Ngahi Ensaranga Zigendekeza Omukolo gw’Abahamirizi ba Yehova Zirhenga?

Ensaranga rhukolesa lyo rhuhikiriza omukolo gwirhu gw’omwigulu lyoshi buba burhabale buhânwa n’Abahamirizi ba Yehova buzira kusêzibwa.a Ebibikiro [bibweta] by’okuhiramo oburhabale binahirwe ahantu rhujirira entimanano, cikone ezindi njira z’okuhânamwo oburhabale ziyerekinwe oku bukurasa Okuhâna Oburhabale. Kw’obo bukurasa kuli njira nyinji rhwakakolesa lyo rhuhâna oburhabale bwirhu oku mukolo gw’irhu gw’omwigulu lyoshi erhi oku yindi mikolo yirhu ejirikana emunda oba olamire.

Abahamirizi ba Yehova barhahâna ecakumi, barhanasêzibwa okuhâna mubale mulebe gw’ensaranga oku mushahara gwabo. (2 Abakorinti 9:7) Rhurhahûna ntûlo rhurhanahûna abantu ensaranga lyo baja oku ntimanano zirhu, idîni lirhu lirhahûna ensaranga ly’omuntu abatizibwa, ajira obuhya, ajirirwa emishîbo erhi yindi mikolo y’idîni. Rhurhalonza ensaranga omu kujira oburhimbuzi, omu kusharha emicezo y’ensaranga, erhi kuhûna-hûna oburhabale. Rhurhaderha erhi kuyalagaza amazino g’abantu bahânyire oburhabale. (Mateyo 6:2-4) Esite zirhu z’Enterenete n’ebicapo birhu birhamo amatangazo g’okuhûna erhi g’okurhulerhera ensaranga.

Ngasi mwezi, oku ntimanano zirhu, ebigamba byoshi by’Abahamirizi ba Yehova binahâne eraporo eyerekine gurhi ensaranga zakolesibwe, ngasi muntu anaja oku ntimanano zirhu. Ngasi mango rhunakalaba gurhi ensaranga zakolesibwe lyo rhumanya erhi oburhabale bwahânyirwe buli bwakolesibwa bwinja.​—2 Abakorinti 8:20, 21.

Njira Mberuluka z’Okuhânamwo Oburhabale

• Ebibibikiro [bibweta] by’oburhabale: Wanahira oburhabale bwawe bw’ensaranga erhi chèque omu bibikiro biba omu Nyumpa zirhu z’Entimanano, Nyumpa z’Entimanano Nkulu erhi handi hantu rhujirira entimanano zirhu.

• Oburhabale kugerera e enterenete: Omu bihugo binji wanakolesa obukurasa “Okuhâ Abahamirizi ba Yehova Oburhabale” ly’ohâna oburhabale omu kukolesa e carte bancaire, omu kurhuma ensaranga kurhenga omu banke kuja omu yindi, n’omu kukolesa ezindi njira z’ecielektroniki.b Bahamirizi baguma na baguma banacishoge “okuhira kantu kelebe eburhambi” ngasi mwezi, bananarhôle emipango lyo bakahâna oburhabale ngasi mango omu kukolesa njira nguma muli ezo.​—1 Abakorinti 16:2, NWT

  

• Oburhabale buli burheganye embere z’akasanzi: Njira nguma na nguma z’okuhânamwo oburhabale zinahûne okucirheganya embere z’akasanzi erhi kuba n’amahano lugenda irhegeko. Okucirheganya ntyo embere kwanakurhabala omu kukunyihiza ebeyi l’ikoli. Bantu banji babire n’obunguke omu kulonza emyanzi lugenda oburhabale bakahâna bwakakolesibwa amango bacizine erhi enyuma z’okufâ. Wekasinga oganire n’ebiro by’etawi by’Abahamirizi ba Yehova b’omu cihugo olamamo, erhi wakalonza okumanya gurhi wakajira ly’ohâna oburhabale buhiziremo:

  • e konte y’oku banke

  • e asiranse n’omushahara omuntu ahâbwa erhi leka akazi enyanya z’obushosi

  • eciwanja n’enyumpa

  • ecigabi erhi obunguke bw’omuntu omu bintu biyerekire oburhunzi

  • etestama n’obundi buhirhi

Ly’omanya binji lugenda enjira z’okuhânamwo oburhabale zikolesibwa emunda olama olole obukurasa budesire “Okuhâ Abahamirizi ba Yehova Oburhabale.”