Gurhi Abahamirizi ba Yehova Bajirira Abandi Bali Bahamirizi Embere?

Rhunacihangane okujirira ngasi muntu omu njira y’obuzigire, ya lukogo, na ya bukenge. Erhi muguma w’omu Bahamirizi ba Yehova akaba arhaciri ajira binji omu nterekêro aha Yehova nk’oku akag’ijira embere, erhi ciru abe alesire okumuharamya, rhunacihangane rhumuganize,a rhumuyemeze n’obwalagale oku rhumuzigire, n’okucihangana okumurhabala ly’ashub’iyegera Nnâmahanga.—Luka 15:4-7.

Omu kanga kalebe, ebijiro by’omuntu byanarhuma ahikira aha arhenzibwa omu cigamba. (1 Abakorinti 5:13) Cikone, bulya rhuba rhuzigire abirhu bemezi, rhunacihangane okurhabala oyo muntu embere z’akasanzi ly’arhahikiraga aha arhenzibwa omu cigamba. Na ciru akarhenzibwa omu cigamba, rhunagendekere rhwamuyeresa obuzigire n’obukenge, nk’oku Ebibliya erhuhunyire rhukajira.—Marko 12:31; 1 Petro 2:17.

Bici birhuma omuntu ahikira okurhenzibwa omu cigamba?

Ebibliya eyerekine n’obwalagale oku erhi Omukristu akajira ecaha cizibu akanalahira okushanja olugenzi lwage, ashinganine arhenzibwe omu cigamba.b (1 Abakorinti 5:11-13) Ebibliya eyerekine n’obwalagale byaha bihi biri bizibu bwenene byakarhuma omuntu ahikira okurhenzibwa omu cigamba. Kwa lwiganyo, Ebibliya eganirire ebijiro bibi nka obugonyi, endalwe, obunizi, okulibuza abantu b’omu mulala gwirhu, n’obushambo.—1 Abakorinti 6:9, 10; Abagalasiya 5:19-21; 1 Timoteyo 1:9, 10.

Cikone, rhurharhenza ho n’aho omuntu wajijire ecaha cizibu omu cigamba. Abagulac b’ecigamba banarhang’imurhabala ly’ashanja olugenzi lwage. (Abaroma 2:4) Banajire okwabo koshi lyo bamurhabala ashanje olugenzi omu kumujirira omu njira y’olukogo, ya bonjo na ya butûdu. (Abagalasiya 6:1) Okujira ntyo kwanarhabala oyo muntu wajijire ecaha ahugûkwe amagosa gage n’okuciyunjuza. (2 Timoteyo 2:24-26) Cikone erhi akagendekera ajira ebi Ebibliya ahanzize arhanalonzizi okuciyunjuza ciru akaba abagula bamurhabire kanji-kanji, agwasirwe arhenzibwe omu cigamba. Enyuma z’aho abagula banamanyise ecigamba oku oyo muntu arhaciri muguma w’omu Bahamirizi ba Yehova.

Bagula babirhi b’ecigamba bali baganiza musole muguma omu kukolesa Ebibliya. Muguma egarhi k’abo bagula ahizire okuboko kwage oku cirhugo c’ogo musole amango ali aguganiza. — Abagula banajire okwabo koshi lyo barhabala omunya-byaha ashanje olugenzi omu kumujirira omu njira y’olukogo, ya bonjo na ya butûdu

Okurhenza omuntu wahizire okugendekera ajira ecaha omu cigamba, malehe gahi kulerha? Burhangiriza, okurhenza oyo muntu omu cigamba kunarhume ecigamba cagendekera calunga okuboko amakanuni ga Mungu g’olugenzi lwinja, kunanacilange lyo cirhashumikagwa n’olugenzi lubi lw’oyo muntu. (1 Abakorinti 5:6; 15:33; 1 Petro 1:16) Kandi, oko kwanashumya omuntu wajiraga ecaha ayake olugenzi lwage lubi n’okucihangana ly’ashanja.—Abahabraniya 12:11.

Gurhi Abahamirizi ba Yehova bajirira abantu barhenzibwe omu cigamba?

Ebibliya edesire oku Abakristu ‘bamanye bankakômerana’ n’omuntu warhenzibwe omu cigamba, n’oku ‘omuntu wa bene oyo, bamanye bankalîra haguma naye.’ (1 Abakorinti 5:11) Co cirhuma rhurhakômerana n’omuntu warhenzibwe omu cigamba. Cikone, rhurhamulekerera loshi. Rhunamujirire omu njira y’obukenge. Rhunamuyegereze oku ntimanano zirhu, n’Abahamirizi ba Yehova arhimanyire oku ntimanano banamulamuse nka balonzize.d Kandi anahuna abagula oburhabale alagirireko ly’agaluka omu cigamba.

Mulume muguma na mukage Bahimirizi ba Yehova bali aha Nyumpa y’Obwami bali balamusa n’obushagaluke mukazi muguma warhenzibwe omu cigamba. — Abantu barhenzibwe omu cigamba banaja oku ntimanano zirhu

Gurhigi erhi akaba muka omuntu warhenzibwe omu cigamba n’abana bage barho baciri Bahamirizi ba Yehova? Ciru akaba arhaciri aharamya Yehova haguma n’omulala gwage, banacibe bali mulala muguma. Bulya balamire omu nyumpa nguma, anagendekere aba iba w’oyo mukazi n’ishe w’abo bana, na boshi bashinganine bagendekere bajirirana omu njira y’obuzigire nk’oku byanali embere.

Omuntu warhenzibwe omu cigamba anahuna abagula bamulambagirire, n’amango bamulambagirire, banamuha amahano g’obuzigire gayimangire oku Bibliya n’okumushumya omu njira y’olukogo aciyunjuze ly’agalukira Nnâmahanga. (Zakariya 1:3) Erhi akaleka olugenzi lwage lubi akanayerekana loshi oku alonzize okulama kushimbana n’amakanuni g’Ebibliya g’olugenzi, anashub’iyegerezibwa n’okugalulwa omu cigamba. Ecigamba ‘canamubabalira . . . n’okumuhira omurhima omu nda,’ nk’oku Abakristu b’e Korinti bajiraga erhi omuntu wakag’ijira ebyaha mîra aciyunjuza n’okushanja olugenzi lwage.—2 Abakorinti 2:6-8.

Gurhi abantu barhenzibagwa omu cigamba mîra baciyumva?

Oyumve ebi Bahamirizi ba Yehova baguma na baguma barhenzibagwa omu cigamba mîra na buzinda bahiga okugalukira Nnâmahanga badesire.

“Erhi ntôla omuhigo gw’okugaluka omu cigamba, narhanya oku abagula balonza okumanya ngasi kantu najijire omu makumi g’emyaka nayusize kurhenga amango narhenzibagwa omu cigamba. Cikone ahali h’okujira ntyo, bambwira ntya kone, ‘Wekasinga osegeze obwenge bwawe kw’ebi wajira ene, ci arhali kw’ebi wajijire omu mango gageraga.’ Enyuma z’okumbwira ntyo, naciyumva bwinja bwenene.”—Maria, États-Unis.

“Bene wirhu na bali birhu bashagalusire bwenene enyanya z’okugaluka kwani omu cigamba. Naciyumva nani ndi wa bulagirire. Bene wirhu na bali birhu b’omu cigamba barhumire naciyumva oku Yehova ambabalire n’oku nabo bambabalire, n’oko kwantabala nkasegeza obwenge oku bintu binja najira omu mango gayisha. Ngasi mango abagula bakang’intabala lyo nshub’iba n’obwîra bwinja haguma na Yehova. Bakantuliriza n’okuntabala mbone oku Yehova anacibone oku ndi wa bulagirire n’oku aciba anzigire.”—Malcom, Sierra Leone.

“Nshagalusire okubona Yehova aba azigire abantu bage bwenene n’okubona ebi ajira ly’ikubuliro lyage ligendekera lyabêra licîre. Ciru ankaba abantu banarhanya oku okurhenza omuntu wajijire ecaha omu cigamba kuli kumujirira omu njira y’obukali, okujira ntyo kuli kwa bulagirire kunali kuyerekana obuzigire bwenene. Mvuzire omunkwa bwenene okubona Larha w’omu mpingu aba Mungu wa buzigire ananababalire abantu.”—Sandi, États-Unis.

Ebi abalenga omu by’amarhegeko barhali Bahamirizi ba Yehova badesire lugenda oko

Bici abazuzi n’abalenga omu by’amarhegeko badesire lugenda Abahamirizi ba Yehova okurhenza abanya-byaha barhaciyunjuzizi omu bigamba byabo? Badesire ezi ntanya zikulikire:

“Biyumvikine n’obwalagale oku idîni lilongozibwa n’amakanuni g’Ebibliya n’okucihangana okugakolesa omu kalamo, lishinganine libe n’obuhashe [bw’okurhenza muli lyo omuntu wajijire ecaha buzira kuciyunjuza amango bihunyire okujira ntyo]. Okujira ntyo kushinganine kunali kwa bulagirire bulya erhi akaba omuntu arhahashiri erhi kandi arhalonzizi okukulikira amakanuni g’Ebibliya, anaba arhashinganini okuba muguma wa mw’er’idîni. Erhi akaba arharhenzibwi mw’er’idîni, anaba lwiganyo lubi oku bantu ba mw’er’idîni balonzize okukulikira amakanuni g’Ebibliya.”—Kagombe Kakulu k’Okutwa Emanja k’e Angleterre n’omu Pays de Galles, Nsiku 7/6/2019.
“Orhugombe rhw’Ebulaya n’orhw’omu gandi maeneo rhwadesire oku Abahamirizi ba Yehova bagwerhe ehaki y’okurhenza bantu balebe omw’idîni lyabo bulya bayemerirwe okujira ntyo, na nta kagombe kashinganine kabahanze okurhôla ogo muhigo bulya amarhegeko gabayemerire okujira ntyo.”—Professeur Paulo Pinto de Albuquerque, muzuzi wa mîra w’omu Kagombe Kakulu k’Ebulaya Kalaba Ehaki z’Abantu.

a Ogu mwanzi guganirire omulume, cikone amahano galimwo gayerekire n’abakazi.

b Embere rhwakag’iderha oku omuntu wajijire ecaha buzira kuciyunjuza anatenzirwe. Cikone, kushimbana n’enderho zikolesibwe omu Bibliya rhukola rhuderha oku anarhenzibwe omu cigamba.

c Abagula bali balume Bakristu bakuzire kiroho bayigiriza omu kukolesa Ebibliya n’okulanga abantu ba Yehova omu kubarhabala n’okubaha omurhima. Barhalipwa enyanya z’ogo mukolo bajira.—1 Petro 5:1-3.

d Omu kanga kaguma na kaguma, omuntu analeka ecigamba n’okujira okwage koshi ly’acishereza erhi ly’ashumya abandi babe n’olugenzi lubi luli nk’olwage. Erhi omuntu akajira ntyo, rhunakulikire irhegeko ly’Ebibliya lidesire oku ‘rhumanye rhwankamulamusa.’—2 Yowane 9-11.