“Obwami Bwawe Buyishe”

Yehova alaganyize ntya: ‘Harhakac’iba ndûlù, amalumwa, endwala, erhi olufû. Nayish’ihôrhola emirenge omu masu g’abantu. Ebintu bibi byoshi byayish’iba birhacihali, abantu bayish’ibiyibagira.’

Yehova ahiraga Adamu na Eva omu bustani bw’e Edeni lyo balamamwo omu murhûla n’omu mwishingo. Bal’ishinganine bakaharamya Ishe w’omu mpingu n’okujira igulu libumbemwo abana babo. Adamu na Eva barharhumikiraga Yehova, cikone omuhigo gwage gurhasag’ishanja ciru n’ehitya. Kugerera eci citabu rhwabwine oku ngasi byoshi Mungu alaganya binahikirire. Obwami bwage bwayish’ilerha migisho minji minja okw’igulu, nk’oku analaganyagya Abrahamu.

Hano hofi-hofi, Shetani, abazimu bage, n’abantu babi boshi basherezibwa. Ngasi muntu ayish’ikaharamya Yehova. Rhurhakacilwala, rhurhakanacifâ. Lubero n’oko, ngasi lusiku rhwakazuka rhunagwerhe misi minji n’omwishingo gw’okulama. Igulu lyayish’iba paradizo. Ngasi muntu ayish’ikaba n’ebiryo binja n’ahantu hinja h’okulama. Abantu bayish’iba ba lukogo, harhakaciba baminya, n’ebishumusi birhakacihaba. Ensimba z’emuzirhu zirhakacirhuyoboha na nirhu rhurhakaciziyoboha ciru n’ehitya.

Amango Yehova ayish’irhondera afûla abantu bafîre, kayish’iba kasanzi ka kushagalusa bwenene. Rhwayish’iyegereza abantu ba mîra bali bafîre, nka Abeli, Nuhu, Abrahamu, Sara, Musa, Ruti, Esteri, na Daudi. Bayish’irhurhabala okujira igulu libe paradizo. Ensiku zoshi rhwayish’ikaba n’omukolo mwinja na gwa kushagalusa bwenene gw’okujira.

Yehova alonzize nawe oyishiba ho mw’ago mango. Wayish’imumanya bwinja bwenene kulusha oku wakahash’irhanya. Lekagi rhugendekere rhwayegera Yehova bwenene ngasi lusiku, kurhondera ene n’ensiku n’amango!