Bici Ebibliya Edesire Okubiyerekire Obulwala bw’Okuyahukira?
Ishuzo ly’Ebibliya
Ebibliya yali erhi yalebire oku omu nsiku za buzinda hanabe endwala z’okuyahukira (cahira). (Luka 21:11) Ezo ndwala burhali buhane Nnâmahanga ahîre abantu. Okuderha okuli, hano hofi-hofi, Nnâmahanga akolesa Obwami bwage ly’ayusa endwala z’okuyahukira.
K’Ebibliya edesire oku hakabîre endwala z’okuyahukira?
Ebibliya erhadesiri amazino g’endwala ziyunjulirine omw’igulu ene, nka Coronavirus, e SIDA, erhi ishushira likali lihamagalwa omu cifaransa gripe espagnole. Cikoki yali erhi yalebire oku “hâbe ecahira” “n’endwala y’okuyirha.” (Luka 21:11; Amafulûlo 6:8, NWT) Ebyo byoshi ciri “cimanyiso c’ensiku nzinda,” zihamagalwa “okuhwa kw’igulu.”—2 Timoteyo 3:1; Mateyo 24:3.
Ka Nnâmahanga akola ahanyire abantu n’endwala?
Ebibliya eganirire nyiganyo nsungunu zone ziyerekine amango Nnâmahanga akolesagya endwala ly’ahana abantu. Kwa lwiganyo, hali abantu akagiderha oku bafê n’olushomyo. (Emibalè 12:1-16; 2 Abami 5:20-27; 2 Enganîro 26:16-21) Cikoki, obo bulwala burhagwarhaga bantu banji, burhanagwarhaga abantu barhaligwerhe igosa. Ebyo byahikiraga abo bantu, bwali buhane bahâbagwa bulya bagomire Nnâmahanga buzira nshonyi erhi boba.
K’endwala ziyunjwire omw’igulu ene, ka buli buhane bwa Nnâmahanga?
Nanga. Bantu baguma na baguma banaderhe oku ene, Nnâmahanga ali akolesa endwala z’okuyahukira n’ezindi ndwala kone mpu ly’ahana abantu. Cikoki, Ebibliya erhayerekini ntyo. Bulya gurhi?
Ecirhumire cirhanzi kuli kubona oku, bakozi balebe ba Nnâmahanga, babe bamira erhi ba muli kano kasanzi kirhu banalwale. Kwa lwiganyo, omulume mwishwekerezi Timoteyo, akagihunyangwa “n’endwala ngasi mango.” (1 Timoteyo 5:23) Cikoki, Ebibliya erhadesiri oku akagihunyagwa n’endwala bulya arhaliyemerirwe na Nnâmahanga. Ene nalyo, hali bakozi banji bishwekerezi ba Nnâmahanga bali balwala erhi kuyahukirwa n’endwala. Bantu banji balwala bulya bali ahantu habi n’omu kasanzi karhali karheganye.—Omuhanûzi 9:11, NWT.
Kandi, Ebibliya eyigirizize oku akasanzi Nnâmahanga ahana abantu karhacihika. Cikoki rhulamire omu nsiku “z’okucira,” kw’okuderha, akasanzi Nnâmahanga ali alalika abantu oku bamuyegere lyo bayishicunguka. (2 Abakorinti 6:2) Enjira nguma Nnâmahanga ali akolesa, kali kazi k’okuhubiri kali kajirwa omw’igulu lyoshi ly’aha abantu ogo mulali. Ako kazi kw’okuhubiri kali kayaliza omwanzi mwinja, kw’okuderha “Omwanzi mwinja gw’Obwami.”—Mateyo 24:14.
K’ezi ndwala z’okuyahukira zanacihwê?
Neci. Ebibliya yalebire oku omu mango gayisha ntaye wanacilwale. Amango Obwami bwa Nnâmahanga bwarhambula, ayishiyusa endwala zoshi. (Izaya 33:24; 35:5, 6) Ashiyusa amalibuko, amalumwa n’olufû. (Amafulûlo 21:4) Ayishinafûla abafîre lyo bacibilama hanw’igulu omu hali nyinja na nyimana. Na kandi bayishiba n’amagala nkana.—Ennanga 37:29; Ebijiro by’Entumwa 24:15.
Amandiko g’Ebibliya gaganirire endwala
Mateyo 4:23: “[Yezu] agera omu Galilaya yoshi aj’ayigiriza omu masinagogi gabo n’okuhanûla Emyanzi minja y’Obwami, anaj’afumya ngasi ndwala na ngasi buzamba bwâli omu lubaga.”
Oko kw’okuderha: Oku ebisomerine Yezu ajaga ajira ziri nyiganyo nsungunu zirhuyeresire ebi Obwami bwa Nnâmahanga bwajirira abantu hano hofi-hofi.
Luka 21:11: “Hâbe . . . ecahira [erhi ndwala z’okuyahukira].”
Oko kw’okuderha: Oku ezi ndwala ziyunjwire omw’igulu ene ciri cimanyiso c’ensiku za buzinda.
Amafulûlo 6:8: ‘Nalola! nabona enfarasi y’irangi lishushire oluvu, owali yidamireko izino lyage ye Lûfu. N’enshinda yalimukulikire. Babaha obuhashe . . . mpu bayirhe . . . n’endwala y’okuyirha.’
Oko kw’okuderha: Oku obulebi buli omu Amafulûlo buganirire ezo nfarasi ini n’abazishonyireko buyerekine oku omu nsiku zirhu hakabire endwala z’okuyahukira erhi cahira.