Okuyushuka Bwenene kw’Ecidurhu omw’Igulu Lyoshi​—Bici Ebibliya Edesire?

Omu mwezi gwa Nda mwaka gwa 2022, raporo nyinji zahânyirwe ziyerekine okuyushuka kurhalusire olugero kw’ecidurhu omw’igulu lyoshi:

• “M’ogu mwezi, bo bwakabirhi ecihugo c’e Chine carhonda abantu oku ecidurhu cayushuka kubi bwenene omu vile 70.”​—Nsiku 25/7/2022, CNN Wire Service.

• “Bulya ecidurhu cayushusire Ebulaya kulusha oku byali embere, omu bihugo binji emizirhu eri yayaka muliro n’okusingonoka.”​—Nsiku 17/7/2022, The Guardian.

• “Lw’Iyinga vile nyinji z’omu États-Unis zagwerhe cidurhu cinji kulusha oku biyorha, n’eco cidurhu calandira omu ma eneo g’e Côte Est, omu ma eneo g’e Sud n’omu g’e Midwest y’e États-Unis.”​—Nsiku 24/7/2022, The New York Times.

Bici ebyo byoshi bihûgwire? Ka birhahashikane okulama okw’igulu omu mango gayishire? Bici Ebibliya Edesire lugenda oko?

K’okuyushuka bwenene kw’ecidurhu kuli kwahikiriza obulebi bw’Ebibliya?

Neci. Okuyushuka bwenene kw’ecidurhu omw’igulu lyoshi kupatine n’ebi Ebibliya yali erhi yalebire byakahikirire muli gano mango girhu. Kwa lwiganyo, Yezu alebire oku rhwakabwine “eby’okuyobohya,” erhi “bintu birhalug’iba na byakuyobohya.” (Luka 21:11) Okuyushuka bwenene kw’ecidurhu omw’igulu lyoshi kwayobohize abantu bulya banakarhanya oku ebi bali bajira byashereza igulu.

Ka hali amango birhakahashikana okulama okw’igulu?

Nanga. Nnâmahanga alemaga igulu lyo bene bantu balilamako ensiku n’amango. (Ennanga 115:16; Omuhanûzi 1:4) Ahali h’okuleka bene bantu bashereze igulu, Nnâmahanga alaganyize oku ‘ayish’ihererekeza balya bashereza igulu.’​—Amafulûlo 11:18.

Olole ebi Nnâmahanga alaganyize ajirira igulu:

• “Irungu n’ebiherebuga bishagaluke, obulambo bwacishinga bunameremwo akahasi.” (Izaya 35:1) Nnâmahanga arhakayemera igulu lisherezibwe kuhika birhacihashikanaga okulilamamo, lubero n’oko, ayish’ikubula ebyasherezibwe.

• “Onashibirire idaho oliniese mw’enkuba olibumbe buhirhi.” (Ennanga 65:9, Mashi Bible) Kugerera emigisho ya Nnâmahanga, igulu lyayish’iba paradizo.

Ly’omanya binji okubiyerekire gurhi okushanja kw’e climat kuli kwahikirizamwo obulebi bw’Ebibliya, osome omwanzi gudesire “Bici Ebibliya Edesire Lugenda Okushanja kw’e Climat n’Akasanzi Kirhu Kayisha?”

Ly’omanya binji okubiyerekire eciragane c’Ebibliya ciyerekine oku amazingira gayish’ikubulwa, osome omwanzi gudesire “Ni Nani Atakayeiokoa Dunia?”