Amahugûlo
1. Babiloni Mukulu ye Ndi?
Gurhi rhumanyiremo oku “Babiloni Mukulu” ashushanyize amadîni goshi g’obunywesi? (Amafulûlo 17:5) Olole bintu biguma na biguma:
Ali akola omw’igulu lyoshi. Ebibliya edesire oku Babiloni Mukulu adamire enyanya ‘z’amashanja n’omwandu gwa bantu.’ Agwerhe “obuhashe bw’okurhegeka abami b’igulu.”—Amafulûlo 17:15, 18.
Lirhali ikubuliro lilebe ly’epolitike erhi lya burhimbuzi. Bulya Ebibliya edesire oku ‘abami b’igulu’ n’“abarhunzi” barhakasherezibwa amango asherezibwa.—Amafulûlo 18:9, 15.
Anaderhere Nnâmahanga obunywesi. Ebibliya emuhamagire ndumba bulya anakajira ebiragane haguma n’amarhegesi ga bene bantu ly’aba n’ensaranga na bunguke bunji. (Amafulûlo 17:1, 2) Ali arheba abantu b’amashanja goshi. Na kandi ayirhîsize bantu banji.—Amafulûlo 18:23, 24.
Ogaluke oku isomo lya 13 nukta ya 6
2. Mangaci Masiya Akabonekine?
Ebibliya edesire oku Masiya akabonekine oku buzinda bw’emigobe 69.—Osome Daniyeli 9:25.
Mangaci eyo migobe 69 yarhangiraga? Yarhangiraga omu mwaka gwa 455 E.K.K.K. Ago mango go Guvernere Nehemiya ahikaga omu lugo lw’e Yeruzalemu ‘ly’ashub’iluyubaka.’—Daniyeli 9:25; Nehemiya 2:1, 5-8.
Eyo migobe 69 yali ya buli bunganaci? Bulebi buguma buguma b’omu Bibliya budesire oku, lusiku luguma guli mwaka muguma. (Emibalè 14:34; Ezekiyeli 4:6) Kuli kuderha oku ngasi mugobe eri myaka nda. Mw’obo bulebi, emigobe 69 eri myaka 483 (migobe 69 x 7, kuli kuderha myaka 69 kali 7).
Mangaci eyo migobe 69 yahwaga? Erhi wakarhôla myaka 483 kurhangira mwaka gwa 455 E.K.K.K., wanahika omu mwaka gwa 29 K.K.K.a Ogo go mwaka Yezu abatizibagwa n’okuba Masiya!—Luka 3:1, 2, 21, 22.
Ogaluke oku isomo lya 15 nukta ya 5
3. Obulenga bw’Ecinganga Buhûnyire Okukolesa Omuko
Haba obulenga bw’ecinganga buba buhûnyire okukolesa omuko gw’omulwala. Kwa lwiganyo, omuntu anaha abandi omuko gwage erhi anahiga oku omuko gwawe gubîkwe, lyo guyishikolesibwa omu kasanzi akola aberwa. Cikoki, Abakristu barhayemera obo bulenga boshi.—Olushika 15:23.
Hali obundi bulenga Omukristu nkaba akayemera. Kwa lwiganyo, bulenga buguma na buguma bw’okupima omuko, buhamagalwa hémodialyse, hémodilution, erhi récupération du sang épanché erhi kandi okukolesa amashini lyo gakola aha nafasi y’omurhima n’amahaha. Ngasi Mukristu yene okwanine ahige gurhi omuko gwage gwayish’ikolesibwa omu kasanzi aberwa, erhi omu mango gw’okupima omuko gwage, omu mango abukwa omu kukolesa bulenga buguma na buguma bw’ecinganga. Ngasi munganga anakolesa obo bulenga lubero n’owundi. Co cirhumire embere z’okuyemera okuberwa, okupimwa omuko, erhi kuyemera bufumu bulebe, Omukristu akwanine amanye gurhi omuko gwage gwayish’ikolesibwa. Anacidosa aga madoso:
Gurhi byakaba erhi cigabi cilebe c’omuko gwani cakakulwa omu mubiri gwani na ntyo gubule bwalambagira omu mubiri gwani kasanzi kalebe? K’ezamiri yani yanambwira oku ogo muko gwanaciri gwa muli nie, erhi yanambwira oku nshinganine okugubulagira “oku idaho”?—Olushika 12:23, 24.
Gurhi byakaba erhi cigabi cilebe c’omuko gwani cakakulwa omu mubiri gwani, gukubulwe na buzinda bagugalule omu mubiri gwani? K’ezamiri yani ekomerezibwe n’Amandiko yanantumuza erhi erhakantumuza?
Ogaluke oku isomo lya 39 nukta ya 3
4. Okulekana
Ebibliya erhabwiziri abajire omu buhya oku banalekana, na kandi eyerekine oku erhi omulume n’omukazi bakalekana, ntaye mulibo ogwerhe oluhusa lw’okucijira obuhya n’owundi mulume erhi n’owundi mukazi. (1 Abakorinti 7:10, 11) Cikone hali akanga kahikira Bakristu baguma baguma bajire omu buhya na ntyo bahige okulekana.
Okulahira n’obulonza okuhikiriza amalagirire g’omulala: Omulume alahire okuhikirigiza omulala gwage amalagirire gago g’omubiri, omulala gwage guhikire ciru aha gwabula ebintu by’obulagirire omu kalamo.—1 Timoteyo 5:8.
Omulume erhi omukazi ali alwisa owabo erhi kumuyagaza bwenene: Okujirira owundi kubi kwakahira amagala erhi obuzine omu mazibu.—Abagalasiya 5:19-21.
Omulume erhi omukazi ahanze owabo loshi-loshi oku arhajiraga obwîra haguma na Yehova: Omulume erhi omukazi ajire okwage koshi ly’ahanza owabo oku arhakoleraga Yehova.—Ebijiro by’Entumwa 5:29.
5. Amadinye n’Ensiku Nkulu
Abakristu barhajira ensiku nkulu zirhashagalusa Yehova. Cikone ngasi Mukristu yene anakolesa ezamiri yage ekomerezibwe n’Ebibliya ly’ahiga bici ajira omu kanga kalebe kayerekire ezo nsiku nkulu. Rhulole nyiganyo nguma.
Omuntu akubwîre erhi bonne fête. Wanaderha kone ntya: “Koko.” Erhi oyo muntu akalonza okumanya binji wanamuhugûlira bulya gurhi orhajira olo lusiku lukulu.
Balo erhi mukawe orhali Muhamirizi wa Yehova akubwire oku mujirya ebiryo haguma na bene wabo b’omulala oku lusiku lukulu lw’ecipagani. Akaba ezamiri yawe ekuyemerire okugenda, wanarhang’imuhugûlira embere mugende oku eyo munda mwaja bakayishijira nkomêdu ndebe z’ecipagani wehe orhayishizijire.
Bose wawe w’akazi akuhe oluhembo amango g’olusiku lukulu. Ka wanalulahira? Wene wakahiga oku wajira. K’oyo bose wawe akuhîre olo luhembo mpu lyo nawe ojira kw’olo lusiku lukulu erhi alonzize akuvuge omunkwa oku kazi kinja oli wamujirira?
Omuntu akuhe akantu omu mango g’olusiku lukulu. Nkaba anakubwira ntya: “Nyishi oku orhajira olu lusiku lukulu, ciru ankaba ntyo ndonzize kone nguhe aka kantu.” Nkaba oyo muntu alonzize kone akushobôze ako kantu. Cikone, k’arhakaba ali alonza ahire obuyemere bwawe omu marhangulo erhi ali alonza akushumye nawe ojire kw’olo lusiku lukulu? Enyuma z’okurhanya kw’ebyo byoshi wene wakahiga erhi wakayemera erhi nanga. Omu mihigo yirhu yoshi, rhulonzize rhugendekere rhwaba n’ezamiri ecîre na bishwekerezi kuli Yehova.—Ebijiro by’Entumwa 23:1.
Ogaluke oku isomo lya 44 nukta ya 1
6. Endwala z’Okuyahukira
Bulya rhunazigire abantu, rhunajire okwirhu koshi lyo rhurhabayahukizagya endwala z’okuyahukira. Okujira ntyo kuli kwinja erhi akaba rhulwazire endwala y’okuyahukira erhi hali ebiyerekine oku nkaba rhulwazire eyo ndwala. Rhunajire ntyo bulya Ebibliya erhubwizire ntya: “Ozigire abinyu nk’oku ocizigira wêne.”—Abaroma 13:8-10.
Gurhi omuntu olwazire endwala y’okuyahukira akayereka abandi oku abazigire? Arhakwanini okuyegera abantu omu kubahobera erhi kubanunugurha. Arhakagaya mpu bulya abandi barhamuyegerezizi omu nyumpa zabo bulya bayobohire oku abayahukiza. N’embere abatizibwe, akwanine okumanyisa omuratibu w’embaraza y’abagula oku alwazire endwala y’okuyahukira ly’abagula barhôla emipango y’okulanga abandi babatizibwa barhagiyahukirwa. Embere z’okurhondera okusheba erhi kushebwa, nk’omuntu al’ilwazire endwala y’okuyahukira anapimisa omuko gwage. Omu kujira ntyo, wanayerekana oku oshibirire abandi, ‘orhanalonzizi obunguke bwawe bone, ci olonzize obunguke bw’abandi.’—Abafilipi 2:4.
Ogaluke oku isomo lya 56 nukta ya 2
7. Eby’oburhimbuzi n’Okuyandikana Emwa Leta
Rhwanayaka mazibu manji omu kuyandikirana edokima omu mango rhwajira amapatano gayerekire ensaranga, rhwanayandikirana eyo dokima ciru akaba wirhu Mukristu rhwajira naye ntyo. (Yeremiya 32:9-12) Ciru akaba ntyo, hali amango Abakristu babula buyumvikana omu bintu biyerekire ensaranga erhi omu bindi. Banalonza okuyumvikana duba-duba bonene omu murhula.
Cikone gurhi rhwakajira erhi akaba kali kanga kazibu, kwa lwiganyo, omuntu azimbe akantu kirhu erhi arhushobeke? (Osome Mateyo 18:15-17.) Yezu adesire bintu bisharhu rhwakajira:
Olonze gurhi mwakayumvikana naye mwembi mwene.—Olole omulongo gwa 15.
Akaba murhayumvikine, obwire Mukristu muguma erhi babirhi bakuzire kiroho bakuluse ojimubona.—Olole omulongo gwa 16.
Erhi mwakabula kuyumvikana loshi-loshi, muli ago mango wanagendig’ibwira abagula.—Olole omulongo gwa 17.
Omu kanga kanji, rhurhakalonza okushitaki bene wirhu emwa leta bulya oko kwanajaciza Yehova n’ecigamba. (1 Abakorinti 6:1-8) Cikone hali akanga kakahûna kahêkwe emwa leta, kwa lwiganyo: okuzaza obuhya, okulonza e droit y’okulera abana, okukalipa ensaranga z’okuha abantu b’omulala lyo balama, ebintu biyerekire e assurance, oburhunzi nka bwakahomba, erhi kulonza leta ayemere etestama. Erhi Omukristu okakolesa okuja emwa leta ly’ayusa ago mazibu omu murhula, nt’ihano ly’Ebibliya akaba avunyire.
Erhi akaba ebyajiragwa biri bibi bwenene, kwa lwiganyo nk’okubaka omuntu, okubaka omwana, okulwisa omuntu, okuzimbwa birugu binji, n’obunizi, erhi Omukristu akajishitaki oyo muntu emwa leta nt’ihano ly’Ebibliya akaba avunyire.
a Kurhangira omu mwaka gwa 455 E.K.K.K., kuhika omu mwaka gwa 1 E.K.K.K., eri myaka 454. Kurhangira mwaka gwa 1 E.K.K.K., kuhika mwaka gwa 1 K.K.K., guli mwaka muguma (omwaka busha erhi zero gurhahaba). Na kurhangira mwaka gwa 1 K.K.K., kuhika mwaka gwa 29 K.K.K., eri myaka 28. Erhi rhwakarhôla myaka 454+1+28, rhwanabona myaka 483.