Ka Haba Ivita ly’Igulu Lyoshi Hano Hofi-hofi—Bici Ebibliya Edesire?

Omu myaka 30 egezire, bantu banji bakag’irhanya oku olushangi egarhi k’ebihugo lwal’igendekire lwaba lwinja. Cikone, ebintu bicizind’ihikira biyerekine oku ezo ntanya nkaba zirhali z’okuli.

“Abantu bali barhanya oku ivita liri e Gaza lyahuma oku bindi bihugo bya mw’eyo eneo bulya e Israël n’e Hezbollah byarhondire byalwira oku mupaka gw’e Liban.”—Reuters, Nsiku 6/1/2024.
“Ebigusho by’abasoda b’e Iran biri byarhera amaneo gali lubero, n’ecihugo c’e Iran cacibir’irhondera duba-duba okutula e armes nucléaires. Na kandi ecihugo c’e Russie n’ec’e Chine bilunzire okubuko ecihugo c’e Iran. Ebyo byoshi byacibir’iyobohya ebihugo by’e ebuzikiro bw’izuba.”—The New York Times, Nsiku 7/1/2024.
“Ebirhero by’e Russie bigendekire byashereza bwenene ecihugo c’e Ukraine.”—UN News, Nsiku 11/1/2024.
“Obuhirhi bw’ecihugo c’e Chine n’obuhashe bw’abasoda baco bigendekire byayushûka, entanya z’okusima bwenene ecihugo zigendekire zayushûka bwenene e Taïwan, n’okurhayumvikana egarhi k’e Pékin n’e Washington, ebyo byoshi biri byalerha akanga kakarhuma kwaba kulembu habe ivita.”—The Japan Times, Nsiku 9/1/2024.

Ka hali kantu Ebibliya edesire lugenda akavulindi rhuli rhwabona omu igulu ene? Ka karhuma haba ivita ly’igulu lyoshi?

Ebibliya yali yalebire lugenda ebintu biri byaba ene

Ebibliya erhalebaga lugenda ivita lilebe egarhi k’aga rhuli rhwabona ene. Cikone, yalebire lugenda okuyushûka bwenene kw’ivita rhuli rhwabona mwa gano mango girhu linali ‘lyarhenza omurhûla omu igulu.’—Amafulûlo 6:4.

Ecitabu ca Daniyeli calebire oku “omu mango ga buzinda,” amarhegesi makulu gw’omu igulu ‘gakalwisinye [kusunsunikana, NWT]’ enyanya z’okurhegeka. Oko kulwisanya kwakahiziremwo okuyerekana obuhashe bw’emirhwe y’abasoda n’okukolesa ‘mihako’ minji, erhi nsaranga nyinji bwenene.—Daniyeli 11:40, 42, 43, Mashi Bible.

Ivita Lyabaho

Ebibliya eyerekine oku ehali y’igulu yaba mbi bwenene embere ebe nyinja kulusha. Yezu alebire oku hakabire ‘amalibuko [madarhi, NWT] garhazig’iboneka kurhenga okulemwa kw’igulu.’ (Mateyo 24:21) Ago “malibuko [madarhi, NWT]” gayish’ihêka okw’ivita lihamagalwa Armagedoni, liganirirwe nka “ntambala y’olusiku lukulu lwa Nyamuzinda Nn’amahanga goshi.”—Amafulûlo 16:14, 16.

Cikone, ivita lya Armagedoni lyayish’iyokola bene bantu, c’arhali kubashereza. Kugerera ery’ivita, Mungu ayish’iyusa oburhegesi bwa bene bantu bwadwirhe mavita manji g’okushereza. Ly’obona gurhi ivita lya Armagedoni lyayish’ilerhamwo omurhûla gw’ensiku n’amango, osome eyi myanzi ekulikire:

“Ivita lya Armagedoni Byo Bici?”
“Har–Magedoni Ni Habari Njema!”