Omu Igulu Lyoshi Amango g’Ecidurhu ga 2023 Idurhu Lyabire Linji Bwenene​—Bici Ebibliya Edesire?

Abantu b’omu igulu lyoshi bali balembera okubaho kw’ecidurhu cinji bwenene kulusha oku byali embere n’agandi mahanya gali galerhwa n’okuyushuka kw’ehali mbi z’ehewa. Olole eraporo zikulikire:

• “Ogu go gwali Mwezi gwa Ndarhu gwa cidurhu cinji bwenene cirhasag’ibaho bundi kurhenga abantu barhonderaga bapima ecidurhu omu igulu lyoshi hamagera myaka 174.”​—Agence américaine d’observation océanique et atmosphérique [NOAA], États-Unis, département du Commerce, Nsiku 13/7/2023.

• “Ecihugo c’e Italie, e Espagne, e France, e Allemagne n’e Pologne biri byahikirwa na cidurhu cinji bwenene cakahika oku 48°C [118°F] omu birhwa by’e Sicile n’e Sardaigne, eco canaba co cidurhu cinji bwenene camakaba omu Europe.”​—Agence spatiale européenne, Nsiku 13/7/2023.

• “Okuba igulu liri lyadurhubala bwenene, oko kwarhuma haba nkuba nyinji na ndarhi, zarhuma haba okuyunjulira bwenene kw’amishi.”​—Stefan Uhlenbrook, mwimangizi w’e hydrologie, amishi n’e cryosphère omu Organisation météorologique mondiale, Nsiku 17/7/2023.

K’ezo raporo ziyerekire okuyushuka kw’ecidurhu zikuyobohize? Olole ebi Ebibliya edesire lugenda ogo mwanzi gw’obulagirire.

K’okuyushuka bwenene kw’ecidurhu kuli kwahikiriza obulebi bw’Ebibliya?

Neci. Okuyushuka bwenene kw’ecidurhu omu igulu lyoshi n’ezindi hali mbi z’e hewa bipatine n’ebi Ebibliya yali yalebire byakabire mwa gano mango girhu. Kwa lwiganyo, Yezu alebire oku rhwakabwine “bintu binji bya kuyobohya.” (Luka 21:11, Mashi Bible) Okuyushuka bwenene kw’idurhu omu igulu kwarhumire bantu banji bayoboha oku bene bantu bajira birhacihashikanaga okulama oku igulu.

Ka hali amango birhakahashikana okulama oku igulu?

Nanga. Nnâmahanga alemire igulu lyo haba aha mwirhu ensiku zoshi; arhakaleka bene bantu balishereze. (Ennanga 115:16; Omuhanûzi 1:4) Co cirhumire, alaganyize oku ‘ahererekeza balya bashereza igulu.’​—Amafulûlo 11:18.

Ebibliya eyerekine oku Nnâmahanga agwerhe obuhashe bw’okulanga igulu oku buhanya bw’amazingira, ananajire ntyo.

• “Erya mpusi ndarhi [Nnâmahanga] ayigombya . . . , obukali bw’erya nyanja bwalemba.” (Ennanga 107:29) Nnâmahanga agwerhe obuhashe oku misi y’igulu. Agwerhe obuhashe bw’okukubûla amazibu g’amazingira garhuma kanji-kanji abantu balibuka enyanya z’ehali mbi y’ehewa.

• “Onashibirire idaho . . . olibumbe buhirhi.” (Ennanga 65:9, Mashi Bible) Nnâmahanga ayish’igisha igulu omu kulijira libe paradizo.

Ly’oyiga binji lugenda eciragane c’Ebibliya c’okukubûlwa kw’amazingira, olole omwanzi gudesire “Ni Nani Atakayeiokoa Dunia?”