Okuhindula omu Zindi Ndimi Entimanano y’e Eneo ya 2020 “Mufurahi Sikuzote”!

Omu Mwezi gwa 7 n’ogwa 8, 2020, bo bwali burhanzi bene wirhu na bali birhu bw’omw’igulu lyoshi balola entimanano y’eneo caligumiza. Lyo bihashikana ntyo, byal’ihûnyire eyo ntimanano ebe enregistrer enahindulwe omu ndimi 500 na kulusha. Kanji-kanji, emikolo ejirwa ly’entimanano y’eneo ehwa yoshi, enajire mwaka muguma erhi kulusha. Cikone enyanya z’obulwala bw’ekorona, abahindulaga Entimanano y’Eneo ya 2020 “Mufurahi Sikuzote”! balishinganine bayuse ogo mukolo omu kasanzi kasungunu; k’okuderha omu myezi erhahisiri ini.

Ebiro Biyimangira Omukolo g’Okuhindula Ebitabu omu Zindi Ndimi n’Ebiro by’Okugula Ebintu biba oku Biro Bikulu by’Abahamirizi ba Yehova byarhabala ly’ogo mukolo munene guhikirizibwa. Bene wirhu baba omu Biro Biyimangira Omukolo g’Okuhindula Ebitabu omu Zindi Ndimi, babona oku bene wirhu bakola omu mukolo g’okuhindula ebitabu omu zindi ndimi bali omu bulagirire by’ebyombo binja by’okubarhabala bahikirize ogo mukolo, kwa lwiganyo, emikro minja kulusha. Bene wirhu baba omu Biro by’Okugula Ebintu baba oku biro bikulu by’Abahamirizi ba Yehova, bagula mikro 1 000 banayirhuma omu maeneo hofi 200.

Lyo bakolesa ensaranga bwinja, bene wirhu baba omu Biro by’Okugula Ebintu bahiga okugula mikro minji caligumiza, bayihira haguma buzinda bayirhumira bene wirhu b’omw’igulu lyoshi bahindula ebitabu omu zindi ndimi. Okubona baguzire mikro minji caligumiza, dolare 170 zo zakagihwa omu kugula n’okulipa etransporo ya ngasi mikro. Nka rhurhagulaga mikro minji caligumiza ntyo, birhakahashikine okugula eyo mikro kuli er’ibeyi.

Bene wirhu baba omu Biro by’Okugula Ebintu balishinganine bagule emikro n’okuyirhuma emunda yajikolera omu Mwezi gwa 4 n’omu Mwezi gwa 5, 2020, muli ako kasanzi enyanya z’obulwala bw’ekorona barhunzi banji barhakagikola nk’oku bayorha bajira. Cikone, okubuzinda bw’Omwezi gwa 5, biro binji by’okuhindula ebitabu omu zindi ndimi, tawi nyinji, na maeneo manji gali gamahikamo ebyombo bal’ilagirireko lyo bajira omukolo.

Mwene wirhu muguma ohamagalwa Jay Swinney, ob’oyimangire Ebiro by’Okugula Ebintu, adesire ntya: “Muli ako kasanzi koshi, biro biguma na biguma by’oku Beteli n’abarhunzi bakola haguma omu cinyabuguma. Iroho lya Yehova lyo lyarhurhabire okujira ogo mukolo duba-duba, lyo lyanarhurhabire rhukolese bwinja oburhabale bwirhu lyo rhurhabala bene wirhu na bali birhu.”

Mwene wirhu muguma ohamagalwa Nicholas Ahladis, okola omu Biro Biyimangira Omukolo g’Okuhindula Ebitabu omu Zindi Ndimi, adesire ntya: “Bene wirhu bahindula ebitabu omu zindi ndimi bahâbwa omurhima erhi bahâbwa ebyo byombo, bulya barhacikagirhenga omu mwababwe enyanya z’ekorona. Ciru akaba barhakacirhiganine n’ababo bahindula boshi olulimi, bakola haguma lyo bahindula n’oku enregistrer, edrame, n’olwimbo omu ndimi 500 na kulusha.”

Ogo mukolo guli muguma gw’emikolo minji yajijirwe lyo barhabala bene wirhu na bali birhu bakulikire Entimanano y’Eneo ya 2020 “Mufurahi Sikuzote”! Oburhabale mwahânyire n’obulonza kugerera donate.jw.org erhi kugerera ezindi njira bo bwarhabire okugula ebyo byombo.