Hêrezi Yehova Irenge

1. Bici bantu banji bali basegezako obwenge ene?

NKABA wabwine oku bantu banji ene bali ba kucikaliza bwenene. Kwa lwiganyo, bantu banji banacikunge bwenene kugerera esite z’e Enternete z’okuganira na bantu banji, omu kujira abandi babasegezeko obwenge n’okubusegeza kw’ebi bali bahikiriza. Cikone, bantu basungunu ene bali baha Yehova Nnâmahanga irenge. Mw’eci cigabi, rhwaganirira bici okuha Yehova irenge kuhugwîre na bici bishinganine birhushumye okujira ntyo. Kandi, rhwayiga gurhi rhwakahamwo Mungu irenge ashinganine ahâbwe, na gurhi yene ahamwo izino lyage irenge hano hofi-hofi.

BICI OKUHA YEHOVA IRENGE KUHUGWÎRE?

2. Gurhi Yehova ayerekinemwo irenge lyage oku Ntondo Sinayi? (Olole n’enfoto.)

² Irenge byo bici? Omu Bibliya, oluderho “irenge” lwanaganirira ngasi kantu kakajira muntu mulebe abe alengerire. Kasanzi kasungunu enyuma z’ishanja ly’Israheli okurhenzibwa omu buja e Misri, Yehova ayerekana irenge lyage omu njira y’okusomeza. Obone omu bukengere bwawe ebi: Emiliyoni y’Abaisraheli barhimanine oku murhondero gw’Entondo Sinayi lyo barhimanana na Mungu wabo. Ecitû cinene bwenene cibwikire entondo. Ho n’aho, omusisi munene gw’idaho nkaba guli nk’ogulerhwa n’evolka guli gwadunda idaho aha bayimanzire, emilazo, emikungulo n’izu ly’emishekera lyakahusa amarhwiri liri lyayumvikana omu malunga. (Lub. 19:16-18; 24:17; Enna. 68:8) Orhanye kunganaci Abaisraheli basomirwe bwenene erhi Yehova ayerekana obo buhashe bw’irenge lyage.

3. Bici okuha Yehova irenge kuhugwîre?

³ Cikone, gurhigi lugenda bene bantu? Ka rhwanalerhera Yehova irenge? Neci rhwanamulerhera lyo. Njira nguma rhuhamwo Yehova irenge kuba kubwira abandi lugenda obuhashe bwage bw’okusomeza n’amorhere gage minja bwenene. Kandi, rhunahe Mungu irenge erhi rhuyerekana oku ye shinganine ahâbwe obukuze enyanya z’ebintu rhwahikirizize oku buhashe bwage. (Iz. 26:12) Mwami Daudi luli lwiganyo lumanyikine bwenene lw’omuntu wahîre Yehova irenge. Omw’isala ajiraga embere z’ishanja ly’Israheli, Daudi abwira Mungu ntya: “Yagirwa, wêne we nn’obukulu n’obuhashe, irenge, okurhwaliha n’obwami w’e nnabyo, byoshi omu mpingu na hano igulu bibâ byawe.” Enyuma za Daudi okushwinja isala lyage, “boshi bànacivuga Nyakasane Nyamuzinda . . . omunkwa [bakuza Yehova, NWT].”​—1 Nga. 29:11, 20.

4. Gurhi Yezu ahîremwo Yehova irenge?

⁴ Amango Yezu ali hano igulu, ahîre Ishe irenge omu kuyemera n’obwalagale oku ye wali Nshôko y’ebisomerine akag’ijira. (Mk. 5:18-20) Kandi, Yezu alerhire Yehova irenge kugerera oku akag’iganira lugenda Ishe n’oku akag’ijirira abandi. Mango maguma, Yezu akag’iyigiriza omu sinagogi. Omu bantu bakag’imuyumvirhiza mwali mukazi muguma wagwerhe myaka 18 aliko omuzimu. Oyo muzimu al’imugonyire na ntyo arhakahashire okuyinamuka. Ebyo byali bya kubabaza bwenene! Yezu ashumibwa n’obwonjo, ayegerera oyo mukazi anamubwira ntya omu njira y’olukogo: “Ewe nyoko, wamafuma obuzamba bwawe!” Amulambulirako amaboko gage, na ho n’aho oyo mukazi ayinamuka “akuza Nyamuzinda,” avuga omunkwa okuba Yehova anajijire acib’iba n’amagala minja n’emisi! (Lk. 13:10-13) Oyo mukazi agwerhe ecirhumire cinja c’okuha Yehova irenge, na nirhu ko n’oko.

BICI BIRHUSHUMYA OKUHA YEHOVA IRENGE?

5. Birhumire bihi rhugwerhe by’okukenga Yehova?

⁵ Rhunahe Yehova irenge bulya rhuba rhumukenzire bwenene. Rhugwerhe birhumire binji by’okumukenga. Yehova ye ogala byoshi, ajira obuhashe burhankagerwa. (Enna. 96:4-7) Obwenge bwage bunji bwenene bunabonekane n’obwalagale omu bintu ajijire. Ye Nshôko y’obuzine ye narhuha ebi rhulagirireko byoshi lyo rhulama. (Maf. 4:11) Aba mwishwekerezi. (Maf. 15:4) Ngasi ebi ajira binamubêre, n’ensiku zoshi anahikirize ebiragane byage. (Yoz. 23:14) Co cirhumire, rhurhankasomerwa okubona omulebi Yeremiya adesire ntya okubiyerekire Yehova: “Omu karhi k’abanyabumanye [banya-bwenge] boshi b’omw’igulu, n’omu mami gabo goshi ntaye oli akawe”! (Yer. 10:6, 7, Mashi Bible) Kobinali, rhugwerhe ebirhumire binja by’okukenga Larha wirhu w’omu mpingu. Cikone arhali kukenga kone rhukenga Yehova, kandi rhuba rhumuzigire.

6. Bulya gurhi rhuba rhuzigire Yehova?

⁶ Rhunahe Yehova irenge bulya rhuba rhumuzigire bwenene. Orhanye oku morhere malebe ga Yehova garhuma rhwamuzigira. Aba wa lukogo na wa bwonjo. (Enna. 103:13; Iz. 49:15) Erhi rhubabala naye anababale. (Zak. 2:8) Anajire kube kulembu kuli rhwe okumuyegera nka mwîra. (Enna. 25:14; Ebj. 17:27) Anaba mwirhohye; ‘anayuname kurheng’enyanya alola idako, abone ebiri empingu n’en’igulu. Ye rhenza omuzamba omu katulo.’ (Enna. 113:6, 7) Gurhi omuntu yeshi-yeshi akabulaga bwaha Nnâmahanga wirhu mukulu irenge?​—Enna. 86:12.

7. Bulyo buhi bwago-bwago rhugwerhe?

⁷ Rhunahe Yehova irenge bulya rhuba rhulonzize abandi bamumanye. Bantu banji barhaba bamanyire okuli lugenda Yehova. Bulya gurhi? Bulya Shetani ahusize obukengere bwabo, omu kulumiza emyanzi midarhi y’obunywesi okubimuyerekire. (2 Kr. 4:4) Shetani ayemezize abantu oku Yehova aba wa kucihôla, arhashibirira abantu, n’oku ye lerha amalibuko manji gali omw’igulu. Cikone, rhumanyire okuli lugenda Nnâmahanga wirhu! Rhugwerhe obulyo bw’okurhabala abandi bahugûkwe kunganaci aba Mungu mwinja bwenene n’okumulerhera irenge. (Iz. 43:10) Olulanga lwa 96 lusegize okuha Yehova irenge. Omu kasanzi rhwaba rhuli rhwaganirira nderho nguma na nguma z’omu nderho zalongozibagwa n’iroho litagatifu ziri mw’olo lulanga, orhanye lugenda enjira wakahamwo Yehova irenge ashinganine ahâbwe.

GURHI RHWAKAHAMWO YEHOVA IRENGE ASHINGANINE?

8. Njira nguma ehi rhwakahamwo Yehova irenge? (Ennanga 96:1-3)

⁸ Osome Ennanga 96:1-3. Rhwanaha Yehova irenge kugerera ebi rhuderha okubimuyerekire. Mw’eyo milongo, abakozi ba Yehova babwizirwe ‘bayimbire Nyakasane [Yehova, NWT],’ ‘bakuze izîno lyage,’ ‘bakazimanyisa bwaca bwayira oku kuciza aciza,’ n’‘irenge lyage baliganîrire omu karhî k’ab’emahanga.’ Ezo zoshi ziri njira rhwakahamwo Larha wirhu w’empingu irenge kugerera enderho zirhu. Abayahudi bishwekerezi n’Abakristu b’omu kagana karhanzi barharhindiraga okuganirira abandi lugenda ebintu binja Yehova abajirire n’okuhalira irenge lyage. (Dan. 3:16-18; Ebj. 4:29) Gurhi nirhu rhwakajiramwo ntyo?

9-10. Bici ebyahikiraga Angelena bikuyigirizize? (Olole n’enfoto.)

⁹ Rhuganirire ebyahikiraga Angelena,a mwali wirhu muguma olama omu États-Unis. Ahalire irenge ly’izino lya Yehova emunda akag’ikola. Ye nka munya-kazi muhyahya, Angelena alalikwa haguma n’abandi banya-kazi bahyahya oku ntimanano ngasi munya-kazi muhyahya ahâbagwako obulyo bw’okuganirira ababo banya-kazi lugenda akalamo kage. Angelena arheganya nfoto ndebe akayerekine, ziyerekine omwishingo ajira omu kuba muguma w’omu Bahamirizi ba Yehova. Embere akasanzi ka Angelena k’okuderha kahike, owabo munya-kazi arhondera aganira omu kuderha oku aleragwa n’ababusi Bahamirizi ba Yehova. Arhondera aderha kubi lugenda obwemere bwirhu. Angelena adesire ntya: “Naciyumva kubi bwenene. Cikone narhanya ntya: ‘Ka naleka muntu mulebe anywerhere Yehova? Erhi nacihira eluhya muhalire?’”

¹⁰ Erhi owabo munya-kazi ayusa aderha, Angelena ajira isala ly’ekandalala lya duba-duba. Enyuma z’aho amubwira omu njira y’olukogo ntya: “Akalamo kani kashushine n’akawe. Nani nalezirwe n’ababusi Bahamirizi ba Yehova, na kuhika buno, ncigendekire naba ye.” Ciru akaba omurhima gwage gwakag’idurha-durha, Angelena arhulirira, ayereka ababo banya-kazi enfoto aliko haguma n’abîra bali bakolera Yehova n’omwishingo anahalira obwemere bwage omu njira y’obukenge. (1 Pt. 3:15) Malehe gahi oko kwadwirhe? Erhi Angelena ayusa aganira, oyo mulume ali amashanja entanya zage. Ciru anaderha bintu bilebe binja bwenene acibwinire amango akag’icilunga haguma n’Abahamirizi ba Yehova erhi aciri musole. Angelena adesire ntya: “Yehova ashinganine ahalirwe. Luli lukengwa okuderha lugenda izino lyage.” Nirhu rhugwerhe olukengwa lw’okukuza Yehova n’okumuha irenge, ciru n’amango abandi bali bamugayaguza.

11. Omu kalamo kabo, gurhi abakozi b’okuli ba Yehova bakulikiremwo akanuni kali omu Ennanga 96:8?

¹¹ Osome Ennanga 96:8. Rhwanaha Yehova irenge kugerera ebintu birhu binja. Ensiku zoshi abakozi b’okuli ba Yehova bamukuzize mw’eyo njira. (Mig. 3:9) Kwa lwiganyo, Abaisraheli bahânyire emicango lyo bayubaka n’okushibirira ehekalu. (2 Bam. 12:4, 5; 1 Nga. 29:3-9) Banafunzi balebe ba Kristu bamukolire ye n’entumwa zage kugerera “ebirugu byabo.” (Lk. 8:1-3) Abakristu b’omu kagana karhanzi nabo, bahânyire emicango y’oburhabale omu mango g’obuhanya kuli bene wabo na bali babo b’ekiroho. (Ebj. 11:27-29) Ene, nirhu rhwanaha Yehova irenge kugerera oburhabale rhuhâna buzira kusezibwa.

12. Gurhi oburhabale bwirhu bulerheramwo Yehova irenge? (Olole n’enfoto.)

¹² Rhuganirire lwiganyo luguma luyerekine gurhi oburhabale bwirhu bulerheramwo Yehova irenge. Raporo nguma y’omu mwaka gwa 2020, yaganirire amazibu galerhagwa n’ecanda ciliri omu cihugo c’e Zimbabwe. Emiliyoni y’abantu yali hofi bufâ n’ishali kuhiramwo na mwali wirhu muguma ohamagalwa Prisca. Ciru akaba ako kanga kali kazibu bwenene, Prisca agendekeza enkomedu yage y’okuhubiri ngasi Lwa Kasharhu na Lwa Karhanu, ciru n’omu mango g’okuhinga. Abalungu bage bakamushekera enyanya z’okuba akag’ija omu mahubiri ahali h’okuja ebw’ishwa, bakamubwira ntya: “Wafâ n’ishali.” Prisca akag’ibashuza buzira karhinda ntya: “Nta mango Yehova asag’ilekerera abakozi bage.” Enyuma za kasanzi kasungunu, Prisca, ahâbwa oburhabale bwahânagwa n’ikubuliro lirhu. Kugerera oburhabale ngasi muguma wirhu ahâna, Prisca ahâbwa ebiryo n’ebindi bintu al’ilagirireko. Abalungu ba Prisca basomerwa bwenene banamubwira erhi, “Nta mango Mungu asag’ikulekerera, co cirhumire nirhu rhulonzize rhuyige binji okubimuyerekire.” Bantu nda omu balungu bage, barhondera baja oku ntimanano z’ecigamba.

13. Gurhi olugenzi lwirhu lwakalerheramwo Yehova irenge? (Ennanga 96:9)

¹³ Osome Ennanga 96:9. Rhwanaha Yehova irenge kugerera olugenzi lwirhu. Abakuhani bakag’ikola omu hekalu ya Yehova, bal’ishinganine babe bacîre omu njira y’omubiri. (Lub. 40:30-32) Ciru akaba ntyo, akantu k’obulagirire bwenene kulusha okuca omu njira y’omubiri, kuli kuca omu lugenzi. (Enna. 24:3, 4; 1 Pt. 1:15, 16) Rhushinganine rhukole bwenene lyo rhuhogola “omuntu wa mîra,” ko kuderha enkomedu n’olugenzi lurhacîri n’‘okucihundikira [omuntu] muhyahya’ ko kuderha, enjira y’okurhanya n’ey’okujira ebintu eyerekine amorhere minja bwenene ga Yehova. (Kl. 3:9, 10) Kugerera oburhabale bwa Yehova, ciru n’abantu bagwerhe olugenzi lubi bwenene na baminya bwenene banashanja n’okuyambala omuntu muhyahya.

14. Bici oyizire kugerera olwiganyo lwa Jack? (Olole n’enfoto.)

¹⁴ Orhanye oku lwiganyo lwa Jack, wali muntu muminya na mubi bwenene washembagwa izino, Muzimu. Enyanya z’amabi ajiraga, Jack atwirwa olubanja lw’olufû. Cikone, omu kasanzi Jack akag’ilinda oku olusiku anigwa lwahika, ayemera okuyiga Ebibliya haguma na mwene wirhu wakag’ilambagirira eprizo al’ishwekirwemwo. Ciru akaba Jack agwerhe akalamo kabi embere, ahogola obumuntu bwage bwa mîra, n’omu kasanzi kalebe ahikiriza ebihûnyire ly’abatizibwa. Jack ashanja bwenene na ntyo, erhi olusiku lwage lw’okunigwa luhika, baguma na baguma omu balanzi b’eprizo bavugumula emirenge erhi bali bamusengaruka. Musoda muguma wakag’ikola mw’eyo prizo, aderha ntya: “Kasanzi kalebe, Jack ali muntu muminya bwenene kulusha abandi boshi mw’eyi prizo, buno akola ali muguma w’omu bantu binja bwenene.” Omu mugobe gwakulikiraga okunigwa kwa Jack, bene wirhu bagalukaga lyo balongoza entimanano omu prizo, barhimanana n’owundi mushwekwa wayishaga oku ntimanano oburhangiriza. Bici byamushumyagya okuja oku ntimanano? Asomirwe n’oku Jack ashanjaga olugenzi analonza amanye ebi ashinganine ajire ly’aharamya Yehova. Bibonekine n’obwalagale oku olugenzi lwirhu lwanalerhera Larha wirhu w’empingu irenge!​—1 Pt. 2:12.

GURHI YEHOVA AHAMWO IZINO LYAGE IRENGE HANO HOFI-HOFI?

15. Gurhi Yehova ahamwo loshi-loshi izino lyage irenge hano hofi-hofi? (Ennanga 96:10-13)

¹⁵ Osome Ennanga 96:10-13. Eyo milongo mizinda y’Olulanga lwa 96, eganirire Yehova nka muciranuzi na Mwami mushinganyanya. Gurhi Yehova ahamwo izino lyage irenge hano hofi-hofi? Kugerera oku atwa emanja. Hano hofi-hofi ashereza Babiloni Mukulu, enyanya z’okuba ajacizize izino lyage litagatifu. (Maf. 17:5, 16; 19:1, 2) Bantu baguma na baguma bacibonera okusherezibwa kwa Babiloni Mukulu, nkaba bacilunga haguma na nirhu omu nterekêro y’okuli. Buzinda okw’ivita lya Harmagedoni, Yehova ayish’ishereza igulu lya Shetani lyoshi, omu kuyusa balya boshi bamuhagalika banajacira izino lyage. Cikone ayish’iyokola balya boshi baba bamuzigire banamurhumikira, banacidinira okumuha irenge. (Mk. 8:38; 2 Ts. 1:6-10) Enyuma z’irhangululo lizinda lyaba enyuma z’Emyaka Cihumbi y’Oburhegesi bwa Kristu, Yehova ayish’iba amacêsa loshi-loshi izino lyage. (Maf. 20:7-10) Ago mango, “okumanya irenge lya Nyamuzinda, kwalumîra omw’igulu lyoshi nka kula amîshi gabwikira ebirumbi by’enyanja.”​—Hab. 2:14, Mashi Bible.

16. Bici ohizire okujira? (Olole n’enfoto.)

¹⁶ Byayish’iba bya kushagalusa bwenene amango ngasi muntu ozine ayish’iba ali aha Yehova irenge ly’izino lyage! Cikone, kuhika olo lusiku luhike, rhwanajira ecirhu cigabi omu kuha Nnâmahanga wirhu irenge omu ngasi bulyo rhupatire. Omu kusegeza obulagirire bw’oko, Embaraza Eri Yalongoza yacishozire olwandiko lw’Ennanga 96:8 nka lwandiko lw’omwaka gwa 2025, ludesire ntya: “Hêrezi Nyakasane [Yehova, NWT] irenge ly’izîno lyage.”