K’Idîni Lishinganine Okucihira omu by’Epolitike?

Omw’igulu lyoshi, bantu banji baderha oku bali banafunzi ba Yezu Kristu banacihire bwenene omu by’epolitike. Baguma na baguma banalonze okugendekeza obuyemere bwabo n’amakanuni g’olugenzi lwinja omu kulunga okuboko bantu balebe b’epolitike erhi byama bilebe by’epolitike. N’abakulu b’epolitike nabo banakolese ebiyerekire olugenzi lw’abantu n’amazibu abantu bagwerhe lyo abantu b’amadîni babalunga okuboko. Kanji-kanji abimangizi b’amadîni banajire okwabo koshi lya bahâbwa ebikono omu bintu by’epolitike. N’ omu bihugo biguma na biguma, idîni liciderha lya “Cikristu” linajirwe idîni ly’ecihugo, erhi idîni lya leta.

Gurhi orhanyize? K’abanafunzi ba Yezu Kristu bashinganine okucihira omu by’epolitike? Olwiganyo lwa Yezu lwakurhabala obone ishuzo. Adesire ntya: “Nammuhîre olwiganyo, nti ninyu mukajira oku mmujirire.” (Yowane 13:15) Lwiganyo luhi Yezu ayerekine lugenda eby’epolitike?

Ka Yezu acihizire omu by’epolitike?

Nanga. Yezu arhacihiraga omu by’epolitike by’er’igulu.

Yezu arhalonzagya okuhâbwa ecikono omu by’epolitike. Alahire okujirwa cirhongozi w’amarhegesi ga bene bantu erhi Shetani Ibilisi aderha oku amuha “amami goshi g’en’igulu.” (Mateyo 4:8-10)a Agandi mango, abantu balonza okuseza Yezu acihire omu by’epolitike erhi babona oku agwerhe amorhere gakarhumire aba cirongozi mwinja. Ebibliya edesire ntya: “Yezu erhi amanya oku balonza okumugwarha mpu bamujire mwami, acigendera, ashub’icifulika oku ntondo yêneyêne.” (Yowane 6:15) Yezu alahire okujira ebi abantu bal’ilonzize; alahira okucihira omu by’epolitike.

Yezu arhalungaga okuboko oluhande loshi-loshi. Kwa lwiganyo, omu mango ga Yezu, Abayahudi bal’igayire okulipa oburhegesi bw’Abaroma ikoli, bakag’ibona okujira ntyo nka buli bubule bw’obushinganyanya gunali muzigo muzirho. Erhi balonza okushumya Yezu alunge ezo ntanya okuboko, arholonzagya okucihira mw’ako kadali lugenda ir’ikoli. Ababwira ntya: “Ebya Sezari bigaluliragi Sezari, n’ebya Nyamuzinda mubihe Nyamuzinda.” (Marko 12:13-17) Arhalungaga okuboko oluhande loshi-loshi muli oko cikone ayerekana oku ikoli oburhegesi bw’Abaroma, bwakag’ivurhisa omw’izino lya Sezari, lyalishinganine lilipwe. Cikone anayerekana oku omuntu arhakarhumikira amarhegesi omu ngasi kantu. Omuntu arhal’ishinganine okuha abarhegesi ebi Nnâmahanga akwanine, bihiziremwo obwishwekerezi n’enterekêro.​—Mateyo 4:10; 22:37, 38.

Yezu akag’iyigiriza lugenda oburhegesi bw’empingu, k’okuderha Obwami bwa Nnâmahanga, bo analilunzire okuboko. (Luka 4:43) Arhacihiraga omu by’epolitike bulya al’imanyire oku Obwami bwa Nnâmahanga bo bwayish’ihikiriza omuhigo gwa Nnâmahanga okubiyerekire igulu, cikone arhali marhegesi ga bene bantu. (Mateyo 6:10) Al’ihugûsirwe oku Obwami bwa Nnâmahanga burhakarhambwire kugerera amarhegesi ga bene bantu cikone bwayish’irhôla enafasi yago.​—Daniyeli 2:44.

K’Abakristu b’omu myaka igana mirhanzi bakag’icihira omu by epolitike?

Nanga. Abanafunzi ba Yezu bakag’irhumikira irhegeko lyage lidesire oku barhali “cigabi c’er’igulu.” (Yowane 15:19) Bashimbire olwiganyo lwage barhalungaga okuboko oluhande loshi-loshi omu by’epolitike. (Yowane 17:16; 18:36) Ahali h’okucihira omu by’epolitike bakag’ijira omukolo gw’okuhubiri n’okuyigiriza okubiyerekire Obwami bwa Nnâmahanga Yezu abarhegekaga oku bajire.​—Mateyo 28:18-20; Ebijiro by’Entumwa 10:42.

Okurhumikira Nnâmahanga ko kali kantu ka burhanzi omu kalamo k’Abakristu b’omu myaka igana mirhanzi, cikone kandi bal’imanyire oku balishinganine okurhumikira abarhegesi b’ecihugo. (Ebijiro by’Entumwa 5:29; 1 Petro 2:13, 17) Bakag’ikenga amarhegeko banakavurha amakoli. (Abaroma 13:1, 7) Ciru akaba barhakag’icihira omu by’epolitike, bakag’iyunguka n’obulanzi bulerhwa n’amarhegeko ga leta n’eyindi mikolo amarhegesi ga bene bantu gajirira abantu.​—Ebijiro by’Entumwa 25:10, 11; Abafilipi 1:7.

Abakristu b’ene nabo barhalunga okuboko oluhande loshi-loshi

Ebibliya eyerekine n’obwalagale oku Yezu n’abanafunzi bage b’omu myaka igana mirhanzi barhacihiraga omu by’epolitike. Co cirhumire, Abahamirizi ba Yehova b’omw’igulu lyoshi barhalunga okuboko oluhande loshi-loshi. Aka Abakristu b’omu myaka igana mirhanzi, banajire omukolo gw’okuhubiri ‘Omwanzi mwinja gw’Obwami’ Yezu arhegekaga.​—Mateyo 24:14.