Mwe Bali Birhu Muciri Balamba, Mube Bakazi Bakristu Bakuzire Kiroho

1. Lyo rhuhikira okuba Bakristu bakuzire kiroho, bici rhugwasirwe rhujire?

RHUNASOMERWE okubona gurhi omwana akula duba-duba n’okuba muntu mukulu. Oko kukula kunabonekane nka kunajirikane omu njira erhahûnyiri bushiru boshi-boshi. Cikone, okukula kw’Omukristu omu hali y’ekiroho kurhajirikana buzira bushiru boshi-boshi.b (1 Kr. 13:11; Hb. 6:1) Lyo rhuhikira okukula omu hali y’ekiroho, rhweshi rhushinganine rhujire obwîra busêzire haguma na Yehova. Kandi rhulagirire oku iroho litagatifu lyo lirhurhabala rhube n’amorhere gashagalusa Nnâmahanga, okuyiga obulenga bw’obulagirire, n’okucirheganya oku mikolo y’amango gali embere.—Mig. 1:5.

2. Bici rhuciyigirizize kugerera olwandiko lw’Omurhondêro 1:27, na bici rhwaganirira mw’eci cigabi?

² Yehova alemire bene bantu bakaba balume erhi bakazi. (Osome Omurhondêro 1:27.) Bibonekine oku abalume n’abakazi barhaba bashushine oku mubiri, cikone kandi baba lubero omu zindi njira. Kwa lwiganyo, Yehova alemire abalume n’abakazi lyo bahikiriza emikolo y’obwalagale, co cirhumire balagirire oku kuba n’amorhere n’obulenga bwakabarhabala lyo bahikiriza emikolo yabo. (Murh. 2:18) Mw’eci cigabi, rhwaganirira bici mwali wirhu ociri musole akajira ly’aba mukazi Mukristu okuzire kiroho. Omu cigabi cikulikire, rhwaganirira bici bene wirhu baciri misole bakajira.

OBE N’AMORHERE GASHAGALUSA NNÂMAHANGA

3-4. Ngahi bali birhu baciri misole bakabona enyiganyo nyinja z’okuyiga? (Olole n’enfoto.)

³ Ebibliya eganirire bakazi banji bali lwiganyo lwinja bal’izigire Yehova banakag’imukolera. (Oku jw.org olole ecigabi cidesire, “Wanamuke Wenye Kuzungumuziwa mu Biblia Wanatufundisha Nini?”) Bakag’iyerekana amorhere olwandiko lw’omusingi lw’eci cigabi luyerekine, ko kuderha oku bali ba “lugero” na ba “kucîkubagirwa omu ngasi kantu.” Na kandi, bali birhu banabona omu cigamba cabo enyiganyo nyinja z’abakazi Bakristu bakuzire kiroho bakayiga.

⁴ Mwe bali birhu muciri misole, ka mwanacishoga bakazi balebe Bakristu mumanyire bakuzire kiroho mwakayiga olwiganyo lwabo? Mukalaba amorhere gabo minja; buzinda murhanye gurhi mwakakagayerekanamwo. Omu bifungo bikulikire, rhwaganirira morhere asharhu g’obulagirire abakazi bakuzire kiroho balagirireko.

5. Bulya gurhi obwirhohye buli bwa bulagirire oku bakazi Bakristu bakuzire kiroho?

⁵ Obwirhohye buli borhere bw’obulagire bwenene burhabala omuntu abe Mukristu okuzire kiroho. Erhi akaba omukazi ali mwirhohye, anabe n’obwîra bwinja haguma na Yehova n’abandi. (Yk. 4:6) Kwa lwiganyo, omukazi ozigire Yehova anacishoge okurhumikira n’obwirhohye akanuni Larha wirhu w’omu mpingu ahizireho lugenda obulongozi. (1 Kr. 11:3) Ako kanuni kanakolesibwe omu njira y’obwalagale omu cigamba n’omu mulala.c

6. Bici bali birhu baciri misole bakaciyigiriza lugenda obwirhohye kugerera olwiganyo lwa Rebeka?

⁶ Rhuganirire olwiganyo lwa Rebeka. Ali mukazi mwenge wakag’irhôla emihigo y’oburhwali omu kalamo kage anakag’ijira ebintu omu njira nyinja. (Murh. 24:58; 27:5-17) Cikone ali wa bukenge anali wa kurhumikira. (Murh. 24:17, 18, 65) Erhi wakakalunga okuboko emipango ya Yehova n’obwirhohye aka Rebeka, wanaba lwiganyo lwinja omu mulala gwawe n’omu cigamba.

7. Gurhi bali birhu baciri misole bakayigamwo olwiganyo lwa Esteri omu kuba ba lugero?

⁷ Olugero buli bundi borhere Abakristu boshi bakuzire kiroho balagirireko. Ebibliya edesire oku “ab’olugero bo bajira obwenge.” (Mig. 11:2, NWT) Esteri, mukozi mwishwekerezi wa Nnâmahanga, ali wa lugero. Okuba wa lugero kwakag’imurhabala arhabaga wa bucibone. Ayumvirhizize ihano muzala wage Mordekayi amuhaga analikulikira. (Est. 2:10, 20, 22) Wanayerekana oku oli wa lugero akage omu kukahûna amahano minja n’okugakolesa.—Tt. 2:3-5.

8. Kushimbana na 1 Timoteyo 2:9, 10, gurhi olugero lwakarhabalamwo mwali wirhu ly’arhôla emihigo y’obwenge lugenda emyambalo n’okuciyinjihya?

⁸ Esteri ayerekine oborhere bw’olugero omu yindi njira. Ajiraga ‘iranga linja n’ebirumbu bisogorosire bwinja, anali mwinjinja’; cikone, arhacisegezagyako obwenge omu njira erhali ya bulagirire. (Est. 2:7, 15) Gurhi omukazi Mukristu akayungukamwo kugerera olwiganyo lwa Esteri? Njira nguma akayungukamwo eyerekinwe omu 1 Timoteyo 2:9, 10. (Osome.) Entumwa Paolo arhonzire abakazi Bakristu bakayambala emyambalo ekwanine na ya lugero. Enderho z’Ecigiriki zikolesibwe aha ziyerekine oku emishangi y’omukazi Mukristu eshinganine ebe ya kucikengesa enayerekine oku akenzire entanya z’abandi n’oku baciyumva. Rhunashagalukire bwenene bali birhu Bakristu bakuzire kiroho bayambala omu njira eyerekine olugero!

9. Bici rhwakaciyigiriza kugerera olwiganyo lwa Abigaili?

⁹ Oburhimanya buli bundi borhere bali birhu Bakristu boshi bakuzire kiroho bayerekana. Oburhimanya byo bici? Buli buhashe bw’okumanya ebinja n’ebibi na buzinda ocishoge okujira ebinja. Rhuganirire olwiganyo lwa Abigaili. Iba arhôzire omuhigo mubi gwakadwirhire abantu b’omu nyumpa yage yoshi amazibu. Ho n’aho Abigaili ajira kantu kalebe. Bulya ayerekine oburhimanya ayokola abantu boshi b’omu mulala gwage. (1 Sam. 25:14-23, 32-35) Nirhu oburhimanya bunarhurhabale rhumanye mangaci rhushinganine rhuderhe na mangaci rhushinganine rhuhulike. Bunarhurhabale rhugendekere okuba ba lugero amango rhuli rhwashibirira abandi buzira kubajira baciyumve kubi.—1 Ts. 4:11.

OYIGE OBULENGA BWAKAKURHABALA

10-11. Gurhi okusoma n’okuyandika bwinja kwakakulerheramwo obunguke n’okubulerhera abandi? (Olole n’enfoto.)

¹⁰ Omukazi Mukristu ashinganine ayige bulenga bunji bwakamurhabala. Bulenga buguma na buguma omunyere ayiga amango aciri murho bunagendekere bwamurhabala omu kalamo kage koshi. Rhuganirire nyiganyo nsungunu.

¹¹ Oyige bwinja okusoma n’okuyandika. Omu nkomedu nguma na nguma, abantu banabone nka kurhali kwa bulagirire abakazi bayige okusoma n’okuyandika. Cikone, obulenga bw’okusoma n’okuyandika buba bwa bulagirire bwenene oku ngasi Mukristu.d (1 Tm. 4:13) Co cirhumire, orhalekaga akantu koshi-koshi kakuhanze okuyiga bwinja okusoma n’okuyandika. Bunguke buhi wakaba nabo? Obo bulenga bwanakurhabala ly’opata akazi n’okukabêrana. Wanaba mwanafunzi mwinja na mwalimu mwinja w’Akanwa ka Nnâmahanga. N’akantu kinja kulusha, wanayegera Yehova amango oli wasoma Akanwa kage n’okukarhanyako bwenene.—Yoz. 1:8; 1 Tm. 4:15.

12. Gurhi olwandiko lw’Emigani 31:26 lwakakurhabalamwo ly’okaganira bwinja?

¹² Oyige obulenga bw’okuganira bwinja. Abakristu bashinganine bakaganira bwinja. Muli ntyo, entumwa Yakobo erhuhîre ihano ly’obulagirire omu kuderha ntya: “Ngasi muntu akabangaduka omu kuyumvirhiza, ci arhabaga wakuderha duba.” (Yk. 1:19) Erhi wakayumvirhiza bwinjinja amango abandi bali baganira, onayerekane oku ocihizire ahali habo, erhi ‘kubabêra lukogo.’ (1 Pt. 3:8, Mashi Bible) Erhi akaba orhahugûsirwi bwinja ebi omuntu anaderhaga erhi oku ali aciyumva, wanamudosa amadoso omu njira eshinganine. Buzinda ocihe akasanzi k’okurhanya embere oderhe. (Mig. 15:28) Ocidose ntya: ‘K’ebi naderha biri by’okuli binali bya kuyubaka? Ka biri bya bukenge na binja?’ Oyige olwiganyo lwa bali birhu bakuzire kiroho baganira omu njira nyinja. (Osome Emigani 31:26.) Olabirize bwinja oku baganira. Oku wagendekera wayiga bwinja obo bulenga bw’okuganira, ko n’obwîra bwawe haguma n’abandi bwagendekera bwaba bwinja.

13. Gurhi wakaciyigirizamwo okushibirira enyumpa? (Olole n’enfoto.)

¹³ Ociyigirize okushibirira enyumpa. Omu maeneo manji, abakazi banajire mikolo minji lyo bashibirira enyumpa. Nkaba nyoko erhi owundi mwali wirhu ogwerhe obuhashe anakurhabala ly’oyiga obulenga olagirireko. Mwali wirhu muguma ohamagalwa Cindy adesire ntya: “Nguma z’omu ngalo nyinja bwenene nyâma ampire kwali kunyigiriza omwishingo omuntu aba nago omu kujira omukolo muzibu. Okuyiga obulenga nk’okudeka, okufula, okuhanga, n’okugula ebintu, kwajijire akalamo kani kaba kalembu kwanarhuma najira binji omu mukolo gwa Yehova. Kandi nyâma anyigirizize gurhi nakabamwo wa kuyegereza ebigolo, n’oko kwarhumire nabuganana na bene wirhu na bali birhu binja bali nyiganyo nal’ishinganine nyige.” (Mig. 31:15, 21, 22) Omukazi w’obushiru n’oyegereza abantu waciyigirizize okushibirira enyumpa guba mugisho kuli ngasi muntu w’omu mulala gwage n’omu cigamba.—Mig. 31:13, 17, 27; Ebj. 16:15.

14. Bici olwiganyo lwa Crystal lukuyigirizize, na bici oshinganine osegezeko obwenge?

¹⁴ Oyige okukacihikirigiza amalagirire gawe wene. Okuba muntu ocihikirigiza amalagirire gage yene guli muhigo gw’obulagirire Abakristu boshi bakuzire kiroho bashinganine bacihirireho. (Fl. 4:11) Mwali wirhu muguma ohamagalwa Crystal adesire ntya: “Ababusi bani bampire omurhima nyige obulenga e masomo bwakantabire buzinda omu kalamo kani. Larha anyinginga oku nsome okujira ensabu, n’oko kwantabire bwenene.” Ahanyuma n’okuyiga obulenga olagirireko ly’opata akazi, ocihangane oyige gurhi wakakolesamwo ensaranga zawe n’obwenge ly’orhag’ikakolesa nyinji kulusha ezi opata. (Mig. 31:16, 18) Okasegeza obwenge oku mihigo y’ekiroho omu kuyaka amadeni garhali ga bulagirire n’okukarhimukwa n’akalamo karhahûnyiri binji.—1 Tm. 6:8.

OCIRHEGANYE OKU MANGO GALI EMBERE

15-16. Bulya gurhi bali birhu baciri balamba baba ba ngulo ndarhi bwenene omu cigamba? (Marko 10:29, 30)

¹⁵ Erhi wakaba n’amorhere g’ekiroho n’obulenga bw’obulagirire, wanaba ocirheganyize bwinja kw’ebi wakajira omu mango gali embere. Rhuganirire nyiganyo nsungunu z’ebi wakajira.

¹⁶ Wanabêra mulamba kasanzi kalebe. Kushimbana n’enderho za Yezu, bakazi baguma na baguma banacishoge okurhaja omu buhya, ciru akaba okubêra balamba kurhabonwa bwinja omu nkomedu z’emwabo. (Mt. 19:10-12) Nkaba abandi banabêra balamba enyanya z’akanga kalebe. Oyemere n’obwalagale oku Yehova na Yezu barhagayaguza Abakristu balamba. Omw’igulu lyoshi, bali birhu balamba banarhabale bwenene ecigamba. Okuzigira abandi n’okubashibirira kunashumye abo bakazi Bakristu babe ba nnina wa bantu banji na bali babo omu hali y’ekiroho.—Osome Marko 10:29, 30; 1 Tm. 5:2.

17. Gurhi mwali wirhu ociri musole akacirheganyamwo buno ly’aja omu mukolo gw’akasanzi koshi?

¹⁷ Wanajira omukolo gw’akasanzi koshi. Abakazi Bakristu banajire binji omu mukolo gw’amahubiri omw’igulu lyoshi. (Enna. 68:11) Ka wanajira emipango ene ly’oja omu mukolo gw’akasanzi koshi? Wanajira omukolo gw’obupainiya, wanaja omu mukolo gw’obubasi, erhi oku Beteli. Okasalira enyanya z’omuhigo gwawe. Okaganiza abandi bahikire omuhigo gwa ntyo, ly’omanya ebi oshinganine ojire ly’ohikira omuhigo gw’okuja omu mukolo gw’akasanzi koshi. Buzinda opange ebintu wakahash’ijira byakakurhabala ly’ohikira omuhigo gwawe. Erhi wakahikira omuhigo gw’okuja omu mukolo gw’akasanzi koshi, oko kwanakuyigulira enjira y’okujira bintu binja binji omu mukolo gwa Yehova.

18. Bulya gurhi mwali wirhu ashinganine acishoge bwinja omulume waba iba? (Olole n’enfoto.)

¹⁸ Nkaba wanahiga okuja omu buhya. Amorhere n’obulenga rhwaganiriraga byakurhabala ly’oba mukazi mwinja. Kobinali, akaba oli warhanya lugenda okuja omu buhya, oshinganine ocishoge bwinjinja omulume waba balo. Ogo guli muguma g’omu mihigo y’obulagirire bwenene warhôla omu kalamo. Okengere oku, oshinganine okulikire obulongozi bw’omulume wacishoga okuja naye omu buhya. (Rm. 7:2; Ef. 5:23, 33) Co cirhumire ocidose ntya: ‘K’ali mulume okuzire kiroho? K’anahire ebintu by’ekiroho oku nafasi ntanzi omu kalamo kage? K’anarhôle emihigo y’obwenge? K’anayemere amagosa gage? K’anakenge abakazi? K’agwerhe obulenga buhûnyirwe ly’antabala omu hali y’ekiroho, y’omubiri, n’ey’ekandalala? K’anahikirize emikolo bwinja? Kwa lwiganyo, mikolo ehi agwerhe omu cigamba na gurhi ayihikirizamwo?’ (Lk. 16:10; 1 Tm. 5:8) Kobinali, akaba olonzize opate omulume mwinja, nawe oshinganine obe mukazi mwinja.

19. Bulya gurhi omukolo gw’‘omurhabazi’ guba gwa lukengwa?

¹⁹ Ebibliya edesire oku omukazi mwinja aba “murhabâzi” w’iba “omushushire [omuyenezize, NWT]’’. (Murh. 2:18) K’oko kuli kuderha oku arhali wa bulagirire? Nanga! Kobinali olo luli lukengwa kuli ye. Kanji-kanji Ebibliya eba ehamagire Yehova “murhabazi.” (Enna. 54:4; Hb. 13:6) Omukazi anabe murhabazi w’okunali kuli iba erhi amulunga okuboko n’okumurhabala okuhikiriza emihigo eyerekire omulala. Na bulya aba azigire Yehova, anajire okwage koshi lyo iba aba n’irenge linja. (Mig. 31:11, 12; 1 Tm. 3:11) Wanacirheganya okuhikiriza ogo mukolo omu mango gayisha omu kusêza obuzigire bwawe kuli Yehova n’omu kuba murhabazi w’abandi aha kâ n’omu cigamba.

20. Gurhi omuzire akarhabalamwo omulala gwage?

²⁰ Wanaba muzire. Enyuma z’okuja omu buhya, nkaba we na balo mwanaburha abana. (Enna. 127:3) Co cirhumire, kuli kwinja orhanye embere z’akasanzi. Amorhere n’obulenga rhwaganiriraga mw’eci cigabi, byanakurhabala erhi wakahikira aha waba mukazi na muzire. Obuzigire, olukogo, n’obulembedu bwawe byanarhabala ly’aha mwawe haba hantu ha bushagaluke, aha abana bawe bakaciyumva bali omu bulanzi banazigirwe.—Mig. 24:3.

21. Gurhi rhuciyumva lugenda bali birhu, na bulya gurhi? (Olole enfoto eri oku cijalada.)

²¹ Bali birhu, rhumuzigire enyanya z’ebintu byoshi mujirira Yehova n’abantu bage. (Hb. 6:10) Munacihangane lyo muba n’amorhere g’ekiroho, lyo muba n’obulenga bulerha omwishingo omu kalamo kinyu n’omu kalamo k’abantu bamuzungulusire, na lyo mucirheganya bwinja oku mikolo mwakajira omu mango gali embere. Munajire binji omw’ikubuliro lya Yehova!