Okuyegererana Rhwene na Nnene Kuba Kwinja Kuli Rhwe!

1-2. Kantu kahi kaba ka bulagirire kuli Yehova na bici alonzize rhujire?

OKU rhujirira abandi kuba kwa bulagirire bwenene kuli Yehova. Yezu ayigirizize oku rhugwasirwe rhuzigire omulungu wirhu nk’oku rhucizigira rhwenene. (Mt. 22:37-39) Oko kuhiziremwo okuba ba lukogo ciru n’oku bantu barhakolera Yehova. Erhi rhuyerekana olo lukogo, rhunabe rhuli rhwayiga olwiganyo lwa Yehova Mungu, “obashisa izuba lyage oku binja n’ababi, onaniesa enkuba oku bashinganyanya n’endyalya.”​—Mt. 5:45.

² Ciru akaba Yehova aba azigire abantu boshi, aba azigire kwago-kwago balya bamurhumikira. (Yn. 14:21) Alonzize rhuyige olwiganyo lwage. Arhuhûnyire ‘rhuzigire . . . bwenene’ bene wirhu na bali birhu rhunabayerese obuzigire “nka kula abalondana bazigirana.” (1 Pt. 4:8; Rm. 12:10, Mashi Bible) Obuzigire bwa ntyo buba nk’oku omuntu aciyumva lugenda omuntu w’omu mulala aba azigire erhi omwîra wage mwinja bwenene.

3. Bici rhugwasirwe rhukengere lugenda obuzigire?

³ Nka kula rhuba rhushinganine rhugendekere rhwashibirira omurhi guli omu jardin yirhu lyo gukula, ko n’oko rhushinganine rhugendekere rhwakola bwenene ly’obuzigire bwirhu oku bandi buyushûka. Entumwa Paolo yahanwire Abakristu ntya: “Musêre omu buzigire bw’ecinyabuguma.” (Hb. 13:1) Yehova alonzize rhugendekere rhwayushûla obuzigire bwirhu oku bandi. Eci cigabi caganirira bulya gurhi rhushinganine rhuyegerere bwenene abirhu bemezi na gurhi rhwakagendekera rhwajiramwo ntyo.

EBIRHUMIRE RHUSHINGANINE RHUYEGERERANE BWENENE RHWENE NA NNENE

4. Nk’oku biganirirwe omu Ennanga 133:1, gurhi rhwakagendekera rhwayerekanamwo oku ecinyabuguma cirhu ciri ca bulagirire? (Olole n’enfoto.)

⁴ Osome Ennanga 133:1. Rhuyemire oku enderho z’omwandisi w’ennanga wayandikaga oku, okuba n’obwîra bw’okunali haguma n’abantu bazigira Yehova ‘kuyinjiha’ na kandi ‘kununa’ ziri z’okuli. Cikone nka kula omuntu akabula bushagalukira omurhi munene abona ngasi lusiku, rhwanahikira aha rhwabula bubona obulagirire bw’ecinyabuguma cirhu c’Ecikristu. Rhunabone bene wirhu na bali birhu kanji-kanji, nkaba ciru kasanzi kanji kali lubero omu mugobe. Gurhi rhwakamanya n’obwalagale erhi rhugendekire rhwabona oku bali ba bulagirire? Obuzigire bwirhu kuli bene wirhu na bali birhu bwagendekera bwayushûka erhi rhwakakarhôla akasanzi k’okurhanya kunganaci ngasi muguma wabo ali wa bulagirire omu cigamba na kuli rhwe.

5. Malehe gahi obuzigire bwirhu kuli bene wirhu na bali birhu buba nago oku bandi?

⁵ Bantu baguma na baguma bayisha oku ntimanano zirhu oburhangiriza banashagaluke bwenene erhi babona obuzigire buba egarhi kirhu. Enyanya z’oko kone, banayemera oku bapasire okuli. Yezu adesire ntya: “Ecimanyiso abantu boshi babonerekwo oku muli baganda bani, bwo buzigire mwazigirane.” (Yn. 13:35) Rhuganirire ebi Chaithra, mwanafunzi muguma w’oku université wakag’iyiga Ebibliya haguma n’Abahamirizi ba Yehova, aciboneraga. Ayemera omulali gw’okuja oku ntimanano y’e eneo. Enyuma z’okuhika kw’eyo ntimanano busu oku busu olusiku lurhanzi, abwira mwalimu wage w’Ebibliya ntya: “Nta lusiku ababusi bani basag’impobera. Cikone oku ntimanano yinyu, nahobirwe kali 52 koshi omu lusiku luguma lone! Nacibwinire obuzigire bwa Yehova kugerera ogu mulala gw’ekiroho. Nnonzize mbe muguma wa mw’ogu mulala.” Chaithra agendekire ajira amajambere anabatizibwe omu mwaka gwa 2024. Kobinali erhi abahyahya babona ebijiro birhu, kuhiramwo n’obuzigire rhujiranako rhwene na nnene, kanji-kanji banashumibwe okukolera Yehova.​—Mt. 5:16.

6. Gurhi okuyegerera bwenene bene wirhu na bali birhu kwakarhulanga?

⁶ Okuyegerera bwenene bene wirhu na bali birhu bwanaba bulanzi kuli rhwe. Paolo arhegesire ababo Bakristu ntya: “Mushibirizanye ngasi lusiku . . . lyo ciru n’omuguma muli mwe arhag’icîlîkirira ebyaha bimurhebe.” (Hb. 3:13, Mashi Bible) Erhi rhwakavunika omurhima bwenene kuhika amagulu girhu garhondere gagenda ebinzongonzongo kurhenga omu njira y’obushinganyanya, Yehova anashumya owirhu mwemezi wabwine oko ly’arhuha oburhabale rhulagirireko. (Enna. 73:2, 17, 23) Oburhabale bwa ntyo kobinali buli bwinja kuli rhwe.

7. Lushangi luhi luba egarhi k’obuzigire n’ecinyabuguma? (Abakolosi 3:13, 14)

⁷ Rhuba omu cigusho c’abantu bakola bwenene lyo bayeresanya obuzigire, enyanya z’oko rhunabe na migisho minji. (1 Yn. 4:11) Kwa lwiganyo, obuzigire bunarhushumye ‘rhukalemberana,’ n’oko kunagendekeze ecinyabuguma cirhu c’Ecikristu. (Osome Abakolosi 3:13, 14; Ef. 4:2-6) Co cirhumire oku ntimanano zirhu, rhunashagalukire ehali nyinja bwenene erhaba omu cindi cigusho coshi-coshi okw’igulu.

MUKAYERESANYA OBUKENGE

8. Gurhi Yehova arhurhabalamwo lyo rhuhikira okuba n’ecinyabuguma?

⁸ Ecinyabuguma rhujira haguma na bene wirhu na bali birhu b’omw’igulu lyoshi ciba cisomerine. Yehova anajire oko kuhashikane ciru akaba rhurhaba bimana. (1 Kr. 12:25) Ebibliya edesire oku ‘Nyamuzinda yêne warhuyigirizagya okuzigirana rhwêne na nnene.’ (1 Ts. 4:9) Oko kuli kuderha oku kugerera Amandiko, Yehova anarhubwire bwinja-bwinja ebi rhushinganine rhujire lyo rhuyegererana bwenene rhwene na nnene. ‘Nyamuzinda yêne anarhuyigiriza’ erhi rhwakakayiga bwinja-bwinja enyigirizo zage n’okuzikolesa. (Hb. 4:12; Yk. 1:25) Na kobinali ebyo byo Abahamirizi ba Yehova bacihangana okujira.

9. Bici olwandiko lw’Abaroma 12:9-13, Mashi Bible, lurhuyigirizize lugenda okuyeresanya obukenge rhwene na nnene?

⁹ Gurhi Akanwa ka Mungu karhuyigirizamwo okuyegererana bwenene rhwene na nnene? Olole ebi Paolo adesire lugenda oko biganirirwe omu Abaroma 12:9-13, Mashi Bible. (Osome.) Obwine oku adesire ntya: ‘Mube babidu [barhanzi, NWT] b’okuyerekana obukenge.’ Bici oko kuhugwîre? Rhushinganine rhulonze obulyo bw’okuyeresa abandi obuzigire “nka kula abalondana bazigirana” omu njira ziri lubero, nka omu kuba ba kubabalira bwenene, ba kuyegereza ebigolo na bahânyi. (Ef. 4:32) Rhurhashinganini rhulinde oku mwene wirhu erhi mwali wirhu arhuyegerera bwenene. Rhwanaba “barhanzi” okujira ntyo. Rhwananacibonera ebi Yezu alaganyagya erhi aderha ntya: “Haba bushagaluke bunji omu kuhâna kulusha omu kuhâbwa.”​—Ebj. 20:35, NWT.

10. Gurhi rhwakabamwo ba bashiru omu ‘kuyerekana obukenge’? (Olole n’enfoto.)

¹⁰ Biri bya kushagalusa okubona oku ho n’aho enyuma z’okurhubwira oku rhube barhanzi b’okuyeresanya obukenge rhwene na nnene, Paolo arhuhûnyire ‘rhube ba bushiru, ci rhurhabâga bolo.’ Omuntu oba wa bushiru anakakola bwenene. Erhi akahâbwa omukolo anaguhikirize bwinja-bwinja. Olwandiko lw’Emigani 3:27, 28 lurhurhegesire ntya: “Orhalahiraga ecijiro cinja oku muntu ocikwanine, nk’ogwerhe obuhashe bw’okucijira.” Kushimbana n’oko, amango rhwamabona muntu mulebe ali omu bulagirire, rhunajire oku rhwakanahasha lyo rhumurhabala. Rhurharhindira okujira ebi rhugwasirwe rhujire; rhurhanarhanya oku owundi muntu aba ye bijira.​—1 Yn. 3:17, 18.

11. Bici birhurhabala okuyegererana rhwene na nnene?

¹¹ Eyindi njira rhwakayeresamwo abandi obukenge kuli kuba babidu okubabalira amango bamarhugokeza. Olwandiko lw’Abefezi 4:26 ludesire ntya: “Izuba lirhazikaga n’obukunizi bucimmugwerhe.” Bulya gurhi? Omulongo gwa 27 gudesire oku okujira ntyo ‘kwanaha hishetani engwarhiro.’ Omu Kanwa kage, Yehova arhubwizire kanji-kanji rhukababalirana rhwene na nnene. Olwandiko lw’Abakolosi 3:13 lurhurhegesire ntya: ‘Mukababalirana.’ Okubabalira amagosa g’abandi eri nguma y’omu njira nyinja bwenene zakarhurhabala okubayegerera bwenene. Erhi rhubabalira abandi, rhunarhabale ‘okulanga obuguma bw’omûka mutagatifu [iroho litagatifu] omu murhûla gw’ecinyabuguma.’ (Ef. 4:3) Kwa bofofi, okubabalira kunarhume haba ecinyabuguma n’omurhûla egarhi kirhu.

12. Gurhi Yehova arhurhabala lyo rhuba ba kubabalira?

¹² Kobinali, hali amango rhwakabona oku kuli kuzibu okubabalira abantu barhugokize. Cikone kugerera iroho lya Mungu, rhwanahasha okujira ntyo. Enyuma z’okurhurhegeka ‘rhuzigirane nka kula abalondana bazigirana’ n’‘okuba ba bushiru,’ amandiko garhubwizire oku rhube n’‘omurhima gw’obwihanganyi.’ Omuntu oba ‘mwihanganyi’ anabe agwerhe bushiru bunji na bushagaluke bunji enyanya z’okushumibwa n’iroho litagatifu. Co cirhumire, iroho lya Mungu lyanarhushumya okuzigirana nk’oku abalondana bazigirana n’okubabalirana rhwene na nnene buzira kusezibwa. Co cirhuma rhusemberera Yehova kurhenga oku murhima arhurhabale.​—Lk. 11:13.

“MUMANYE MWANKACIBERAMWO”

13. Bici byakalerha okugabikanamwo egarhi kirhu?

¹³ Ecigamba ciba cijijirwe n’“abantu boshi” barhenga omu nkomendu ziri lubero. (1 Tm. 2:3, 4) Nka rhurhabiri masu, ezo nkomedu ziri lubero zanarhuma haba okuciberamwo erhi kugabikanamwo omu bintu omuntu akacishoga yene omu kalamo nka emyambalo n’okuciyinjihya, okushibirira amagala, erhi okucishagalusa. (Rm. 14:4; 1 Kr. 1:10) Bulya Nyamuzinda arhuyigirizize okuzigirana rhwene na nnene, rhugwasirwe rhube masu lyo rhurhakag’ishokoza ebi rhwacishogaga rhwene omu kulonza okuyerekana oku biri binja kulusha ebi abandi bacishozire.​—Fl. 2:3.

14. Bici rhushinganine rhucihangane okujira ensiku zoshi, na bulya gurhi?

¹⁴ Kandi rhwanarhuma harhaba okugabikanamwo omu cigamba erhi rhwakakacihangana okuba n’enderho nyinja na za kuha abandi omurhima ngasi mango. (1 Ts. 5:11) Omu mango gacizind’igera, bantu banji bali bamaleka okujira emikolo y’ecigamba erhi abali barhenzibwe omu cigamba bashubir’igaluka omw’ikubuliro. Rhubayegerezize n’obushagaluke! (2 Kr. 2:8) Olole ebyahikiraga mwali wirhu muguma wayishaga aha Nyumpa y’Obwami enyuma z’okuyusa myaka ikumi alesire emikolo y’ecigamba. Adesire ntya: “Ngasi muntu akag’indamusa anali amwemwerhwa omu kumpa okuboko.” (Ebj. 3:19) Gurhi ebyo bijiro bisungunu by’olukogo byamurhabire? Adesire ntya: “Oko kwantabire nciyumve oku Yehova akag’intabala nshub’iba n’omwishingo.” Omu kuba ba kuyubaka abantu boshi, Kristu anarhukolesa lyo rhuhâna oburhulirize kuli balya ‘badwirhe bababala banazidohirwe.’​—Mt. 11:28, 29.

15. Yindi njira ehi rhwakagendekezamwo ecinyabuguma? (Olole n’enfoto.)

¹⁵ Eyindi njira rhwakagendekezamwo ecinyabuguma kuli kugerera enderho zirhu. Olwandiko lwa Ayubu 12:11 ludesire ntya: “K’okurhwîri arhali ko kuyumva ebinwa nka kula olulimi luyumva obununu bw’ebiryo?” Nka kula pishi mwinja ensiku zoshi ahonja ebiryo byage ly’amanya erhi biri binunu embere abihe abandi, nirhu rhushinganine rhukarhanya bwinja lugenda ebi rhwaderha embere rhubiderhe. (Enna. 141:3) Omuhigo gwirhu ensiku zoshi gushinganine gube gwa kumanya n’obwalagale erhi ebi rhukola rhwaderha byaba bya kuyubaka, bya kurhuliriza, “n’okulerhera ababiyumva akamalo [obunguke]”.​—Ef. 4:29.

16. Bandi bwenene bashinganine bakakolesa enderho z’okuyubaka abandi?

¹⁶ Abalume bajire omu buhya n’ababusi bo bashinganine bwenene bakaba masu lyo bakaderha omu njira yayubaka abandi. (Kl. 3:19, 21; Tt. 2:4) Abagula nabo bashinganine babe nshôko y’oburhulirize na ya kuhâna omurhima, bo nka balungere b’obuso bwa Yehova. (Iz. 32:1, 2; Gl. 6:1) Mugani muguma gw’omu Bibliya gurhukengezize ntya: “Okuderha akanwa amango gakwanine, okwo kuba kwinja bwenene.”​—Mig. 15:23, Mashi Bible.

RHUZIGIRE “OKUNALI OMU BIJIRO”

17. Gurhi rhwakamanyamwo n’obwalagale erhi obuzigire bwirhu kuli bene wirhu na bali birhu burhenzire oku murhima?

¹⁷ Entumwa Yowane erhuhîre omurhima “rhumanye rhwankazigirana omu nderho n’omu kalimi, ci rhuzigirane okunali omu bijiro.” (1 Yn. 3:18) Rhulonzize obuzigire bwirhu kuli bene wirhu na bali birhu bube bwa kurhenga oku murhima. Gurhi rhwakajiramwo ntyo? Oku rhwagendekera rhwageza kasanzi kanji haguma na bene wirhu na bali birhu, ko rhwanagendekera rhwayegererana bwenene rhwene na nnene, ko n’obuzigire bwirhu kuli rhwene na nnene bwagendekera bwasêra bwenene. Co cirhumire, okalonza obulyo bw’okugeza akasanzi haguma n’abandi, kwa lwiganyo oku ntimanano n’omu mukolo gw’amahubiri. Okaciha akasanzi k’okulambagirira abandi. Erhi rhujira ebyo bintu, rhunayerekane oku ‘Nyamuzinda yêne warhuyigirizagya okuzigirana rhwêne na nnene.’ (1 Ts. 4:9) Na ntyo rhwagendekera rhwacibonera rhwenene oku ‘kuyinjiha, kunanuna, okubêra haguma omu cinyabuguma nk’abalondana.’​—Enna. 133:1.