ECIGABI C’OKUYIGA CA 7
LWIMBO 15 Rhukuze Enfula ya Yehova!
Okubabalira kwa Yehova, Bunguke Buhi Kukulerhera?
“Bulya we obabalira okunali, lyo bakuyoboha bwenene.”—ENNA. 130:4, NWT.
EBI ECI CIGABI CISEGIZE
Omu kuganirira nderho ndebe z’olwiganyo ziri omu Bibliya, rhwaba ba kuvuga omunkwa bwenene enyanya z’oku Yehova arhubabalira omu njira y’okunali.
1. Bulya gurhi kanji-kanji kuba kuzibu okuhugûkwa oku bene bantu bababalira?
“NKUBABALIRE.” Ezo nderho zanarhuliriza kobinali, ci bwenene erhi akaba omuntu amanyire oku anadesire erhi kujira kantu kalebe kagayisize owundi! Cikone bici enderho “nkubabalire” zihugwîre kobinali? Ka kuli kuderha oku omuntu wagayisize alonzize okuderha oku obwîra bwinyu bwacibir’iba nk’oku bwanali? Erhi k’alonzize kone okuderha oku arhacilonzizi muganirire ebyamugayisagya? Okuhugûkwa oku bene bantu bababalira, kwanaba kuzibu.
2. Gurhi okubabalira kwa Yehova kuganirirwe omu Mandiko? (Olole n’amahugûlo g’idako.)
2 Oku Yehova orhubabalira rhwe bene bantu barhali bimana kuba lubero bwenene n’oku rhubabalirana rhwene na nnene. Okubabalira kwa Yehova kuba kwago-kwago. Lugenda Yehova, omuzihi w’ennanga adesire ntya: “Bulya we obabalira okunali, lyo bakuyoboha bwenene.”a (Enna. 130:4, NWT) Okubabalira kwa Yehova kuba ‘kubabalira kw’okunali.’ Ye rhuyeresire ebi okubabalira kuba kuhugwîre kobinali. Omu kanga kalebe, abandisi b’Ebibliya bakolesize oluderho lw’Ecihabraniya lugenda okubabalira lurhasag’ikolesibwa bundi omu kuganirira okubabalira kwa bene bantu.
3. Gurhi okubabalira kwa Yehova kubamwo lubero n’okwirhu? (Izaya 55:6, 7)
3 Erhi Yehova ababalira muntu mulebe, ecaha c’oyo muntu cinazazibwe. Obwîra bwasherezibagwa bunacib’igaluka bwinja nk’oku bwanali. Rhuvuzire omunkwa bwenene okubona Yehova anarhubabalire loshi-loshi na kanji-kanji.—Osome Izaya 55:6, 7.
4. Gurhi Yehova arhurhabiremwo lyo rhuhugûkwa ebi okubabalira kw’okunali kuhugwîre?
4 Obo okubabalira kwa Yehova kuli lubero n’okwirhu, gurhigi byakahashikanamwo rhwe bene bantu rhurhali bimana rhuhugûkwe ebi okubabalira kw’okunali kuhugwîre? Yehova arhurhabire omu kukolesa enderho nyinja z’olwiganyo ziganirire okubabalira kwage. Mw’eci cigabi, rhwaganirira nguma na nguma muli zo. Zarhuyeresa oku Yehova arhenzamwo ecaha, n’omu kasanzi ko n’ako agalule obwîra bwasherezibagwa n’ecaha nk’oku bwanali. Omu kuganirira ezo nderho z’olwiganyo, rhwaba ba kuvuga omunkwa bwenene kuli Larha wirhu w’olukogo orhubabalira omu njira nyinji bwenene.
YEHOVA ANARHENZE ECAHA
5. Gurhi biba erhi Yehova ababalira ebyaha birhu?
5 Omu Bibliya, kanji-kanji ebyaha binashushanyizibwe n’emizigo mizirho. Mwami Daudi aganirire ebyaha byage yene omu kuderha ntya: “Ebyaha ngwerhe byanzonzire, bikola binzidohîre bwenene.” (Enna. 38:4, Mashi Bible) Cikone Yehova anababalire ebyaha by’abanya-byaha baciyunjuzize. (Enna. 25:18; 32:5) Oluderho lw’Ecihabraniya lwahindwirwe “kubabalira,” burhangiriza luhugwîre “kulengeza” erhi “kubarhula.” Omu bwenge rhwanabona Yehova nka mulume wa misi olengezize omu njira y’olwiganyo omuzigo gw’ecaha n’okuguhêka kulî na nirhu.
“Wambabalira” (Enna. 32:5, Mashi Bible)
6. Kunganaci Yehova ahêka ebyaha birhu kulî na nirhu?
6 Hali olundi luderho lw’olwiganyo luyerekine gurhi Yehova ahêka ebyaha birhu kulî bwenene na nirhu. Olwandiko lw’Ennanga 103:12 lurhubwizire ntya: “Nka kulya ebushoshokero eri kulî n’ebuzikîro, kwo Nnâmahanga ahirika kulî ebyaha birhu.” Ebushoshokero eba kulî bwenene n’ebuzikîro. Nta lusiku ebushoshokero yakarhimanana n’ebuzikîro. Omu zindi nderho, Yehova anahêke ebyaha birhu kulî bwenene na nirhu kulusha oku rhwakahash’irhanya. Oko kurhuyemezize n’obwalagale oku Yehova anarhubabalire loshi-loshi!
“Nka kulya ebushoshokero eri kulî n’ebuzikîro” (Enna. 103:12)
7. Gurhi Ebibliya eganiriremwo oku Yehova ajira lugenda ebyaha birhu? (Mikeyo 7:18, 19)
7 Ciru akaba omu njira y’olwiganyo Yehova anahêke ebyaha birhu kulî bwenene na nirhu, k’anacigendekere abisegezako obwenge? Nanga. Lugenda Yehova, Mwami Ezekiya ayandisire ntya: ‘Wajugucire ebyaha byani byoshi enyuma z’omugongo gwawe.’ (Iz. 38:9, 17) Ezo nderho z’olwiganyo ziyerekine oku Yehova anarhôle ebyaha by’abantu baciyunjuzize n’okubijugucira kulî bwenene aha arhakacibibona. Kandi ezo nderho zanahindulwa ntya: “Wajijire [ebyaha byani] bibonekane nka ntabijiraga.” Ebibliya ecibir’isegeza bwenene ezo ntanya omu lundi luderho lw’olwiganyo luli omu Mikeyo 7:18, 19. (Osome.) Mw’olo lwandiko, Yehova aganirirwe nk’oli wajugucira ebyaha birhu emuhengere omu nyanja. Omu mango ga mîra, birhakahashikine omuntu acib’irhôla akantu kajugucirwe emuhengere.
‘Wajugucîre ebyaha byani byoshi enyuma z’omugongo gwawe’ (Iz. 38:17)
“Ebyaha birhu byoshi obikwebe emuhengere” (Mik. 7:19)
8. Bici rhwaciyigirizize kuhika aha?
8 Kugerera ezo nderho z’olwiganyo, rhwayizire oku erhi Yehova arhubabalira, anarhurhenzeko omuzigo gw’ebyaha birhu. Kobinali nk’oku Daudi aderhaga, “ab’omwishingo bali balya ebijiro byabo by’okuvuna amarhegeko byababalirwe n’ab’ebyaha byabo byafunisirwe; ow’omwishingo ali muntu Yehova arhaganjira ecaha cage ciru n’ehitya.” (Rm. 4:7, 8, NWT; Enna. 32:1, 2) Oko ko kubabalira kw’okunali!
YEHOVA ANAZAZE ECAHA
9. Nderho zihi z’olwiganyo Yehova akolesize ly’ahugûla kunganaci ababalira ebyaha birhu?
9 Yehova akolesize ezindi nderho z’olwiganyo ly’arhurhabala rhuhugûkwe gurhi azaza, kugerera enterekêro y’engombôlo, ebyaha by’abantu baciyunjuzize. Omu njira y’olwiganyo, Yehova aganirirwe nka muntu oli washuka n’okucêsa ebyo byaha. Oko kunarhume omunya-byaha aba buzira izabyo. (Enna. 51:7; Iz. 4:4; Yer. 33:8) Yehova yene aganirire amalehe okujira ntyo kulerha: “Ebyaha binyu bikabâ bidukwire nka mwambalo gwa kaduku, byahinduka byêru nka lubula; bikabâ bidukulîze nka mugôla, byayeruha nka boya bwêru!” (Iz. 1:18) Kuba kuzibu bwenene okurhenza amatashi g’irangi lidukula oku mushangi. Cikone, kugerera olo luderho lw’olwiganyo, Yehova arhuyemezize n’obwalagale oku ebyaha birhu byanacêsibwa bwinjinja kuhika birhacibonekanaga.
“Ebyaha binyu bikabâ bidukwire nka mwambalo gwa kaduku, byahinduka byêru nka lubula” (Iz. 1:18)
10. Lundi luderho luhi lw’olwiganyo Yehova akolesize ly’ayerekana enjira ababaliramwo?
10 Nk’oku biyerekinwe omu cigabi c’embere, kandi ebyaha bishushanyizibwe n’“emyenda.” (Mt. 6:12; Lk. 11:4) Co cirhumire, ngasi mango erhi rhujirira Yehova ecaha, rhunabe nka rhuli rhwagendekera rhwaja omu mwenda. Rhunabe n’omwenda gwage munene bwenene! Cikone erhi Yehova arhubabalira, anabe nk’orhenzize omwenda byakahûnyire rhulyule. Arharhuhûna rhulyule omwenda gw’ebyaha byababalirwe. Olo luli lwiganyo lwinja luyerekine oburhulirize rhuyumva amango Yehova amarhubabalira!
“Orhukulire emyenda yirhu” (Mt. 6:12)
11. Ebibliya edesire oku ebyaha birhu ‘binazazibwe,’ bici oko kuhugwîre? (Ebijiro by’Entumwa 3:19)
11 Yehova arharhenza kone emyenda yirhu erhi byaha; anayizaze. (Osome Ebijiro by’Entumwa 3:19.) Erhi omwenda gurhenzibwaho, gunabe nka gugezibwemwo omustari. Cikone, omubalè gugezibwemwo omustari gwanacibonekana. Okuzaza kantu kalebe kohe kuli lubero. Lyo rhuhugûkwa olo luderho lw’olwiganyo, rhushinganine rhukengere oku obwino bwakag’ikolesibwa omu mango ga mîra bwakag’ijirwa omu kucanga akarbone haguma n’obulimbo n’amishi. Omuntu akarhozîre eshifo elobire n’okuzaza emyandiko y’obo bwino. Co cirhumire erhi omwenda gwakazazibwe, “gwakag’ihera” loshi-loshi. Abantu barhakacibwine ebyal’iyandisirwe embere. Byakag’ibonekana nk’ogo mwenda gurhahabaga ciru n’ehitya. Bishagalusize omurhima bwenene okumanya oku Yehova arharhenza kone ebyaha birhu, cikone kandi anabizaze loshi-loshi!—Enna. 51:9.
“Lyo ebyaha binyu bizazibwa” (Ebj. 3:19)
12. Enderho z’olwiganyo ziganirire ecitû, bici zirhuyigirizize?
12 Yehova akolesize ezindi nderho z’olwiganyo zishushine n’ezo ly’aganirira gurhi azazamwo ebyaha. Adesire ntya: “Nazazize amabi gawe nka lwikungu, n’ebyaha byawe nka citû.” (Iz. 44:22) Erhi Yehova ababalira, anabe nk’okolesize ecitû ly’afulika ebyaha birhu birhacibonekanaga.
‘Nazaza amabi gawe nka lwikungu’ (Iz. 44:22)
13. Erhi Yehova arhubabalira ebyaha birhu, gurhi rhuciyumva?
13 Bici enderho z’olwiganyo rhwaganirire zirhuyigirizize? Erhi Yehova arhubabalira ebyaha, rhurhagwasirwi rhugendekere rhwacitumuza enyanya z’ebyo byaha omu kalamo kirhu koshi. Kugerera omûko gwa Yezu, emyenda yirhu enarhenzibweho loshi-loshi. Erhi Yehova ababalira ecaha, cinabe nka ciru rhurhacijiraga ciru n’ehitya. Ntyo ko Yehova arhubabalira erhi rhuciyunjuza ebyaha birhu.
YEHOVA ANAGALULE OBWÎRA BWINJA HAGUMA NA NIRHU
Okubabalira Larha wirhu w’omu mpingu arhubabalira, kunarhuhashise okuba n’obwîra bwinja haguma naye (Olole ecifungo ca 14)
14. Bulya gurhi rhwanalangalira oku Yehova arhubabalira loshi-loshi? (Olole n’enfoto.)
14 Okubabalira kw’okunali Yehova arhubabalira, kunarhuhashise rhube n’obwîra bwinja haguma naye. Kunarhurhabale rhuyake okugogomerwa n’entanya z’okucitumuza. Rhurhashinganini rhuyobohe oku Yehova arhubîkire akarhinda omu bwifulikwe n’oku ali alonza enjira akarhuhanamwo. Nta mango akajira ntyo ciru n’ehitya. Erhi Yehova akaderha oku arhubabalire, bulya gurhi rhwanamulangalira? Yehova abwizire omulebi Yeremiya ntya: “Nababalira amabi banjirire, ntakanacikengera ebyaha byabo.” (Yer. 31:34) Omu kuganirira ezo nderho, entumwa Paolo yakolesize enderho zishushine n’ezo omu kuderha ntya: “Ebyaha byabo ntakàcibikengêra bundi.” (Hb. 8:12) Cikone bici oko kuhugwîre kobinali?
“Ntakanacikengera ebyaha byabo” (Yer. 31:34)
15. Okuderha oku Yehova arhacikengera ebyaha birhu, bici kuhugwîre?
15 Omu Bibliya, oluderho “kukengera” amango goshi lurhaba luyerekire muntu mulebe oli warhanya lugenda kantu kalebe kabire omu mango gageraga. Cikone, lwanaganirira omuntu oli wajira kantu kalebe. Nyankola-maligo wal’imanisirwe oku murhi gw’amalibuko aha burhambi bwa Yezu, ahûnyire ntya: “Yagirwa, onkengere hano ohika omu bwami bwawe.” (Lk. 23:42, 43) Arhahûnaga kone oku Yezu amurhanyeko ago mango. Ishuzo lya Yezu lyayerekine oku anajire kantu kalebe ly’afûla oyo nyankola-maligo. Co cirhumire, erhi Yehova aderha oku arhacikengere ebyaha birhu, anabe alonzize okuderha oku arhajire kantu kalebe ly’arhuhana. Arharhuhane omu mango gayisha enyanya z’ebyaha ababalire.
16. Gurhi Ebibliya eganiriremwo oluhuma lurhenga omu kubabalirwa kw’okunali?
16 Ebibliya ekolesize ezindi nderho z’olwiganyo, ly’erhurhabala rhuhugûkwe oluhuma lurhenga omu kubabalirwa kw’okunali. Edesire oku, enyanya z’ehali yirhu y’okurhaba bimana, rhuba omu “buja bw’ecaha.” Cikone, erhi Yehova arhubabalira rhunabe nka bajà ‘bamalikuzibwa oku caha.’ (Rm. 6:17, 18; Maf. 1:5) Kobinali, okubabalirwa na Yehova kunarhume rhwaciyumva rhushagalusire bwenene ak’omuntu orhenzibwe omu bujà.
‘Mwalikuzibwe oku caha’ (Rm. 6:18)
17. Gurhi rhufumamwo erhi rhubabalirwa ebyaha birhu? (Izaya 53:5)
17 Osome Izaya 53:5. Enderho nzinda z’olwiganyo rhwaganirira zirhushushanyize n’omuntu olwazire endwala ndarhi. Enyanya z’enterekêro y’engombôlo Yehova ahânaga kugerera Omugala, Yehova arhufumize omu njira y’olwiganyo. (1 Pt. 2:24) Engombôlo enarhuhashise okushub’iba n’obwîra bwinja haguma na Yehova, bwasherezibagwa n’endwala y’ekiroho. Nk’oku omuntu wafumaga endwala ndarhi ayumva omwishingo munji bwenene, nirhu rhunacishinge erhi rhufuma omu hali y’ekiroho n’okucib’iyemerwa na Yehova enyanya z’okubabalirwa naye.
“Bibande byage byarhufumize” (Iz. 53:5)
OBUNGUKE RHUBA NABO OMU KUBABALIRWA NA YEHOVA
18. Bici rhwaciyigirizize omu kuganirira nderho ndebe z’olwiganyo ziri omu Bibliya lugenda okubabalira kwa Yehova? (Olole n’ecisanduku cidesire “Oku Yehova Arhubabalira.”)
18 Bici rhwaciyigirizize omu kuganirira enderho z’olwiganyo ziri omu Bibliya lugenda okubabalira kwa Yehova? Erhi Yehova arhubabalira, anarhubabalire loshi-loshi. Oko kunarhuhashise rhube n’obwîra bwinja haguma na Larha wirhu w’omu mpingu. Kandi rhukengire oku, okubabalira kw’okunali eba ngalo. Eyo ngalo erhenzire omu buzigire bwa Yehova n’olukogo lwage lurhashinganinwi arhuyeresa rhuli bene bantu banya-byaha. Rhurhaba rhushinganine eyo ngalo.—Rm. 3:24.
19. (a) Bici rhushinganine rhubeko ba kuvuga omunkwa? (Abaroma 4:8) (b) Bici rhwaganirira omu cigabi cikulikire?
19 Osome Abaroma 4:8. Ngasi muguma wirhu ashinganine abe wa kuvuga omunkwa bwenene okubona Yehova aba Mungu “obabalira okunali.” (Enna. 130:4, NWT) Cikone, erhi akaba rhulonzize Yehova arhubabalire, rhugwasirwe rhujire kantu kalebe k’obulagirire. Yezu adesire ntya: “Akaba murhababaliri abantu, naye Sho arhammubabalire ebyaha binyu.” (Mt. 6:14, 15) Co cirhumire, bibonekine n’obwalagale oku kuli kwa bulagirire rhube ba kubabalira aka Yehova. Cikone, gurhigi rhwakajiramwo ntyo? Rhwaganirira oko omu cigabi cikulikire.
LWIMBO 46 Rhukuvuzire Omunkwa Yehova
a Amandishi marhangiriza g’Ecihabraniya gakolesize oluderho “kubabalira,” luyerekine nk’oko kone ko kubabalira kw’okunali n’obo hali ezindi mbero z’okubabalira. Mpindûlo nyinji z’Ebibliya zirhayerekini ezo ntanya z’obulagirire omu Ennanga 130:4, cikone e Biblia—Tafsiri ya Ulimwengu Mupya yohe yajijire ntyo, n’oko kurhumire yaba yago-yago lugenda oku ehindwire olo lwandiko.