Ekulembe: kalemera ohamagalwa Ian, e Floride, États-Unis, mwezi gwa mwenda 2022 (Sean Rayford/Getty Images); omu kagarhi: muzire muguma n’omugala bali bayaka ahantu hali obuhanya, Donetsk, e Ukraine, mwezi gwa nda 2022 (Alex Chan Tsz Yuk/SOPA Images/LightRocket via Getty Images); e kulyo: bali bapima Ekorona, Pékin, e Chine, mwezi gwa kani 2022 (Kevin Frayer/Getty Images)
MUBE MASU!
Omwaka gwa 2022 Gwalimo Nkananga Nyinji—Bici Ebibliya Edesire Lugenda Oko?
Omu mwaka gwa 2022, rhwakag’iyumva ngasi mango emyanzi lugenda amavita, okunyiha kw’obuhirhi, n’obuhanya bucilerha bone. Bibliya yone eyerekine n’obwalagale ebi ebyo bintu bihugwîre.
Ebi ebintu byajirikine omu mwaka gwa 2022 bihugwîre
Ebintu byajikine omu mwaka guhwire biyerekine n’obwalagale oku rhulamire omu kasanzi Ebibliya ehamagala “nsiku nzinda.” (2 Timoteyo 3:1) Ako kasanzi karhonderaga omu mwaka gwa 1914. Olole gurhi ebintu bicizind’ijirikana bipatine n’ebi Ebibliya yali erhi yalebire lugenda gano mango girhu:
“Entambala [Amavita].”—Mateyo 24:6, Mashi Bible.
“Omu mwaka gwa 2022, Ebulaya yahikirwa n’amazibu madarhi bwenene galerhwa n’ivita.”a
Olole omwanzi gudesire “Ecihugo c’e Russie okurhera ec’e Ukraine.”
“Ecizombo [Ishali].”—Mateyo 24:7.
“Omwaka gwa 2022, gwalimo ishali lidarhi bwenene.”b
Olole omwanzi gudesire “Ivita ly’e Ukraine Lyarhumire Ebiryo Byanyiha omw’Igulu lyoshi.”
“Ecahira [Ndwala z’okuyahukira].”—Luka 21:11.
“Abantu bashubir’irhondera balwala e piliyo, e variole de singe n’Ekorona egendekire yayirha bantu banji bwenene. Oko kuyerekine n’obwalagale kunganaci endwala z’okuyahukira zigendekire zaba ndarhi.”c
Olole omwanzi gudesire “Bantu Miliyoni 6 Bafîre n’Ekorona.”
“Eby’okuyobohya.”—Luka 21:11.
“Okuyushuka bwenene kw’ecidurhu, okuyumûka kw’idaho, emizirhu okuyaka muliro n’okuyunjulira kw’amaishi. Amango g’ecidurhu g’omu mwaka gwa 2022 gakakengerwa bulya mw’ago mango bintu binji byasherire, ebihumbi by’abantu bafîre n’abandi banji bayâka emwababo.”d
Olole omwanzi gudesire “Okuyushuka Bwenene kw’Ecidurhu omw’Igulu Lyoshi.”
“Akavulindi.”—Luka 21:9, NWT.
“Bulya abantu bal’igayire bwenene enyanya z’okunyiha bwenene k’obuhirhi, n’okuyushûka bwenene kw’ibeyi ly’ebintu omw’igulu lyoshi, habire maandamano manji g’okuhagalika amarhegesi omu mwaka gwa 2022.”e
Olole omwanzi gudesire “Okuyushûka kw’Ibeyi ly’Ebintu omw’Igulu Lyoshi.”
Bici byaba omu mwaka gukulikire?
Ntaye muli rhwe omanyire n’obwalagale ebyaba omu mwaka gwa 2023. Hali akantu rhumanyire n’obwalagale; hano hofi-hofi, Obwami bwa Nnâmahanga erhi burhegesi buli empingu, bwayusa amazibu goshi gali okw’igulu. (Daniyeli 2:44) Obo burhegesi bwayish’irhenza ebirhuma bene bantu balibuka, na kandi bwayish’ijira obulonza bwa Nnâmahanga bujirikane.—Mateyo 6:9, 10.
Rhukuhûnyire orhumikire ihano lya Yezu omukugendekara ‘waba masu’ ly’ohugûkwa gurhi ebintu biri byajirikana okw’igulu biri byahikiriza obulebi buli omu Bibliya. (Marko 13:37) Wekasinga, rhukuhûnyire orhulonze ly’oyiga binji lugenda oku Ebibliya yakakurhabalamwo ene na gurhi yakakuha we n’omulala gwawe obulangalire bwinja bw’amango gayisha.
a AP News, “Omu mwaka gwa 2022 ivita lyacib’iba Ebulaya,” Jill Lawless, Nsiku 8/12/2022.
b Cinyabuguma c’Omw’igulu Lyoshi Cilaba eby’Ebiryo, “Okunyiha Kw’Ebiryo Omu Igulu Lyoshi.”
c JAMA Health Forum, “Okulama omu kasanzi k’endwala z’okuyahukira—Kurhondera oku Korona kuhika oku variole de singe, epoliyo n’ezindi ndwala. Lawrence O. Gostin, JD, Nsiku 22/9/2022.
d Earth.Org, “Bici byarhumire e climat yasherera bwenene omu kasanzi kal’iyegerire Amango g’ecidurhu g’omu mwaka gwa 2022?” Martina Igini, Nsiku 24/10/2022.
e Carnegie Endowment for International Peace, “Okugaya bwenene kwadwirhwe n’okunyiha bwenene kw’obuhirhi kwarhumire bantu banji bajira amaandamano g’okuhagalika amarhegesi omu mwaka gwa 2022.” Thomas Carothers and Benjamin Feldman, Nsiku 8/12/2022.