Olunge Ecigamba Cawe Okuboko

Omw’igulu lyoshi, emiliyoni y’abantu banashagalukire okuharamya Yehova omu bihumbi by’ebigamba. Banashagalukire okuba omu cigamba bulya omo banahâbwe obulongozi n’enyigirizo. Na kandi baba babidu okulunga ecigamba okuboko omu njira nyinji. Ka nawe oba mubidu okulunga ecigamba cawe okuboko?

1. Njira zihi nguma na nguma wakakolesamwo akasanzi kawe n’emisi yawe ly’olunga ecigamba okuboko?

Rhweshi rhwanajira kantu kalebe lyo rhulunga ecigamba okuboko. Kwa lwiganyo, ka hali bene wirhu bakola bashosi erhi balwala bali omu cigamba cawe? Ka wanabarhabala lyo bakahika oku ntimanano? Erhi wanabarhabala okujibagulira ebintu omu cibuye erhi kubarhabala oku mikolo y’omu nyumpa? (Osome Yakobo 1:27.) Na kandi rhwanacihâna lyo rhurhabala okucesa n’okushibirira Enyumpa y’Entimanano. Ntaye orhuseza mpu rhujire eyo mikolo. Obuzigire bwirhu kuli Nnâmahanga na kuli bene wirhu, bunakarhushumya ‘rhucihâne n’obulonza.’​—Ennanga 110:3, NWT.

Hali ezindi njira Abahamirizi babatize bakalungamwo okuboko ecigamba. Bene wirhu bahikirizize amorhere g’ekiroho gahûnyirwe banakola nka barhabazi b’abagula na hano hagera akasanzi banaba bagula. Bene wirhu na bali birhu banacihâne lyo balunga omukolo gw’amahubiri okuboko omu kuba bapainiya. Bahamirizi baguma na baguma banacihâne lyo barhabala oku bubasi bw’enyumpa z’okuharamizamo Nnâmahanga, erhi kuhamira omu gandi maeneo lyo barhabala ecigamba omu njira ziri lubero.

2. Gurhi rhwakakolesa ebirugu birhu lyo rhulunga ecigamba okuboko?

‘Rhwanakenga Yehova kugerera ebirugu birhu by’engûlo ndarhi.’ (Emigani 3:9, NWT) Luli lukengwa lunene bwenene okuhâna ensaranga erhi kandi kantu lyo rhulunga ecigamba okuboko na ly’omukolo gw’okuhubiri gujirwa omw’igulu lyoshi. (Osome 2 Abakorinti 9:7.) Kandi oburhabale bwirhu (michango) bunakolesibwe lyo burhabala bene wirhu na bali birhu bahikîrwe n’obuhanya. Bantu banji banahige ‘okukabika kantu kalebe eburhambi’ lyo bayish’ikahâna burhabale. (Osome 1 Abakorinti 16:2, NWT.) Rhwanahîra oburhabale rhuhânyire omu bisanduku by’okuhiramo oburhabale biba aha rhujirira entimanano, erhi rhwanabuhâna kugerera e Enternete oku donate.jw.org. Yehova arhuhîre obulyo bw’okuyerekana oku rhuba rhumuzigire kugerera enjira rhucishoga okukolesamwo ebirugu birhu.

HUMBIRIRA LY’OHUGÛKWA

3. Rhwanakolesa ebirugu birhu lyo rhuhâna oburhabale

Yehova na Yezu banashagalukire omuntu ohâna akantu n’obushagaluke. Kwa lwiganyo, Yezu avuzire omunkwa olya mukana wali omu buligo, ciru akaba ahânaga olusaranga lusungunu bwenene. Osome Luka 21:1-4, na buzinda oganirire aga madoso:

• Ka rhushinganine rhuhâne burhabale bunji lyo Yehova ashagaluka?

• Gurhi Yehova na Yezu baciyumva erhi rhuhâna oburhabale n’omurhima gwirhu goshi?

Ly’obona gurhi oburhabale bwirhu bukolesibwa, Olole EVIDEO. Buzinda oganirire idoso likulikire.

VIDEO: ‘Ohe Yehova Oluhembo’ (4:47)

• Gurhi oburhabale bukolesibwa lyo burhabala ebigamba by’omw’igulu lyoshi?

4. Rhwanacihâna lyo rhurhabala okujira mikolo milebe

Omu mango ga mîra, abakozi ba Yehova bakagicihâna n’obushiru lyo bashibirira aha bakag’imuharamiza. Hali ebindi bintu bakagijira ahanyuma n’okuhâna ensaranga. Osome 2 Enganîro 34:9-11, na buzinda oganirire er’idoso:

• Gurhi ngasi Muyisraheli akagijira ly’alunga okuboko okushibirira enyumpa bakagiharamizamo Yehova?

Ly’obona gurhi Abahamirizi ba Yehova bakulikiramwo olo lwiganyo lw’abakozi ba Yehova ba mîra, olole EVIDEO. Buzinda oganirire amadoso gakulikire.

VIDEO: Okushibirira aha Rhuharamiza Nnâmahanga (3:31)

• Bulya gurhi kuli kwa bulagirire okukacêsa Enyumpa yirhu y’Entimanano n’okuyijira ebe n’ehali nyinja?

• Njira zihi nguma na nguma wakajiramwo ntyo?

5. Bene wirhu banacihangana okuhikira mikolo minji omu cigamba

Amandiko gaba gahîre abalume Bakristu omurhima oku bakajira okwabo koshi lyo bahikira emikolo yago-yago omu cigamba. Ly’obona olwiganyo, olole EVIDEO. Buzinda oshuze idoso likulikire.

VIDEO: Bene wirhu, Mucihangane Okuhikira Omukolo Mwinja (5:19)

• Nk’oku obwine mw’eyo video, gurhi Ryan ajijire ly’ahikira okurhabala ecigamba kulusha?

Ebibliya ehugwîre ebi mwene wirhu ashinganine ahikirize ly’aba mugula erhi murhabazi w’abagula. Osome 1 Timoteyo 3:1-13, na buzinda oganirire aga madoso:

• Bici bene wirhu balonzize okuba bagula erhi barhabazi b’abagula bahûnyirwe bahikirize?

• Bici bihûnyirwe oku milala yabo?​—Olole omulongo gwa 4 n’ogwa 11.

• Bunguke buhi ngasi muguma aba nabo omu cigamba erhi bene wirhu bacihangana okuhikiriza ebihûnyirwe lyo baba bagula erhi barhabazi b’abagula?

KWA BOFOFI

Yehova anashagaluke bwenene erhi rhukolesa emisi yirhu, akasanzi kirhu, n’ebirugu birhu lyo rhulunga ecigamba okuboko.

Okucikengeza

• Gurhi rhwakakolesa akasanzi kirhu n’emisi yirhu lyo rhulunga ecigamba cirhu okuboko?

• Gurhi rhwakakolesa ebirugu birhu lyo rhulunga ecigamba okuboko?

• Omu njira zihi nawe wakalonza olunge ecigamba okuboko?

OCIYIGIRIZE KWA BULÎRI

Olole bulya gurhi Nnâmahanga arhacihûna abakozi bage oku bahâne ecakumi.

“Bici Ebibliya Edesire Okubiyerekire Ecakumi?” (Mwanzi guli oku jw.org)

Hali mikolo miguma na miguma Ebibliya ehîre abalume babatize. Cikone gurhigi erhi byakahûna omukazi mubatize ajire eyo mikolo?

“Ohugûkwe Obukulu Abagula Bagwerhe omu Cigamba” (Ilabiro ly’Akalalizi, ly’Omwezi gwa 2, 2021)

Obone Bahamirizi balebe bajira obushiru, bakaciseza okuhisako ababo bemezi ebitabu.

Oku Ebitabu Bihika omu Maeneo Maguma Maguma g’omu Congo (4:25)

Olole gurhi rhubonamw’ensaranga z’okugendekeza omukolo gwirhu lubero n’agandi makubuliro g’idîni.

“Ngahi Ensaranga Zigendekeza Omukolo gw’Abahamirizi ba Yehova Zirhenga?” (Mwanzi guli oku jw.org)