Mangaci Entambala Zahwa?​—Bici Ebibliya Edesire?

“Aka ko kasanzi k’okulembuhya aka kanga n’okunyihya amazibu. Aka ko kasanzi k’okucihasha bwenene.” Ezo nderho zaderhagwa na António Guterres, Mwandisi Mukulu w’Ecinyabuguma c’Amashanja enyuma z’ecihugo c’e Iran okurhera ecihugo c’e Israeli Lwa Kalindarhu, nsiku 13/4/2024.

Entambala y’e Moyen-Orient luli lwiganyo kone lw’ebiri byajirikana omw’igulu.

“Kuhika ene, hali ntambala nyinji bwenene z’obuminya ziri zajirikana omw’igulu zirhalisag’ibaho kurhenga amango g’Ivita lya Kabirhi ly’Igulu na bantu miliyare 2 bali balibuzibwa nazo, ko kuderha muntu muguma oku bantu bani.”​—Conseil de sécurité des Nations unies, nsiku 26/1/2023.

Amaeneo galimw’entambala z’obuminya gahiziremwo Israël, Gaza, Syrie, Azerbaïdjan, Ukraine, Soudan, Ethiopie, Niger, Birmanie, n’e Haïti.a

Mangaci entambala zahwa? K’abarhegesi b’igulu banalerha omurhûla? Bici Ebibliya edesire?

Igulu lirimw’amavita

Entambala ziri omw’igulu ene ziyerekine oku obuzinda bw’amavita goshi buli hofi. Ago mavita gali gahikiriza obulebi bw’Ebibliya lugenda akasanzi rhulamiremwo. Ebibliya ekahamagire kasanzi k’“okuhwa kw’igulu.”​—Mateyo 24:3.

• “Mwayumve baderha ibirha [erhi ivita] n’emihigo y’ebirha. . . . Ecihugo cayimukire ecindi, n’obwami obundi bwami.”​—Mateyo 24:6, 7.

Osome omwanzi gudesire, “Ecimanyiso c’‘Ensiku Nzinda’ Erhi ‘Buzinda’ co Cihi?” ly’obona gurhi amavita g’ene gali gahikirizamwo obulebi bw’Ebibliya.

Ivita lyayish’iyusa amavita goshi

Ebibliya yalebire obuzinda bw’entambala za bene bantu. Gurhi byabamwo ntyo? Arhali kugerera emisi ya bene bantu, ci kugerera ‘entambala y’olusiku lukulu lwa Nyamuzinda Nnâmahanga goshi’ ehamagalwa Harmagedoni. (Amafulûlo 16:14, 16) Kugerera er’ivita, Mungu ayish’ihikiriza eciragane cage c’okulerhera bene bantu omurhûla gw’ensiku n’amango.​—Ennanga 37:10, 11, 29.

Ly’oyiga binji lugenda ivita lya Mungu lyayish’iyusa amavita goshi, osome omwanzi gudesire, “Ivita lya Armagedoni Byo Bici?”