Enyuma z’okuyusa myaka minji ali alongoza abantu ba Yehova, Yozwe afâ erhi agwerhe myaka 110. Omu mango goshi al’izine, Abaisraheli bakag’iharamya Yehova. Cikone erhi Yozwe ayus’ifâ, barhondera baharamya ensanamu nk’oku abantu b’e Kanani bakag’ijira. Bulya Abaisraheli barhagendekeraga barhumikira Yehova, Yehova aleka mwami w’e Kanani wakag’ihamagalwa Yabini abalibuze. Olubaga lwayinginga Yehova abarhabale. Ntyo Yehova abaha omuntu muhyahya w’okubalongoza wakag’ihamagalwa Baraki. Akarhabire abo bantu lyo bashub’igalukira Yehova.

Mulebi-kazi muguma wakag’ihamagalwa Debora, ahamagala Baraki. Agwerhe omwanzi kurhenga emwa Yehova al’ilonzize okumubwira. Aderha ntya: ‘Orhôle balume 10 000, ogend’irhimanana n’abasoda ba Yabini omu kabanda k’olwishi Kishoni. Wahima Sisera, mukulu w’abasoda ba Yabini.’ Baraki abwira Debora ntya: ‘Naja eyo munda okayemera oku rhwagenda rhwembi.’ Debora aderha ntya: ‘Rhwagenda haguma. Cikone omanye oku arhali we wayirha Sisera. Yehova anadesire oku mukazi wayirha Sisera.’

Debora agenda haguma na Baraki n’abasoda bage oku Ntondo Tabora lyo bacirheganya okulwa ivita. Erhi Sisera ayumva ntyo, arheganya emituga yage y’okulwa ivita n’abasoda bage omu kabanda. Debora abwira Baraki ntya: ‘Ene luli lusiku Yehova akuhimira.’ Baraki n’abalume 10 000 bali haguma naye bayandagala kw’eyo ntondo lyo barhimanana n’abasoda ba Sisera.

Enyuma z’aho Yehova ajira amishi g’omu kabanda k’e Kishoni gayushuke bwenene. Emituga y’ivita ya Sisera yakananira omu bijondo. Sisera arhenga omu mutuga gwage gw’okulwa ivita anarhondera alibirha n’amagulu. Baraki n’abasoda bage bahima abasoda ba Sisera, cikone Sisera afulumuka! Alibirha anagend’icifulika omw’ihema lya mukazi muguma wakag’ihamagalwa Yaeli. Yaeli aha Sisera amarha anywa anamubwikira n’obulangeti. Oyo mulwi w’ivita aj’iro bulya al’irhamire. Buzinda, Yaeli aja emunda Sisera al’igwishire, arhôla omusumari bashurhira omw’ihema, agukomerhera omw’irhwe lya Sisera. Sisera afâ.

Baraki ayisha aj’alonza Sisera. Yaeli aja embuga z’ihema lyage anabwira Baraki ntya: ‘Oyishe muno. Nakuyeresa omulume oli walonza.’ Baraki aja omw’ihema lya Yaeli anabuganamwo Sisera agwishire anafîre. Baraki na Debora bakuza Yehova omu kumuyimbira olwimbo bulya anarhabire Abaisraheli bahime abashombanyi babo. Omu myaka 40 yakulikiraga, Abaisraheli bali omu murhûla.

Mango maguma erhi ishali lili omu cihugo c’e Israheli, mukazi muguma Muisraheli wakag’ihamagalwa Noemi ahamira omu cihugo c’e Mowabu haguma n’iba na bagala babo babirhi. Buzinda iba wa Noemi afâ. Bagala bage barhôla abakazi bali Bamowabu, egarhi k’abo bakazi hali Ruti na Orpa. Akantu k’okugayisa, erhi hagera akasanzi, bagala ba Noemi nabo bafâ.

Erhi Noemi ayumva oku ebiryo byashubir’ibonekana omu cihugo c’e Israheli, ahiga okugaluka yo. Ruti na Orpa bahiga okugenda haguma naye, cikone erhi bali omu njira, Noemi ababwira ntya: ‘Bagala bani bagwerhe abakazi binja, mwanali balikazi binja bwenene kuli nie. Ndonzize mushubiyish’iheruka. Mugaluke emwinyu e Mowabu.’ Abo bakazi bamubwira ntya: ‘Rhukuzigire! Rhurhalonzizi rhukuleke.’ Noemi agendekera ababwira baje emwabo e Mowabu. Buzinda Orpa agaluka, cikone Ruti alahira okugaluka. Noemi amubwira ntya: ‘Orpa anagalusire emw’olubaga lwage n’emwa bamungu bage. Na nawe ogaluke haguma naye, oje emwa nyoko.’ Cikone Ruti aderha ntya: ‘Ntakuleke ciru n’ehitya. Olubaga lwawe lwaba lo lubaga lwani, na Mungu wawe aba ye Mungu wani.’ Gurhi orhanyize Noemi aciyumvirhe erhi Ruti amubwira ntyo?

Ruti na Noemi bahikaga omu cihugo c’e Israheli oku murhondero gw’amango g’okusarula engano. Lusiku luguma, Ruti aj’irhologola emogomogo abantu bakag’isarula omw’ishwa lya mulume muguma wakag’ihamagalwa Boazi bakag’isiga enyuma. Oyo Boazi ali mugala wa Rahabu. Ayumva oku Ruti ali mukazi w’e Mowabu wabêzire mwishwekerezi kuli Noemi. Abwira abakag’imukolera oku baje basiga ezindi mogomogo omw’ishwa lyo Ruti aja azirhologola.

Erhi biba bijingo, Noemi adosa Ruti ntya: ‘Ishwa lya ndi warhologolagamwo ezi mogomogo ene?’ Ruti aderha ntya: ‘Nazirhologolaga omw’ishwa lya mulume muguma ohamagalwa Boazi.’ Noemi amubwira ntya: ‘Boazi aba w’omu mulala gw’emwabo ibanie. Ogendekere waj’irhologola emogomogo omw’ishwa lyage haguma n’abandi bakazi. Nta mazibu gakuhikira eyo munda.’

Ruti agendekera akaja ebw’ishwa lya Boazi kuhika amango omukolo gw’okusarula gwahwaga. Boazi abona oku Ruti ali mukazi mwinja n’oku akag’ikola n’obushiru. Mw’ago mango, erhi omulume akafîre buzira kuburha abana-rhabana, omuntu w’omu mulala gwage akag’irhôla oyo mukazi anasigaga. Muli ntyo Boazi arhôla Ruti. Baburha omwana-rhabana banamuha izino lya Obedi, wahikiraga okuba shakulu wa Mwami Daudi. Abîra ba Noemi bashagaluka bwenene. Baderha ntya: ‘Yehova akuhîre Ruti wakujirire aminja, na buno okolaga ogwerhe omwinjikulu. Yehova ahâbwe irenge.’