ISOMO LYA 51
Gurhi Wakashagalusamwo Yehova Kugerera Enderho Zawe
Erhi Yehova arhulema, arhuha engalo nyinja bwenene: obuhashe bw’okuganira. K’ebi rhuderha byanamugayisa erhi bimushagaluse? Neci! (Osome Yakobo 1:26.) Akaba ntyo, gurhi rhwakakolesa obuhashe bwirhu bw’okuganira omu njira yakashagalusa Yehova?
1. Gurhi rhushinganine rhukakolesa obuhashe bw’okuganira?
Ebibliya erhubwizire ntya: “Mugendekere mwahânana omurhima n’okuyubakana.” (1 Abatesalonika 5:11, NWT) Ka hali muntu mulebe omanyire olagirire oku kuhâbwa omurhima? Bici wakajira ly’omurhabala aciyumve bwinja? Omuyerese oku onakamubona oku aba wa bulagirire bwenene. Nkaba wanamubwira amorhere gage minja garhuma omushagalukira. Ka hali olwandiko lw’Ebibliya orhanyize lwakaha muntu mulebe omurhima? Hali mandiko manji bwenene wakacishogamo olwandiko wakolesa. Na kandi, okengere oku enderho zawe n’oku ozidesire, kwanarhuma omuntu aciyumva bwinja erhi aciyumve kubi. Co cirhumire kuli kwinja okacihangana okuganira omu njira nyinja y’obuzigire na ya butûdu.—Emigani 15:1.
2. Nderho za gurhi rhushinganine rhuyake?
Ebibliya edesire ntya: “Nta luderho lubi lurhengage omu kanwa kinyu.” (Osome Abefezi 4:29.) K’okuderha oku rhurhashinganini rhuderhe enderho mbi, erhi z’okusarhazanya erhi ezakarhuma owundi aciyumva kubi. Na kandi rhushinganine rhuyake okuderhera-derha abandi erhi kubashobeka.—Osome Emigani 16:28.
3. Bici byakarhurhabala lyo rhukaganira omu njira yakayubaka abandi?
Kanji-kanji enderho zirhu zinakayerekana ebirhuli omu murhima n’omu bukengere. (Luka 6:45) Co cirhumire rhushinganine rhucikomereze okukarhanya ebintu binja, k’okuderha ebintu biri by’okuli, biri nkana, bishinganine na ngasi kantu kakwaninine okukuzibwa. (Abafilipi 4:8) Lyo rhukasegeza obwenge bwirhu kw’ebyo bintu, rhushinganine rhukacishoga n’obwenge abîra birhu n’eby’okucishagalusa. (Emigani 13:20) Okujira ntyo kwanarhurhabala rhukarhanya embere z’okuderha. Orhang’irhanya gurhi ebi waderha byahûma oku bandi. Ebibliya edesire ntya: “Omuntu oderha duba, kwo ayagazanya nka ngôrho, ci olulimi lw’abashinganyanya kufumya lufumya.”—Emigani 12:18.
HUMBIRIRA LY’OHUGÛKWA
Oyige gurhi wakakaderha omu njira y’okushagalusa Yehova na yakuha abandi omurhima.
4. Okarhanya kw’ebi waderha
Hali amango rhweshi rhuhikira aha rhwaderha enderho zakarhuma rhwayish’iciyunjuza buzinda. (Yakobo 3:2) Osome Abagalasiya 5:22, 23, na buzinda oganirire aga madoso:
Borhere buhi bwa muli aga morhere wakashenga Yehova akurhabale obe nabo ly’okaderha omu njira yakamushagalusa? Gurhi ago morhere gakakurhabalamwo?
Osome 1 Abakorinti 15:33, na buzinda oganirire er’idoso:
Gurhi okucishoga abîra n’ebyokucishagalusa byakahûma oku nderho zawe?
Bici byakakushumya okaderha enderho nyinja erhi nderho mbi?
Osome Omuhanûzi 3:1, 7, na buzinda oganirire er’idoso:
Mangaci kwakaba kwinja okuhulika erhi okulinda akasanzi kinja lyo rhuderha kantu kalebe?
5. Okaderha abandi bwinja
Gurhi rhwakayaka enderho z’okuyagaza abandi erhi kuderha enderho mbi? Olole EVIDEO, na buzinda oganirire aga amadoso gakulikire.
VIDEO: Okaderha “Enderho Nyinja z’Okuyubaka” Abandi (4:07)
Nk’oku obwine mw’eyo video, bulya gurhi oyo mwene wirhu alonzagya okushanja oku akagiderha-derha abandi?
Bici ajijire ly’ashanja?
Osome Omuhanûzi 7:16, na buzinda oganirire er’idoso:
Bici rhushinganine rhukakengera amango rhwalikola rhwaderha abandi kubi?
Osome Omuhanûzi 7:21, 22, na buzinda oganirire er’idoso:
Gurhi eyo milongo yakakurhabala orhagayaga duba-duba amango muntu mulebe amakuderhera ebintu bibi?
6. Okaganiza abantu b’omu mulala gwawe omu njira nyinja
Yehova aba alonzize rhukaganiza abantu b’omu mulala gwirhu omu njira nyinja na ya buzigire. Olole EVIDEO, na buzinda oganirire idoso likulikire.
Bici byakakurhabala ly’okaganiza abantu b’omu mulala omu njira nyinja?
Osome Abefezi 4:31, 32, na buzinda oganirire er’idoso:
Nderho za gurhi ziyubaka omulala?
Yehova ayerekine n’obwalagale oku alizigire Omugala, Yezu. Osome Mateyo 17:5, na buzinda oganirire er’idoso:
Gurhi wakayigamwo olwiganyo lwa Yehova amango oli waganira haguma n’abantu b’omu mulala gwawe?
Obe n’oborhere bw’okuvuga abandi omunkwa
HALI ABANTU BADERHA NTYA: “Niehe nnankaderha ebinanyishire omu bukengere. Ciru abandi bakabiyumva kubi, oko kurhandabiri.”
Ka nawe oyemire ezo ntanya? Bulya gurhi oziyemire, erhi bulya gurhi orhaziyemiri?
KWA BOFOFI
Enderho zijira obuhashe, ebi rhuderha byanarhabala abandi erhi bibayagaze. Co cirhumire rhushinganine rhukarhanya lugenda ebi rhwaderha, mangaci rhwabiderha, na gurhi rhwabiderha.
Okucikengeza
Omu njira zihi na zihi rhwakakolesa engalo yirhu yʼokuganira lyo rhurhabala abandi?
Nderho za gurhi olonzize oyake?
Bici byakarhurhabala lyo rhukaderha enderho z’obuzigire na zakuyubaka abandi?
OCIYIGIRIZE KWA BULÎRI
Bici byakarhurhabala rhube n’enderho z’okuha abandi omurhima?
Olole ebyakakurhabala oyake okuderha enderho mbi.
“Ka Kobinali Okujacirana Kuba Kubi?” (Mwanzi guli oku jw.org)
Olole gurhi wakayakamwo engeso y’okuderha-derha abandi kubi.
Olole gurhi Yehova arhabiremwo mulume muguma aleke okukakolesa enderho mbi.