova Barhajira Idinye ly’Olusiku Lukulu lw’Okuburhwa?
Abahamirizi ba Yehova barhajira idinye ly’okukengera olusiku lw’okuburhwa bulya bamanyire oku er’idinye linakagayisa Nnâmahanga. Ebibliya ehanzinze n’obwalagale okujira idinye ly’okukengera olusiku lw’okuburhwa, cikoki erhurhabire rhukarhanya okubiyerekire bintu biguma biguma n’entanya za Nnâmahanga okubibiyerekire. Rhuganirire bintu bini, na bici Ebibliya edesire okubibiyerekire.
Amadinye gw’okukengera olusiku lw’okuburhwa garhondezibagwa n’abapagani. Citabu ciguma ciyerekine ngahi ago madinye garhondereraga. Okubiyerekire oku abantu barhanya lugenda idinye ly’okukengera olusiku lw’okuburhwa, citabu ciguma cidesire ntya: “Abantu bakagirhanya oku olusiku lw’okuburhwa kw’omuntu, hanaba iroho libi lyakamujira kubi” n’okurhanya oku “okuyisha kw’abîra n’okulongeza oyo muntu akalamo kaliri, kwanamulanga kuli er’iroho.” (Funk & Wagnalls Standard Dictionary of Folklore, Mythology, and Legend) Ecitabu Coutumes et Usages des Anniversaires (angl.) ciyerekine n’obwalagale oku mango mîra, okuyandika amazino g’ababusirwe “kwali kwa bulagirire bwenene lugenda enkomedu z’obulaguzi” n’okujira ntyo, “kwali kuyimangire oku bintu by’obukurungu.” Emyanzi eri oku buzindikiriza bw’eco citabu, eyerekine oku “obwemere bw’okukoleza omushuma amango gw’okukengera olusiku lw’okuburwa, buli bulaguzi bw’okulonza okuhikiriza irala ly’omuntu.”
Ebibliya erhuhanzize obulaguzi, okushurha enyungu, obukurungu, n’‘ebintu bya mwene abo’ (Olushika 18:14; Abagalasiya 5:19-21) Ciru n’akaba Nnâmahanga ahanaga olugo lw’e Babiloni, kwali kubona oku bacikala b’eyo bakajira obukurungu, n’obulaguzi bwa ngasi lubero. (Izaya 47:11-15) Abahamirizi ba Yehova barhalonza mpu kuhika bamanye ngahi ngasi kantu erhi ngasi nkomedu yarhengaga. Cikone erhi Ebibliya eganirira kantu kalebe, barhakalekerera.
Abakristu Barhangiriza barhakagijira idinye ly’okukengera olusiku lw’okuburhwa kw’omuntu. Encyclopédie nguma edesire oku abakristu barhangiriza “bakagibona oku okukengera olusiku lw’okuburhwa kw’omuntu yali nkomedu ya cipagani.” (The World Book Encyclopedia) Ebibliya eyerekine oku Abakristu boshi bakwanine bayige ebi entumwa n’abandi banafunzi bayigiribagwa na Yezu ye nnanene.—2 Abatesalonika 3:6).
Idinye liguma Abakristu bahunyirwe okukengera, lirhali idinye lya kuburhwa ci kukengera—olufû lwa Yezu. (Luka 22:17-20) Oko kurhakasomerana bulya, Ebibliya edesire oku “olusiku lw’okufâ lwo lukulu aha lusiku lw’okuburhwa.” (Omuhanûzi 7:1) Oku buzinda bw’akalamo kage hanw’igulu, Yezu acijirira izino, k’okuderha irenge linja omu masu ga Nnâmahanga. Olusiku lw’okufâ kwage lwâli lwabulagirire bwenene kulusha olusiku lw’okuburhwa kwage.—Abahabraniya 1:4.
Ebibliya erhadesiri omukozi wa Nnâmahanga ciru n’omuguma wajijire idinye ly’okukengera okuburhwa kwage. Kurhali mpu kuyibagira. Ebibliya eyerekine madinye abirhi gw’okukengera olusiku lw’okuburhwa kwa bantu babirhi barhalibakozi ba Nnâmahanga. Cikone ago madinye oku ganali abirhi gali mabi bwenene.—Omurhondêro 40:20-22; Marko 6:21-29.
K’Abana b’Abahamirizi ba Yehova Banaciyumve Babulirwe Mpu Bulya Barhajijiri Idinye ly’Okukengera Okuburhwa Kwabo?
Ak’ababusi binja boshi, Abahamirizi ba Yehova banalonze obulyo bw’okuyereka abana babo obuzigire omu mwaka goshi, banabahe oluhembo, banalonze akasanzi k’okucishagalula haguma n’abîra, n’ebindi n’ebindi. Banacihangane okukulikira olwiganyo lwimana lwa Nnâmahanga lw’okuha abana bage ebintu binja. (Mateyo 7:11) Abana b’Abahamirizi ba Yehova barhaciyumva nk’ababulirwe muli oko. Ezi nderho zikulikire ziyerekine ntyo bwinja:
“Okuhâbwa oluhembo buzira kucirheganya kuli lo kunashagalule bwenene.”—Tammy, wa myaka 12.
“Ciru akaba ntahâbirwe luhembo olusiku lw’okukengera okuburhwa kani, ababusi bani banalumpe omu kandi kasanzi. Bwenene nshagalukira oko, bulya ntalicirheganyize kuli oko.”—Gregory, wa myaka 11.
“K’orhanyize oku miniti ikumi, mabenye masungunu, na lwimbo luguma byabajira idinye? Ushinganine oje emwirhu obone gurhi idinye lijirwa!”—Eric, wa myaka 6.