Oku Barheganyagya Evideo z’Entimanano y’e Eneo ya 2020 “Mufurahi Sikuzote”!

Evideo z’entimanano z’e eneo zinahume oku murhima na kandi zinarhurhabale rhuhugûkwe bwinja enyigirizo z’Ebibliya. Entimanano y’e Eneo ya 2020 “Mufurahi Sikuzote”! egwerhe video 114, kuhiramo na hotuba 43 zajiragwa na bene wirhu b’omu Mbaraza Eri Yalongoza n’abarhabazi babo. K’okola orhanyize okubiyerekire omukolo gujirwa n’ensaranga zikolesibwa lyo barheganya ezo video?

Bene wirhu na bali birhu hofi 900 b’omw’igulu lyoshi bakolesize akasanzi kabo n’obulenga bwabo lyo barhabala okurheganya eyo ntimanano. Bayusize hofi nsa 100 000, banajira hofi myaka ibirhi lyo bajira ogo mukolo. Lyo barheganya edrame ya miniti 76 edesire Nehemia: “Shangwe ya Yehova Ni Ngome Yenu,” bayusize nsa 70 000.

Kobinali, byal’ihûnyire nsaranga nyinji lyo bashibirira bene wirhu na bali birhu bacihânaga muli ogo mukolo na lyo babaha ngasi kantu bal’ilagirireko, ebyombo, n’enafasi y’okukolera.

Mwene wirhu Jared Gossman okola omu Biro by’e Audio/Vidéo, adesire ntya: “Ekomite y’Okuyigiriza y’Embaraza Eri Yalongoloza enashagalukire okukolesa bene wirhu na bali birhu ba ngasi nkomêdu na ba ngasi hantu. Banakajira ntyo bulya rhuba mulala muguma gw’omw’igulu lyoshi, rhunanaba rhulonzize evideo zirhu ziyerekane ntyo n’obwalagale. Lyo rhuhikiriza ogo muhigo, bikundi 24 bya bene wirhu b’omu bihugo 11 bakola haguma. Ly’abantu b’omw’igulu lyoshi bakola haguma, byanahûna nsaranga nyinji, okupanga omukolo bwinja, n’omuntu walongoza ogo mukolo.”

Na kandi, biba bihûnyire okukolesa ebyombo byago-byago lyo rhurheganya evideo zirhu nyinji. Kwa lwiganyo, lyo rhurheganya edrame edesire Nehemia: “Shangwe ya Yehova Ni Ngome Yenu,” byal’ihûnyire okuyubaka omu stidyo y’e Mt. Ebo hofi n’e Patterson, e New York, omu Amérique, bintu biguma na biguma by’okuyerekana oku olugo lw’e Yeruzalemu lwal’iyosire. Lyo bakolesa oburhabale bwirhu bwinja n’okurheganya edrame yayerekana bwinja-bwinja gurhi ebintu byaliyosire mîra, bene wirhu bakolesa ebikolanwa byali bilembu okukolesa lyo bayubaka enkuta zishushire olugo lw’e Yeruzalemu lwa mîra. Bakolesa empaho lyo bayubaka olukuta lugwerhe metre 6, buzinda bazibwikira n’eshifo nshige kw’iragi lyo zibonekana nka zinali nyubake n’amabuye. Ezo “nkuta” zakolesibwa lyo ziyerekana bigabi biguma na biguma bya mw’eyo drame, n’oko kwarhuma rhurhakolesagya bikolanwa binji. Ciru akaba abo bene bajijire ntyo, cikone bayusize dolare 100 000 lyo batengeneza ebikolanwa by’okurheganya eyo drame.a

Okumanya ebyo byoshi kunarhume rhwashagalukira bwenene entimanano yirhu y’eneo y’ogu mwaka. Rhuyemire n’obwalagale oku obushiru bwajiragwa lyo rhurheganya eyi ntimanano bwarhabala bantu banji bakuze Yehova. Rhumuvuzire omunkwa oku burhabale muhâna n’obulonza kugerera donate.jw.org erhi kugerera ezindi njira.