Abakristu n’Ivita​—Bici Ebibliya Edesire Lugenda Oko

Nk’oku ivita ly’e Ukraine lyarekine n’obwalagale, bakulu banji b’amadîni gacihamagala ga Cikristu bali baha abantu omurhima bacilunge mw’eryo ivita. Mulole gurhi abakulu b’amadîni bali balungamwo okuboko eryo ivita:

• “Rhukenzire rhunavuzire omunkwa abasoda birhu bali balwira ecihugo cabo c’e Ukraine . . . Emirhima yirhu, amasala girhu garhenzire oku murhima n’oburhabale bwirhu biri haguma na ninyu ensiku zoshi.” (Nderho za métropolite Épiphane w’e Kiev ziganirirwe omu The Jerusalem Post, Nsiku 16/3/2022.

• “Omukulu w’Akanisa Orthodoxe k’e Russie asomera abasoda b’e Russie emisa anabaha omurhima bahalire ecihugo cabo omukuderha oku “abantu b’e Russie bone bakahash’ijira ntyo,” omu kasanzi Moscou agendekire arhera ecihugo c’e Ukraine.​—Reuters, Nsiku 3/4/2022.

K’Abakristu bashinganine Mbacilunge omw’ivita?

Ebi Ebibliya edesire

Ebibliya eyerekine n’obwalagale oku abakulikira Yezu Kristu barhakacilunga omu by’amavita.

• “Shubiza engorho yawe omu lûba, bulya ngasi yeshi wakolese engorho, ngorho yamuyirhe.”​—Mateyo 26:52.

  K’omuntu ocilunzire omu by’ivita erhi oli walwa ivita, ka kobinali anaba erhi arhumikire ezo nderho za Yezu?

• “Mmuhîre irhegeko lihyahya: muzigirane; nk’oku nani nammuzigire, ko ninyu mukag’izigirana. Ecimanyiso abantu boshi babonerekwo oku muli baganda bani, bwo buzigire mwazigirane.”​—Yowane 13:34, 35.

  Omuntu ocilunga omu by’ivita, ka kobinali anaba ayerekine obo buzigire Yezu aderhaga bwakabire cimanyiso c’abanafunzi bage?

Ly’omanya binji, osome omwanzi gudesire “Je, Ukristo Unaunga Mkono Vita?”

Abakristu n’ivita ene

Ka biyumvikine okuderha oku byanahashikana Abakristyu bayake okucilunga omu by’ivita mwa gano mango? Neci. Ebibliya yali erhi yalebire oku mwa gano mango girhu, gahamagalwa “nsiku nzinda” hakabire abantu b’omu mashanja goshi ‘barhakaciciyigirizize okulwa amatumu [ivita].’ Oko kupatine n’enyigirizo za Yezu.​—Izaya 2:2, 4.

• Ly’omanya binji, osome omu Ilabiro ly’Akalalizi emyanzi edesire: “Mungu Anaona Vita Namna Gani?”

Hano hofi-hofi, Yehova,a “Nnâmahanga w’obuholo [w’omurhûla],” akolesa oburhegesi bwage bw’omu mpingu ly’akûla abantu “omu kunyagwa n’omu kulibuzibwa.”​—Abafilipi 4:9; Ennanga 72:14.

• Ly’omanya gurhi ayish’ijiramwo ntyo, olole evideo edesire Obwami bwa Nnamahanga byo Bici?