“Okubêraho Nyamuzinda kwo Kwinja” Kuli Rhwe!

1-2. (a) Bici biba bihûnyirwe ly’omuntu akoma obwîra busezire haguma na muntu mulebe? (b) Bici rhwaganirira mw’eci cigabi?

KA HALI omwîra mwinja bwenene ojira? Gurhi wakomagamwo obwîra haguma naye? Nkaba wakag’igeza akasanzi haguma naye, wamanya lugenda amazibu gage, wanamanya ebi asima n’ebi ashomba. Wavumbula oku ajira amorhere minja bwenene wakalonza oyige. Wahikira aha wazigira oyo mwîra wawe.

² Okukoma obwîra busezire haguma na muntu mulebe kunahûne akasanzi n’obushiru. Ko binaba bihûnyire ntyo lugenda okucijirira obwîra busezire haguma na Yehova Mungu. Eci cigabi caganirira oku rhwakayegeramwo Mungu wirhu bwenene n’obunguke rhuba nabo omu kujira ntyo. Burhangiriza, rhuganirire bulya gurhi kuli kwinja okuyegera Yehova, Mwîra wirhu mwinja bwenene.

3. Bulya gurhi rhushinganine rhukarhanya bwenene oku bunguke rhuba nabo omu kuyegera Yehova? Ohâne olwiganyo.

³ Buzira karhinda oyemire oku, okuyegera Yehova kuba kwinja. Cikone, okurhanya bwenene lugenda kunganaci kuba kwinja okujira ntyo kwanarhushumya rhugendekere rhwamuyegera bwenene. (Enna. 63:6-8) Kwa lwiganyo, rhumanyire oku okucilisa bwinja, okujira esporo, okurhamuka bwenene, n’okunywa mishi manji, ebyo byoshi biba binja kuli rhwe. Ciru akaba ntyo, bantu banji barharhanya bwenene oku bunguke bw’ebyo bintu barhanashibirira amagala gabo. Cikone, oku rhugendekera rhwarhanya kanji-kanji oku bunguke bw’okuba n’enkomedu nyinja, ko rhunagendekera rhwacihangana bwenene okuba n’ezo nkomedu. Ko n’oko, rhwanaba rhumanyire oku okuyegera Yehova kuba kwinja kuli rhwe, cikone okurhanya bwenene oku bunguke bw’okujira ntyo kwanarhushumya rhugendekere rhwayegera Omwîra wirhu Yehova.​—Enna. 119:27-30.

4. Nk’oku biyerekinwe omu Ennanga 73:28, gurhi omwandisi w’olo lulanga aciyumvirhe?

⁴ Osome Ennanga 73:28. Omwandisi w’Olulanga lwa 73 ali Mulawi wahiragwaho ly’akola nka muzihi w’omuziki omu hekalu ya Yehova. Bibonekine oku aharamize Yehova n’obwishwekerezi omu kasanzi kalebe. Ciru akaba ntyo, acir’ilagirire oku kucikengeza yene n’okukengeza abandi oku “okubêraho [okuyegera] Nyamuzinda” kwali kwinja kuli ye na kuli bo. Bunguke buguma na buguma buhi rhuba nabo omu kujira ntyo?

“OKUBÊRAHO NYAMUZINDA” KUNALERHE OBUSHAGALUKE

5. (a) Bulya gurhi okuyegera Yehova bwenene kunarhulerhere obushagaluke? (b) Kushimbana n’Emigani 2:6-16, ohâne enyiganyo z’obwalagale ziyerekine gurhi obwenge Yehova ahâna bwakakulerheramwo obunguke n’okukulanga.

⁵ Oku rhugendekera rhwayegera Yehova, ko rhunagendekera rhwaba n’obushagaluke. (Enna. 65:4) Hali birhumire binji biyerekine ntyo. Cirhumire ciguma, rhunayunguke omu kukolesa obwenge buba omu Kanwa kage, Bibliya. Obo bwenge bunarhulange oku mashumi mabi, bunanarhurhabale lyo rhurhajiraga amagosa madarhi. (Osome Emigani 2:6-16.) Co cirhumire Ebibliya edesire ntya: “Ow’obushagaluke ali muntu opata obwenge n’omuntu ohikira aha aba n’oburhimanya.”​—Mig. 3:13, NWT.

6. Bici byarhumaga omwandisi w’ennanga aheza omwishingo gwage?

⁶ Kobinali, ciru n’abîra ba Yehova hali amango baciyumva barhagwerhi mwishingo. Omwandisi w’Olulanga lwa 73 ahezize omwishingo gwage amango al’igogomirwe n’entanya mbi. Agayisibwe anaba n’obumvu bulya akag’ibona nk’abantu babi barhashibirira Nnâmahanga erhi amakanuni gage bal’igwerhe akalamo kinja. Acirheba omu kurhanya oku abantu baminya na ba bucibone ensiku zoshi bali bagale banal’igwerhe amagala minja, na ciru barhakag’ihikirwa n’amalibuko. (Enna. 73:3-7, 12) Oyo mwandisi w’ennanga ababala bwenene kuhika ahikira aha acidosa erhi obushiru bwage bw’okukolera Yehova kobinali bwal’igwerhe obunguke. Enyanya z’okubabala bwenene, aderha ntya: “Busha narhamiraga erhi nnanga omurhima gwani nti gurhazingaga, erhi nkalabira enfune omu bweru-kweru.”​—Enna. 73:13.

7. Amango rhuli rhwaciyumva rhubabire, bici rhwakajira? (Olole n’enfoto .)

⁷ Oyo mwandisi w’ennanga arhalekaga amababale gage gamugonye. Ajira kantu kalebe. Aja “omu ka-Nyamuzinda [nafasi ntagatifu nkulu ya Nnâmahanga, NWT],” n’omo Yehova akubûla entanya zage. (Enna. 73:17-19, Mashi Bible) Amango rhubabire, Yehova, Mwîra wirhu mwinja bwenene, anabe amanyire lugenda oko. Erhi rhumuhûna obulongozi kugerera isala, n’okuyemera oburhabale arhuha kugerera Akanwa kage na kugerera ecigamba, rhunahâbwe emisi y’ekandalala lyo rhulembera amababale girhu. Ciru n’amango rhuli rhwaciyumva rhugogomirwe n’amahangayiko, Yehova anarhurhulirize.​—Enna. 94:19.a

“OKUBÊRAHO NYAMUZINDA” KUNARHUME RHWABA N’AKALAMO KINJA N’OBULANGALIRE

8. Zindi njira zihi z’obulagirire okuyegera Nnâmahanga kubamwo kwinja kuli rhwe?

⁸ Okubêraho Nyamuzinda erhi kumuyegera kuba kwinja kuli rhwe omu zindi njira ibirhi z’obulagirire. Burhangiriza, kunarhume rhwaba n’akalamo kinja. Bwa kabirhi, kunarhume rhwaba n’obulangalire busêzire lugenda amango gayisha. (Yer. 29:11) Lekagi rhuganirire kwa buliri obo bunguke.

9. Gurhi okuyegera Yehova kurhuma rhwaba n’omuhigo omu kalamo?

⁹ Okuyegera Yehova kunarhume rhwaba n’akalamo kinja. Bantu banji balahira okubaho kwa Nnâmahanga banarhanye oku akalamo karhajira muhigo n’oku buzinda bene bantu bayish’ihirigirha. Cikone, kugerera ifunzo lirhu ly’Akanwa ka Mungu rhwahikire aha rhwayemera n’obwalagale oku Mungu “ho âbâ n’oku ahemba abamulonza.” (Hb. 11:6) Ciru n’ene, rhugwerhe akalamo k’omwishingo bulya rhuli rhwajira ebi rhwalemeragwa, ko kuderha, okukolera Yehova Larha wirhu w’omu mpingu.​—Lush. 10:12, 13.

10. Bici olwandiko lw’Ennanga 37:29 ludesire lugenda amango gayisha g’abantu balangalira Yehova?

¹⁰ Bantu banji barhajira bulangalire bw’okunali lugenda amango gayisha; banakole kone, banaje omu buhya, banaburhe abana, n’okurheganya oku bayish’ilama hano baba barhacigwerhi obuhashe bw’okujira akasi. Barhaba bamanyire ebi Mungu alaganyize lugenda amango gayisha. Lubero n’oko, abakozi ba Yehova baba bamulangalire. (Enna. 25:3-5; 1 Tm. 6:17) Rhuba rhulangalire Mungu warhukululaga emwage rhunaba rhulangalire ebi arhulaganyize. Obulangalire bwirhu lugenda amango gayisha buhiziremwo okumuharamya emyaka n’emyaka omu Paradizo.​—Osome Ennanga 37:29.

11. Bunguke buhi rhuba nabo erhi rhuyegera Mungu, na gurhi naye aciyumva?

¹¹ Okuyegera Mungu kuba kwinja kuli rhwe omu zindi njira nyinji. Kwa lwiganyo, Yehova alaganyize oku ababalira ebyaha by’abantu baciyunjuzize bamuyegera. (Iz. 1:18) Oko kunarhume rhurhabarhula omuzigo gw’okuba n’ezamiri eri yarhutumuza enyanya z’ebyaha rhwajiraga omu mango gageraga. (Enna. 32:1-5) Kandi rhunabe n’omwishingo bulya rhuli rhwashagalusa Yehova. (Mig. 23:15) Kobinali rhwanarhanya oku yindi migisho rhuba nayo enyanya z’okuba n’obwîra busezire haguma na Mungu. Gurhigi rhwakagendekera rhwayegeramwo Mungu?

OKU RHWAKAJIRA LYO RHUGENDEKERA ‘RHWABÊRAHO NYAMUZINDA’

12. Gurhi rhwajijire lyo rhuyegera Mungu?

¹² Embere rhubatizibwe n’okuba Bahamirizi ba Yehova, rhwajijire binji lyo rhuba bîra ba Yehova. Rhwayizire binji lugenda Yehova Mungu na Yezu Kristu, rhwaciyunjuzize ebyaha birhu bya mîra, rhwabire n’obuyemere busezire muli Mungu, rhwanacihangana okulama kushimbana n’obulonza bwage. Cikone, lyo rhuyegera Mungu bwenene, rhugwasirwe rhugendekere rhwajira ebi bintu bikulikire.​—Kl. 2:6.

13. Bintu bisharhu bihi byakarhurhabala lyo rhugendekera rhwayegera Yehova bwenene?

¹³ Bici byarhurhabala lyo rhugendekera rhwayegera Yehova bwenene? (1) Rhugwasirwe rhugendekere rhwasoma Ebibliya n’okuyiyiga. Amango rhuli rhwajira ntyo, omuhigo gwirhu gurhashinganini gube gwa kuyiga enyigirizo z’omusingi zone lugenda Mungu. Lubero n’oko, rhushinganine rhulonze okumanya obulonza bwa Mungu buli buhi kuli rhwe n’okulongozibwa n’amakanuni ahizire omu Kanwa kage. (Ef. 5:15-17) (2) Rhugwasirwe rhuseze obuyemere bwirhu omu kurhanya bwenene oku bintu binji biyerekine n’obwalagale oku aba arhuzigire. (3) Rhugwasirwe rhugendekere rhwashomba ebintu bigayisa Yehova n’okuyaka okujira obwîra haguma n’abantu bajira ebintu bya ntyo.​—Enna. 1:1; 101:3.

14. Kushimbana n’ebidesirwe omu 1 Abakorinti 10:31, bintu biguma na biguma bihi rhwakajira omu kalamo kirhu ka ngasi lusiku lyo rhushagalusa Yehova? (Olole n’enfoto.)

¹⁴ Osome 1 Abakorinti 10:31. Kuli kwa bulagirire rhugendekere rhwashimbulira bwenene ebintu bishagalusa Yehova. Oko kuhiziremwo binji ahanyuma n’okuja kone omu mukolo gw’amahubiri n’oku ntimanano z’ecigamba. Ebijiro binja bishagalusa Yehova bihiziremwo ebi rhujira omu kalamo kirhu ka ngasi lusiku. Kwa lwiganyo, amango rhuli bikubagirwa omu bintu byoshi n’okushangira ebi rhugwerhe haguma n’abandi, rhunashagaluse Yehova. (2 Kr. 8:21; 9:7) Kandi aba alonzize rhuyerekane oku rhukenzire bwenene engalo y’obuzine. Rhunayegere bwenene Omuhânyi w’obuzine omu kugendekera rhwaba n’olugero omu kulya n’okunywa, n’omu kushibirira amagala girhu omu zindi njira z’olugero. Ngasi bushiru rhujira lyo rhushagalusa Yehova, ciru n’omu bintu bibonekine nka biri bisungunu, bunarhume arhusima bwenene.​—Lk. 16:10.

15. Gurhi Yehova alonzize rhukajirira abandi?

¹⁵ Yehova aba wa lukogo kuyerekera abantu bashinganyanya n’abarhali bashinganyanya. (Mt. 5:45) Alonzize nirhu rhukayeresa abandi olukogo. Kwa lwiganyo, alonzize abakozi bage “barhajaciraga ndi, bayâke enongwe, . . . banalembere abantu boshi.” (Tt. 3:2) Enyanya z’oko, rhurhagayaguza abandi mpu bulya kone barhagwerhi buyemere buguma na nirhu. (2 Tm. 2:23-25) Rhunayegere Yehova bwenene omu kujirira ngasi muntu omu njira y’olukogo ensiku zoshi.

‘RHWANABÊRAHO NYAMUZINDA’ CIRU N’AMANGO RHUZAMBANYIZE

16. Gurhi omwandisi w’Olulanga lwa 73 arhondire aciyumva enyuma za kasanzi kalebe?

¹⁶ Cikone, gurhigi erhi enyuma za kasanzi kalebe wakarhondera waciyumva nk’orhashinganini okuzigirwa na Yehova? Nk’oku rhwaganirire, akantu kali nk’ako kahikire omwandisi w’Olulanga lwa 73. Adesire ntya: “Amagulu gani okwisi gagend’ebinzongonzongo, hindi hitya amagulu gani garherere.” (Enna. 73:2) Ayemire oku ali amaba n’“omungo” ‘anahwinjagala’ “nka nkafu” embere za Yehova. (Enna. 73:21, 22) Cikone, k’aciyumvirhe oku enyanya z’obuzamba bwage Yehova arhakacimuzigire?

17. (a) Ciru n’amango oyo mwandisi w’ennanga al’ivunisire omurhima bwenene, bici ajijire? (b) Isomo lihi rhwakaciyigiriza kugerera ebyamuhikiraga? (Olole n’enfoto.)

¹⁷ Akaba oyo mwandisi w’ennanga aciyumvirhe oku alekerirwe na Yehova, agwasirwe abe aciyumvirhe ntyo kasanzi kalebe kone. Bibonekine oku erhi aciyumva avunisire omurhima bwenene, ahugûkwa obulagirire bw’okuyegera Yehova, nk’oku biyerekinwe mw’ezi nderho zage: “Niehe nàyorha mbâ haguma nawe [nayorha nkuyegera, NWT], wànyansire wangwarhira oku kuboko. Wene wàlonzize okumpabûla, wene wàyishirinyankirira omw’irenge.” (Enna. 73:23, 24) Nirhu rhushinganine rhuhûne Yehova emisi amango rhuli rhwaciyumva oku obuyemere bwirhu buzambanyize erhi amango rhuli rhwaciyumva rhuvunisire omurhima enyanya z’amagosa girhu. (Enna. 73:26; 94:18) Ciru n’erhi amagulu girhu gakagenda binzongonzongo kasanzi kalebe, rhwanagalukira Yehova erhi rhunayemire n’obwalagale oku aba “mubidu w’okubabalira.” (Enna. 86:5, Mashi Bible) Rhushinganine rhuyegere bwenene Mungu wirhu, ci bwenene amango rhuvunisire omurhima kulusha olugero.​—Enna. 103:13, 14.

“OKUBÊRAHO NYAMUZINDA” ENSIKU N’AMANGO

18. Bulya gurhi okuyegera Yehova kurhagwerhi buzinda?

¹⁸ Okuyegera Yehova n’okumumanya bwinja kurhagwerhi buzinda. Ebibliya edesire oku enjira za Yehova, obwenge bwage, n’obumanye bwage ‘birhakalongerezibwa.’​—Rm. 11:33, NWT.

19. Bici Ennanga zirhuyemezize n’obwalagale?

¹⁹ Olwandiko lw’Ennanga 79:13, ludesire ntya: “Rhwehe rhwe rhuli lubaga lwawe rhwe rhunali bibuzi by’omu buso bwawe rhukwitakîre emyaka n’emyaka, rhunakazishambâlira abandi irenge lyawe omu maburhwa n’amaburhwa.” Omu kasanzi ogendekire wayegera Nnâmahanga, nawe wanayemera n’obwalagale oku akugisha ensiku n’amango n’okuderha ntya n’obwagale: “Wene we Kabuye k’omurhima gwani, We wanayorha obâ mwanya gwani [cigabi cani] ensiku n’amango.”​—Enna. 73:26.