MUBE MASU!
Idîni n’Ivita Liri e Ukraine—Bici Ebibliya Edesire?
Olole emyanzi ekulikire lugenda ebirongozi by’amadîni n’ivita liri lyajirwa e Ukraine:
“Nta kantu koshi-koshi kabi Patriarch Kirill, cirongozi w’idîni ly’eci Orthodoxe ly’e Russie adesire lugenda ivita e Russie eri yajira e Ukraine. . . . Poutine akolesize emyanzi y’obunywesi er’idîni liri lyaderha lugenda ecihugo c’e Ukraine lyo ahalira acirhumire ali alwisa eco cihugo.”—EUobserver, Nsiku 7/3/2022.
“Patriarch Kirill . . . akolesize enderho nzibu z’okuhalira ecihugo c’e Russie omukuderha oku er’ivita e Russie eri yajira e Ukraine, lir’ivita lya kuyusa ecaha.”—AP News, Nsiku 8/3/2022.
“Lwa Kasi, ecirongozi c’Idîni ly’eci Orthodoxe, Metropolitan Epiphanius I w’e Kiev, agisha olubaga lwage lyo ‘lulwisa abasoda b’e Russie barheraga ecihugo cabo’ . . . [A]naderha oku okuyirha abasoda b’e Russie cirhali caha.”—Jerusalem Post, Nsiku 16/3/2022.
“Rhulunzire abasoda b’e Ukraine okuboko na boshi bali barhuhalira, rhubagishire rhunagishire ebi bali bajira lyo bahalira ecihugo c’e Ukraine, rhunali rhwashenga enyanya zabo.”—UCCROa Nsiku 24/2/2022.
Gurhi orhanyize? K’amadîni gacihamagala ga Cikristu ganaha abemezi bago omurhima oku balwe ivita? Bici Ebibliya edesire lugenda oko?
Ebi e istware edesire lugenda Idîni okulwa ivita
E istware eyerekine oku idîni linakaderha oku kurhali kubi okulwa ivita, oku kuba kwinja okuja okw’ivita erhi akaba okujira ntyo kwanalerha omurhûla. Abahamirizi ba Yehova bamayusa nsiku nyinji bali bayerekana obo bulyalya bw’ago madîni. Olole nyiganyo nguma na nguma ziganirirwe omu bitabu birhu.
Zile Krusedi—“Zile Krusedi Uongo Wenye Musiba,” ogo mwanzi guyerekine gurhi Akanisa Katoliki k’e Roma kanizire bantu banji omukuderha oku okujira ntyo, guli mukolo bali bajirira Nnâmahanga na Kristu.
“Kanisa Katoliki Katika Afrika,” ogo mwanzi guganirire olwiganyo luyerekine gurhi idîni lyayabiragwa okuhanza ivita, n’obunizi.
Emyanzi edesire “Je, Dini Inapaswa Kulaumiwa?,” “Fungu la Dini Katika Vita vya Binadamu,” na “Dini Yajiunga” ehugwîre gurhi abakulu b’akanisa Katoliki, ba Orthodoxe, n’Abaporo balunzire mavita manji okuboko.
K’amadîni g’Ecikristu gashinganine galunge ivita okuboko?
Ebi Yezu ayigirizize: “Okâzigira owinyu nk’oku ocizigira wenene.” (Mateyo 22:39) “Muzigire abammushomba.”—Mateyo 5:44-47.
Orhanye kuli oku: K’idîni lyanaderha oku liri lyarhumikira irhegeko lya Yezu lugenda obuzigire amango liri lyaha abemezi balyo omurhima bakayirha abandi omw’ivita? Ly’obona ishuzo, osome omwanzi gudesire “Wakristo wa Kweli na Vita” n’ogudesire “Je, Inawezekana Kuwapenda Adui Zako?”
Ebi Yezu ayigirizize: ‘Obwami bwani burhali cigabi c’er’igulu. Obwami bwani bucibâga cigabi c’er’igulu, bambali bani bâli banfungira, lyo ndek’ihânwa.’ (Yowane 18:36) “Ngasi yeshi wakolese engorho, ngorho yamuyirhe.”—Mateyo 26:47-52.
Orhanye kuli oku: Erhi akaba Abakristu barhal’ishinganine balwe lyo balanga Yezu, ka hali akandi kantu kakarhuma balwa? Ly’obona gurhi Abakristu barhanzi bakulikire n’obwishwekerezi olwiganyo lwa Yezu n’enyigirizo zage, osome omwanzi gudesire “Je, Ukristo Unaunga Mkono Vita?”
Bici byayish’ihikira amadîni galunga ivita okuboko?
Ebibliya eyigirizize oku Nnâmahanga arhaba ayemire amadîni gacihamagala ga Cikristu cikone garharhumikira enyigirizo za Kristu.—Mateyo 7:21-23; Tito 1:16.
Ecitabu c’Amafulûlo ciyerekine oku Nnâmahanga anakabona ago madîni oku gogarhuma ‘ngasi boshi banigîrwe omw’igulu’ bafâ. (Amafulûlo 18:21, 24) Ly’omanya bulya gurhi agabona ntyo, osome omwanzi gudesire “Babiloni Mukulu Yendi?”
Yezu ayerekine oku amadîni goshi garhaba gayemirwe na Nnâmahanga, gayish’isherezibwa enyanya z’ebijiro byago bibi nka kulya omurhi mubi guleheka amalehe mabi “gunatûbwe, gukwêbwe ecîko.” (Mateyo 7:15-20) Ly’omanya gurhi oko kwanajirwemwo osome mwanzi gudesire “Mwisho wa Dini ya Uwongo Unakaribia!”
Abarhuyemereraga ezi nfoto, kurhenga ekumosho kuja ekulyo: Nfoto ya Sefa Karacan/Anadolu Agency/Getty Images; Maxym Marusenko/NurPhoto via Getty Images
a E UCCRO, erhi Conseil Ukrainien des Églises et des Organisations Religieuses, eba ehiziremo makanisa 15 gayimangirwe n’ akanisa Orthodoxe, Akanisa Katoliki k’Ecigriki n’ak’e Roma, Abaporo, Amakanisa g’ecievanjelike, Abayahudi n’Abaislamu.