Ebijiro Bibi Bwenene by’Obuminya Biri Byajirwa omw’Igulu Lyoshi omu Kukolesa Ebunduki​—Bici Ebibliya Edesire?

Omu Mwezi gwa 7, 2022, ebijiro bibi by’obuminya by’okukolesa ebunduki byajijirwe omw’igulu lyoshi:

• “Okunigwa kw’omuntu w’epolitike wal’imanyikine bwenene w’omu cihugo c’e Japon [Shinzo Abe, Premier Ministre wa mira] kwahira akavulindi omu cihugo coshi kwanasomeza abantu omw’igulu lyoshi, bwenene bulya ecihugo c’e Japon cirhabamwo bijiro binji bya bunizi cinajira amarhegeko makali lugenda okukolesa ebunduki.”​—Nsiku 10/7/2022, The Japan Times.

• “Abantu b’omu cihugo c’e Danemark bagaya bwenene erhi mulume muguma aniga bantu basharhu n’ebunduki omu eneo nguma y’oburhunzi y’omu vile y’e Copenhague.”​—Nsiku 4/7/2022, Reuters.

• “Afrique du Sud: Balume baguma baniga bantu 15 n’ebunduki omu bare nguma y’omu vile y’e Soweto.”​—Nsiku 10/7/2022, The Guardian.

• “Bantu balushire 220 banigwa n’ebunduki omu États-Unis omu Nsiku 4 Mwezi gwa 7, oku lusiku lukulu lw’ecihugo lwajiragwa oku buzinda bw’omugobe.”​—Nsiku 5/7/2022, CBS News.

Ka hali obulangalire boshi-boshi oku ebijiro bya ntyo by’obuminya byanacihwe? Bici Ebibliya edesire?

Obuzinda bw’Obuminya

Ebibliya ehamagire akasanzi kirhu oku ziri “nsiku nzinda,” kasanzi abantu bakabire n’ebijiro by’obukali, bya buminya, biri nka bya nsimba. (2 Timoteyo 3:1, 3) Ebijiro bya ntyo by’obuminya binarhume abantu balama omu boba. (Luka 21:11) Cikone, Ebibliya elaganyize akasanzi obuminya bwanahwe n’‘olubaga lwayubaka ahantu h’omurhûla, omu nyumpa zirimwo akahwenyenye, n’omu ndâro zirimwo obuholo.’ (Izaya 32:18) Gurhi obuminya bwanahwemwo?

Nnâmahanga ayish’ishereza abantu babi n’ebikolanwa by’okulwa ivita.

• “Abamînya [abantu babi] bohe kukûlwa bayish’ikûlwa omu cihugo.”​—Emigani 2:22.

• • ‘[Nnâmahanga] ye wafunga entambala z’omw’igulu lyoshi. Anashenyule emiherho n’amatuma agatyabule mwo kabirhi, engâle z’okulwa entambala anazidukumbye n’omuliro.’​—Ennanga 46:9, Mashi Bible.

Nnâmahanga ayish’ikulaho ebirhuma abantu bajira ebijiro by’obuminya omu kubayigiriza okulama omu murhûla.

• “Nta bubi na nta buligo bwacikolwe oku ntondo yani ntagatifu yoshi, bulya ecihugo cayunjula bumanye bwa Nyakasane [Yehova, NWT], nka kula omuhengere gw’enyanja guyunjulira mishi.”​—Izaya 11:9.

• Ciru n’ene, Nnâmahanga ali ayigiriza abantu omw’igulu lyoshi lyo bayâka obuminya n’okukolesa ebikolanwa by’okulwa ivita, ‘engôrho zabo bali bazitulamwo enfuka, n’amatumu gabo bali bajiramwo emigushu.’​—Mikeyo 4:3.

Ly’omanya binji lugenda eciragane c’Ebibliya ciyerekine oku rhwanalame omw’igulu lirhalimwo boba, osome omwanzi gudesire “Je, Inawezekana Kuishi Bila Woga?”

Ly’omanya binji lugenda ebyayish’iyusa obuminya loshi-loshi, osome omwanzi gudesire “Hatimaye Amani Duniani!”