Nta Mango Okuboko kwa Yehova Kusag’iba Kofi

1. Gurhi Musa ayerekinemwo obulangalire bwage muli Yehova erhi arhenza Abaisraheli e Misri?

ECITABU c’Abahabraniya ciganirire bantu banji bagwerhe obuyemere muli Yehova. Musa, muguma mulibo, agwerhe obuyemere bwago-bwago. (Hb. 3:2-5; 11:23-25) Ayerekine obuyemere erhi arhenza Abaisraheli e Misri. Arhalekaga Faraoni n’omurhwe gwage bamuyobohye. Omu kulangalira Yehova, alongoza olubaga kugerera Enyanja Ndukula, n’enyuma z’aho alulongoza omw’irungu. (Hb. 11:27-29) Banji omu Baisraheli baheza obulangalire bwabo omu buhashe bwa Yehova bw’okubashibirira, cikone Musa agendekera alangalira Mungu wage. Musa arhavunikaga omurhima omu kulangalira Yehova, bulya omu njira y’ecisomerine, Mungu ahîre olubaga ebiryo n’amishi lyo bagendekera balama omw’irungu lyal’iyumusire.a​—Lub. 15:22-25; Enna. 78:23-25.

2. Bulya gurhi Mungu adosagya Musa erhi, “K’okuboko kwa Nyamubâho kwayofiha bwenene”? (Emibalè 11:21-23)

² Ciru akaba Musa al’igwerhe obuyemere busezire, mwaka muguma enyuma z’okurhenzibwa kw’Abaisraheli e Misri omu njira y’ecisomerine, aba n’akarhinda lugenda obuhashe bwa Yehova bw’okuha olubaga lwage enyama. Musa arhabonaga gurhi Yehova akahîremwo emiliyoni y’abantu enyama z’okubayigusa amango bali omw’irungu. Muli ntyo, Yehova adosa Musa ntya: “K’okuboko kwa Nyamubâho kwayofiha bwenene?” (Osome Emibalè 11:21-23.) Mw’olu lwandiko, enderho “okuboko kwa Nyamubâho” ziganirire iroho lyage litagatifu, erhi emisi yage akolesa ly’ajira ebintu. Ko biri nka Yehova akag’idosa Musa erhi, ‘Ka kobinali orhanyize oku ntakahasha okujira ebi ndesire oku najira?’

3. Bulya gurhi rhushinganine rhurhanye oku lwiganyo lwa Musa n’Abaisraheli?

³ Ka hali amango okola ocidosize erhi Yehova ashibirira amalagirire gawe g’omubiri erhi amalagirire g’omulala gwawe? Obe okola ocidosize ntyo erhi nanga, leka rhuganirire olwiganyo lwa Musa n’Abaisraheli, bahezagya obulangalire omu buhashe bwa Mungu bw’okubahikirigiza amalagirire gabo g’omubiri. Amakanuni g’Amandiko rhwaganirira garhurhabala rhuzibuhye obulangalire bwirhu oku okuboko kwa Yehova nta mango kusag’iba kofi.

OCIYIGIRIZE KUGERERA MUSA N’ABAISRAHELI

4. Nkaba bici byarhumaga bantu banji baba n’akarhinda lugenda obuhashe bwa Yehova bw’okubahikirigiza amalagirire gabo g’omubiri?

⁴ Bulya gurhi Baisraheli banji barhonderaga okuba n’akarhinda erhi kobinali Yehova akabahikirigize amalagirire gabo? Ishanja ly’Israheli haguma n’“engabo erhali nyi y’abantu ba ngasi lubero” barhali Baisraheli bali omw’irungu linene omu kasanzi kalebe, erhi bali omu mubalamo gw’okurhenga e Misri kuja omu Cihugo c’Amalaganyo. (Lub. 12:38; Lush. 8:15) Eyo ngabo y’abantu ba ngasi lubero, ciru na Baisraheli banji bacilungaga haguma nabo omu kuciduduma, barhama n’okulya amana. (Mib. 11:4-6) Abantu barhondera bacifinja ebiryo bakag’ilya e Misri. Bulya abantu bakag’icidudumira Musa, arhanya oku al’igwasirwe apate enyama y’okuha abo bantu boshi, cikone arhamanyaga gurhi akayipasiremwo.​—Mib. 11:13, 14.

5-6. Bici rhwakaciyigiriza kugerera oku engeso mbi y’engabo y’abantu ba ngasi lubero yayahukiraga Baisraheli banji?

⁵ Engabo y’abantu ba ngasi lubero barhali Baisraheli barhabaga ba kuvuga omunkwa oku bintu byoshi Yehova abahîre, n’ezo ntanya zayahukira Abaisraheli. Oko kwanarhuhikira erhi rhwakakacifinja bwenene ebi rhwagwerhe embere kandi erhi rhwakakayumva obumvu enyanya z’ebi abandi bagwerhe. Lubero n’oko, rhwanaba n’omwishingo bwenene erhi rhwakaba ba kurhimukwa, ciru rhwakaba rhuli omu kanga kahi.

⁶ Abaisraheli bal’ishinganine bakengere oku Mungu al’ibayemezize n’obwalagale oku erhi bakahisire emunda bal’iyerekire lyo bakashagalukire okuba na bintu binji by’omubiri. Eco ciragane cakahikirizibwe omu Cihugo c’Amalaganyo, c’arhali amango bakag’ibalama omw’irungu. Ko n’oko, ahali h’okusegeza obwenge kw’ebi rhurhakahasha okupata mw’er’igulu libi, kuli kwinja rhukarhanya bwenene kw’ebi Yehova alaganyize okurhuha omw’igulu lihyahya. Kandi rhwanarhanya bwenene oku mandiko gakarhurhabala rhuzibuhye obulangalire bwirhu muli Yehova.

7. Bulya gurhi rhwanayemera n’obwalagale oku okuboko kwa Yehova kurhaba kofi?

⁷ Ciru akaba ntyo, nkaba wanacidosa bulya gurhi Mungu adosagya Musa ntya: “K’okuboko kwa Nyamubâho kwayofiha bwenene?” Nkaba Yehova anaba akag’irhabala Musa ly’arhanya, arhali oku misi y’okuboko kwage kw’obuhashe yone, cikone kandi n’aha yakahika. Mungu akahîre Abaisraheli nyama nyinji bwenene, ciru akaba bali kulî omw’irungu. Mungu ayerekana emisi yage kugerera “obuzibu bw’okuboko kwage n’obuhashe bunji [okuboko kulambule, NWT].” (Enna. 136:11, 12) Co cirhumire amango rhuli omu mazibu, rhurhashinganini rhube n’akarhinda oku okuboko kwa Yehova kurharhuhikeko.​—Enna. 138:6, 7.

8. Gurhi wakayakamwo okujira igosa liri nk’eri bantu banji bajiraga omw’irungu? (Olole n’enfoto.)

⁸ Enyuma za kasanzi kasungunu, Yehova aha abantu enyama; baba na nkwale nyinji bwenene z’okulya. Cikone Abaisraheli barhavugaga Mungu omunkwa kw’eco cisomerine. Lubero n’oko, bantu banji bagogomerwa n’irala ly’okuba na nkwale nyinji bwenene kulusha ezi bal’ilagirireko. Bakola mushi na budufu lyo bashubuza nkwale nyinji bwenene nk’oku bakanahashire. Yehova akunira bwenene enyanya z’abo bantu bagomaga “erhi kagegene [irala ly’okucikaliza] karhuma,” anabahana. (Mib. 11:31-34) Rhwanaciyigiriza binji kugerera olo lwiganyo. Rhushinganine rhube masu lyo rhurharhogeraga omw’irala ly’okulonza okuba na binji. Rhube rhuli bagale erhi bakenyi, akantu rhushinganine rhuhire oku nafasi ntanzi omu kalamo kirhu kuli kucibîkira “amahirhi empingu” omu kujira obwîra bwa hofi-hofi haguma na Yehova na Yezu. (Mt. 6:19, 20; Lk. 16:9) Erhi rhwakajira ntyo, rhwanayemera n’obwalagale oku Yehova arhuhikirigiza amalagirire girhu.

9. Bici rhwakayemera n’obwalagale lugenda oburhabale bwa Yehova?

⁹ Ene nalyo, Yehova aba mubidu okurhabala abantu bage. Cikone, oko kurhali kuderha oku nta mango rhwakabulirwa n’ebintu by’omubiri erhi oku nta mango rhwakashalika.b Ciru akaba ntyo, nta mango Yehova akarhulikirira. Arhurhabala omu mazibu girhu gali lubero. Rhwanabona oko omu kuganirira hali ibirhi rhwakayerekanamwo oku rhulangalire oku Yehova alambûla okuboko kwage ly’arhuhikirigiza amalagirire girhu g’omubiri: (1) amango rhuli rhwalwisa amazibu g’okubula ensaranga na (2) amango rhuli rhwarhanya lugenda oku amalagirire girhu g’omubiri gahikirizibwamo hano rhushosihala.

AMANGO RHULI RHWALWISA AMAZIBU G’OKUBULA ENSARANGA

10. Mazibu gahi gakarhuhikira gakarhuma rhwaba n’obubule bw’ensaranga?

¹⁰ Oku er’igulu libi liri lyayegerera ebuzinda, rhumanyire oku amazibu lugenda eby’ensaranga gagendekera gayushuka. Akavulindi omu by’epolitike, amavita, obuhanya bucilerha bone, erhi endwala mpyahya z’okuyahukira nkaba byanarhuma rhwaba n’amalagirire rhurhal’irhanyizeko erhi kurhuma rhwaheza akazi kirhu, ebirugu birhu, erhi enyumpa yirhu. Nkaba byanahûna rhulonze akazi kahyahya omu eneo yirhu erhi kurhanya okuhamikiza omulala gwirhu omu yindi eneo lyo rhuba n’obuhashe bw’okuguhikirigiza amalagirire g’omubiri. Bici byakarhurhabala lyo rhurhôla emihigo eyerekine oku rhulangalire okuboko kwa Yehova?

11. Bici byakakurhabala ly’olwisa amazibu g’okubula ensaranga? (Luka 12:29-31)

¹¹ Akantu k’obulagirire bwenene na kinja wakajira kuli kubwira Yehova ebikuhangayisize. (Mig. 16:3) Omuhûne obwenge olagirireko ly’orhôla emihigo minja, omuhûne n’omurhima gurhulirire ly’oyaka ‘okucihira omu ntanya’ lugenda akanga kawe. (Osome Luka 12:29-31.) Omusemberere akurhabale orhimukwe n’ebintu biba by’obulagirire omu kalamo. (1 Tm. 6:7, 8) Ojire obusagasi omu bicapo birhu lugenda gurhi wakalwisamwo bwinja amazibu g’okubula ensaranga. Banji bayungusire n’emyanzi eri oku jw.org eganirire amazibu g’okubula ensaranga.

12. Madoso gahi gakarhabala Omukristu ly’arhôla emihigo minja bwenene lugenda omulala gwage?

¹² Baguma na baguma barhangwirwe okuyemera akazi kabahûnyire okuhamira kulî n’omulala gwabo, cikone kanji-kanji okujira ntyo kwabonekine oku gurhaba muhigo gw’obwenge. Embere z’okuyemera akazi kahyahya, orharhanyagya kone oku nsaranga wakapata, cikone kandi orhanye erhi ako kazi kakurhabala we n’omulala gwawe mugendekere mwayegera Yehova. (Lk. 14:28) Ocidose ntya: ‘Bici byakahikira obuhya bwani erhi nakaba ndi kulî n’ibanie erhi mukanie? Ka naba n’obuhashe bw’okukaja oku ntimanano zoshi, omu mukolo gw’amahubiri, n’okukageza akasanzi haguma na bene wirhu na bali birhu?’ Erhi akaba ogwerhe abana, kandi oshinganine ocidose er’idoso ly’obulagirire: ‘Gurhi nakaleramwo abana bani ‘omu kubayigiriza n’okubahanûla muli Nyakasane’ erhi nakaba ntali haguma nabo?’ (Ef. 6:4) Olongozibwe n’entanya za Mungu, c’arhali entanya z’abantu b’omulala gwawe erhi z’abîra bawe barhakenga amakanuni g’Amandiko.c Tony, olama omu eneo y’e Asie y’ebuzikiro bw’izuba, ahâbirwe makazi manji minja omu cindi cihugo. Cikone, enyuma z’okushenga n’okuganirira oko haguma na mukage, ahiga okulahira ago makazi n’ahali h’okugayemera barhanya lugenda gurhi bakajijiremwo empindûlo omu kalamo kabo lyo balama na nsaranga nsungunu. Omu kurhanya oku kalamo kage, Tony adesire ntya: “Nabire n’olukengwa lw’okurhabala bantu banji bahikire okumanya Yehova, n’abana birhu bashagalukire okuli. Omulala gwirhu gwaciyigirizize oku, amango goshi rhugendekire rhwalama kushimbana n’enderho ziri omu Mateyo 6:33, Yehova arhushibirira.”

AMANGO OLI WARHANYA LUGENDA OKU AMALAGIRIRE GAWE G’OMUBIRI GAHIKIRIZIBWAMWO HANO OSHOSIHALA

13. Bici rhwakajira ene lyo rhuba n’ensaranga z’okuhikiriza amalagirire girhu hano rhushosihala?

¹³ Obulangalire bwirhu omu kuboko kwa Yehova kandi bwanarhangulwa amango rhuli rhwarhanya lugenda oku akalamo kirhu kayish’iba hano rhushosihala. Ebibliya erhuhîre omurhima rhukakola bwenene lyo rhuba n’ebi rhulagirireko omu nsiku zayisha. (Mig. 6:6-11) Erhi akaba rhugwerhe obuhashe bw’okujira ntyo, kurhali kubi okubîka nsaranga ndebe lyo zirhurhabala omu mango gayisha. Ensaranga zinalange omuntu omu njira ndebe. (Muh. 7:12) Ciru akaba ntyo, rhurhashinganini rhujire okulonza ensaranga kabe ko kantu k’obulagirire bwenene omu kalamo kirhu.

14. Gurhi olwandiko lw’Abahabraniya 13:5 lurhurhabalamwo okuba ba lugero amango rhuli rhwarhanya oku nsaranga z’okuhikiriza amalagirire girhu omu mango gayisha?

¹⁴ Yezu ahânyire olwiganyo luyerekine oku buli buhwinja omuntu okuhaka ensaranga n’obo “embere za Nnâmahanga arhali mugale ciru.” (Lk. 12:16-21, Mashi Bible) Ntaye oba omanyire oku byaba irhondo. (Mig. 23:4, 5; Yk. 4:13-15) Hali amazibu garhuhikira rhuli banafunzi ba Kristu. Yezu adesire oku rhugwasirwe rhube n’obulonza bw’‘okuleka’ ebi rhugwerhe byoshi lyo rhuba banafunzi bage. (Lk. 14:33) Abakristu b’e Yudeya b’omu kagana karhanzi bayemire n’omwishingo okuleka ebirugu byabo. (Hb. 10:34) Muli gano mango, bene wirhu banji bahezize ebirugu byabo enyanya z’okulahira okulunga okuboko eby’epolitike. (Maf. 13:16, 17) Bici byabarhabire okujira ntyo? Bulya baba balangalire loshi-loshi eci ciragane ca Yehova: “Ntakakuleka, ntakanakulîkirira.” (Osome Abahabraniya 13:5.) Rhunajire okwirhu koshi lyo rhurheganya akalamo kirhu k’amango gayisha, n’erhi ebi rhurhal’irhanyizeko byakarhuhikira, rhunalangalire oburhabale bwa Yehova.

15. Ntanya zihi z’olugero ababusi Bakristu bashinganine babe nazo okubiyerekire abana babo? (Olole n’enfoto.)

¹⁵ Omu nkomedu nguma na nguma, omulume na mukage banaburhe abana burhangiriza ly’abo bana bayish’ikabaha oburhabale bw’ensaranga hano baba bakola bashosi. Omu njira ndebe, abo babusi banarhanye oku abo bana bo bakabarhabala hano baba barhacigwerhi obuhashe bw’okukola enyanya z’obushosi. Ebibliya edesire oku ababusi bashinganine bashibirire amalagirire g’abana babo. (2 Kr. 12:14) Kobinali, ababusi banaba balagirire oku kuhâbwa burhabale bulebe amango bamashosihala, na bana banji banashagalukire okuha ababusi obo burhabale balagirireko. (1 Tm. 5:4) Cikone ababusi Bakristu barhaba na mwishingo munji omu kulera abana mpu lyo bayish’ikabaha oburhabale bw’ensaranga, lubero n’oko banabe n’omwishingo munji omu kurhabala abo bana bahikire okuba bakozi ba Yehova.​—3 Yn. 4.

16. Gurhi ababusi bakarheganyamwo abana babo lyo baba n’obuhashe bw’okupata ensaranga z’okucihikirigiza amalagirire gabo? (Abefezi 4:28)

¹⁶ Kugerera olwiganyo lwawe, oyigirize abana bawe okulangalira Yehova amango oli wabarheganya okucihikirigiza amalagirire gabo. Kurhenga amango baciri barho, obayerese obulagirire bw’okujira omukolo muzibu. (Mig. 29:21; osome Abefezi 4:28.) Amango bali bakula, obarhabale bakakola bwinja emasomo. Ababusi Bakristu banajira obusagasi lyo babona amakanuni g’Ebibliya, n’enyuma z’aho, banarhabala abana babo barhôle emihigo y’obwenge lugenda amasomo basoma. Oko kwanarhabala abana babo babe n’obuhashe bw’okucihikirigiza amalagirire gabo bonene n’okuba n’akasanzi k’okuhubiri bwenene erhi ciru okujira omukolo gw’obupainiya.

17. Bici rhwakayemera n’obwalagale?

¹⁷ Abakozi bishwekerezi ba Yehova banalangalire oku Yehova agwerhe obuhashe n’irala ly’okubahikirigiza amalagirire gabo g’omubiri. Oku rhuli rhwayegerera obuzinda bw’er’igulu, rhumanyire oku obulangalire bwirhu muli Yehova bwanarhangulwa. Ciru akaba ntyo, ciru bici byakarhuhikira, lekagi rhuhige okulangalira oku Yehova akolesa obuhashe bwage ly’arhuhikirigiza amalagirire girhu g’omubiri. Rhwanayemera n’obwalagale oku Yehova arhurhabala ensiku zoshi ciru rhwakaba rhuli ngahi.