Oyemere oku Yehova Akubabalire

1-2. Burhulirize buhi abanya-byaha baciyunjuzize bakayumva? (Olole n’enfoto.)

MWAMI Daudi, al’imanyire gurhi biyorha amango omuntu ali acitumuza enyanya z’ebyaha ajiraga mîra. (Enna. 40:12; 51:3) Ajijire byaha bilebe bidarhi omu kalamo kage. Ciru akaba ntyo, aciyunjuza okunali na Yehova amubabalira. (2 Sam. 12:13) Enyanya z’oko, Daudi ayumva oburhulirize burhenga omu kubabalirwa na Yehova.​—Enna. 32:1.

² Aka Daudi, nirhu rhwanayumva oburhulirize burhenga omu kubabalirwa na Yehova. Kobinali buba burhulirize okumanya oku Yehova anababalire ebyaha birhu ciru n’ebyaha bidarhi, erhi rhwakabihungama, erhi rhwakaciyunjuza n’omurhima goshi, n’erhi rhwakajira okwirhu koshi lyo rhurhacibigalukiraga! (Mig. 28:13; Ebj. 26:20; 1 Yn. 1:9) Biri byakuhâna omurhima okumanya oku Yehova anababalire loshi-loshi, n’oko kunarhume ecaha caba nka cirhajiragwa ciru n’ehitya!​—Eze. 33:16.

3-4. Gurhi mwali wirhu muguma akag’iciyumva enyuma z’okubatizibwa, na bici rhwaganirira mw’eci cigabi?

³ Ciru akaba ntyo, hali amango kuba kuzibu kuli bantu baguma na baguma okuyemera oku Yehova abababalire. Rhuganirire olwiganyo lwa Jennifer, walereragwa omu okuli. Erhi aciri mwana w’omushûko acihira omu by’olugenzi lubi analama akalamo k’obulyalya. Myaka milebe enyuma z’aho, agalukira Yehova anahikiriza ebihûnyirwe ly’abatizibwa. Adesire ntya: “Embere, kanji-kanji nakag’ijira eby’enshonyi, nakag’ilaluka, nali muntu wa bukunizi, n’okulonza ensaranga ko kali kantu k’obulagirire bwenene omu kalamo kani. Omu bukengere bwani nal’imanyire oku enyuma z’okusemberera Yehova ambabalire n’okuciyunjuza, enterekêro ya Yezu yancêsize. Cikone ntakahashire nayemeza omurhima gwani oku Yehava ambabalire.”

⁴ Ka hali amango obona oku kuli kuzibu okuyemeza omurhima gwawe oku Yehova ababalire ebyaha wajiraga mîra? Okengere gurhi Daudi aciyumvirhe lugenda olukogo lwa Yehova. Al’iyemire n’obwalagale oku Yehova amubabalire bulya Yehova aba wa lukogo lunji. Yehova alonzize nawe ociyumve ntyo. Mw’eci cigabi rhwaganirira bulya gurhi rhushinganine rhuyemere oku Yehova arhubabalire n’ebyakarhurhabala okujira ntyo.

BULYA GURHI RHUSHINGANINE RHUYEMERE OKU YEHOVA ARHUBABALIRE?

5. Bici Shetani aba alonzize rhuyemere? Ohâne olwiganyo.

⁵ Amango rhwamayemera oku Yehova arhubabalire, rhwanayaka okurhogera omu murhego muguma gw’omu mirhego ya Shetani. Okengere oku Shetani ajira oku akanahasha koshi ly’arhushumika rhuleke okukolera Yehova. Lyo Shetani ahikiriza omuhigo gwage, analonza okurhuyemeza oku ebyaha birhu birhankababalirwa. Rhuganirire olwiganyo lw’omulume w’omu cigamba c’e Korinti warhenzibagwa omu cigamba enyanya z’olugenzi lw’eby’enshonyi. (1 Kr. 5:1, 5, 13) Enyuma z’aho aciyunjuza. Cikone Shetani alonza abantu ba mw’eco cigamba balahire okumubabalira n’okushub’imuyegereza omu cigamba. Mw’ako kasanzi ko n’ako, Shetani alonza okujira oyo mulume waciyunjuzagya aciyumve nka arhankababalirwa, ko kuderha, arhogere omu ‘burhe bulushire olugero’ n’oko kurhume aleka okukolera Yehova. Shetani arhasag’ishanja omuhigo gwage erhi enjira zage. Cikone “emihigo yage rhurhayihabiri.”​—2 Kr. 2:5-11.

6. Gurhi rhwakajira lyo rhuleka okugendekera rhwacitumuza?

⁶ Amango rhwamayemera kobinali oku Yehova arhubabalire, rhurhankacigendekera rhwacitumuza. Erhi rhujira ecaha, rhunaciyumve kubi enyanya z’ebi rhwajijire. (Enna. 51:17) Okuciyumva ntyo kuba kwinja. Ezamiri yirhu yanarhushumya rhujire bintu bilebe binja lyo rhukubûla olugenzi lwirhu. (2 Kr. 7:10, 11) Cikone, erhi rhwakagendekera rhwacitumuza nsiku nyinji enyuma z’okujira ecaha, rhwanavunika omurhima n’okuleka okukolera Yehova. Lubero n’oko, amango rhwamayemera oku kobinali Yehova arhubabalire, rhwanaleka okugendekera rhwacitumuza. Muli ntyo rhwanakolera Yehova nk’oku alonzize rhumukolere, ko kuderha, okumukolera rhunagwerhe ezamiri ecîre n’omwishingo munji. (Kl. 1:10, 11; 2 Tm. 1:3) Cikone, gurhigi rhwakayemezamwo omurhima gwirhu oku Yehova arhubabalire?

BICI BYAKARHURHABALA LYO RHUYEMERA OKU YEHOVA ARHUBABALIRE?

7-8. Bici Yehova adesire okubimuyerekire erhi aganira na Musa, na bici oko kurhuyemezize n’obwalagale? (Olubungo 34:6, 7, NWT)

⁷ Orhanye lugenda ebi Yehova adesire okubimuyerekire. Kwa lwiganyo, olole ebi Yehova abwiraga Musa oku Ntondo Sinayi.a (Osome Olubungo 34:6, 7, NWT.) Ciru akaba Yehova ajira morhere manji minja, acishoga okubwira Musa oku aba “Nnâmahanga w’olukogo n’obwonjo.” Ka Mungu wa ntyo analahira okubabalira omukozi wage ociyunjuzize ecaha okunali? Nanga ciru n’ehitya! Oko kwanaba kubula obwonjo n’okuba wa murhima mubi, morhere Yehova arhankayerekana ciru n’ehitya.

⁸ Rhwanayemera n’obwalagale oku nta mango Yehova akaderha ebirhali by’okuli okubimuyerekire bulya aba Mungu oderha okuli. (Enna. 31:5) Co cirhumire rhwanayemera ebi adesire. Erhi wakabona oku kuli kuzibu okuleka okucitumuza enyanya z’ebyaha wajiraga mîra, ocidose ntya: ‘Ka nyemire oku kobinali Yehova aba Mungu w’obwonjo n’olukogo, n’oku nta mango akabula bubabalira omunya-byaha yeshi-yeshi ociyunjuzize? Muli ntyo, ka ntashinganini nyemere oku ambabalire?’

9. Bici okubabalirwa ebyaha birhu kuhugwîre? (Ennanga 32:5, Mashi Bible)

⁹ Orhanye bwenene kw’ebi Yehova alongwire abandisi b’Ebibliya baderhe lugenda okubabalira kwage. Kwa lwiganyo, olole gurhi omwandisi w’Ebibliya Daudi aganirire okubabalira kwa Yehova. (Osome Ennanga 32:5, Mashi Bible.) Daudi adesire ntya: ‘Wambabalire.’ Oluderho lw’Ecihabraniya lwahindwirwe “kubabalira” lwanahugûla “okulengeza,” “okuhêka kulî,” erhi “okubarhula.” Erhi Yehova ababalira Daudi ali nk’olengezize ebyaha bya Daudi anabihêka kulî. Muli ntyo Daudi ayumva oburhulirize bulya arhacigendekeraga acitumuza enyanya z’ebyaha byage. (Enna. 32:2-4) Nirhu rhwanayumva oburhulirize buli nk’obo. Amango rhwamaciyunjuza ebyaha birhu okunali, rhurhacishinganini rhugendekere rhwabarhula omuzigo enyanya z’okucitumuza ebyaha Yehova alengezize anabihêka kulî na nirhu.

10-11. Bici enderho “mubidu w’okubabalira” zirhuyigirizize lugenda Yehova? (Ennanga 86:5, Mashi Bible)

¹⁰ Osome Ennanga 86:5, Mashi Bible. Mw’olo lwandiko, Daudi adesire oku Yehova aba “mubidu w’okubabalira.” Lugenda ezo nderho, citabu ciguma cihâna amahugûlo g’Ebibliya cidesire ntya okubiyerekire Yehova: “[Aba] wa ‘kubabalira,’ ko ‘ayorha’ ntyo. ” Bulya gurhi Yehova aba wa kubabalira? Ecigabi cikulikire c’olo lwandiko cidesire ntya: “Orhanayima [oba wa buzigire bunji bwishwekerezi kuli, NWT] ngasi boshi bakushenga.” Nk’oku rhwayizire omu cigabi cishokwire, obuzigire bwishwekerezi bwa Yehova bunamushumye agendekere acishwekera bwenene oku bakozi bage bishwekerezi. Omu kushumibwa n’obuzigire bwage bwishwekerezi, “aba wa bwonjo bunji” oku banya-byaha boshi baciyunjuzize. (Iz. 55:7) Akaba onabone oku kuli kuzibu kuli we okuyemera oku Yehova akubabalire, wanacidosa ntya: ‘Ka nyemire oku Yehova aba wa kubabalira, ko kuderha oku, aba mubidu okubabalira abanya-byaha boshi baciyunjuzize bamulakira ababêre obwonjo? Muli ntyo, ka ntashinganini nyemere oku ambabalire erhi mulakira oku ambêre obwonjo?’

¹¹ Rhunarhulirizibwe omu kumanya oku Yehova aba ahugûsirwe bwinja-bwinja ehali yirhu y’okurhaba bimana. (Enna. 139:1, 2) Oko kuyerekinwe n’obwalagale omu lundi lulanga lwa Daudi lwankarhurhabala okuyemera oku Yehova arhubabalire.

ORHAYIBAGIRAGA EBI YEHOVA AKENGERA

12-13. Kushimbana n’Ennanga 103:14, bici Yehova akengera okubirhuyerekire, na bici oko kumushumya okujira?

¹² Osome Ennanga 103:14. Lugenda Yehova, Daudi adesire oku “arhahabiri [akengire] oku rhuli luvu.” Kugerera ezo nderho, Daudi ahugwîre cirhumire ciguma omu birhumire Yehova aba mubidu okubabalira abakozi bage baciyunjuzize: Anagendekere akengera ehali yirhu y’okurhaba bimana. Lyo rhuhugûkwa oko bwinja, lekagi rhuganirire kwa bulîri enderho za Daudi.

¹³ Daudi adesire oku Yehova “ayishi bwinja eci rhwabumbagwamwo.” Abumbire Adamu “n’ebidaka,” anaba amanyire bene bantu bwinja n’ebi baba balagirireko ciru bakaba bimana, kwa lwiganyo, okulya, okuhunga, n’okuyisa. (Murh. 2:7) Cikone erhi Adamu na Eva bajira ecaha, okuba budaka kwabonekana omu yindi njira. Rhwe nk’iburha lyabo, rhwayimire omu hali yabo y’okuba banya-byaha erhuma kanji-kanji rhwaba n’irala ly’okujira ebintu bibi. Yehova arhaba amanyire kone ehali yirhu y’okurhaba bimana; Daudi adesire oku ‘anayikengere’. Oluderho lw’Ecihabraniya lukolesibwe mw’olo lwandiko lwanahugûla oku Yehova anajire kantu kalebe kinja. Ebi enderho za Daudi zihugwîre, rhwanabiderha ntya kwa bofofi: Yehova aba ahugûsirwe oku kanji-kanji rhunajire amagosa. Erhi biba ntyo, anashumibwe okuyemera obuciyunjuze bwirhu burhenzire oku murhima omu kurhuyeresa olukogo lwage n’okurhubabalira.​—Enna. 78:38, 39.

14. (a) Gurhi Daudi ahugwîremwo oku Yehova ababalira bwenene? (Ennanga 103:12) (b) Gurhi olwiganyo lwa Daudi luyerekinemwo oku Yehova anababalire loshi-loshi? (Olole ecisanduku cidesire, “Oku Yehova Ababalira n’Okuyibagira.”)

¹⁴ Yehova anababalire bwenene. (Osome Ennanga 103:12.) Daudi adesire oku erhi Yehova ababalira ebyaha birhu, anabihire kulî “nka kulya ebushoshokero eri kulî n’ebuzikîro.” Ebushoshokero eba kulî bwenene n’ebuzikiro; nta lusiku aho hantu hombi hakarhimanana. Bici oko kurhuyigirizize lugenda ebyaha Yehova ababalira? Citabu ciguma cihâna amahugûlo g’Ebibliya cidesire oku erhi Yehova ahêka ebyaha birhu kulî na nirhu anabe nka kula obwehe bwa kantu kalebe buhwa loshi-loshi. Co cirhumire rhushinganine rhuyemere n’obwalagale oku arhankacirhanya kw’ebyo byaha ciru n’ehitya erhi kurhukengeza byo. Orhanye hitya, obwehe bwanakengeza omuntu kantu kalebe k’omu mango gageraga. Cikone erhi Yehova ababalira ecaha, binabe nka nta bwehe ciru busungunu bucisigire bw’eco caha bwakamukengeza co erhi bwakarhuma arhuhana enyanya z’aco.​—Eze. 18:21, 22; Ebj. 3:19.

15. Bici rhwakajira erhi akaba rhugendekire rhwacitumuza enyanya z’ebyaha rhwajiraga mîra?

¹⁵ Gurhi enderho za Daudi ziri omu Ennanga 103 zirhurhabalamwo okuyemera oku Yehova arhubabalire? Erhi akaba rhugendekire rhwacitumuza enyanya z’ebyaha rhwajiraga mîra, rhwanacidosa ntya: ‘Ka ndi nayibagira ebi Yehova akengera, ko kuderha, ka nyibagire oku Yehova amanyire ehali yani y’okurhaba mwimana n’oku anababalire ngasi munya-byaha ociyunjuzize oli akani? Ka ndi nakengera kandi ebi Yehova acishoga okuyibagira, ko kuderha, ka ndi nakengera ebyaha Yehova ababalire arhakanacimpana enyanya zabyo?’ Yehova arhasegeza obwenge oku byaha rhwajiraga mîra. Na nirhu rhurhashinganini rhujire ntyo. (Enna. 130:3) Erhi rhuyemera oku Yehova arhubabalire kobinali, rhunaleke okucitumuza, rhunanagendekere rhwamukolera rhunagwerhe omwishingo.

16. Ohâne olwiganyo luyerekine amazibu gakarhuhikira erhi rhwakagendekera rhwacitumuza enyanya z’ebyaha rhwajiraga mîra. (Olole n’enfoto.)

¹⁶ Rhuganirire olwiganyo. Okugendekera rhwacitumuza enyanya z’ebyaha rhwajiraga mîra kuli nka kula omuntu akagendekera alola omu ciyo c’omutuga ciyerekana ebiri enyuma. Kuba kwinja okulola mw’eco ciyo liguma-liguma; okujira ntyo kunarhabale omuntu okuyaka amazibu gali enyuma zage. Cikone ly’omuntu agendekera atembeza buzira mazibu, agwasirwe agendekere alola embere omw’ibarabara. Ko n’oko okukengera liguma-liguma ebyaha rhwajiraga mîra kwanarhurhabala; rhwanaciyigiriza kugerera byo n’okuzibuhya omuhigo gwirhu gw’okurhabigalukira. Cikone erhi rhwakagendekera rhwasegeza obwenge oku byaha rhwajiraga mîra, okucitumuza lugenda byo kwanarhuma rhurhajira binji omu mukolo gwa Yehova. Ahali h’okujira ntyo, rhugendekerage rhwasegeza obwenge omw’ibarabara liri embere zirhu. Rhuli omw’ibarabara lihêsire ebwa buzine omw’igulu lihyahya Mungu arhulaganyize, omwo ‘rhurhakacikengera’ ebintu bibi byagezire.​—Iz. 65:17; Mig. 4:25.

OGENDEKERE WAYEMEZA OMURHIMA GWAWE

17. Bulya gurhi rhushinganine rhugendekere rhwayemeza omurhima gwirhu oku Yehova aba arhuzigire ananarhubabalire?

¹⁷ Rhushinganine rhugendekere rhwayemeza omurhima gwirhu oku Yehova aba arhuzigire n’oku aba mubidu w’okurhubabalira. (1 Yn. 3:19) Bulya gurhi? Bulya Shetani agendekera ajira oku akanahasha koshi ly’arhuyemeza oku Yehova arhankarhuzigira arhankanarhubabalira. Mw’ezo njira zombi, omuhigo gwage guba go na gulya, ko kuderha, okurhushumika rhuleke okukolera Yehova. Rhumanyire oku Shetani ayushûla obushiru bwage bulya akasanzi acisigaline kakola kasungunu. (Maf. 12:12) Rhurhagwasirwi rhumuleke ahime!

18. Bici wakajira ly’oyemeza omurhima gwawe oku Yehova aba akuzigire anakubabalire?

¹⁸ Ly’ozibuhya obuyemere bwawe oku Yehova aba akuzigire, okolese amahano gali omu cigabi c’embere. Ly’oyemeza omurhima gwawe oku Yehova akubabalire, orhanye bwenene kw’ebi Yehova adesire okubimuyerekire. Orhanye bwenene kw’ebi alongwire abandisi b’Ebibliya bayandike lugenda okubabalira kwage. Orhayibagiraga oku aba amanyire bwinja ehali yawe y’okurhaba mwimana n’oku akujirira omu njira y’olukogo. Kandi okengere oku erhi ababalira, anababalire loshi-loshi. Omu kujira ntyo wanaciyumva oshagalusire enyanya z’olukogo lwa Yehova, n’aka Daudi wanahash’iderha ntya: “Koko Yehova, bulya ‘wambabalire’!”​—Enna. 32:5, Mashi Bible.