Yonatani, mugala mukulu wa Mwami Sauli ali musoda wa burhwali. Daudi adesire oku Yonatani akag’ilibirha bwenene kulusha ikozi n’oku ali wa misi bwenene kulusha entale. Lusiku luguma Yonatani abona basoda 20 Bafilistini oku ntondo. Abwira awakag’imurhwaza ebikolanwa byage by’ivita ntya: ‘Rhwabalwisa Yehova akarhuyeresa ecimanyiso. Abafilistini bakarhubwira rhusoke emunda bali, rhwanamanya oku rhwabalwisa.’ Abafilistini bayakuza ntya: ‘Muyishe rhulwe!’ Ho n’aho abo balume babirhi basoka kw’eyo ntondo banahima abo basoda.

Bulya Yonatani ye wali mugala mukulu wa Sauli, ye wakabire mwami enyuma z’ishe. Cikone Yonatani al’imanyire oku Yehova acishozire Daudi ly’aba mwami muhyahya w’e Israheli; ciru akaba ntyo, Yonatani arhayagalagwa. Yonatani na Daudi baba bîra bwenene. Bombi bajira eciragane c’okulangana n’okuhalirana. Yonatani aha Daudi igoti lyage, engorho yage, omuherho n’omukaba gwage nka cimanyiso c’obwîra bwabo.

Erhi Daudi aba ali ayaka Sauli, Yonatani aja emunda Daudi ali anamubwira ntya: ‘Ozibuhe, onabe wa burhwali. Yehova acishozire we ly’oba mwami. Ciru na larha amanyire ntyo.’ Ka wanashagalukira okuba n’omwîra mwinja oli aka Yonatani?

Kanji-kanji, Yonatani ahizire obuzine bwage omu mazibu ly’arhabala omwîra wage. Al’imanyire oku Mwami Sauli akag’ilonza okuniga Daudi, muli ntyo abwira ishe ntyo: ‘Okaniga Daudi waba ojijire ecaha; nta kantu kabi ajijire.’ Sauli agaya Yonatani bwenene. Myaka milebe enyuma z’aho, Sauli na Yonatani bafâ omw’ivita.

Enyuma z’okufâ kwa Yonatani, Daudi alonza Mefibosheti mugala wa Yonatani. Erhi Daudi abona Mefibosheti, amubwira ntya: ‘Bulya sho ali mwîra wani mwinja bwenene, nakushibirira akalamo kawe koshi. Walama omu nyumpa yani y’obwami, wakalira n’oku meza gani.’ Daudi arhayibagiraga omwîra wage Yonatani.

Enyuma z’okufâ kwa Sauli, Daudi aba mwami. Agwerhe myaka 30. Enyuma z’okuyusa myaka milebe ali mwami, budufu buguma erhi ali alambagira oku cigabi c’enyanya c’enyumpa yage, alangira omukazi w’iranga linja. Daudi amanya oku izino ly’oyo mukazi ye wali Batisheba, n’oku ali muka omusoda wakag’ihamagalwa Uriya. Daudi arhuma baj’imulerhera Batisheba. Bajira obugonyi na Batisheba aba izimi. Daudi alonza okufulika ebi ajiraga. Abwira omukulu w’abasoda bage ahire Uriya oku mustari murhanzi omw’ivita n’enyuma z’aho bagaluke enyuma baleke Uriya yene. Erhi Uriya ayus’inigwa omw’ivita, Daudi arhôla Batisheba.

Cikone Yehova abona ebyo bintu byoshi bibi byajirikanaga. Gurhi ajijire? Yehova arhuma omulebi Natani emwa Daudi. Natani aderha ntya: ‘Mulume muguma mugale agwerhe bibuzi binji, na mulume muguma mukenyi agwerhe mwana-buzi muguma musungunu al’izigire bwenene. Oyo mulume mugale arhôla oyo mwana-buzi muguma oyo mulume mukenyi agwerhe.’ Daudi agaya bwenene anaderha ntya: ‘Oyo mulume mugale ashinganine afê!’ Enyuma z’aho Natani abwira Daudi ntya: ‘We oyo mulume mugale!’ Daudi avunika omurhima, anayemera ebi Natani aderhaga, aderha ntya: ‘Najirire Yehova ecaha.’ Eco caha calerhera Daudi n’omulala gwage mazibu manji. Yehova aha Daudi obuhane, cikone amuleka agendere alama bulya ali mwikubagirwa na mwirhohye.

Daudi al’ilonzize ayubakire Yehova ehekalu, cikone Yehova acishoga Solomoni, mugala wa Daudi ly’ayubaka eyo hekalu. Daudi arhondera okurheganyiza Solomoni ebintu by’okuyubaka eyo hekalu, anaderha ntya: ‘Ehekalu ya Yehova eshinganine ebe nyinja bwenene. Solomoni acili murho, cikone namurhabala murheganyize ebi ayish’ikolesa.’ Daudi ahâna nsaranga zage nyinji enyanya z’ogo mukolo gw’obubasi. Alonza abakozi b’obulenga. Alunda enoro n’amarhale, anarhuma balerhe emirhi y’emishebeyi [cedre] kurhenga e Tiro n’e Sidoni. Erhi Daudi ali hofi afê aha Solomoni e plan ly’ayubaka ehekalu. Aderha ntya: ‘Yehova ambwizire nkuyandikire ebi bintu byoshi. Yehova akurhabala. Orhayobohaga. Ozibuhe onarhondere omukolo.’