Izaki agwerhe myaka 40 erhi arhôla Rebeka. Al’imuzigire bwenene. Erhi hagera nsiku, baburha bana-rhabana babirhi b’amahasha.

Ezau ye wali cikuru, na Yakobo ye wali cito. Ezau akag’ilambagira bwenene, anali muhivi. Cikone Yakobo yehe akag’isima okubêra aha kâ.

Mw’ezo nsiku, erhi omushamuka akafîre omugala mukulu akag’ihâbwa mashwa manji na nsaranga nyinji. Ebyo byo byakag’ihamagalwa bwimo. Obwimo bw’omu mulala gwa Izaki, bwal’ihiziremwo okushangira oku ciragane Yehova ahaga Abrahamu. Ezau arhakag’ishibirira ebyo biragane, cikone Yakobo yehe al’imanyire oku biri bya bulagirire bwenene.

Lusiku luguma Ezau alegerera ahiva anagaluka erhi arhamire bwenene. Ayumva ehisununu hinja hy’ebiryo Yakobo akag’ideka anaderha ntya: ‘Ishali lyamanyirha! Mpa kw’ebyo biryo!’ Yakobo aderha ntya: ‘Nakuha kuli ebi biryo. Cikone orhang’impa obukulu bw’okuba nfula, onandaganye oku nayish’ihâbwa obwimo bwawe.’ Ezau aderha ntya: ‘Ntaco obo bwimo bwanjirira! Oburhôle. Ompe kone ebi nalya.’ K’orhanyize oku ebyo Ezau ajiraga byali binja? Nanga, byali bibi bwenene. Ezau ahâna akantu k’obulagirire bwenene enyanya z’ebiryo byone.

Erhi Izaki ashosihala bwenene, akasanzi kahika k’okugisha omugala mukulu. Cikone Rebeka arhabala omugala murho Yakobo, ly’ahabwa ogo mugisho. Erhi Ezau amanya oko, akunira bwenene anahiga okuniga omulumuna. Izaki na Rebeka bal’ilonzize balange Yakobo, muli ntyo bamubwira ntya: ‘Yimuka, ojibera emwa Labani, mushinja wabo nyoko, kuhika oburhe bwa mukulu wawe Ezau buhwe.’ Yakobo ayumva ihano ly’ababusi bage anayasa obuzine bwage.

Yehova al’ilaganyize Yakobo oku akamulanzire nk’oku analangaga Abrahamu na Izaki. Yakobo al’ilamire e Harani, arhôlerayo omukazi, aba na mulala munji, anaba mugale bwenene.

Enyuma z’aho Yehova abwira Yakobo ntya: ‘Galuka omu cihugo cawe.’ Ntyo Yakobo n’omulala gwage barhondera omubalamo gw’okugaluka. Erhi bali omu njira, bantu balebe barhimana Yakobo bamubwira ntya: ‘Mukulu wawe Ezau ayishire, alusibwe na balume 400!’ Yakobo ayoboha bwenene oku Ezau amujira kubi ye n’omulala gwage. Ashenga Yehova ntya: ‘Wekasinga, onangeko mukulu wani.’ Olusiku lwakulikiraga Yakobo arhumira Ezau engalo ya bibuzi binji, empene, enkafu, engamiya na bapunda.

Mw’obo budufu erhi Yakobo aba ali yene, abona malahika! Malahika arhondera amulwisa. Balwa kuhika sezi. Ciru akaba Yakobo ayagalisire, arhayemeraga ahimwa. Malahika amubwira ntya: ‘Ondeke ngende.’ Cikone Yakobo amubwira ntya: ‘Nanga, ntakuleke kuhika ongishe.’

Buzinda oyo malahika agisha Yakobo. Yakobo amanya oku Yehova arhakayemire Ezau amujira kubi.

Erhi buca sezi Yakobo alangira Ezau na balya balume 400. Yakobo ashokolera omulala gwage anafukama embere za mukulu wage kali nda. Ezau alibirhira emunda Yakobo ali anamuhobera. Abo balume bombi balaka bwenene banajira omurhûla. Gurhi orhanyize Yehova aciyumvirhe lugenda oku Yakobo alwisizemwo ako kanga?

Buzinda Ezau aja emwage, na Yakobo aja emwage. Yakobo agwerhe bagala 12. Rubeni, Simoni, Levi, Yuda, Dani, Naftali, Gadi, Asheri, Isakari, Zabuloni, Yozefu, na Benyamini. Yehova akolesize muguma wa mw’abo bana, ko kuderha Yozefu ly’ayokola abantu bage. K’omanyire gurhi amukolesizemwo? Rhwabona gurhi ajijiremwo ntyo.