Okuhâna Oburhabale Amango g’“Ebirha n’Emihigo y’Ebirha”

Mw’ezi nsiku nzinda rhushinganine rhuyumve ”ebirha [mavita] n’emihigo y’ebirha.” (Mateyo 24:6) Kobinali erhi bene wirhu babuganana n’amazibu galerhwa n’ivita banapate oburhabale balagirireko. Eraporo ya 3 y’Embaraza Eri Yalongoza (2022) yahânyire emyanzi y’okuhâna omurhima lugenda oburhabale bwahânagwa omu Europe de l’Est kuli balya bahumagwako n’ivita ly’e Ukraine. Gurhi bene wirhu barhabalanamwo amango g’ivita? Gurhi omukolo gw’okuhâna oburhabale gwarhulirizize bene wirhu b’omu Ukraine?

Bici Biba Bilagirirweko? Gurhi Bihânwa?

Omu nsiku 24/2/2022, erhi ivita lirhondera omu Ukraine, Ekomite y’Abaratibu yayemera ensaranga zakakolesibwe okuhâna oburhabale kuli bene wirhu b’omu Ukraine. Etawi y’e Ukraine yarhondera ho n’aho okugula ebintu by’obulagirire mw’eyo eneo n’okubiha Komite 27 z’Okuhâna Oburhabale omu Mango g’Obuhanya zahiragwaho lyo zibigaba.

Enyuma z’oburhabale bwahânagwa n’Etawi y’e Ukraine, bene wirhu b’oku Biro Bikulu by’Abahamirizi ba Yehova barhondera ho n’aho okurhanya bundi burhabale buhi bulagirirweko. Ekomite y’Abaratibu n’Ekomite y’Okutangaza babwira Edepartema y’Okugula Ebintu oku ekole haguma n’abimangizi b’Etawi y’e Ukraine n’ey’e Pologne omu kushibirira ago malagirire n’okupanga oku emikolo yajirwa. Bene wirhu b’omu departema y’Okugula Ebintu, e Expédition, n’edepartema elabire eby’Amarhegeko za mw’ezo tawi, mwene wirhu muguma w’omu Komite y’Etawi y’e Ukraine, na bene wirhu b’omu Departema y’Omw’Igulu Lyoshi y’Okugula Ebintu bakabuganana ngasi lusiku lyo bajira eyo mikolo.

Mwene wirhu Jay Swinney w’omu Departema y’Okugula Ebintu adesire ntya: “Burhangiriza, rhwal’ishinganine rhulabe bici rhulagirereko. Rhwal’ilonzize okuhâna ebiryo n’ebikolanwa by’okucesa, bene wirhu bali bakomire. Cikone okumanya bici bene wirhu bal’ilagirireko gali maguma g’omu mazibu rhwagwerhe. Na kandi rhwal’ishinganine okumanya gurhi ebyo bintu byagabwa omu Ukraine amango g’ivita omu njira erhahire obuzine bwa bene wirhu omu mazibu na duba-duba.”

Omu Nsiku 9/3/2022, ebintu bene wirhu na bali birhu b’e Ukraine bal’ilagirireko byamanyikana. Amakarto galimo ebiryo by’obulagirire, nka enyama n’ensamaki, enshogo nyumye, omucere, n’ebishimbo, byakahânyirwe haguma n’ensabuni n’orhuradasi rhukolesibwa ebwa musarani. Mw’ago mango, ebiryo ngasi muntu akahâbirwe oku mwezi byakaguzirwe hofi dolare 65. Bulya bene wirhu banji bakabire balagirire kw’ebyo bintu, Ekomite y’Abaratibu yayemera nsaranga nyinji zikolesibwe ly’obo burhabale buhânwa. Cikone gurhi ebyo bintu byakahânyirwe buzira kuhira obuzine bwa bene wirhu omu mazibu?

Omu Nsiku 13/3, bene wirhu babirhi b’e Pologne bapima okurhondera barhuma ebyo bintu kurhenga oku Tawi y’e Pologne kuhika oku depo yali hofi n’e Lviv, e Ukraine. Nsiku nsungunu embere bagende, abanyakazi b’oku Tawi y’e Pologne n’ey’e Ukraine barhabala bantu babirhi bal’icihânyire okurheganya omubalamo gwabo. Etawi yarheganya edokima zihûnyirwe n’amarhegeko zakabahashisize okugera oku mupaka ziyerekine oku kobinali burhabale bagend’ihâna, yalaba erhi emituga yoshi ya bene wirhu eyandisirweko oku eri ya kuhâna oburhabale, yanakola haguma na bene wirhu b’omu Ukraine lyo bamanya enjira ya duba-duba bageramwo hano bayikira oku mupaka. Kugerera oko kucirheganya bwinja n’emigisho ya Yehova, oburhabale bwahânwa oku Komite y’Okuhâna Oburhabale omu Mango g’Obuhanya n’omu nsa 24 bwali bwamarhumwa e Lviv n’abo bene wirhu bagaluka e Pologne omu bulanzi.

Ciru akaba omubalamo murhanzi gwabire mwinja, bene wirhu bahânyire hofi tone nguma y’oburhabale. Bene wirhu bacir’ilagirireko hofi zindi tone 220 z’oburhabale! Gurhi tone nyinji ziri nk’ezo zakahesirwe n’okugabwa duba-duba nk’oku binahashikine?

“Olubaga lwawe lwacihâna buzira kusêzibwa”

Enyuma z’okusoma emyanzi oku jw.org lugenda oku bene wirhu bali balibuzibwa enyanya z’ivita omu Ukraine, abantu b’omu igulu lyoshi balonza okuhâna oburhabale. Bantu banji bal’ilamire omu maeneo ga kuli bahâna oburhabale bwabo oku mukolo gw’omu igulu lyoshi gw’Abahamirizi ba Yehova, bulya bal’imanyire oku obo burhabale bwakolesibwa bwinja bwenene. Abandi bantu bal’ilamire omu bihugo bya hofi bagwerhe obuhashe bw’okuhâna akasanzi kabo, emisi yabo, n’obuhirhi bwabo lyo barhabala. Rhulabe nyiganyo nsugunu.

Omu Pologne, abantu bacihânyire n’obulonza bahira haguma amakumi g’ebihumbi g’amapake g’obufumu, n’abana bakacapa amakarte. Bartosz Kościelniak, muguma w’omu Departema y’Okugula Ebintu oku Tawi y’e Pologne adesire ntya: “Ngasi mango nakag’isoma olwandiko lw’Ennanga 110:3, NWT, ludesire oku ‘olubaga lwa Yehova lwacihâna buzira kusêzibwa.’ Cikone erhi ncibonera niene oburhabale boshi bene wirhu na bali birhu bahânaga, n’amagana g’abacihânaga buzira kusêzibwa bayisha ho n’aho banagwerhe obulonza bw’okukola, oko kwanyeresa oku ezo enderho ziba z’okunali.”

Mwene wirhu muguma ojira e entreprise internationale de logistique wanahânaga oburhabale bw’amakamyo gage haguma n’ekarbira y’okugakolesa adesire ntya: “Kuli nie, aka kali kasanzi k’okuyerekana obuzigire bwani kuli bene wirhu na kuli Yehova. Nshagalusire bwenene okuba nacihânyire lyo mpâna oburhabale.” Bibonekine oku burhabale bwa litre 7 700 z’ekarbira na kulusha bwahânyirwe, na bene wirhu bakolesize akasanzi kabo n’emisi yabo omu kutembeza emituga oku bilometre 48 000 lyo bayusa ogo mukolo gw’okuhâna oburhabale!

Kugerera obulonza n’omukolo gw’obuzigire gwa bene wirhu na bali birhu, omu Nsiku 28 z’Omwezi gwa Kasharhu; nsiku 15 zone enyuma z’okupima okurhuma ebintu, tone 100 z’ebiryo, ebikolanwa by’okucesa, n’amafumu byali byamarhumwa omu Ukraine! Na kugerera obulonza bwinja bwa bene wirhu bw’okuhâna oburhabale n’okuhisa obwo burhabale oku babulagirireko, omubale gw’ensaraga zal’irheganyizibwe okujira ogo mukolo gurhacibaga munji bwenene. Kuhika buno, Abahamirizi ba Yehova bamahâna oburhabale bwa tone 190 omu Ukraine. Kunganaci obo burhabale bwarhulirizize bene wirhu?

“Obuzigire Bwinyu Bwabonekine mw’Ebyo Bijiro!”

Enyuma z’okuhisa ebyo bintu e Lviv, Ekomite z’Okuhâna Oburhabale omu Mango g’Obuhanya z’omu Ukraine zabigabira abali omu bulagirire boshi. Ebyo bintu byagabirwe omu ville nyinji, oku bilometre 1 300 na kulusha kurhenga e Lviv. Ciru akaba ogwo mukolo gwajijirwe bwinja bwenene, gwarhozire kasanzi kanji.a

Mwene wirhu Markus Reinhardt, w’omu Komite y’Etawi y’e Ukraine adesire ntya: “Ago mango g’amazibu, banji muli bene wirhu bacibwinire obuzigire bwa Yehova n’obunguke bw’okuba bishwekerezi oku bulongozi bw’ikubuliro, ciru n’amango ivita lirhacihikira. Kwa lwiganyo, boshi bahîrwe omurhima bakabîka ebiryo n’amishi byakayusa migobe milebe omu mwababwe. Lugenda obwo bulongozi, mugula muguma ohamagalwa Anton okolera e Kiev adesire ntya: ‘Ikubuliro lya Yehova liba lirhurheganyize oku mazibu, rhunavuzire omunkwa kuli oko. Okuba n’omuhako gw’ebiryo n’amishi ciru n’eradiyo byacungwire obuzine bwirhu.’ Rhuvuzire omunkwa bwenene okubona bene wirhu barhumikire obwo bulongozi bulya oko kwahire Etawi akasanzi k’okurheganya enjira z’okuhâna obo burhabale.”

Gurhi bene wirhu baciyumvirhe erhi obo burhabale bubahikako? Mykola na Zinaida, balama omu Kharkiv, bayerekine entanya zabo, badesire ntya: “Ebi mwajijire byarhuhumire oku murhima bwenene. Rhuvuzire omunkwa bwenene oku biryo n’amafumu mwarhuhîre. Kobinali, rhubwine oku Yehova ali arhushibirira.” Valentyna naye aba alamire mw’eyo eneo. Adesire ntya: “Kurhenga ivita linarhondera abantu bakag’ijira kasanzi kanji bali oku mulongo lyo bagula ebintu. Kurhali kulembu ngasi mango okugula ebi bal’ilagirireko. Cikone Yehova al’imanyire aga mazibu anajaga agabona. Ahiraho bene wirhu b’okugaba oburhabale kuhik’aha mwa ngasi muguma wirhu, n’amakarto galimwo ebintu kobinali rhwal’ilagirireko! Omu kasanzi k’amazibu gali nk’ago, amango biri byabonekana nka nta bulangalire bucihali, onaciyumve n’okubona oku Yehova n’ikubuliro lyage bakushibirire omu njira yago-yago. Biri bya kushagalusa bwenene okumanya oku oburhabale bwage bunayishe omu kasanzi kashinganine.”

Yevhen, Iryna, na Mykyta, bayakaga kurhenga e Marioupol, badesire ntya: “Rhuvuzire omunkwa oku bushibirizi n’oburhabale mwahîre omulala gwirhu. Kobinali, bwayishire omu kasanzi kashinganine. Ka mumanyire; oku murhondêro, rhwajaga rhwarhanya mpu bintu byone biri mw’ago makarto, cikone erhi rhugayigula, rhwashanga galimwo n’obuzigire bwinyu!”

Buzira karhinda wanabona oku Yehova akolesize iroho lyage lyo aha abantu bage obulongozi bw’okuhâna omu njira y’obuzigire obwo burhabale omu kasanzi k’“ebirha n’emihigo y’ebirha.” Oburhabale bwinyu bw’okulunga okubo mukolo gw’omu igulu lyoshi, kanji-kanji bwahânyirwe kugerera donate.jw.org, nabo bwajijire mukolo munene bwenene. Rhumuvuzire omunkwa kuli obo buhânyi bwinyu!

Okuhâna Oburhabale Duba-duba na Buzira Kuhira Obuzine omu Mazibu

1. 

   Omu Nsiku 24/2/2022: Ekomite y’Abaratibu yayemera omubale gw’ensaranga zapangagwa lyo bahâna oburhabale omu Ukraine, oko kwarhuma Etawi yarhondeza okuhâna oburhabale

2. 

   Omu Nsiku 24/2–Nsiku 8/3/2022: Etawi y’e Ukraine yagula ebintu mw’eyo eneo yanarhondera yabigaba oku Komite z’Okuhâna Oburhabale. Na kandi Etawi yacirheganya okuyankirira n’okugaba ebintu byarhengaga e Pologne

3. 

   Omu Nsiku 9/3/2022: Ekomite y’Abaratibu yayemera okuhâna oburhabale oku bantu e Ukraine

4. 

   Omu Nsiku 10–12/3/2022: Emipango yarhôlwa y’okupima okurhuma ebiryo n’ebindi bintu kurhenga e Pologne kuja e Lviv, omu Ukraine

5. 

   Omu Nsiku 13/3/2022: Bapima okurhuma ebiryo n’ebindi bintu kurhenga e Pologne kuja e Lviv, omu Ukraine.

6. 

   Omu Nsiku 14–16/3/2022: Aha Nyumpa y’Entimanano Nkulu eba hofi n’e Poznan, omu Pologne, bavolontere omu by’obubasi bali barheganye lyo bahira haguma amakarto g’ebiryo n’ebikolanwa by’okucesa

7. 

   Omu Nsiku 17/3/2022: Nsiku ini enyuma z’okubona oku emipango y’okupima okurhuma ebiryo n’ebindi bintu yagwasire, tone 13 z’amakarto g’oburhabale zarhondera zayikira oku mupaka gw’e Ukraine

8. 

   Omu Nsiku 21–27/3/2022: Omu kushimba eyo njira yo n’eyo, amakarto gal’isigire g’oburhabale gahirwa haguma omu Pologne ganarhumwa omu Ukraine n’enyuma z’aho omu nsa 24 gagabirwa abantu bali omu bulagirire

9. 

   Omu Nsiku 28/3/2022: Nsiku 20 enyuma z’okuyemera okuhâna oburhabale, tone 100 z’ebiryo, ebikolanwa by’okucesa, n’amafumu zo zali zamagabwa omu Ukraine

Kuhika buno, Abahamirizi ba Yehova bamarhuma tone 190 na kulusha z’oburhabale e Ukraine.