ECIGABI C’OKUYIGA CA 2
LWIMBO 132 Rhwamaba Mubiri Muguma!
Oku Abalume Bakayeresamwo Bakabo Obuzigire n’Obukenge
“Ninyu mwe balume, . . . mubakenge.”—1 PT. 3:7.
EBI ECI CIGABI CISEGIZE
Oku omulume akayeresamwo mukage obuzigire n’obukenge omu nderho n’omu bijiro.
1. Cirhumire ciguma cihi carhumaga Yehova arhondeza omupango gw’obuhya?
YEHOVA aba “Mungu w’obushagaluke,” anaba alonzize nirhu rhube n’obushagaluke. (1 Tm. 1:11, NWT) Arhuhîre ngalo nyinji lyo zirhurhabala rhushagalukire akalamo. (Yk. 1:17) Ngalo nguma muli zo buba buhya. Erhi omulume n’omukazi bajira obuhya, banajire eciragane c’okuzigirana n’okukengana. Okugendekera baseza obuzigire bwabo kwanabalerhera omwishingo gw’okunali.—Mig. 5:18.
2. Bici biri byaba omu mahya manji ene?
2 Eby’okugayisa, omw’igulu ly’ene, balume na bakazi banji barhôline banayibagire ebiragane bajiraga olusiku lw’obuhya bwabo. N’oko kunarhume barhaba n’omwishingo. Raporo nguma yazindig’ihânwa n’Ikubuliro ly’omw’Igulu Lyoshi ly’Amagala Nkana (OMS) eyerekine oku balume banji banakashurha bakabo, banakababwira enderho mbi, n’okubajirira omu zindi njira mbi. Omulume ojira ntyo nkaba anajirira mukage omu njira y’obukenge amango bali embere z’abandi bantu, cikone enyuma z’aho amujirire kubi amango bali aha mwabo. Kandi mahya manji ganabe n’amazibu erhi akaba omulume anakalola epornografi.
3. Nkaba bintu bihi byakarhuma omulume ajirira mukage kubi?
3 Bici birhuma nkaba balume baguma na baguma bajirira bakabo kubi? Nkaba banaba baleragwa n’ishe wali muminya, enyanya z’oko, banarhanya oku kurhali kubi okujirira bakabo omu njira y’obuminya. Abandi banashumibwa n’enkomedu z’aha balama zigendekeza entanya mbi z’okuderha oku “omulume ohamagirwe mulume,” agwasirwe akolese emisi ly’ayereka mukage oku ye shefu. Abandi balume barhayigirizibagwa okucihasha lugenda oku bali baciyumva, kuhiramwo n’oburhe bwabo. Hali n’abandi balume babire n’entanya zirhashinganini lugenda abakazi n’ecijiro c’obuhya enyanya z’okulola epornografi ngasi mango. Kandi, hali eraporo ziyerekine oku endwala y’e COVID-19 yayushwire ago mazibu. Okuderha okuli, nta kaguma mw’ebyo bintu kahîre omulume oluhuma lw’okujirira mukage kubi.
4. Bici abalume Bakristu bashinganine bacilangeko, na bulya gurhi?
4 Abalume Bakristu bashinganine bacilange lyo barhag’iba n’entanya mbi lugenda abakazi.a Bulya gurhi? Cirhumire ciguma kuli kuba, kanji-kanji entanya omuntu agwerhe zo zimushumya okujira bintu bilebe. Entumwa Paolo yarhonzire Abakristu bashîge amavurha b’e Roma, omu kuderha ntya: “Mumanye mwakacigererakwo er’igulu [mwankabumbwa n’er’igulu, NWT].” (Rm. 12:1, 2) Erhi Paolo ayandikira Abaroma, bibonekine oku eco cigamba cal’ikola cigwerhe kasanzi kalebe ciri ho. Ciru akaba ntyo, enderho za Paolo ziyerekine oku bantu baguma na baguma ba mw’eco cigamba, bacir’igendekire bashumibwa n’enkomedu n’entanya z’igulu. Co carhumaga abahanûla bashanje entanya zabo n’olugenzi lwabo. Kobinali ery’ihano liyerekire abalume Bakristu ene. Eby’okugayisa, kuli kubona oku balume baguma na baguma bashumibwe n’entanya z’er’igulu na ciru bajirire bakabo kubi.b Gurhi Yehova alonzize omulume akajirira mukage? Ishuzo liri omu lwandiko lw’omusingi lw’eci cigabi.
5. Kushimbana na 1 Petro 3:7, gurhi omulume ashinganine ajirire mukage?
5 Osome 1 Petro 3:7. Yehova arhegesire abalume bayerese bakabo obukenge. Omulume okenzire mukage, anamujirire omu njira y’olukogo na ya buzigire. Mw’eci cigabi, rhwaganirira gurhi omulume akayerekanamwo oku akenzire mukage. Cikone lekagi rhurhang’iganirira olugenzi lwakayerekana oku omulume abulire mukage obukenge.
OYAKE OLUGENZI LW’OKUBULIRA MUKAWE OBUKENGE
6. Gurhi Yehova aciyumva lugenda abalume bajirira bakabo omu njira y’obuminya? (Abakolosi 3:19)
6 Omulume arhashinganini akashurha mukage. Yehova aba ashombire ngasi muntu oba muminya. (Enna. 11:5) Aba ashombire ciru bwenene abalume bajirira bakabo kubi. (Mal. 2:16; osome Abakolosi 3:19.) Kushimbana n’olwandiko lw’omusingi lw’eci cigabi, ko kuderha, 1 Petro 3:7, erhi akaba omulume arhajirira mukage bwinja, oko kwanashereza obwîra bwage haguma na Mungu. Yehova arhankayumvirhiza amasala gage.
7. Kushimbana n’Abefezi 4:31, 32, nderho za gurhi abalume bashinganine bayake? (Olole n’“Amahugûlo ga Luderho Luguma.”)
7 Omulume arhashinganini akabwira mukage enderho mbi. Balume baguma na baguma banaganize bakabo omu njira y’obukali n’okuderha enderho zakabayagaza bwenene. Cikone Yehova aba ashombire “enongwe, obukunizi, akadali, ebijaci.”c (Osome Abefezi 4:31, 32.) Anayumve ngasi kantu. Oku omulume aganiza mukage ciru n’amango bali bone omu mwabo, kuba kwa bulagirire kuli Yehova. Omulume oganiza mukage omu njira y’obukali anashereze obuhya bwage ciru n’obwîra bwage haguma na Mungu.—Yk. 1:26.
8. Gurhi Yehova aciyumva lugenda epornografi, na bulya gurhi?
8 Omulume arhashinganini alole epornografi. Gurhi Yehova aciyumva lugenda epornografi? Aba ayishombire. Co cirhumire omulume olola enfoto ncafu, anashereze obwîra bwage haguma na Yehova ananabulire mukage obukenge.d Yehova ahûnyire omulume abêre mwishwekerezi kuli mukage, arhali omu bijiro mwone cikone kandi n’omu ntanya. Yezu adesire oku omulume olola omukazi omu njira y’okucifinja ye, anabe “emurhima” erhi amuhushirekwo.e—Mt. 5:28, 29.
9. Bulya gurhi Yehova anagaye erhi omulume akaseza mukage okujira ecijiro c’obuhya c’okumubulira obukenge?
9 Omulume arhashinganini aseze mukage okujira ecijiro c’obuhya c’okumubulira obukenge. Balume baguma na baguma banaseze bakabo okujira ebijiro by’obuhya by’okubabulira obukenge na kandi byakacafula ezamiri zabo erhi kurhuma baciyumva barhazigirwi. Yehova aba ashombire olugenzi lwa ntyo lw’okucikaliza n’okurhashibirira abandi. Yehova alonzize omulume azigire mukage n’okukenga oku ali aciyumva omu kandalala. (Ef. 5:28, 29) Gurhigi erhi akaba omulume Mukristu akola abulira mukage obukenge, erhi akola amujirira omu njira y’obuminya, erhi akola alola epornografi? Gurhi akashanjamwo entanya zage n’ebijiro byage?
OKU OMULUME AKAHIMAMWO OLUGENZI LW’OKUBULIRA MUKAGE OBUKENGE
10. Gurhi abalume bakayungukamwo kugerera olwiganyo lwa Yezu?
10 Bici byakarhabala omulume wajire omu buhya ly’ahima olugenzi lw’okujirira mukage omu njira y’obuminya n’okumubulira obukenge? Anacihangana okuyiga olwiganyo lwa Yezu. Ciru akaba Yezu arhajaga omu buhya, oku akag’ijirira abanafunzi bage luli lwiganyo luyerekine gurhi omulume ashinganine ajirire mukage. (Ef. 5:25) Kwa lwiganyo, olole ebi abalume bakaciyigiriza kugerera oku Yezu akag’ijirira entumwa n’oku akag’iziganiza.
11. Gurhi Yezu akag’ijirira entumwa zage?
11 Yezu akag’ijirira entumwa zage omu njira y’olukogo na ya bukenge. Nta mango abajirire n’obukali erhi kubabonerera. Ciru akaba Yezu ye wali Nnawabo, nta lusiku aciyumvirhe oku ashinganine abayerese oku ye bakulire. Lubero n’oko, Yezu abakolire n’obwirhohye. (Yn. 13:12-17) Abwizire abanafunzi bage ntya: ‘Munyigirekwo, bulya ndi mutûdu na mwirhohye w’omurhima na mwayish’ibona irhamuko ly’obuzine bwinyu.’ (Mt. 11:28-30) Obwine oku Yezu ali muntu mutûdu. Omuntu mutûdu arhaba muzamba. Lubero n’oko, ajira emisi y’ekandalala y’okucihasha. Erhi bakamuhalalira, anagendekere arhulirira n’okucihasha.
12. Gurhi Yezu akag’iganiza abandi?
12 Yezu akag’ikolesa enderho z’okurhuliriza na za kurhuma abandi baciyumva bwinja. Arhakag’iganiza abanafunzi bage omu njira y’obukali. (Lk. 8:47, 48) Ciru n’amango abantu bakag’imuhagalika bamujaciraga n’okulonza okumuhalalira, “arhagalulaga bijaci.” (1 Pt. 2:21-23) Ciru hali n’amango Yezu akag’icihulikira ahali h’okushuza omu njira y’obukali. (Mt. 27:12-14) Olo luli lwiganyo lwinja bwenene oku balume Bakristu bajire omu buhya!
13. Nk’oku olwandiko lwa Mateyo 19:4-6 ludesire, gurhi omulume ‘akacishwekerakwo mukage’? (Olole n’enfoto.)
13 Yezu arhegesire abalume bajire omu buhya, babêre bishwekerezi kuli bakabo. Agalukire enderho z’Ishe waderhaga oku, omulume wajire omu buhya ashinganine “acishwekerekwo mukage.” (Osome Mateyo 19:4-6.) Oluderho lw’Ecigiriki lwahindwirwe “kucishwekerako” lukolesibwe mw’olo lwandiko, luhugwîre luderho oku lundi “kunanika.” Co cirhumire, ifundo ly’obuhya egarhi k’omulume n’omukazi lishinganine libe lisezire bwenene nka kuno bananisirwe haguma. Ifundo lyabo lirhakashwekulwa buzira bombi okuyagalika. Omulume ohikire okuba n’ifundo lya ntyo haguma na mukage, anayake okulola epornografi ya ngasi lubero. Buzira kulegama, anayase amasu gage lyo “garhagihenekera ebya busha [ebirhagwerhi bunguke boshi-boshi].” (Enna. 119:37) Muli ntyo, anajire eciragane n’amasu gage omu kurhalola omukazi yeshi-yeshi orhali mukage omu njira y’okucifinja ye.—Ayu. 31:1.
Mulume muguma mwishwekerezi wajire omu buhya, amalahira okulola epornografi (Olole ecifungo ca 13)g
14. Bintu bihi omulume ojirira mukage kubi ashinganine ajire ly’akubûla obwîra bwage haguma na Yehova na haguma na mukage?
14 Hali bintu binji omulume ojirira mukage omu njira y’obuminya erhi omubwira enderho mbi ashinganine ajire ly’akubûla obwira bwage haguma na Yehova na haguma na mukage. Bintu bihi ebyo? Burhangiriza, ashinganine ahugûkwe oku ebi ali ajira biri bibi. Nta kantu kaba kafulisirwe omu masu ga Yehova. (Enna. 44:21; Muh. 12:14; Hb. 4:13) Bwa kabirhi, ashinganine aleke okujirira mukage kubi n’okushanja olugenzi lwage. (Mig. 28:13) Bwa kasharhu, anabwire mukage na Yehova kunganaci abagokize, ananabahûne obwonjo kurhenga oku murhima. (Ebj. 3:19) Ashinganine asemberere Yehova ly’aba n’obulonza bwinja bw’okushanja n’okumuhûna amurhabale ly’akacihasha omu ntanya, omu nderho n’omu bijiro byage. (Enna. 51:10-12; 2 Kr. 10:5; Fl. 2:13) Bwa kani, ashinganine ajire kushimbana n’amasala gage omu kuciyigiriza okushomba obuminya bwa ngasi lubero na ngasi nderho mbi. (Enna. 97:10) Bwa karhanu, ashinganine alonze buzira kulegama oburhabale bwa balungere bw’obuzigire b’omu cigamba. (Yk. 5:14-16) Bwa kalindarhu, ashinganine arhôle omupango gwamurhabala ly’ayaka okuba n’olugenzi lwa ntyo omu gandi mango. Ebyo bintu byo n’ebyo byo omulume wajire omu buhya olola epornografi naye ashinganine ajire. Yehova agisha obushiru ali ajira ly’ashanja olugenzi lwage. (Enna. 37:5) Cikone arhali ebyo byone omulume wajire omu buhya ashinganine ajire ly’ayaka olugenzi lw’okubulira mukage obukenge. Kandi ashinganine aciyigirize okuyereka mukage obukenge. Gurhi akajiramwo ntyo?
OKU WAKAYERESAMWO MUKAWE OBUZIGIRE N’OBUKENGE
15. Gurhi omulume akayeresamwo mukage obuzigire?
15 Oyerese mukawe oku omuzigire. Bene wirhu baguma na baguma bajire omu buhya bagwerhe omwishingo, bajira enkomedu y’okujira kantu kalebe ngasi lusiku lyo bayeresa bakabo kunganaci baba babazigire. (1 Yn. 3:18) Omulume anayeresa mukage obuzigire omu kujira ebintu bilembu, nk’okumugwarha okuboko erhi okumuhobera n’obushagaluke. Anamuyandikira emesaje n’okumubwira ntya: “Ndi nakudula” erhi “Gurhi n’omulegerege?” Kasanzi oku kandi, anamuyeresa obuzigire omu kumuyandikira oku karatasi enderho acishozire bwinja ziyerekine kunganaci aba amuzigire. Erhi kandi anamulerhera ebiryo asima bwenene. Erhi omulume ajira ebyo bintu, anayerese mukage obukenge n’okuzibuhya obuhya bwabo.
16. Bulya gurhi omulume ashinganine akakunga mukage?
16 Oyerese mukawe oku aba wa bulagirire bwenene kuli we. Omulume okenga mukage anamumanyise bulya gurhi aba wa ngulo ndarhi kuli ye, ananamujire akaciyumva bwinja. Njira nguma ajiramwo ntyo, kuba kukengera okumuyeresa oku amuvuzire omunkwa kw’ebi ali ajira byoshi ly’amulunga okuboko. (Kl. 3:15) Erhi omulume akunga mukage kurhenga oku murhima, omurhima gwa mukage gunashagaluke. Erhi omulume abwira mukage ebi aba amusimire, mukage anaciyumve ali omu bulanzi, azigirwe, anakenzirwe.—Mig. 31:28.
17. Gurhi omulume akayeresamwo mukage obukenge?
17 Obe wa lukogo na wa bukenge. Omulume ozigira mukage anamubone oku aba wa ngulo ndarhi ananamusime. Anamubone oku eri ngalo nyinja bwenene kurhenga emwa Yehova. (Mig. 18:22; 31:10) Oko kunarhume amujirira omu njira y’olukogo na ya bukenge, ciru n’omu kasanzi k’omu buhya bwabo k’okuyeresanya amasime bwenene amango bali bone. Arhankamuseza bajire ecijiro c’obuhya amu njira yarhuma aciyumva kubi, y’okumubulira obukenge, erhi yakacafula ezamiri yage.f Omulume naye ashinganine acihangane okugendekera aba n’ezamiri ecîre embere za Yehova.—Ebj. 24:16.
18. Bici abalume bajire omu buhya bashinganine bahige okujira? (Olole n’ecisanduku cidesire “Njira Ini Omulume Wajire omu Buhya Ayeresamwo Mukage Obukenge.”)
18 Mwe balume, muyemere n’obwalagale oku Yehova anabone ananashagalukire obushiru bwinyu bw’okukenga bakinywe omu bigabi byoshi by’akalamo kinyu. Ohige okukenga mukawe omu kuyaka olugenzi lw’okumubulira obukenge n’omu kuba wa lukogo, wa bukenge kuli ye, n’omu kumuzigira. Omu kujira ntyo, wamuyeresa oku omuzigire onali wamubona oku ali wa bulagirire kuli we. Oyerese mukawe obukenge, na ntyo walanga obwîra bwawe bw’obulagirire bwenene bulushire ngasi bundi bwîra boshi wakaba nabo, ko kuderha, obwîra bwawe haguma na Yehova.—Enna. 25:14.
LWIMBO 131 “Eci Nyamuzinda Ahumanyagya”
a Abalume bajire omu buhya bayunguka omu kusoma ecigabi cidesire “K’Onajirire Abakazi nk’Oku Yehova Abajirira?” ciri omw’Ilabiro ly’Akalalizi ly’omu Mwezi gwa 1, 2024.
b Abantu bajirirwa kubi aha mwababwe banayunguka omu kusoma omwanzi gudesire “Msaada kwa Wanaotendewa kwa Jeuri Nyumbani,” guli omu cigabi “Eyindi Myanzi” oku jw.org n’omu JW Library®.
c AMAHUGÛLO GA LUDERHO LUGUMA: “Enderho mbi” zihiziremwo okuyirikana amazino g’ebijaci, enderho z’obukali, n’enderho z’okugayaguza owundi. Ngasi nderho z’okuyagaza z’okubula obukenge, erhi z’okujacira, ziri nderho mbi.
d Olole oku jw.org n’omu JW Library omwanzi gudesire “Ponografia Inaweza Kuiharibu Ndoa Yako.”
e Omukazi iba alola epornografi anayunguka omu kusoma ecigabi cidesire “Gurhi Wakajira Erhi Akaba Balo Analole Epornografi?” ciri omw’Ilabiro ly’Akalalizi ly’Omwezi gwa 8, 2023.
f Ebibliya erhahânyiri amahugûlo lugenda njira ehi y’okujira ecijiro c’obuhya egarhi k’omulume n’omukazi bajire omu buhya eri nyinja erhi eri mbi. Omulume n’omukazi Bakristu bajire omu buhya bagwasirwe barhôle emihigo eyerekine oku bahizire okukenga Yehova, okukengana bone na nene, n’okugendekera baba n’ezamiri ecîre. Omu kanga kanji, omulume n’omukazi bajire omu buhya barhashinganini baganirire abandi eco cigabi c’akalamo kabo k’obuhya cibayerekire bonene.
g AMAHUGÛLO G’ENFOTO: Mwene wirhu muguma okola n’ababo banya-kazi barhali Bahamirizi, bali balonza alole omu jurnale yabo y’eby’epornografi.