Bulya gurhi Abahamirizi ba Yehova Barhaja omu by’Epolitike?
Abahamirizi ba Yehova barhaja omu by’epolitike bulya hali ebirhumire biba omu Bibliya. Rhurhaba omu cikundi cilebe c’okuhagalika abarhegesi b’ecihugo, rhurhavote cigamba cilebe c’epolitike erhi kuvote muntu mulebe w’ecipolitike, rhurhalonza okuba na ceo cilebe omu guvernema, rhurhanalunga okuboko ebikundi by’okulonza empindulo omu guvernema. Rhunanaba rhuyemire n’obwalagele oku Ebibliya edesire okuli erhi erhuhanza ebyantyo.
Rrhunakulikire olwiganyo lwa Yezu orheyemeraga ceo coshi-coshi omu bintu by’epolitike. (Yowane 6:15) Abwira n’abanfunzi bage oku “barhali b’igulu” ananabahugûlira oku barhakwanine okucihira omu bintu by’Epolitike.—Yowane 17:14, 16; 18:36; Marko 12:13-17.
Rhuba bikubagirwa oku Bwami bwa Nnâmahanga Yezu aganiriraga erhi aderha ntya: “Eyi myanzi minja y’Obwami yayishiyalizibwa omw’igulu lyoshi.” (Mateyo 24:14) Rhuba barhumwa bw’Obwami bwa Nnâmahanga ananarhuhire omukolo gw’okuyaliza okuyisha kw’obo Bwami. Co cirhumire rhurhaja omu bintu by’epolitike by’omu ngasi cihugo kuhiramo n’eci rhulamiremwo.—2 Abakorinti 5:20; Abefezi 6:20.
Omu kurhaja omu by’epolitike rhwanahashibwira abantu ba ngasi lubero omwanzi mwinja. Rhuba rhulonzize rhuyerekane kugerera ebinjiro n’enderho zirhu oku Obwami bwa Nnâmahanga bone bo bwayukize bene bantu amazibu gabo.—Ennanga 56:11.
Okubona rhurhaja omu by’akashababe k’eby’epolitike, rhuba omu cinyabuguma ciru akaba rhuli ba cihugo cihi. (Abakolosi 3:14; 1 Petro 2:17) Lubero n’oko, amadîni gacihira omu bintu by’epolitike ngasi mango gabamo akashababe egarhi k’abemêzi bago.—1 Abakorinti 1:10.
Rhunakenge eguvernema. Ciru akaba rhurhaja omu bintu by’epolitike, rhunakenge abakulu b’eguvernema bali balongoza ecihugo rhulamiremo. N’oko kupatine n’er’irhegeko ly’Ebibliya: “Ngasi muntu akayumva abarhegesi bamukulire.” (Abaroma 13:1) Rhunarhumikire amarhegeko, rhunavurhe ikoli n’okulunga okuboko obwihangane bw’eguvernema bw’okulonza okujirira bacikala ebintu binja. Lubero n’okulonza okurhôla enafasi y’eguvernema eri yarhambula, rhunakulikire er’ihano ly’Ebibliya lidesire oku rhukagwasa “abami n’abarhegesi boshi” omu masala girhu amango balonza okurhôla emihigo okubiyerekire oluhuma lw’enterekêro rhuha Nnâmahanga.—1 Timoteyo 2:1, 2, mahugûlo g’idako.
Rhunanakenge ehaki y’abandi y’okucishoga okuja omu by’epolitike. Kwa lwiganyo, rhurhalahira erhi kuhagalika oku obucaguzi burhabaga omu cihugo erhi kulonza okuhanza abantu balonzize okuja oku bucaguzi mpu barhabujagako.
Kw’okurhaja kwirhu omu bintu by’epolitike biri bintu bihyahya? Nanga. Entumwa n’abakristu bw’omu myaka igana mirhanzi balahira oku barhaja mu politike. Ecitabu Au-delà des bonnes intentions (angl.) cidesire ntya: “Ciru akaba bakagikenga abami n’abarhegesi, abakristu bw’omu myaka igana mirhanzi barhabonaga obulagirire bw’okucihira omu bintu by’epolitike.” Ecitabu Sur le Chemin de la Civilisation (Angl.) ciyushwire oku abakristu bw’omu myaka igana mirhanzi “barhakagiyemera eceo omu politike.”
Kw’okurhaja kwirhu omu politike kunabuze ecihugo omurhula? Nanga. Rhurhaba bantu bakulonza akavulindi na muli oko abakulu b’ecihugo barhakarhuyoboha. Raporo nguma yajiragwa omu mwaka gwa 2001 oku Académie Nationale des Sciences y’e Ukraine lugenda okurhaja omu by’epolitike yalidesire ntya: “Ene, bantu banji barhashagalukira okubona Abahamirizi ba Yehova barhaja omu politike, n’oko ko kwarhumaga bashombwa n’oburhegesi bw’Abanazi n’Abakoministi ba mîra.” Ciru akaba bakagilibuzibwa n’obo burhegesi bw’Abanazi, Abahamirizi ba Yehova bagendekire “barhumikira amarhegeko, n’obwishwekerezi boshi bagendekera bakola omu ma fermes n’omu ma industries; barhabuzagya oburhegesi bw’Abanazi omurhula.” Eyo raporo eshwinjire ntya: “Ene nalyo, obwemere n’amakanuni g’idîni g’Abahamirizi ba Yehova, garhabuza ebihugo omurhula.”