Oku Yehova Arhurhabalamwo lyo Rhulembera

1. Bulya gurhi rhulagirire oku bulembedu, na burhabale buhi rhugwerhe? (1 Petro 5:10)

MULI zino nsiku nzinda ndarhi, abantu ba Yehova balagirire oku bulembedu. Bantu baguma na baguma bagwerhe nsiku nyinji balwazire. Abandi bali balibuka enyanya z’okuba bafîrirwe n’abazigirwa babo. Abandi bali bahagalikwa n’abantu b’omu mulala gwabo erhi n’abarhegesi. (Mt. 10:18, 36, 37) Oyemere n’obwalagale oku ciru wakaba oli walwisa mazibu gahi, Yehova anakurhabala ly’olembera.​—Osome 1 Petro 5:10.

2. Ngahi obuhashe bwirhu bw’okulembera burhenga rhuli Bakristu?

² Okulembera kuhugwîre okugendekera rhwabêra bishwekerezi kuli Yehova n’okumukolera rhunagwerhe omwishingo, ciru n’amango rhugwerhe amazibu, rhuli rhwalibuzibwa, erhi kurhangulwa okujira ecaha. Lyo rhulembera, kandi rhushinganine rhulangalire oku ebintu byaba binja bwenene. Rhuli Bakristu, obuhashe bwirhu bw’okulembera burharhenga omu misi yirhu rhwenene; lubero n’oko, emwa Yehova burhenga, ohâna “obuhashe bunene.” (2 Kr. 4:7, Mashi Bible) Mw’eci cigabi, rhwaganirira mipango ini Yehova ahizireho ly’arhurhabala rhulembere. Kandi rhwabona ebi rhwakajira lyo rhuyunguka na ngasi muguma gwa mw’eyo mipango.

ISALA

3. Bulya gurhi rhwanaderha oku isala ciba cisomerine?

³ Yehova ahizireho omupango gw’okusomeza gwakarhurhabala okulembera. Ajijire bihashikane kuli rhwe okukaganira naye ciru akaba rhuba banya-byaha. (Hb. 4:16) Orhanye kuli oku: Rhwanasalira emwa Yehova ngasi nsa na lugenda ngasi kantu. Anarhuyumva omu ngasi lulimi na ngasi hoshi rhuli, ciru rhwakahêkwa kulî na bene wirhu na bali birhu erhi kuhirwa omu prizo. (Yon. 2:1, 2; Ebj. 16:25, 26) Erhi rhwakaba rhuhangayisire bwenene kuhika rhuyabirwe oku rhwakamubwiramwo oku rhuli rhwaciyumva, Yehova anabe agwerhe obuhashe bw’okuhugûkwa ebi rhulonzize okuderha. (Rm. 8:26, 27) Kobinali, isala ciba cisomerine!

4. Bulya gurhi rhwanaderha oku amasala girhu g’okuhûna Yehova arhurhabale lyo rhulembera gaba gapatine n’obulonza bwage?

⁴ Omu Kanwa kage, Yehova arhuyemezize n’obwalagale oku “erhi rhwankamushenga akantu nk’oku alonzize, anarhuyumvirhize.” (1 Yn. 5:14) Ka rhwanahûna Yehova oburhabale lyo rhulembera? Neci! Okujira ntyo kupatine n’obulonza bwage. Gurhi rhumanyiremwo ntyo? Erhi rhulembera amazibu, rhunahe Yehova ishuzo aha Shetani Ibilisi, okamusholoshonza. (Mig. 27:11) Kandi Ebibliya edesire oku Yehova aba alonzize ‘okurhabâla ngasi boshi bahizire omurhima gwabo loshi kuli ye.’ (2 Nga. 16:9) Co cirhumire, rhwanayemera n’obwalagale oku Yehova agwerhe obuhashe n’irala ly’okurhurhabala lyo rhulembera.​—Iz. 30:18; 41:10; Lk. 11:13.

5. Gurhi isala lyakarhuhamwo omurhûla gw’obukengere? (Izaya 26:3, Mashi Bible)

⁵ Ebibliya edesire oku erhi rhushenga n’omurhima goshi lugenda amazibu girhu, ‘omurhûla gwa Nyamuzinda gulushire ngasi nkengero gunalange emirhima yirhu n’obukengere bwirhu.’ (Fl. 4:7) Orhanye lugenda ebi oko kuhugwîre. Abantu barhakolera Yehova nabo bajira amazibu, na banji muli bo banakolesa enjira ziri lubero lyo barhulirira erhi kuyibagira amazibu gabo. Kwa lwiganyo, lyo baciyumva barhulirire, hali abapima okukolesa njira ndebe y’okurhanya bwenene lyo balonza okurhenza entanya zoshi omu bukengere bwabo. Amango omuntu ali ajira ntyo, anaha abazimu obulyo bw’okushumya obukengere bwage, n’oko kwanalerha amazibu. (Oshushanye na Mateyo 12:43-45.) Lubero n’oko, omurhûla Yehova arhuha erhi rhumushenga guba gulushire bwenene ngasi murhûla omuntu akacilerhera omu kukolesa ezo njira. Erhi rhusalira emwa Yehova, rhunayerekane oku rhumuyegemire loshi-loshi ananarhuhe “omurhûla.” (Osome Izaya 26:3, Mashi Bible.) Njira nguma Yehova arhuhamwo omurhûla kuba kurhurhabala rhukengere amandiko g’okurhurhuliriza. Ago mandiko ganarhulirize emirhima yirhu n’obukengere bwirhu bulya rhumanyire oku Yehova anarhushibirire analonzize rhubêrwe.​—Enna. 62:1, 2.

6. Gurhi wakakolesamwo bwinja omupango gw’isala? (Olole n’enfoto.)

⁶ Ebi wakajira. Amango oli walembera irhangulo ly’obuyemere, “okwebeko Yehova omuzigo gwawe” onamuhûne akuhe omurhûla. (Enna. 55:22, NWT) Kandi osalire ly’ohâbwa obwenge olagirireko ly’ohasha okulwisa amazibu gawe. (Mig. 2:10, 11) Amango oli wajira amasala g’okusemberera Yehova ly’olembera, orhayibagiraga okujira n’amasala g’okumuvuga omunkwa. (Fl. 4:6) Olonze ebiyerekine oku Yehova ali akurhabala omu marhangulo gawe onamuvuge omunkwa oku burhabale bwage. Orhalekaga amazibu gawe garhume orhabona emigisho Yehova amakakuha.​—Enna. 16:5, 6.

AKANWA KA MUNGU

7. Gurhi okuyiga Ebibliya kwakarhurhabalamwo lyo rhulembera?

⁷ Yehova arhuhîre Akanwa kage ly’arhurhabala rhulembere. Ebibliya erimwo mandiko manji garhuyemezize n’obwalagale oku kobinali Yehova arhurhabala. Rhuganirire lwiganyo luguma. Olwandiko lwa Mateyo 6:8 ludesire ntya: “Sho ayishi ebi mulagirirekwo embere mumuhune.” Yezu ye waderhaga ezo nderho, anaba amanyire Yehova bwinja bwenene kulusha oku owundi muntu yeshi-yeshi aba amumanyire. Muli ntyo, rhurhagwerhi ecirhumire coshi-coshi c’okuba n’akarhinda oku Yehova ashibirira amalagirire girhu amango rhuli omu mazibu. Ebibliya erimw’ezindi ntanya nyinji ziri nk’ezo zakazibuhya omuhigo gwirhu gw’okulembera.​—Enna. 94:19.

8. (a) Ohâne olwiganyo lw’akanuni k’Ebibliya kakarhurhabala lyo rhulembera. (b) Bici byakarhurhabala okukengera amakanuni g’Ebibliya amango rhugalagirireko?

⁸ Amakanuni g’Ebibliya ganarhurhabala lyo rhulembera. Ago makanuni gabamwo obwenge bwakarhurhabala okurhôla emihigo minja. (Mig. 2:6, 7) Kwa lwiganyo, Ebibliya erhubwizire rhuleke okuyoboha lugenda ebyakaba omu mango gayisha, cikone ahali h’oko, rhukayegemera Yehova ngasi lusiku. (Mt. 6:34) Erhi akaba rhujira enkomedu y’okusoma Amandiko n’okugarhanyako, rhwanakakengera bwenene amakanuni g’Ebibliya rhulagirireko omu kasanzi rhugalagirireko.

9. Gurhi emyanzi y’omu Bibliya erhurhabalamwo okulangalira bwenene oburhabale bwa Yehova?

⁹ Kandi Ebibliya erimwo emyanzi eganirire akalamo k’abantu b’okunali bali akirhu balangaliraga Yehova, banahâbwa oburhabale bwage. (Hb. 11:32-34; Yk. 5:17) Erhi rhurhanya kw’eyo myanzi, rhunalangalire bwenene oku Yehova ye “lwakiro lwirhu ye rhuyegemera, ye murhabazi orhuba hofi amango g’amalibuko.” (Enna. 46:1, Mashi Bible) Erhi rhurhanya oku bwishwekerezi bw’abakozi ba Yehova b’omu mango ga mîra, oko kunarhushumye okuyiga obuyemere bwabo n’obulembedu bwabo.​—Yk. 5:10, 11.

10. Gurhi wakakolesamwo bwinja omupango gw’Akanwa ka Mungu?

¹⁰ Ebi wakajira. Okasoma Ebibliya ngasi lusiku, onajire eliste y’amandiko obwine oku ganakurhabala bwenene. Kandi, banji babwine oku okusoma olwandiko lw’olusiku sezi, eba njira nyinja bwenene y’okurhondera olusiku erhi n’omuntu agwerhe entanya z’okuhâna omurhima zirhenzire omu Bibliya. Mwali wirhu muguma ohamagalwa Mariea abwine oku ebyo biri by’okuli amango ababusi bage bombi babonagwamwo akansere. Bici byamurhabire okulembera erhi ali abashibirira omu myezi y’embere z’okufâ kwabo? Adesire ntya: “Ngasi sezi nakag’isoma olwandiko lw’olusiku omu broshire Rhusome Amandiko Ngasi Lusiku n’okulurhanyako bwenene. Eyo nkomedu yantabire okubumba omu bukengere entanya z’Amandiko gakag’intabala okusegeza obwenge kuli Yehova n’oku bintu binja bwenene arhuyigiriza biba omu Kanwa kage ahali h’okubusegeza kone oku mazibu nakag’ilwisa.”​—Enna. 61:2.

ABINYU BEMEZI

11. Bulya gurhi biri bya kuhâna omurhima okumanya oku arhali rhwene rhuli rhwalembera amazibu?

¹¹ Yehova arhuhîre bene wirhu na bali birhu b’omw’igulu lyoshi ly’arhurhabala rhulembere. Okumanya ciru kone oku “ago malibuko go ganadwirhe galibuza bene wirhu bali omu igulu” kunarhuyemeze n’obwalagale oku rhurhali rhwene. (1 Pt. 5:9) Kobinali, rhwanayemera n’obwalagale oku ciru akaba rhuli rhwalwisa kanga kahi, abandi nabo balwisize akanga kali nk’ako, banalembera. Oko kuli kuderha oku nirhu rhwanalembera!​—Ebj. 14:22.

12. Gurhi abirhu bemezi bakarhurhabalamwo, na bici nirhu rhwakabajirira? (2 Abakorinti 1:3, 4)

¹² Amango rhuli rhwalembera, abirhu bemezi banarhuha omurhima. Entumwa Paolo yacibwinire oku ebyo biri by’okuli. Kanji avuzire omunkwa balya boshi bamurhabire erhi ali mushwekwa anabahamagala oku mazino gabo. Bahîre Paolo oburhulirize, bamuha omurhima, n’ebi al’ilagirireko. (Fl. 2:25, 29, 30; Kl. 4:10, 11) Ene nkaba rhwanahikirwa n’akantu kali nk’ako. Amango rhulagirire oku burhabale lyo rhulembera, bene wirhu na bali birhu banabe bali ho lyo barhurhabala; n’amango nabo balagirire oku burhabale, rhunabe rhuli ho lyo rhubarhabala.​—Osome 2 Abakorinti 1:3, 4.

13. Bici byarhabire mwali wirhu muguma ohamagalwa Maya ly’alembera?

¹³ Bene wirhu na bali birhu barhulirizize bwenene mwali wirhu muguma w’e Russie ohamagalwa Maya. Omu mwaka gwa 2020, Abapolisi b’e Russie bajira omusako omu mwage n’enyuma z’aho al’igwasirwe acihalire oku kagombe enyanya z’okuba akag’iganirira abandi obuyemere bwage. Maya adesire ntya: “Mw’ago mango, nakag’iba mpangayisire, ntamire, nangayire. Cikone bene wirhu na bali birhu bakag’impamagala oku telefone, na baguma na baguma bakag’inyandikira amamesaje n’amaruba, oko kwakanyemeza kunganaci bal’inzigire. Nal’imanyire ensiku zoshi oku bene wirhu na bali birhu baba banzigire banaba mulala gwani. Cikone kurhondera omu mwaka gwa 2020, nkola mba nyemire oko ciru bwenene.”

14. Gurhi rhwakayungukamwo n’oburhabale bw’abirhu bemezi amango rhuli rhwalembera? (Olole n’enfoto.)

¹⁴ Ebi wakajira. Amango oli walembera, obêre hofi na bene winyu na bali binyu. Orharhindiraga okuhûna abagula oburhabale. Banaba “kacikirizo ka mpûsi na lwakiro bayakiraho enkuba y’ecihûsi.” (Iz. 32:2) Kandi, okengere oku abinyu Bakristu nabo bali balembera amazibu. Okujirira omuntu oli omu bulagirire akantu kinja, kwanakurhabala ogendekere waba wa lugero n’okuba n’entanya nyinja amango oli walembera amazibu gawe.​—Ebj. 20:35.

OBULANGALIRE BWIRHU

15. (a) Gurhi obulangalire lugenda amango gâli embere bwarhabiremwo Yezu? (Abahabraniya 12:2) (b) Gurhi obulangalire bwirhu lugenda amango gayisha burhurhabalamwo?

¹⁵ Yehova arhuhîre obulangalire busezire ly’arhurhabala rhulembere. (Rm. 15:13) Okengere gurhi obulangalire bwarhabalagamwo Yezu ly’alembera olusiku ludarhi bwenene lw’akalamo kage hanw’igulu. (Osome Abahabraniya 12:2.) Yezu al’imanyire oku obwishwekerezi bwage bwakarhabire okuhalira izino lya Yehova. Kandi Yezu akag’ilindirira okushub’icilunga haguma n’Ishe n’amango akakozire haguma na bene wabo omu Bwami bw’empingu. Ko n’oko, obulangalire bwirhu bw’okulama ensiku n’amango omw’igulu lihyahya lya Nnâmahanga, bunarhurhabale okulembera ngasi mazibu igulu lya Shetani lirhulerhera.

16. Gurhi obulangalire bwarhabiremwo mwali wirhu muguma ly’alembera, na bici oyizire kugerera enderho zage?

¹⁶ Obulangalire bw’Obwami bwarhabire mwali wirhu muguma w’e Russie ohamagalwa Alla. Iba agwarhwa anahirwa omu prizo ly’alinda oku atwirwa olubanja. Erhi ebyo biba, Alla aderha ntya: “Okushenga lugenda obulangalire bwirhu bw’amango gayisha n’okurhanya bwenene kuli bo, kunantabale lyo ntavunikaga omurhima bwenene. Nampugûkwe oku arhali bo buzinda obu, Yehova ahima, na nirhu ko n’oko.”

17. Gurhi rhwakayerekanamwo oku rhuvuzire omunkwa oku bulangalire bwirhu buyimangire oku Bibliya? (Olole n’enfoto.)

¹⁷ Ebi wakajira. Ocihe akasanzi k’okurhanya oku mango minja gayisha Yehova arhubîkire. Ocibone oli omw’igulu lihyahya lya Mungu onabone omu bukengere bwawe emigisho rhwayish’iba nayo. Na ngasi mazibu rhwakaba rhuli rhwalwisa ene gayish’ibonekana oku gali ga “hisanzi hitya.” (2 Kr. 4:17) Kandi, ojire oku wakanahasha koshi ly’okaganirira abandi obuyemere bwawe. Orhanye kunganaci kugwasirwe kube kuli kuzibu kuli bo okulwisa amazibu g’er’igulu lya Shetani buzira kumanya omuhigo gwa Mungu lugenda amango gayisha. Wanabashumya balonze okumanya binji lugenda obulangalire bwirhu bw’Obwami ciru kugerera enshambalo nyofi.

18. Bulya gurhi rhwanalangalira ebiragane bya Yehova?

¹⁸ Enyuma z’okulembera mazibu manji n’okugahima, Ayubu abwira Yehova ntya: “Mmanyire oku ntabyo byakakuyabira, ebi walonza wanabijira.” (Ayu. 42:2, Mashi Bible) Nk’oku Ayubu ayigaga, ntaco cakarhuma omuhigo gwa Yehova gurhahikirira. Okumanya ntyo kwanarhuma rhwaba n’emisi amango rhuli rhwalembera. Kwa lwiganyo, orhanye lugenda omukazi olwazire wavunisire omurhima enyanya z’okuba badoktere banji bayabirwe okumubuka. Cikone erhi doktere ogwerhe obulenga na wa kulangalirwa akamanya endwala yage n’okumuhugûlira gurhi ayibukamwo, anaciyumva arhulirire ciru akaba oko kwahûna kasanzi kalebe embere afume. Analemberaga erhi anamanyire oku agwerhe obulangalire bwinja, ko kuderha, obulangalire bw’okufuma. Ko n’oko, okulangalira kwirhu Eparadizo y’amango gayisha kunarhurhabale lyo rhulembera.

19. Bici rhulagirireko lyo rhulembera?

¹⁹ Nk’oku rhwabwine, Yehova anarhurhabale okulembera amazibu girhu kugerera isala, Akanwa kage, abirhu bemezi, n’obulangalire bwirhu. Erhi rhwakakolesa bwinja eyo mipango ahizire ho, Yehova anarhurhabala omu ngasi mazibu gakarhuhikira kuhika olusiku amazibu g’igulu lya Shetani garhakacihaba bundi.​—Fl. 4:13.