Okarhôla Emihigo Yashagalusa Yehova

1. Kantu kahi kazibu rhweshi rhugwasirwe rhujire?

NGASI LUSIKU, binarhuhûne okurhôla emihigo. Miguma na miguma eba milembu okurhôla, kwa lwiganyo nk’emihigo lugenda ebi rhwayikula sezi erhi lugenda akasanzi k’okuj’igwishira. Omu bindi bintu, kunabe kuzibu bwenene okurhôla emihigo. Nkaba yanahuma oku magala girhu, omwishingo gwirhu, abazigirwa birhu, erhi enterêkero yirhu. Rhuba rhulonzize emihigo yirhu erhulerhere obunguke, rhwe n’omulala gwirhu. Na kulusha byoshi, rhunabe rhulangalire oku emihigo yirhu yashagalusa Yehova.​—Rm. 12:1, 2.

2. Bintu bihi byakakurhabala ly’okarhôla emihigo y’obwenge ?

² Kanji-kanji wanarhôla omuhigo gw’obwenge erhi (1) wakalonza okumanya ebintu bwinja, (2) erhi wakalonza entanya za Yehova lugenda akanga, na (3) erhi wakarhanya bwinja oku njira ziri lubero wakahikirizamwo omuhigo gwawe. Eci cigabi caganirira ebyo bintu bisharhu rhugwasirwe rhujire, na kandi carhurhabala rhubone gurhi rhwakakomerezamwo obuhashe bwirhu bw’okurhimanya.​—Mig. 2:11.

OLONZE OKUMANYA EBINTU BWINJA

3. Ohâne olwiganyo luyerekine bulya gurhi oshinganine olonze okumanya ebintu bwinja embere orhôle omuhigo.

³ Akantu karhanzi rhushinganine rhujire lyo rhurhôla omuhigo mwinja, kuli kulonza okumanya ebintu bwinja. Bulya gurhi oko kuli kwa bulagirire? Orhanye omuntu olwazire agend’ibona doktere enyanya z’endwala yage ndarhi. Ka doktere anarhôla omuhigo gw’okurhondera abuka oyo muntu buzira kumupima erhi kumudosa amadoso? Nanga mashi! Nawe wanarhôla emihigo minja bwenene erhi burhangiriza wakalabiriza ebintu biyerekire akanga kawe. Gurhi wakajiramwo ntyo?

4. Kushimbana n’Emigani 18:13, gurhi wakamanyamwo n’obwalagale erhi omanyire ebintu bwinja? (Olole n’enfoto.)

⁴ Kanji-kanji wanamanya ebintu bwinja omu kudosa amadoso. Orhanye bakulalike ahantu mwacishagalusa haguma na bantu banji. K’oshinganine oje eyo? Erhi akaba orhamanyiri bwinja owakulalikaga erhi emipango yarhôzirwe, oshinganine omudose amadoso nka: “Ngahi na mangaci rhwarhimanana? Bantu banga baba aho? Ndi walongoza ebyajirwa? Bandi bayisha? Bintu bihi byajirwa aho? Ka bahâna ho amamvu?” Amashuzo kw’ago madoso ganakurhabala orhôle omuhigo gw’obwenge.​—Osome Emigani 18:13.

5. Bici oshinganine ojire enyuma z’okumanya ebintu bwinja?

⁵ Enyuma z’okumanya ebintu bwinja, orhanye bwinja-bwinja lugenda akanga koshi. Kwa lwiganyo, gurhigi erhi wakamanya oku abantu barhakenga amakanuni g’Ebibliya baba aho, erhi oku amamvu gahânwa buzira muntu oli walabiriza manganaci gali gahânwa? K’orhanyize oku byanahashikana oko kucishagalusa kwinyu kurhengemwo idinye libi? (1 Pt. 4:3) Oku bundi, gurhigi erhi akasanzi k’okurhimanana kakaba kapatine n’akasanzi k’entimanano y’ecigamba cinyu erhi akasanzi kawe k’amahubiri? Erhi wakarhanya lugenda ebintu byoshi biyerekire ako kanga, kwanaba kulembu kuli we okurhôla omuhigo mwinja. Cikone hali akandi kantu oshinganine ojire. Okola omanyire gurhi oli wabona ako kanga; cikone gurhigi Yehova naye ali aciyumva lugenda ko?​—Mig. 2:6.

OLONZE ENTANYA ZA YEHOVA

6. Kushimbana na Yakobo 1:5, bulya gurhi rhushinganine rhuhûne oburhabale bwa Yehova?

⁶ Ohûne Yehova akurhabale ohugûkwe entanya zage. Yehova alaganyize oku arhuha obwenge lyo rhumanya erhi muhigo mulebe gwamushagalusa. Anahâne obwenge bwa ntyo oku bantu “boshi burhagera na buzira karhinda.”​—Osome Yakobo 1:5.

7. Gurhi wakamanyamwo entanya za Yehova lugenda kanga kalebe? Ohâne olwiganyo.

⁷ Enyuma z’okuhûna obulongozi bwa Yehova, obe masu ly’omanya ishuzo lyage. Kwa lwiganyo: Erhi akaba okola ohezire amango wali omu mubalamo, nkaba wahûnyire cikala w’omu eneo wahereragamwo oburhabale. Cikone ka wakagendekire walambagira embere akushuze? Nanga ciru n’ehitya. Wayumvirhizize bwinja-bwinja obulongozi bwage. Ko n’oko, enyuma z’okuhûna Yehova obwenge, ocihangane okumanya ishuzo lyage omu kulonza marhegeko gahi g’Ebibliya na makanuni gahi gakakolesibwa omu kanga kawe. Kwa lwiganyo, amango oli wahiga erhi waja emunda walalikagwa nk’oku rhwaganiriraga embere, nkaba wanarhanya kw’ebi Ebibliya edesire lugenda amadinye, abîra babi, n’obulagirire bw’okushokoza ebintu biyerekire Obwami ahali h’ebi osima.​—Mt. 6:33; Rm. 13:13; 1 Kr. 15:33.

8. Gurhi wakajira erhi akaba olagirire oku burhabale ly’opata emyanzi oli walonza? (Olole n’enfoto.)

⁸ Ciru akaba ntyo, mango maguma na maguma wanaba olagirire oku burhabale ly’opata emyanzi oli walonza. Nkaba wanapata amahano kugerera mwene wirhu erhi mwali wirhu wacibwinire binji. Cikone, kandi wayunguka omu kujira wene obusagasi. Hali myanzi minji bwenene y’okukurhabala omu bikolanwa birhu b’ifunzo, nk’ecitabu Musaada wa Kutafuta Habari kwa Ajili ya Mashahidi wa Yehova n’ecitabu Maandiko ya Kutusaidia mu Maisha ya Kikristo. Okengere omuhigo gwawe: kukarhôla emihigo yashagalusa Yehova.

9. Gurhi rhwakamanyamwo n’obwalagale erhi omuhigo gwirhu gwashagalusa Yehova? (Abefezi 5:17)

⁹ Gurhi rhwakamanyamwo n’obwalagale erhi omuhigo gwirhu gwashagalusa Yehova? Burhangiriza, rhushinganine rhumumanye bwinja. Ebibliya edesire ntya: “Okumanya Omutagatifu Bwenene ko kuhugûkwa ebintu.” (Mig. 9:10, NWT) Kobinali, okumanya amorhere ga Yehova, omuhigo gwage, n’ebi asima erhi ebi ashomba ko kurhurhabala okuhugûkwa ebintu bwinja. Ocidose ntya: ‘Kushimbana n’ebi manyire lugenda Yehova, muhigo guhi nakarhôla gwamushagalusa?’​—Osome Abefezi 5:17.

10. Bulya gurhi amakanuni g’Ebibliya gaba ga bulagirire bwenene kulusha enkomedu z’omulala erhi z’aha rhulama?

¹⁰ Lyo rhushagalusa Yehova, mango maguma na maguma rhugwasirwe rhujire kantu kalebe kakavuna abazigirwa birhu omurhima. Kwa lwiganyo, nkaba babusi balebe barhagwerhi entanya mbi banasegeza oku mwali wabo ashinganine aheruke omu mw’omulume ocihashire, erhi wankahasha okubaha engulo nnene, ciru akaba arhaseziri omu hali y’ekiroho. Okuderha okuli, balonzize mwali wabo ashibirirwe omu hali y’omubiri, cikone, ndigi wakamurhabala ly’agendekera akula kiroho? Entanya za Yehova lugenda ako kanga ziri zihi? Ishuzo liri omu Mateyo 6:33. Mw’olo lwandiko, Abakristu bahûnyirwe bagendekere ‘burhanzi balonza Obwami.’ Ciru akaba rhunakenge ababusi birhu n’abantu b’omu lubaga lwirhu, akantu k’obulagirire bwenene kuli rhwe kuba kushagalusa Yehova.

ORHANYE BWINJA OKU NJIRA ZIRI LUBERO WAKAHIKIRIZAMWO OMUHIGO GWAWE

11. Borhere buhi buganirirwe omu Abafilipi 1:9, 10 bwakakurhabala okurhanya bwinja oku njira ziri lubero wakahikirizamwo omuhigo gwawe?

¹¹ Enyuma z’okurhanya oku makanuni g’Ebibliya gayerekire omuhigo gwawe, oshinganine olabirize enjira ziri lubero wakaguhikirizamwo. (Osome Abafilipi 1:9, 10.) Oborhere bw’oburhimanya bwakuhashisa okubona embere z’akasanzi amalehe ngasi njira yakalerha. Mango malebe kwanaba kulembu okurhôla omuhigo. Cikone arhali emihigo yoshi eba milembu okurhôla. Oburhimanya bwakurhabala okurhôla emihigo y’obwenge, ciru n’omu kanga kazibu.

12-13. Gurhi oburhimanya bwakakurhabalamwo okurhôla omuhigo gw’obwenge lugenda akazi wakayemera?

¹² Orhanye kw’aka kanga. Oli walonza akazi ly’okahikiriza amalagirire g’omulala gwawe. Makazi abirhi gabonekane. Wanarhanya oku bintu byoshi biyerekire ago makazi nk’omukolo wakajira, eprograme y’akazi, akasanzi byakakuhûna ly’ohika oku kazi, n’ebindi. Mw’ago makazi gombi, nta kaguma kavunyire amakanuni g’Ebibliya. Nkaba wanashagalukira kazi kaguma bulya osimire omukolo wakajira erhi bulya ensaranga wakakamarha ziri nyinji. Ciru akaba ntyo, haligi ebindi bintu oshinganine orhanyeko embere orhôle omuhigo.

¹³ Kwa lwiganyo, ka ngasi kaguma mw’ago makazi kapatana n’eprograme y’entimanano y’ecigamba cinyu? Ka ngasi kaguma mw’ago makazi kakurhôla akasanzi olagirireko ly’oshibirira amalagirire g’ekiroho n’ag’ekandalala g’omulala gwawe? Okucidosa amadoso ga ntyo kwakurhabala okushokoza “ebiri binja kulusha”, ko kuderha, enterekêro yawe n’amalagirire g’omulala gwawe ahali h’ensaranga. Muli ntyo, wanarhôla omuhigo Yehova agisha.

14. Gurhi okukolesa oburhimanya n’okuyerekana obuzigire kwarhurhabalamwo rhuyake okusarhaza abandi?

¹⁴ Kandi oburhimanya bunarhushumye okurhanya gurhi omuhigo gwirhu gwakahuma oku bandi bantu lyo rhubêra “beru-kweru [rhurhasarhazagya abandi, NWT].” (Fl. 1:10) Oko kuli kwa bulagirire amango rhukola rhwarhôla emihigo erhuyerekire rhwenene lugenda ebintu nk’emyambalo n’okuciyinjihya. Kwa lwiganyo, nkaba rhwanasima njira ndebe y’okuyambala erhi y’okuciyinjihya. Cikone, gurhigi erhi akaba eyo njira y’okuyambala erhi kuciyinjihya yanagayisa abandi omu cigamba erhi embuga z’ecigamba? Oburhimanya bwanarhurhabala rhukenge oku bali baciyumva. Obuzigire bwarhushumya rhukalonza obunguke bw’“abandi” n’okuba ba lugero. (1 Kr. 10:23, 24, 32; 1 Tm. 2:9, 10) Omu kujira ntyo, rhwanarhôla omuhigo guyerekine obuzigire bwirhu n’obukenge oku bandi.

15. Bici oshinganine orhanyeko embere orhôle omuhigo gw’obulagirire bwenene?

¹⁵ Amango oli warhôla omuhigo gw’obulagirire bwenene, orhanye oku bihûnyirwe ly’oguhikiriza. Yezu arhuyigirizize ‘rhukaganja’ ebi omuhigo gwirhu gwafâ. (Lk. 14:28) Co cirhumire orhanye oku kasanzi, ebintu, n’obushiru wakaba olagirireko ly’ohikiriza omuhigo gwawe. Omu kanga kaguma na kaguma, wanaganiza abantu b’omu mulala gwawe ly’omanya bici ngasi muntu akajira ly’alunga okuboko ogo muhigo. Bulya gurhi okupanga ebintu ntyo kuli kwa bulagirire? Nkaba oko kwanayerekana oku oshinganine ojire mpindûlo ndebe lugenda omuhigo gwawe erhi kurhôla omuhigo guli lubero. N’amango oli wamanyisa abantu b’omu mulala gwawe omuhigo gwawe n’okuyumvirhiza entanya zabo, banaba babidu bwenene okukola haguma na nawe ly’omuhigo gwawe guhikirira.​—Mig. 15:22.

ORHÔLE OMUHIGO GWAHIKIRIRA

16. Bintu bihi byakakurhabala okurhôla omuhigo gwahikirira? (Olole n’ecisanduku cidesire “Oku Wakarhôlamwo Emihigo y’Obwenge.”)

¹⁶ Erhi akaba washimbire ezo njira rhwaganirire, wanaba okola oli tayari okurhôla omuhigo gw’obwenge. Okola omanyire bwinja ebintu, wanalabirizize amakanuni gakurhabala orhôle omuhigo gwashagalusa Yehova. Muli ntyo, wanahûnaga Yehova akurhabale omuhigo gwawe guhikirire.

17. Ihwe ly’okurhôla emihigo minja lyo lihi?

¹⁷ Ciru akaba omu mango gageraga warhôzire mihigo minji yabaga n’amalehe minja, okengere oku ihwe ly’okurhôla emihigo minja, kurhali kuyegemera obwenge bwawe wenene erhi obulenga bwawe, cikone kuli kuyegemera obwenge burhenga emwa Yehova. Yene ye wakakuha obumanye bw’okuli, okuhugûkwa ebintu, n’oburhimanya; bintu by’obulagirire birhuma omuntu aba n’obwenge. (Mig. 2:1-5) Yehova anakurhabala ly’orhôla emihigo emushagalusize.​—Enna. 23:2, 3.