Nta Mango Rhusag’iba Rhwene

1-2. (a) Bulya gurhi rhwanaderha oku nta mango rhulwisa amazibu girhu rhwene? (b) Bici rhwaganirira mw’eci cigabi?

AMANGO rhwamarhimanana n’amazibu madarhi, nkaba rhwanaciyumva nka rhuli rhwene omu bote nsungunu eri omu nyanja erimw’omulaba mudarhi. Cikone, rhurhalwisa amazibu girhu rhwene. Larha wirhu w’obuzigire w’empingu arhabona kone amazibu rhuli rhwalwisa, cikone kandi arhulaganyize oku arhurhabala okugahima. Omu njira y’obuzigire, Yehova arhubwizire ntya: ‘Nakurhabala.’​—Iz. 41:10.

² Eci cigabi caganirira gurhi Yehova arhurhabala (1) omu kurhulongoza, (2) omu kurhuha ebi rhulagirireko, (3) omu kurhulanga, (4) n’omu kurhurhuliriza. Yehova arhuyemezize n’obwalagale oku ciru mazibu gahi gakarhuhikira omu kalamo, nta mango akarhuyibagira. Nta mango akarhuleka. Co cirhumire nta mango rhusag’iba rhwene.

YEHOVA ANARHULONGOZE

3-4. Gurhi Yehova arhulongozamwo? (Ennanga 48:14, Mashi Bible)

³ Osome Ennanga 48:14, Mashi Bible. Yehova amanyire oku rhurhakacilongoza rhwene. Gurhi ali alongoza abakozi bage bishwekerezi ene? Njira nguma ajiramwo ntyo kuli kugerera Ebibliya. (Enna. 119:105) Kugerera Akanwa kage kalongozibagwa n’iroho litagatifu, Yehova anarhurhabale okurhôla emihigo n’okuba n’amorhere garhuma rhwaba na mwishingo munji ene n’obuzine bw’ensiku n’amango omu mango gayisha.a Kwa lwiganyo, anarhuyigirize okurhabîka akarhinda, okuba bikubagirwa muli byoshi rhujira, n’okuzigira abandi bwenene kurhenga oku murhima. (Enna. 37:8; Hb. 13:18; 1 Pt. 1:22) Erhi rhuba n’amorhere ga ntyo garhenga emwa Nnâmahanga, rhunabe babusi binja bwenene, balume erhi bakazi binja bwenene, na bîra binja bwenene.

⁴ Kandi, Yehova ahizire omu Kanwa kage emyanzi eganirire abantu b’okunali bahikirwe n’amazibu banakag’iciyumva nk’oku rhuciyumva. (1 Kr. 10:13; Yk. 5:17) Erhi rhusoma emyanzi eganirire akalamo k’okunali k’abo bantu n’okukolesa amasomo rhuyiga kugerera eyo myanzi, rhunayunguke mw’ezi njira ibirhi. Burhangiriza, rhunahugûkwe oku arhali rhwe barhanzi rhwahikirwa n’ago mazibu omu kalamo, abandi bantu nabo bahikirwe n’amazibu gali nk’ago banaba n’obuhashe bw’okugalembera kugerera oburhabale bwa Yehova. (1 Pt. 5:9) Na bwa kabirhi, rhunayige gurhi rhwakalwisamwo amazibu girhu.​—Rm. 15:4.

5. Bandi Yehova akolesa ly’arhulongoza omw’ibarabara lihêsire ebwa buzine?

⁵ Na kandi, Yehova arhôzire emipango ly’abirhu bemezi bakarhulongoza.b Kwa lwiganyo, abangalizi b’omuzunguko banalambagirire ebigamba mango oku gandi lyo babiha omurhima. Ehotuba zabo zinazibuhye obuyemere bwirhu zinanarhurhabale rhugendekeze ecinyabuguma cirhu cinja bwenene. (Ebj. 15:40–16:5) Abagula b’ecigamba nabo, banashibirire ngasi muhubiri kurhenga oku murhima ly’agendekera aba n’obwîra bwinja haguma na Yehova. (1 Pt. 5:2, 3) Ababusi banayigirize abana babo okuzigira Yehova na gurhi bakakarhôla emihigo y’obwenge n’okuba n’enkomedu nyinja z’ekiroho. (Mig. 22:6) Abakazi Bakristu bakuzire kiroho banarhabale bali birhu baciri misole omu kubayeresa olwiganyo lwinja, omu kubaha amahano minja, n’omu kubaha omurhima omu njira y’obushagaluke.​—Tt. 2:3-5.

6. Bici rhugwasirwe rhujire lyo rhuyunguka n’obulongozi burhenga emwa Yehova?

⁶ Yehova ajijire ecage cigabi omu kurhuha obulongozi rhulagirireko. Gurhi rhwakayerekanamwo oku rhushagalukire ebyo arhujirire? Olwandiko lw’Emigani 3:5, 6 ludesire ntya: “Oyegemere Nyamuzinda n’omurhima gwawe goshi, orhanahîraga okayegemera obwenge bwawe wenene.” Rhukajira ntyo, “ayumanyanya enjira [zirhu],” kuli kuderha oku, arhurhabala okuyaka mazibu manji n’okuba n’omwishingo. Rhuvuzire omunkwa bwenene okubona Yehova anarhuhe amahano g’obuzigire ngasi muguma wirhu aba alagirireko!​—Enna. 32:8.

YEHOVA ANARHUHE EBI RHULAGIRIREKO

7. Gurhi Yehova arhuhamwo ebi rhulagirireko? (Abafilipi 4:19)

⁷ Osome Abafilipi 4:19. Arhali bulongozi bw’ekiroho bone Yehova arhuha, cikone kandi anagishe obushiru bwirhu lyo rhupata ebiryo, emishangi n’ahantu h’okulama. (Mt. 6:33; 2 Ts. 3:12) Ciru akaba biyumvikine oku rhwanahangayika lugenda amalagirire girhu g’omubiri, Yehova arhuhîre omurhima rhurhakag’ihangayika okurhalusire olugero lugenda ebyo bintu. (Mt. 6:25) Bulya gurhi? Bulya nta mango Larha wirhu analekerere abakozi bage bishwekerezi amango bali omu bulagirire. (Mt. 6:8; Hb. 13:5) Bulya adesire oku arhuha ebi rhulagirireko, rhwanamulangalira loshi-loshi.

8. Bici Yehova ajirire Daudi?

⁸ Orhanye oku Yehova arhabalagamwo Daudi. Omu myaka Daudi ali omu mazibu erhi ali mubunga, Yehova amuhîre ye n’abambali ebi bal’ilagirireko lyo balama. Omu kurhanya gurhi Yehova akag’imurhabala omu myaka minji, Daudi ayandika ntya: “Nali musole lero nkolaga mushosi, ago mango goshi ntabonaga balesire omushinganyanya, ntabonaga abana bage baja bahûhûsa eci balya.” (Enna. 37:25, Mashi Bible) Rhuyemire n’obwalagale oku omu njira y’obuzigire, Yehova anahe abakozi bage bishwekerezi ebi balagirireko omu mango g’amazibu.

9. Ene, gurhi Yehova ahamwo abantu bage ebi balagirireko omu mango g’obuhanya? (Olole n’enfoto.)

⁹ Kandi, Yehova anahe abantu bage ebi balagirireko omu mango g’obuhanya. Kwa lwiganyo, amango ishali lyabaga omu kagana karhanzi, Abakristu b’omu maeneo gali lubero barhumira bene wabo na bali babo ebintu bal’ilagirireko. (Ebj. 11:27-30; Rm. 15:25, 26) Ene nalyo, abantu ba Yehova bali bayerekana ogo murhima gw’obuhânyi. Erhi obuhanya burhibuka, Yehova anashumye omu njira y’obuzigire abakozi bage lyo bahâna ebintu by’obulagirire nk’ebiryo, amishi, emishangi, n’amafumu kuli balya bali omu eneo yahikirwe n’obo buhanya. Ebikundi by’obubasi binakubûle enyumpa zasherire n’Enyumpa z’Obwami. N’abakozi ba Yehova baba babidu okuhâna oburhulirize bw’ekandalala n’obw’ekiroho kuli balya bahezize enyumpa zabo erhi abazigirwa babo.c

10-11. Bici ebi Borys aciboneraga bikuyigirizize?

¹⁰ Kandi, omu njira y’olukogo Yehova anahe n’abarhamuharamya ebi balagirireko. Ko n’oko, rhunalonze obulyo bw’okuyeresa olukogo abantu barhajira buyemere buguma na nirhu. (Gl. 6:10) Kanji-kanji oko kunarhume rhwahâna obuhamirizi bwinja. Orhanye kw’ebi Borys, mwimangizi muguma w’amasomo olama e Ukraine, aciboneraga. Ciru akaba Borys arhaba muguma w’omu Bahamirizi ba Yehova, ensiku zoshi akag’ijirira abanafunzi Bahamirizi omu njira y’olukogo anakag’iyerekana oku aba akenzire obwemere bwabo. Erhi Borys ahiga okuyaka e eneo al’ilamiremwo yalimwo ivita n’okuja omu eneo y’ecihugo yalimwo obulanzi, bene wirhu bamurhabala. Enyuma z’aho Borys aja oku ntimanano y’Okukengera olufû lwa Yezu. Omu kurhanya kw’ebi aciboneraga, aderha ntya: “Abahamirizi ba Yehova bali ba lukogo kuli nie banakag’inshibirira bwenene. Mvuzire Abahamirizi ba Yehova omunkwa.”

¹¹ Nirhu rhwanayiga Larha wirhu w’obwonjo w’empingu omu kuyeresa abali omu bulagirire obuzigire, babe bantu rhugwerhe buyemere buguma nabo erhi nanga. (Lk. 6:31, 36) Rhulangalire oku, obushiru bwirhu bw’okuzigira abantu bwabashumya babe banafunzi ba Kristu. (1 Pt. 2:12) Ciru amalehe gakaba gahi, rhwaba n’obushagaluke bunji bwenene burhenga omu kuhâna.​—Ebj. 20:35.

YEHOVA ANARHULANGE

12. Bici Yehova alaganyize oku aha abantu bage nka cigusho? (Ennanga 91:1, 2, 14)

¹² Osome Ennanga 91:1, 2, 14. Ene, Yehova alaganyize oku arhuha obulanzi bw’ekiroho, nta mango analeke Shetani ahanze abantu bage okumuharamya omu njira aba ayemire. (Yn. 17:15) Rhwanalangalira loshi-loshi oku Yehova ayish’ihikiriza eciragane cage c’okulanga abantu bage omu mango g’“amalibuko madârhi,” arhali omu njira y’ekiroho mone cikone kandi n’omu njira y’omubiri.​—Maf. 7:9, 14.

13. Njira zihi Yehova alangamwo ngasi muguma wirhu?

¹³ Bulanzi buhi Yehova aha ngasi muguma wirhu? Kugerera Amandiko, Yehova anarhurhabale okumanya aminja n’amabi. (Hb. 5:14) Erhi rhulama kushimbana n’amakanuni gaba omu Kanwa ka Mungu, rhunacilange oku mazibu g’ekiroho n’ag’omubiri. (Enna. 91:4) Kandi, Yehova anarhulange kugerera ecigamba. (Iz. 32:1, 2) Omu kukoma obwîra haguma n’abantu baba bazigire Yehova banalama kushimbana n’amakanuni gage, rhunahâbwe omurhima rhunanabe n’emisi y’okuhagalika amashumi mabi.​—Mig. 13:20.

14. (a) Bulya gurhi arhali amazibu goshi Yehova arhulangako? (b) Bici olwandiko lw’Ennanga 9:10 lurhuyemezize n’obwalagale? (Olole n’amahugûlo g’idako.)

¹⁴ Omu mango ga mîra, mango malebe Yehova akag’ilanga abakozi bage oku mazibu g’omubiri. Cikone, arhakag’ijira ntyo omu ngasi kanga. Mango maguma na maguma rhunarhibukirwe n’“obuhanya.” (Muh. 9:11) Kandi, Yehova alesire omu myaka minji abakozi bage balibuzibwe ciru n’okunigwa ly’ayerekana oku Shetani aba munywesi. (Ayu. 2:4-6; Mt. 23:34) Kobinali ntyo ene nalyo. Anaba arharhenzizi amazibu girhu, cikone rhwanayemera n’obwalagale oku nta mango analekerere abantu baba bamuzigire.d​—Enna. 9:10.

YEHOVA ANARHURHULIRIZE

15. Gurhi rhurhulirizibwamwo kugerera isala, Akanwa ka Mungu, n’abirhu Bakristu? (2 Abakorinti 1:3, 4)

¹⁵ Osome 2 Abakorinti 1:3, 4. Mango malebe, rhunabe n’amababale, amahangayiko, erhi okuvunika omurhima. Hali amango wakaba oli wagera omu kanga kali karhuma waciyumva oli wene. Ka hali omuntu ohugûsirwe oku oli waciyumva? Yehova ahugûsirwe oku oli waciyumva. Yehova arhababazibwa kone n’amalumwa girhu, cikone kandi “ye rhurhuliriza omu mbaka zirhu zoshi.” Gurhi ajiramwo ntyo? Erhi rhumusemberera kugerera isala, anarhuhe “omurhûla gwa Nyamuzinda gulushire ngasi nkengero.” (Fl. 4:6, 7) Kandi, rhunabe n’oburhulirize erhi rhusoma omu Bibliya enderho za Yehova rhwayandikiragwa. Enderho z’obuzigire, z’obwenge na za bulangalire zalongozibagwa n’iroho litagatifu ziba mw’eyo ngalo, zanarhuliriza emirhima yirhu. Na kandi rhunahâbwe oburhulirize oku ntimanano zirhu, hantu rhuyiga ebintu by’okuhâna omurhima birhenga omu Bibliya, rhunanabe haguma na bene wirhu na bali birhu barhuzigira.

16. Bici ociyigirizize kugerera ebyahikiraga Nathan na Priscilla?

¹⁶ Rhwanabona gurhi Yehova ahâna omurhima n’oburhulirize kugerera Ebibliya, omu kurhanya oku lwiganyo lwa Nathan na Priscilla balama e États-Unis. Omu myaka milebe egezire, bahiga okuhamira ahali obulagirire bunji bwenene bw’abahubiri bw’Obwami. Nathan adesire ntya: “Rhwal’ilangalire oku Yehova akagishire obushiru bwirhu.” Cikone, erhi bahika mw’ogo mukolo muhyahya, bahikirwa n’amazibu barhal’irhanyizeko g’amagala n’ag’okubula ensaranga. Byahûna oyo mulume na mukage bagaluke emwabo n’eyo munda nayo bagendekera baba n’amazibu g’okubula ensaranga. Nathan akengire ntya: “Nakacidosa bulya gurhi Mungu arharhugishaga nk’oku rhwakag’irhanya akajijire, ciru nanarhondera nacidosa erhi hali kantu kalebe kabi najijire.” Cikone, omu mango gakwanine, Nathan na Priscilla bahikira okuhugûkwa oku Mungu arhabalekereraga amango bali omu bulagirire. Nathan adesire ntya: “Omu mango g’amazibu Ebibliya yaba nka mwîra w’obwenge wakag’irhuha omurhima n’obulongozi. Okusegeza obwenge bwirhu oku njira Yehova arhurhabiremwo okulembera ago mazibu ahali h’okubusegeza kw’ago mazibu, kwarhurheganyize okulwisa n’obuyemere amazibu g’amango gayisha.”

17. Gurhi mwali wirhu muguma ohamagalwa Helga ahâbirwemwo oburhulirize? (Olole n’enfoto.)

¹⁷ Bene wirhu na bali birhu banarhuha obundi burhulirize. Omu njira ehi? Orhanye oku lwiganyo lwa Helga, olama e Hongrie. Omu myaka minji, alwisize amazibu gali lubero garhumaga akaciyumva arhagwerhi bulangalire anali wa busha. Cikone erhi akengera eyo myaka, anahugûkwe oku Yehova akag’imurhuliriza kugerera ecigamba. Adesire ntya: “Ensiku zoshi Yehova akag’intabala erhi akabwine ngogomirwe enyanya z’akasi, okushibirira omwana wani wali mulwala, n’agandi mazibu. Nta lusiku ciru n’oluguma omu myaka makumi asharhu egezire abuzire bwahikiriza eciragane cage c’okuntuliriza. Kanji-kanji ananzibuhye kugerera enderho z’olukogo na za kuvuga omunkwa z’abandi. Kanji-kanji nakag’iyankirira emesaje, akarte, erhi enderho z’okumvuga omunkwa omu kasanzi nakag’iba nzilagirireko bwenene.”

18. Gurhi rhwakarhulirizamwo abandi?

¹⁸ Rhugwerhe olukengwa lw’okuyiga Mungu wirhu omu kurhuliriza abandi. Gurhi rhwakajiramwo ntyo? Rhwanabayumvirhiza omu njira y’obulembedu, rhwanabaganiza omu njira y’okurhuliriza, n’okubaha oburhabale balagirireko. (Mig. 3:27) Rhulalikire okurhuliriza abantu boshi bali balibuka kuhiramwo na balya barhacirhondera bakolera Mungu. Erhi abalungu birhu bahikirwa n’amababale, endwala, erhi amahangayiko, rhunabalambagirire, rhunabayumvirhize n’okubasomera amandiko g’Ebibliya lyo rhubaha omurhima. Erhi rhuyiga olwiganyo lwa Yehova, “Nyamuzinda wa ngasi burhulirize,” rhunabe rhuli rhwarhabala arhali abirhu bemezi bone okulembera amalibuko, cikone kandi na balya barhali bakolera Mungu lyo balonza okuyiga okubimuyerekire.​—Mt. 5:16.

YEHOVA ARHURHABALA ENSIKU ZOSHI

19. Bici Yehova arhujirira na gurhi rhwakayigamwo olwiganyo lwage?

¹⁹ Yehova anashibirire bwenene balya boshi bamuzigira. Arharhulekerera amango rhuli omu mazibu. Nk’oku omubusi ashibirira omwana omu njira y’obuzigire, Yehova anashibirire abakozi bage bishwekerezi. Anarhulongoze, anarhulange, ananarhurhulirize. Rhunayige Larha wirhu w’obuzigire w’empingu erhi rhurhabala abandi n’okubaha omurhima amango bali omu mazibu. Ciru amazibu n’amalumwa g’ekandalala gakarhuhikira, rhwanayemera n’obwalagale oku Yehova ali haguma na nirhu. Arhulaganyize ntya: “Orhayobohaga, bulya ndi haguma nawe.” (Iz. 41:10) Eco ciragane cirhuhîre omurhima oku rhuli haguma na Yehova! Nta mango rhusag’iba rhwene.