ECIGABI C’OKUYIGA CA 23
LWIMBO 2 Izino Lyawe we Yehova
Izino lya Yehova, Ebi Lishinganine Lihugûle Kuli Rhwe
“‘Mwe bahamirizi bani,’ kwo adesire Nyakasane [Yehova, NWT].”—IZ. 43:10.
EBI ECI CIGABI CISEGIZE
Carhuyeresa ebi rhwakajira lyo rhucêsa n’okuhalira izino lya Yehova.
1-2. Gurhi rhumanyiremwo oku izino lya Yehova liba lya bulagirire kuli Yezu?
IZINO lya Yehova liba lya bulagirire bwenene kuli Yezu kulusha ebindi byoshi. Nta wundi okola ojijire binji omu kumanyisa izino lya Yehova akage. Nk’oku ecigabi c’embere cayerekine, Yezu ali mubidu okufâ erhi izino lya Yehova lirhuma n’ebi lihiziremwo byoshi. (Mk. 14:36; Hb. 10:7-9) N’enyuma z’Oburhegesi bw’Emyaka Cihumbi, Yezu ayish’iba mubidu okugalulira Ishe Yehova obukulu boshi ly’izino ly’Ishe licêsibwa. (1 Kr. 15:26-28) Obuzigire bwa Yezu okw’izino lya Mungu kandi buyerekine binji lugenda obwîra ajira haguma n’Ishe. Buyerekine buzira karhinda oku Yezu aba azigire Nn’ery’izino.
2 Yezu ayishire hanw’igulu omw’izino ly’Ishe. (Yn. 5:43; 12:13) Amanyisize abanafunzi bage izino ly’Ishe. (Yn. 17:6, 26) Ayigirizize omw’izino lya Yehova anajira ebisomerine mw’ery’izino. (Yn. 10:25) Kobinali, Yezu ahûnyire Yehova alange abanafunzi bage “omw’izino [lyage].” (Yn. 17:11) Co cirhumire, izino lya Yehova lyali lya bulagirire bwenene kuli Yezu kulusha ebindi bintu byoshi. Gurhigi omuntu akaderha oku aba mwanafunzi w’okunali wa Kristu erhi akaba arhayishi izino ly’Ishe erhi kulikolesa?
3. Bici rhwaganirira mw’eci cigabi?
3 Rhuli Bakristu rhucihangana okushimba enshando za Yezu, rhuba rhuzigire izino ly’Ishe rhunanalikenge. (1 Pt. 2:21) Mw’eci cigabi, rhwabona gurhi izino lya Yehova limanyisamwo abali bahubiri ‘omwanzi mwinja gw’Obwami.’ (Mt. 24:14, NWT) Kandi rhwaganirira ebi izino lya Yehova lishinganine lihugûle kuli ngasi muguma wirhu.
“OMURHWE GW’OKUKOMBÊRA IZINO LYAGE”
4. (a) Mukolo guhi Yezu ahîre abanafunzi bage embere agaluke empingu? (b) Idoso lihi rhwaganirira?
4 Hisanzi hisungunu embere Yezu agaluke empingu, abwira abanafunzi bage ntya: “Mwayish’ihâbwa obuhashe hano iroho litagatifu limuyandagalira, na ntyo mwayish’iba bahamirizi bani omu Yeruzalemu, n’omu Yudeya yoshi n’e Samariya, na kuhika omu eneo ya kuli bwenene y’igulu.” (Ebj. 1:8, NWT) Muli ntyo, omwanzi mwinja gwal’ishinganine guyalizibwe ngasi hoshi, ci arhali omu Israheli mwone. Enyuma za kasanzi kalebe, abantu b’amashanja goshi bakabire n’obulyo bw’okuba banafunzi ba Yezu. (Mt. 28:19, 20) Cikone Yezu adesire ntya: “Mwayish’iba bahamirizi bani.” K’abo banafunzi bahyahya bakalagirire oku kumanya izino lya Yehova, erhi bakabire kone bahamirizi ba Yezu? Ebiganirirwe omu citabu c’Ebijiro by’Entumwa cigabi ca 15 birhurhabire okushuza ery’idoso.
5. Gurhi entumwa n’abagula b’e Yeruzalemu bayerekinemwo oku abantu boshi bashinganine bamanye izino lya Yehova? (Olole n’enfoto.)
5 Omu mwaka gwa 49 Kano Kasanzi Kirhu (K.K.K.), entumwa n’abagula b’e Yeruzalemu barhimanana lyo baganirira ebi Abantu b’Amashanja barhali bakembule bal’ishinganine bajire lyo bayemererwa okuba Bakristu. Oku buzinda bw’ezo nshambalo, Yakobo, mulumuna wa Yezu, aderha ntya: “[Petro] anahugwire kurhi, kurhenga omurhondero, Nyamuzinda acishogaga omu bapagani omurhwe gw’okukombêra izino lyage.” Izino lya ndi Yakobo akag’iganirira? Omu kugalukira enderho z’omulebi Amosi, ayushûla ntya: “Lyo abandi bantu balonza Nyakasane [Yehova, NWT], na galya mashanja goshi gashiga [gahamagalwa oku, NWT] izino lyani, kwo Nyakasane okola ebyo byoshi adesire ntyo.” (Ebj. 15:14-18) Abo banafunzi bahyahya barhakayizire kone lugenda Yehova cikone kandi ‘bakahamagirwe oku izino lyage.’ Oko kuhugwîre oku bakamanyisize abandi izino lya Mungu n’oku abantu bakabamanyire kugerera ery’izino.
Oku ntimanano y’embaraza eri yalongoza y’omu kagana karhanzi, abo balume bishwekerezi bahugûkwa n’obwalagale oku Abakristu bagwasirwe babe bantu b’okukombêra izino lya Mungu (Olole ecifungo ca 5)
6-7. (a) Bici byarhumaga Yezu ayisha hanw’igulu? (b) Cindi cirhumire cihi c’obulagirire bwenene carhumaga Yezu ayisha hanw’igulu?
6 Izino lya Yezu lihugwîre “Yehova Ye Bucire,” anayerekine oku ali njira Yehova akolesa ly’aciza abantu bayerekine obuyemere. Yezu ayishire hanw’igulu ly’ahâna obuzine bwage oku bunguke bwa bene bantu. (Mt. 20:28) Omu kuhâna engombôlo, ajira bihashikane kuli bene bantu okucira n’okuba n’obuzine bw’ensiku n’amango.—Yn. 3:16.
7 Cikone bulya gurhi bene bantu bal’ilagirire oku ngombôlo. Enyanya z’ebyabaga omw’ishwa ly’e Edeni. Nk’oku byaganirirwe omu cigabi c’embere, ababusi barhangiriza ba bene bantu, ko kuderha Adamu na Eva, bagomera Yehova na muli ntyo baheza obulyo bw’okulama ensiku n’amango. (Murh. 3:6, 24) Cikone Yezu ayishire hanw’igulu ly’ajira akantu k’obulagirire ciru bwenene kulusha okuciza bene bantu. Izino lya Yehova lyahizirweko izinga. (Murh. 3:4, 5) Co cirhumire, okucizibwa kw’iburha lya Adamu na Eva kwagwerhe olushangi n’akantu k’obulagirire bwenene, ko kuderha, okucêsibwa kw’izino lya Yehova. Bulya Yezu ayishire omw’izino lya Yehova, anamanyisa abandi ery’izino, ajijire ecigabi c’obulagirire bwenene omu kucêsibwa kw’izino lya Yehova.
Gurhigi omuntu akaderha oku aba mwanafunzi w’okunali wa Kristu erhi akaba arhayishi izino ly’Ishe erhi kulikolesa?
8. Bici abal’iyemire Yezu boshi bal’ishinganine bamanye?
8 Balya boshi bakabire n’obuyemere muli Yezu, ko kuderha, Abayahudi n’Abantu b’Amashanja, bal’ishinganine bamanye Enshôko y’obucire bwabo, ko kuderha, Yehova Mungu, Ishe wa Yezu. (Yn. 17:3) Kandi, aka Yezu, bakamanyikine kugerera izino lya Yehova. Na kandi bal’ishinganine bahugûkwe obulagirire bw’okucêsibwa kw’ery’izino. Oko ko kwakarhumire bacira. (Ebj. 2:21, 22) Co cirhumire, abanafunzi bishwekerezi ba Yezu boshi bal’ishinganine bayige lugenda Yehova na lugenda Yezu. Co carhumaga Yezu ashwinja isala lyage liri omu Yowane cigabi ca 17 kugerera ezi nderho: “Nabamanyisize izino lyawe, nanacibamanyisalyo, lyo obuzigire wanzi-gîre bubâ muli bwo, lyo nani mba muli bwo.”—Yn. 17:26.
“MWE BAHAMIRIZI BANI”
9. Gurhi rhwakayerekanamwo oku izino lya Yehova liri lya bulagirire bwenene kuli rhwe?
9 Kushimbana n’ebi rhwaganirire, abanafunzi boshi b’okunali ba Yezu bashinganine bashibirire okucêsibwa kw’izino lya Yehova. (Mt. 6:9, 10) Bagwasirwe bakabona oku izino lya Yehova liri lya bulagirire bwenene kulusha agandi mazino goshi. Oko kuhûnyire bajire kantu kalebe. Cikone, gurhi rhwakabamwo n’ecigabi omu kucêsa izino lya Yehova, erhi omu kulikûlako izinga Shetani alihizireko?
10. Lubanja luhi lw’olwiganyo luganirirwe omu citabu ca Izaya cigabi ca 42 kuhika 44? (Izaya 43:9; 44:7-9) (Olole n’enfoto.)
10 Ecitabu ca Izaya cigabi ca 42 kuhika 44 ciyerekine obulagirire bw’ecigabi rhujira omu kucêsa izino lya Yehova. Ebyo bigabi biganirire akanga k’olubanja lw’olwiganyo Mungu ashobesirwemwo. Yehova abwizire balya boshi bacihamagala bamungu bayerekane oku kobinali bali bamungu. Kandi ahamagire abahamirizi bacihire eluhya n’okuyerekana oku abo bali bamungu. Cikone ntaye wakahasha okujira ntyo!—Osome Izaya 43:9; 44:7-9.
Omu njira nyinji, rhuba bahamirizi omu lubanja lw’olwiganyo (Olole ecifungo ca 10-11)
11. Bici Yehova abwizire abantu bage omu Izaya 43:10-12?
11 Osome Izaya 43:10-12. Yehova abwizire abantu bage ntya: “Mwe bahamirizi bani, . . . nani ndi Nyamuzinda.” Yehova ali abahûna bashuze kw’er’idoso: “Ka hali owundi Nyamuzinda kuleka nie?” (Iz. 44:8) Co cirhumire, rhugwerhe olukengwa lw’okushuza kw’ery’idoso. Kugerera enderho zirhu n’ebijiro birhu, rhunayerekane oku Yehova yene Mungu w’okuli. Izino lyage lilushire agandi mazino goshi. Kugerera akalamo kirhu, rhunayerekane oku kobinali rhuzigire Yehova n’oku rhuli bishwekerezi kuli ye, ciru Shetani akarhulerhera mazibu gahi. Mw’eyo njira, rhugwerhe obulyo bw’okurhabala okucêsa izino lyage.
12. Gurhi obulebi buli omu Izaya 40:3, 5 bwahikiriremwo?
12 Erhi rhuhalira izino lya Yehova, erhi irenge lyage, rhunabe rhuli rhwayiga Yezu Kristu. Kandi Izaya alebire oku muntu mulebe ‘akarheganyize Nyakasane, [Yehova, NWT] enjira!’ (Iz. 40:3) Gurhi oko kwahikirire? Yowane Mubatiza arheganyize Yezu enjira, wayishaga omw’izino lya Yehova anaderha okw’izino lya Yehova. (Mt. 3:3; Mk. 1:2-4; Lk. 3:3-6) Obo bulebi bo n’obo budesire ntya: “Irenge lya Nyakasane [Yehova, NWT] lyaciyerekana.” (Iz. 40:5) Gurhi byabiremwo ntyo? Erhi Yezu ayisha hanw’igulu, ayishire omw’izino lya Yehova omu njira nyimana na ntyo byabonekana nka Yehova ye nnene wayishire hanw’igulu.—Yn. 12:45.
13. Gurhi rhwakayigamwo olwiganyo lwa Yezu?
13 Aka Yezu, rhuba bahamirizi ba Yehova. Rhunamanyise abantu izino lya Yehova n’okubwira ngasi muntu rhurhimanana naye lugenda ebijiro byage binja bwenene. Cikone lyo rhujira ntyo bwinja, kandi rhugwasirwe rhumanyise abandi ecigabi Yezu ajijire omu kucêsa izino lya Yehova. (Ebj. 1:8) Yezu ye Muhamirizi mukulu wa Yehova, rhunanayige olwiganyo lwage. (Maf. 1:5) Cikone, bicigi izino lya Yehova lishinganine lihugûle kuli ngasi muguma wirhu?
EBI IZINO LYA YEHOVA LIHUGWÎRE KULI RHWE
14. Nk’oku biyerekinwe omu lwandiko lw’Ennanga 105:3, gurhi rhuciyumva lugenda izino lya Yehova?
14 Rhunacidinire izino lya Yehova. (Osome Ennanga 105:3.) Yehova anashagaluke bwenene erhi rhucidinira izino lyage. (Yer. 9:23, 24; 1 Kr. 1:31; 2 Kr. 10:17) ‘Okucikungira Nyamuzinda’ kuhugwîre okucidinira Yehova bulya ali Mungu wirhu. Rhunabone oku luli lukengwa okukenga izino lyage n’okuhalira irenge lyage. Rhurhagwasirwi rhuyumve enshonyi ciru n’ehitya z’okubwira abirhu banyakasi, abirhu banafunzi, abalungu birhu, n’abandi bantu oku rhuli Bahamirizi ba Yehova! Ibilisi aba alonzize rhuleke okuganirira abandi lugenda izino lya Yehova. (Yer. 11:21; Maf. 12:17) Kobinali, Shetani n’abalebi bage b’obunywesi baba balonzize okujira abantu bayibagire izino lya Yehova. (Yer. 23:26, 27) Cikone obuzigire bwirhu oku izino lya Yehova bunarhume rhwagendekera rhwacishinga muli lyo “ensiku zoshi.”—Enna. 5:11; 89:16, Mashi Bible.
15. Bici okuhamagala izino lya Yehova kuhugwîre?
15 Rhunagendekere rhwahamagala izino lya Yehova. (Yow. 2:32; Rm. 10:13, 14) Okuhamagala izino lya Yehova kuhiziremwo binji ahanyuma kone n’okukolesa ery’izino. Rhunahikire okumanya Mungu nka Muntu, okumulangalira, n’okumuhûna oburhabale n’obulongozi. (Enna. 20:7; 99:6; 116:4; 145:18) Kandi rhunayaligize abandi izino lyage n’amorhere gage, omu kubayinginga baciyunjuze n’okujira ebihûnyirwe lyo bayemerwa naye.—Iz. 12:4; Ebj. 2:21, 38.
16. Gurhi rhwakayerekanamwo oku Shetani aba munywesi?
16 Rhunayemere okulibuka erhi izino lya Yehova lirhuma. (Yk. 5:10, 11) Erhi rhubêra bishwekerezi kuli Yehova amango rhuli rhwalibuka, rhunayerekane oku Shetani aba munywesi. Omu mango ga Ayubu, Shetani ashobesire abantu bakolera Yehova omu kuderha ntya: “Ebi omuntu agwerhe byoshi anabijahike mpu lyo afûngira amagala!” (Ayu. 2:4) Shetani aderha oku abantu banakolera Yehova omu mango minja gone n’oku erhi bakahikirwa n’amazibu, banaleka Yehova. Omulume mwishwekerezi Ayubu ayerekine oku ebi Shetani ashobekaga bene bantu bwali bunywesi. Nirhu rhugwerhe olukengwa lw’okuyerekana oku ciru Shetani akarhulerhera mazibu gahi, rhurhakaleka Yehova ciru n’ehitya. Rhwanayemera n’obwalagale oku Yehova agendekera arhulanga erhi izino lyage lirhuma.—Yn. 17:11.
17. Yindi njira ehi rhwakalerheramwo izino lya Yehova obukuze, nk’oku biyerekinwe omu 1 Petro 2:12?
17 Rhunayerekane obukenge oku izino lya Yehova. (Mig. 30:9; Yer. 7:8-11) Bulya rhunaderhe okw’izino lya Yehova rhunanamanyise abandi izino lyage, rhwanalikuza erhi kandi rhwanabula bulikengesa. (Osome 1 Petro 2:12.) Co cirhumire, rhulonzize rhujire oku rhwakanahasha koshi lyo rhukuza Yehova kugerera enderho zirhu n’olugenzi lwirhu. Omu kujira ntyo, rhwanalerhera izino lyage obukuze, ciru akaba rhurhaba bimana.
18. Yindi njira ehi rhwakayerekanamwo oku izino lya Yehova liri lya bulagirire kuli rhwe? (Olole n’amahugûlo g’idako.)
18 Rhunabone oku izino lya Yehova liri lya bulagirire bwenene kuli rhwe ciru abantu bakarhurhanyiza gurhi. (Enna. 138:2) Bulya gurhi oko kuli kwa bulagirire bwenene? Bulya obuzigire bwirhu oku izino lya Yehova bwanarhuma abantu barhuzungulusire barhuhegeza irenge.a Yezu ali mubidu okufâ olufû lw’enshonyi omu kutwirwa olubanja nka cishumusi ly’akuza izino lya Yehova. “Àgayaguza enshonyi” omu kurhababala enyanya z’ebi abandi bamurhanyizagya. (Hb. 12:2-4) Al’isegize obwenge oku kujira obulonza bwa Mungu.—Mt. 26:39.
19. Gurhi ociyumva lugenda izino lya Yehova, na bulya gurhi?
19 Rhunacidinire izino lya Yehova rhunanabone oku luli lukengwa kuli rhwe okuhamagalwa Bahamirizi ba Yehova. Bulya izino lya Yehova liba lya bulagirire bwenene kuli rhwe, rhwagendekera rhwalikuza ciru abandi bakarhugayaguza. Izino lya Yehova liba lya bulagirire bwenene kuli rhwe kulusha ciru ebi abantu barhurhanyiza. Co cirhumire, lekagi rhuhige okugendekera rhwakuza izino lya Yehova ciru Shetani akarhulerhera mazibu gahi. Omu kujira ntyo, rhwayerekana oku izino lya Yehova liri lya bulagirire bwenene kuli rhwe, nk’oku linaba lya bulagirire kuli Yezu.
LWIMBO 10 Rhukuze Mungu Wirhu Yehova!
a Ciru n’omulume mwishwekerezi Ayubu ababire erhi abîra bage basharhu bamuhegeza irenge. Oku murhondero, erhi afîrwa n’abana bage boshi n’okuheza ebirugu byage byoshi, “Ayubu arhajiraga caha, arhanalogorheraga omu masu ga Nyamuzinda.” (Ayu. 1:22; 2:10) Cikone, erhi Ayubu ashobekwa ebijiro bibi, arhondera acihalira yenene n’okuderha “ebinwa . . . bidwirhe byahabuka.” Asegeza obwenge oku kucihalira yenene ahali h’okucêsa izino erhi irenge lya Mungu.—Ayu. 6:3; 13:4, 5; 32:2; 34:5.