ECIGABI C’OKUYIGA 53
Mwe Bene Wirhu Muciri Misole, Muhikire Okuba Balume Bakristu Bakuzire Kiroho
“Ozibuhage! oyerekane oku onali mulume!”—1 BAM. 2:2.
LWIMBO 135 Yehova Anakuomba “Ukuwe na Hekima”
EBI RHWAYIGAa
1. Bici omulume Mukristu akajira ly’abêrwa?
MWAMI Daudi abwizire Salomoni ntya: “Ozibuhage! oyerekane oku onali mulume!” (1 Bam. 2:1-3) Ene, kuli kwinja abalume Bakristu boshi bakolese er’ihano. Lyo babêrwa, bagwasirwe baciyigirize okurhumikira amarhegeko ga Nnâmahanga n’okukolesa amakanuni g’Ebibliya omu ngasi cigabi c’akalamo kabo. (Lk. 2:52) Bulya gurhi kuli kwa bulagirire bwenene bene wirhu baciri misole bahikire okuba balume Bakristu bakuzire kiroho?
2-3. Bulya gurhi kuli kwa bulagirire mwene wirhu ociri musole ahikire okuba Mukristu okuzire kiroho?
2 Omulume Mukristu anahikirize emikolo y’obulagirire omu mulala n’omu cigamba. Mwe bene wirhu muciri misole, buzira karhinda nkaba mwarhanyize oku mikolo mwakaba nayo omu mango gali embere. Nkaba ogwerhe omuhigo gw’okuja omu mukolo gw’akasanzi koshi, okuba murhabazi w’abagula, na buzinda mugula w’ecigamba. Kandi, nkaba ogwerhe omuhigo gw’okuja omu buhya n’okuburha abana. (Ef. 6:4; 1 Tm. 3:1) Ly’ohikira eyo mihigo n’okubêrwa, oshinganine obe Mukristu okuzire kiroho.b
3 Bici byakakurhabala ly’ohikira okuba Mukristu okuzire kiroho? Hali obulenga bw’obulagirire oshinganine obe nabo. Bicigi wakajira ene, ly’ocirheganya n’okuhasha okuhikiriza ngasi mukolo wakaba nago omu mango gali embere?
EBI WAKAJIRA LY’OHIKIRA OKUBA MUKRISTU OKUZIRE KIROHO
Okuyiga amorhere minja ga Yezu kwanakurhabala ly’oba mulume Mukristu okuzire kiroho (Olole ecifungo ca 4)
4. Ngahi wakabona enyiganyo nyinja z’okuyiga? (Olole n’enfoto.)
4 Ocishoge enyiganyo nyinja z’okuyiga. Ebibliya erimw’enyiganyo nyinja abalume baciri misole bakayiga. Abo balume b’omu mango ga mîra bal’izigire Nnâmahanga banashibirira abakozi bage omu njira ziri lubero. Nawe wanabona enyiganyo nyinja egarhi k’abalume Bakristu bakuzire kiroho b’omu mulala gwawe n’omu cigamba cinyu. (Hb. 13:7) Na kandi ogwerhe olwiganyo lwimana lwa Yezu Kristu wakayiga. (1 Pt. 2:21) Amango oli wayiga bwinjinja ezo nyiganyo, okarhanya oku morhere gabo minja. (Hb. 12:1, 2) Buzinda, ohige oku wakayigamwo olwiganyo lw’abo balume.
5. Gurhi wakajira ly’oba n’obuhashe bw’okurhanya, na bulya gurhi oko kuli kwa bulagirire? (Ennanga 119:9)
5 Okuze ‘onalange . . . obuhashe bw’okurhanya.’ (Mig. 3:21, NWT) Omuntu ogwerhe obuhashe bw’okurhanya arhajira ebintu duba-duba cikone anarhanye bwinja-bwinja embere ahige ebi ajira. Co cirhumire, ojire okwawe koshi ly’oba n’obo buhashe n’okubulanga. Bulya gurhi? Er’igulu liyunjwiremwo emisole elongozibwa n’entanya zabo bonene erhi eleka oku bali baciyumva kulongoze ebijiro byabo. (Mig. 7:7; 29:11) Ebyombo by’okuhâna emyanzi nabyo byanakushumya bwenene. Cikone, gurhi wakajira ly’oba n’obuhashe bw’okurhanya? Burhangiriza, oyige amakanuni g’Ebibliya n’okurhanya lugenda bulya gurhi gaba ga kurhulerhera obunguke. Buzinda, okolese ago makanuni lyo gakurhabala orhôle emihigo yakashagalusa Yehova. (Osome Ennanga 119:9.) Erhi wakaciyigiriza okurhanya omu njira ya ntyo, oko kwanakurhabala bwenene ly’oba mulume Mukristu okuzire kiroho. (Mig. 2:11, 12; Hb. 5:14) Rhuganirire njira ibirhi obuhashe bw’okurhanya bwakakurhabalamwo: (1) muli oku ojirira bali birhu na (2) muli oku orhôla emihigo lugenda emyambalo yawe n’iranga lyawe.
6. Gurhi obuhashe bw’okurhanya bwakarhabala mwene wirhu ociri musole ly’akayeresa bali birhu obukenge?
6 Obuhashe bw’okurhanya bwakurhabala ly’okayeresa abakazi obukenge. Kwa lwiganyo, mwene wirhu ociri musole anasimisibwa na mwali wirhu mulebe na nta bubi buli omu kujira ntyo. Ciru akaba ntyo, mwene wirhu ociri musole ogwerhe obuhashe bw’okurhanya, arhakaderha, arhakayandika, erhi kujira akantu koshi-koshi kakarhuma oyo mwali wirhu arhanya oku alonzize okumusheba, erhi akaba oyo mwene wirhu arhagwerhi entanya z’okumusheba. (1 Tm. 5:1, 2) N’erhi akaba ali asheba mwali wirhu mulebe, analange irenge ly’oyo mwali wirhu omu kurhaba haguma bombi bone buzira mushongwe.—1 Kr. 6:18.
7. Gurhi obuhashe bw’okurhanya bwakarhabalamwo mwene wirhu ociri musole amango ali arhôla emihigo lugenda emyambalo n’okuciyinjihya?
7 Eyindi njira mwene wirhu ociri musole ayerekanamwo oku agwerhe obuhashe bwinja bw’okurhanya kuli kurhôla emihigo minja lugenda emyambalo n’okuciyinjihya. Kanji-kanji, ebiri alamode binajirwe n’okugendekezibwa n’abantu barhaba bakenzire Yehova erhi abantu bajira olugenzi lubi. Entanya zabo z’olugenzi lubi zinabonekane omu myambalo y’okufundera erhi erhuma abalume babonekana nka bakazi. Amango ali acishoga emyambalo, mwene wirhu ociri musole oli wagendekera okuba Mukristu okuzire kiroho analongozibwe n’amakanuni g’Ebibliya n’enyiganyo nyinja z’omu cigamba. Anacidosa ntya: ‘K’emihigo yani enayerekane oku ngwerhe enkengero nyinja n’oku nankenge abandi? K’oku nyambala kunarhume abandi barhaba n’amazibu g’okuyemera oku mba mukozi wa Nnâmahanga?’ (1 Kr. 10:31-33; Tt. 2:6) Mwene wirhu ociri musole ogwerhe obuhashe bw’okurhanya anakengwe na bene wirhu na bali birhu, cikone kandi, anakengwe n’Ishe w’omu mpingu.
8. Gurhi mwene wirhu ociri musole akajira ly’aba wa kulangalirwa?
8 Obe wa kulangalirwa. Mwene wirhu ociri musole oba wa kulangalirwa anahikirize bwinja-bwinja emikolo yage yoshi. (Lk. 16:10) Rhuganirire olwiganyo lwimana lwa Yezu. Yezu arhali molo arhanali muntu orhashibirira bwinja-bwinja omukolo gwage. Lubero n’oko, ahikirizize omukolo Yehova amuhâga, ciru n’amango kwali kuzibu okujira ntyo. Al’izigire abantu, ci bwenene abanafunzi bage, anahâna obuzine bwage buzira kusezibwa erhi bo barhuma. (Yn. 13:1) Omu kuyiga olwiganyo lwa Yezu, ocihangane okuhikiriza ngasi mukolo ohâbirwe. Erhi wakaba orhamanyiri bwinja gurhi wagujira, obe mwirhohye onahûne bene wirhu bakuzire kiroho oburhabale. Orhakag’ijira hisungunu hyone kulusha ebi ohûnyirwe. (Rm. 12:11) Lubero n’oko, okaguyukiriza omu kumanya oku ‘Nyakasane [Yehova, NWT] ye ojîre wakolera, c’arhali bantu.’ (Kl. 3:23, Mashi Bible) Kobinali, orhaba mwimana, co cirhumire obe wa lugero n’okuyemera ngasi igosa wakajira.—Mig. 11:2.
OCIYIGIRIZE OBULENGA BWAKAKURHABALA
9. Bulya gurhi mwene wirhu ociri musole agwasirwe aciyigirize obulenga bwakamurhabala?
9 Ly’oba mulume Mukristu okuzire kiroho, oshinganine ociyigirize obulenga bwakakurhabala. Obo bulenga bwanakurhabala ly’oyemera mikolo milebe omu cigamba, ly’okola akazi kakakurhabala ocishibirire wene erhi kushibirira omulala, n’okuba n’obwîra bwinja haguma n’abandi. Rhuganirire bulenga bulebe muli obo bulenga bw’obulagirire.
Okusoma n’okuyandika bwinja kwakulerhera obunguke n’okubulerhera ecigamba (Olole ecifungo ca 10-11)
10-11. Gurhi mwene wirhu ociri musole akacilerheramwo obunguke n’okubulerhera ecigamba omu kuciyigiriza okusoma n’okuyandika bwinja? (Ennanga 1:1-3) (Olole n’enfoto.)
10 Ociyigirize okusoma n’okuyandika bwinja. Ebibliya edesire oku omuntu w’omwishingo onabêrwa ali muntu ogeza akasanzi ngasi lusiku omu kusoma Akanwa ka Nnâmahanga n’okukarhanyako bwenene. (Osome Ennanga 1:1-3.) Omu kusoma Ebibliya ngasi lusiku, anahikira aha amanya enjira ya Yehova y’okurhanya, n’oko kunamurhabale okurhanya bwinja n’okuyiga gurhi akakolesamwo amakanuni g’Amandiko omu kalamo kage. (Mig. 1:3, 4) Ecigamba cilagirire oku balume ba ntyo. Bulya gurhi?
11 Bene wirhu na bali birhu balagirire oku balume bagwerhe obuhashe bw’okuyigiriza n’okuhâna amahano kurhenga omu Bibliya. (Tt. 1:9) Erhi akaba wanasoma n’okuyandika bwinja, wanaba n’obuhashe bw’okurheganya ehotuba n’amashuzo gakarhabala abandi n’okuzibuhya obuyemere bwabo. Kandi wanaba n’obuhashe bw’okuyandika entanya z’obulagirire amango oli wayiga n’amango oli wayumvirhiza ehotuba oku ntimanano z’ecigamba n’oku ntimanano nkulu. Ebyo wayandikaga byanakurhabala okuzibuhya obuyemere bwawe we nnene n’okuha abandi omurhima.
12. Bici byakakurhabala ly’okaganira bwinja?
12 Ociyigirize obulenga bwinja bw’okuganira. Omulume Mukristu agwasirwe aciyigirize okuganira bwinja. Omulume oyish’iganira anayumvirhize n’okuhugûkwa entanya z’abandi n’oku bali baciyumva. (Mig. 20:5) Kandi anahugûkwa entanya z’abandi n’oku bali baciyumva kugerera izu lyabo, ebimanyiso by’obusu n’eby’omubiri. Orhakahasha okujira ntyo erhi akaba orhageza akasanzi haguma n’abandi. Erhi akaba ngasi mango onakolese ebyombo by’ecielekronike ly’oganira n’abandi, nk’omu kubayandikira emesaje kugerera etelefone erhi ordinatere, obuhashe bwawe bw’okuganiza abantu busu oku busu bwanazambanya. Co cirhumire, ocihangane okalonza obulyo bw’okuganiza abandi busu oku busu.—2 Yn. 12.
Kuli kwinja oyige obulenga bwakakurhabala ly’opata akazi (Olole ecifungo ca 13)
13. Bindi bici Omukristu ociri musole agwasirwe ayige? (1 Timoteyo 5:8) (Olole n’enfoto.)
13 Ociyigirize okucihikirigiza amalagirire gawe. Omulume Mukristu okuzire kiroho agwasirwe abe n’obuhashe bw’okuhikiriza amalagirire gage n’ag’omulala gwage. (Osome 1 Timoteyo 5:8.) Omu bihugo biguma na biguma, bene wirhu baciri misole banaciyigiriza mukolo mulebe kugerera b’ishe erhi wundi muntu w’omulala. Omu bindi bihugo, Omukristu ociri musole anaciyigiriza mukolo mulebe erhi bundi bulenga bulebe erhi anaciri oku masomo g’enyanya. Abe ntyo ko biba omu cihugo cinyu erhi nanga, kuli kwinja ociyigirize obulenga bwakakurhabala ly’opata akazi. (Ebj. 18:2, 3; 20:34; Ef. 4:28) Ojire okwawe koshi ly’omanyikana nka muntu okola bwenene onayukiriza omukolo gwage. Erhi wakajira ntyo, oko kwanarhuma waba na bulyo bunji bw’okupata akazi n’okukabêrana. Kandi ago morhere n’obulenga rhwaganiriraga gali ga bulagirire oku mulume Mukristu ly’ahash’ihikiriza eyindi mikolo omu mango gali embere. Lekagi rhuganirire mikolo miguma na miguma muli yo.
OCIRHEGANYE OKU MIKOLO Y’OMU MANGO GALI EMBERE
14. Gurhi mwene wirhu ociri musole akacirheganyamwo ly’aja omu mukolo gw’akasanzi koshi?
14 Omukolo gw’akasanzi koshi. Balume banji Bakristu bakuzire kiroho barhonderaga omukolo gw’akasanzi koshi erhi banaciri misole bwenene. Omukolo gw’obupainiya gunarhabale omulume ociri musole aciyigirize okukola bwinja haguma n’abantu bali lubero. Kandi gunamurhabale ly’apanga okukolesa bwinja ensaranga zage n’okurhakolesa nyinji kulusha ezi agwerhe. (Fl. 4:11-13) Enjira nyinja y’okurhondera omukolo gw’akasanzi koshi kuli kuba painiya murhabazi. Bantu banji banakole nka bapainiya barhabazi kasanzi kalebe, n’oko kunabarhabale lyo baba bapainiya b’akasanzi koshi. Omukolo gw’obupainiya eba njira y’okuja omu yindi mikolo y’akasanzi koshi, nk’omukolo gw’obubasi erhi okukolera oku beteli.
15-16. Gurhi mwene wirhu ociri musole akahikirizamwo ebihûnyirwe ly’aba murhabazi w’abagula erhi mugula?
15 Okuba murhabazi w’abagula erhi mugula. Abalume Bakristu bashinganine babe n’omuhigo gw’okuhikiriza ebihûnyirwe lyo bakolera bene wabo na bali babo nka bagula b’ecigamba. Ebibliya edesire oku omulume ocihangana ly’aba mugula “erhi mukolo mwinja acifinjire.” (1 Tm. 3:1) Embere omuntu abe mugula, agwasirwe ahikirize ebihûnyirwe ly’aba murhabazi w’abagula. Abarhabazi b’abagula banarhabale abagula omu njira nyinji z’obulagirire. Abagula n’abarhabazi b’abagula banakolere bene wabo na bali babo n’obwirhohye bananashangire n’obushiru omu mukolo gw’amahubiri. Bene wirhu baciri misole banahikiriza ebihûnyirwe lyo bakola nka barhabazi b’abagula ciru akaba bacigwerhe emyaka egarhi ka 17 na 19. N’omurhabazi w’abagula ohikirizize bwinja ebihûnyirwe anaba mugula ciru akaba acigwerhe myaka 20 yone erhi kulusha.
16 Gurhi wakahikirizamwo ebihûnyirwe ly’oba murhabazi w’abagula erhi mugula? Ebibliya ehânyire kone eliste y’amorhere olagirireko. Cikone, ago morhere gahûnyirwe goshi gayimangire oku Bibliya, oku buzigire bwawe kuli Yehova, oku mulala gwawe, n’oku cigamba. (1 Tm. 3:1-13; Tt. 1:6-9; 1 Pt. 5:2, 3) Ocihangane okuhugûkwa ngasi borhere buhûnyirwe. Ohûne Yehova oburhabale ly’ohikiriza ago morhere.c
Yehova alonzize omulume azigire mukage n’abana bage n’okushibirira amalagirire gabo g’omubiri, ag’ekandalala, na kulusha byoshi, ag’ekiroho (Olole ecifungo ca 17)
17. Gurhi mwene wirhu ociri musole akacirheganyamwo okuba mushamuka na cirhwe c’omulala? (Olole n’enfoto.)
17 Okuba mushamuka na cirhwe c’omulala. Nk’oku Yezu aderhaga, balume baguma na baguma Bakristu bakuzire kiroho banahige okubêra balamba. (Mt. 19:12) Cikone, erhi wakacishoga okuja omu buhya, wanaba n’eyindi mikolo y’okuba mushamuka na cirhwe c’omulala. (1 Kr. 11:3) Yehova alonzize omulume azigire mukage n’okushibirira amalagirire gage g’omubiri, ag’ekandalala n’ag’ekiroho. (Ef. 5:28, 29) Amorhere n’obulenga rhwaganiriraga oku murhondero gw’eci cigabi, nk’obuhashe bw’okurhanya, okuyeresa abakazi obukenge, n’okuba wa kulangalirwa, byanakurhabala ly’oba mulume mwinja. Waba ocirheganyize bwinja ly’ohikiriza emikolo yawe nka mushamuka na cirhwe c’omulala.
18. Gurhi mwene wirhu ociri musole akacirheganyamwo okuba ishe w’omulala?
18 Okuba ishe w’omulala. Enyuma z’okuja omu buhya, wanaba ishe w’omulala. Bici wakaciyigiriza kugerera olwiganyo lwa Yehova lugenda okuba ishe mwinja w’omulala? Hali masomo manji wakaciyigiriza. (Ef. 6:4) Yehova abwizire Omugala Yezu n’obwalagale oku amuzigire anamuyemire. (Mt. 3:17) Erhi wakahikira okuba ishe w’omulala, ngasi mango okayemeza abana bawe n’obwalagale oku obazigire. Okabavuga omunkwa ngasi mango oku bintu binja bahikirizize. B’ishe w’omulala bakulikira olwiganyo lwa Yehova banarhabale abana babo okuba balume na bakazi Bakristu bakuzire kiroho. Wanacirheganya okuba ishe mwinja w’omulala ene omu kuyereka abandi obuzigire omu mulala n’omu cigamba n’omu kubashibirira, omu kuciyigiriza akubayeresa oku oba obazigire n’oku baba ba ngulo ndarhi kuli we. (Yn. 15:9) Oko kwanakurhabala okuhikiriza emikolo wakaba nayo omu mango gali embere nka mushamuka na cirhwe c’omulala. Amango oli wahikiriza eyo mikolo, wanaba wa bulagirire kuli Yehova, oku mulala gwawe, n’omu cigamba.
BICIGI MWAJIRA?
Bakristu banji baciri misole bayigirizibwe n’Amandiko n’okukolesa ebi bayigaga omu kalamo kabo bahikire aha baba Bakristu bakuzire kiroho (Olole ecifungo ca 19-20)
19-20. Bici byarhabala bene wirhu baciri misole lyo baba balume Bakristu bakuzire kiroho? (Olole enfoto eri oku cijalada.)
19 Mwe bene wirhu muciri misole, murhabe balume Bakristu bakuzire kiroho ho n’aho. Mushinganine mucishoge enyiganyo nyinja z’okuyiga, okuba n’obuhashe bw’okurhanya, okuba ba kulangalirwa, okuba n’obulenga bwakamurhabala omu kalamo, n’okucirheganya oku mikolo y’amango gayisha.
20 Nkaba hali amango mwakaciyumva muzidohirwe omu kurhanya oku mikolo eri embere zinyu. Cikone mwanayihikiriza. Mukengere oku kobinali Yehova alonzize okumurhabala. (Iz. 41:10, 13) Na bene winyu na bali binyu omu cigamba bamurhabala. Erhi wakacihangana ly’ohikira okuba mulume Mukristu okuzire kiroho, akalamo kawe kanaba ka mwishingo na ka kurhimusa. Mwe bene wirhu muciri misole, rhuba rhumuzigire! Yehova amugishe bwenene amango muli mwacihangana ene lyo muhikira okuba balume Bakristu bakuzire kiroho.—Mig. 22:4.
LWIMBO 65 Fanya Maendeleo!
a Abalume bakuzire kiroho balagirirweko omu cigamba c’Ecikristu. Mw’eci cigabi, rhwaganirira gurhi mwe bene wirhu muciri misole mwakahikira okuba balume Bakristu bakuzire kiroho.
b Olole “Amahugûlo ga Luderho Luguma” omu cigabi c’embere.
c Olole ecitabu Tengenezo Yenye Kufanya Mapenzi ya Yehova, cig. 5-6.