MUBE MASU!
Amazibu g’Ababunga—Emiliyoni y’Abantu Yayasire e Ukraine
Erhi abasoda b’e Russie barhera ecihugo c’e Ukraine, omu nsiku 24/2/2022, oko kwarhuma akalamo ka bantu banji kaja omu mazibu erhi bacikala barhondera babunga.a
“Amabombe gakag’ibasha. Byal’ibizubu bwenene ciru ntakahash’ibiganirira. Erhi rhuyumva oku hali e trains ziri zahêka abantu, nirhu rhwahiga okuyaka. Byarhuhûna rhuleke ngasi byoshi rhwal’igwerhe, ngasi muntu akag’ilibirhana hisakoshi hisungunu hyone hirimo ebintu by’obulagirire; nk’amadokima, obufumu, amishi, n’olwiko. Erhi ebombe ziri zabasha, rhwasiga ngasi byoshi, rhwalibirhira aha barhôlera e train.”—Nataliia, w’e Kharkiv, Ukraine.
“Erhi ivita lirhondera, rhurhalimanyire oku lyagendekera. Nakag’iyumva ebombe ziri zabasha omu maeneo malebe g’evile n’amadirisha gakadundagana. Nahiga okuyaka narhôla rhuntu rhusungunu rhone rhw’obulagirire. Narhenga ahaka aha nsa 2:00 z’esezi narhôla e train y’okuja e Lviv buzinda narhôla e bisi y’okumpisa e Poland.”—Nadija, w’e Kharkiv, Ukraine.
Mw’ogu mwanzi rhwabona:
Bici kobinali birhumire abo babunga bahikirwa n’ago mazibu goshi?
Amazibu g’ababunga b’e Ukraine garhonderaga erhi abasoda b’omu cihugo c’e Russie barhera ecihugo c’e Ukraine. Cikone Ebibliya eyerekine ebindi bintu bilerha amazibu gali nk’ago g’okubunga:
Amarhegesi ga bene bantu g’omw’igulu lyoshi, gayabirhwe okulerhera bene bantu ebi balagirireko. Abali barhegeka banakakolesa obuhashe bwabo bw’okurhegeka lyo balibuza abandi.—Omuhanûzi 4:1; 8:9.
Shetani Ibilisi, “mwami w’er’igulu,” ali ashumya bene bantu bajire ebintu bibi, cocinarhumire Ebibliya edesire oku: “Igulu lyoshi liri omu buhashe bw’omubi.”—Yowane 14:30, Mashi Bible; 1 Yowane 5:19.
Ahanyuma n’amazibu gamakahikira bene bantu omu Magana g’emyaka egezire, rhumanyire oku rhulamire omu kasanzi Ebibliya yali erhi yalebire oku: “Omu nsiku nzinda amango mazibu ganayishe.” (2 Timoteyo 3:1) Nakandi, ebyakayerekine oku rhukola rhuli mw’ezo nsiku nzinda gali mavita, obuhanya bw’igulu, ecizombo erhi ishali, n’endwala z’okuyahukira. Ebyo bintu byoshi, binarhume abantu babunga.—Luka 21:10, 11.
Ngahi ababunga bakakûla obulangalire bw’okunali?
Ebibliya eyerekine oku Omulemi wirhu Yehova,b aba azigire ababunga n’abayasire emwabo, ananabayumvize obonjo. (Olushika 10:18) Alaganyize oku ayish’iyusa amazibu g’ababunga kugerera oburhegesi bwage bw’empingu buhamagalwa Bwami bwa Nnâmahanga, bwayish’irhôla enafasi y’amarhegesi ga bene bantu. (Daniyeli 2:44; Mateyo 6:10) Yehova ayish’ikolesa Obwami bwage ly’ahererekeza Shetani Ibilisi loshi-loshi. (Abaroma 16:20) Obo Bwami, bwayish’irhambula igulu lyoshi, bwayish’iyusa amazibu galerhwa n’embibi z’ebihugo abantu bacihirireho. Bene bantu boshi bayish’iba mulala muguma gw’omw’igulu lyoshi. Ntaye wanaciyake ahamwage, bulya Ebibliya elaganyize ntya: “Ngasi muguma akazitamala aha murhi gwage gw’omuzabibu, n’ahidako ly’omurhi gwage gw’omuzeti, ntaye wacibakange. Ntyo kwo akanwa ka Nyamuzinda w’emirhwe kadesire.”—Mikeyo 4:4.
Obwami bwa Nnâmahanga bone bwakayusa loshi-loshi amazibu g’ababunga rhuli rhwacibonera ene. Yehova ayish’ikolesa Obwami bwage ly’ayusa amazibu goshi garhuma abantu babunga. Rhuganirire nyiganyo nguma na nguma:
Ivita. “[Yehova] ajire aho afunga amalwa [ayusa amavita].” (Ennanga 46:9) Ly’omanya gurhi Nnâmahanga ayish’iyusamwo amavita, osome omwanzi gudesire “Amani Duniani—Itapatikanaje?”
Obuminya n’okulibuzanya. “[Yehova] abakûla omu kunyagwa n’omu kulibuzibwa.” (Ennanga 72:14) Ly’ohugûkwa gurhi abantu bakashanja engeso zabo mbi bagwerhe kurhenga mîra, osome ebigabi bidesire “Mambo ya Kufanya Juu ya Kuachana na Chuki.”
Obukenyi. “[Yehova] aciza omukenyi omuyakûzize.” (Ennanga 72:12) Ly’obona gurhi Nnâmahanga ayish’iyusamwo ebintu bilerha obukenyi, osome omwanzi gudesire “Ka Rhwanalangalira oku Enjira z’Okukolesa Obuhirhi bw’Ecihugo (Système Économique) Zirhalimo Obubule bw’Obushinganyanya Zanacibeho?”
Ecizombo erhi ishali. “Idaho lyàyêra engano.” (Ennanga 72:16) Ly’obona ebi Nnâmahanga ayish’ijira ly’abantu barhacibaga n’ishali, osome omwanzi gudesire “Ulimwengu Usio na Njaa?”
K’Ebibliya yanarhabala ababunga ene?
Neci. Ahanyuma n’okuha ababunga obulangalire bw’amango gayisha, Ebibliya yanacib’ibarhabala balwise amazibu bali barhimanana nago muli gano mango.
Akanuni k’Ebibliya: “Embula bwenge enayemereze ngasi kanwa, cikwone okengukwa kulola alolêreza aha agera.”—Emigani 14:15, Mashi Bible.
Ebi oko kuhugwîre: Orhanye oku mazibu gakakuhikira n’ebi wakajira ly’ocilanga. Ocilange n’abantu babi balonza okujirira abubanga amaligo aha balamire bulya bamanyire oku bayobohire.
Akanuni k’Ebibliya: “Nka kuno rhugwerhe ecirhwalya n’ecirhwayambala, rhusime [rhurhimukwe].”—1 Timoteyo 6:8.
Ebi oko kuhugwîre: Oyake okusegeza obwenge bwawe oku bintu by’omubiri. Erhi wakakarhimukwa n’ebi omuntu alagirireko ly’alama, wanaba n’obushagaluke.
Akanuni k’Ebibliya: “Ntyo, ngasi hyoshi mulonza abantu bammujirire, ninyu mubajirirehyo.”—Mateyo 7:12.
Ebi oko kuhugwîre: Obe mwinja na wakulembera. Ago morhere ganarhuma abandi bakakukenga n’okukuyemera omu lubaga.
Akanuni k’Ebibliya: “Mumanye mwankagalulira omuntu obubi oku bundi.”—Abaroma 12:17.
Ebi oko kuhugwîre: Orhalekaga oburhe burhume wacihola amango wamajirirwa kubi. Okujira ntyo kwanarhuma ebintu byaba bibi kulusha.
Akanuni k’Ebibliya: “Nanahasha byoshi n’oburhabale bw’Olya onzibuhya.”—Abafilipi 4:13.
Ebi oko kuhugwîre: Ohire Nnâmahanga oku nafasi y’obulagirire omu kalamo kawe, na kandi okamushenga. Anakuha emisi y’okulwisa amazibu gawe.
Akanuni k’Ebibliya: “Murharhanyagya cici; ci omu ngasi bulagirire, musengere Nnâmahanga, mumushenge, munamuvuge omunkwa. Ntyo omurhûla gwa Nyamuzinda gulushire ngasi nkengero gwalanga emirhima yinyu n’obukengere bwinyu.”—Abafilipi 4:6, 7.
Ebi oko kuhugwîre: Ohûne Nnâmahanga omurhûla gw’ekandalala muli ngasi kanga ocishanziremo. Olole omwanzi gudesire “Abafilipi 4:6, 7—‘Murharhanyagya Cici.’”
a Lusiku luguma enyuma z’ecihugo c’e Russie okurhera ecihugo c’e Ukraine, e Haut Commissariat des Nations unies pour les Réfugiés (UNHCR) yaderha oku ehali er’ivita lyamalerha erhi ndarhi bwenene enahûnyire okushibirirwa duba-duba. Nsiku 12 zone enyuma z’okurhondera kw’ivita, bantu miliyoni ibirhi na kulusha, bali bamakabunga kurhenga e Ukraine kuja omu bindi bihugo n’abandi muliyoni muguma bal’ibungire omu gandi maeneo g’eco cihugo.
b Yehova ly’izino lya Nnâmahanga. (Ennanga 83:18) Olole omwanzi gudesire “Yehova Ye Ndi?”