Omu cinyabuguma c’Abahamirizi ba Yehova murhaba bimangizi b’okukamarha. Cikwone, nk’oku byali omu mango g’entumwa erhi ecigamba c’Abakristu cirhangira, rhujira “abagula” erhi “balungere” bakwanine balya bayabula obuso bwa Nnamahanga. (Ebijiro 20:28) Abo bagula baba balume bakuzire omu bunyamuka balongola n’okulanga ecigamba, ‘arhali nk’abasezibwe, ci n’omurhima gwabo goshi; arhali omukulonza obunguke bubi, ci n’omurhima nkana.’ (1 Petro 5:1-3) Mikolo mici barhujirira?

Banarhushibirire n’okurhulanga. Abagula banarhulongole kugerera oku mandiko n’okulanga abantu boshi omu cigamba lyo bagenderera okukolera Yehova. Bulya bamanyire oku Nnamahanga ye obahire ogwo mukolo gw’obulagirire, abagula barhaba barhambo b’abantu ba Nnamahanga, cikwone banabarhabale bamukolere bwinja omu mwishingo. (2 Abakorinti 1:24) Nk’oku omungere ashibirira ngasi cibuzi omu buso bwage, abagula nabo banacihangane okumanya ngasi muntu omu cigamba erhi omu buso.​—Emigani 27:23.

Banarhuyigirize gurhi rhwankajira obulonza bwa Nnamahanga. Ngasi mugobe, abagula banahane enyigirizo omu ntimanano z’ecigamba ly’obuyemere bwirhu buzibuha. (Ebijiro 15:32) Abo balume basimire Yehova bwenene banayimangire omukulo gw’okuyalagaza n’okurhuyereka olwiganyo, banarhuluse mw’ogo mukolo n’okurhukomeza omu ngasi njira y’okuyalagaza Obwami.

Banarhuhebe omurhima omu nda. Lyo barhabala ngasi muguma wirhu, abagula banarhulambagirire emwa birhwe erhi kurhushambaliza aha Nyumpa y’Obwami lyo barhurhabala n’okurhurhuliriza kugerera oku Mandiko.​—Yakobo 5:14, 15.

Arhali eyo mikolo y’ecigamba yone bajira. Banji mulibo bajira emikolo y’okulonza enfaranga n’eyindi mikolo y’okushibirira emilala yabo. Ebyo byoshi binabahune kasanzi kanji n’obukengere bunji. Bulyala abo balume bwenene barhuluhira, rhuhunyirwe rhubakenge bwenene.​—1 Abatesalonika 5:12, 13.

• Mikolo mici abagula bajira omu cigamba?

• Gurhi abagula bashibirira ngasi muguma muli rhwe?

Ebibliya ederhire bigabi bibirhi bya Bakristu bahikiriza emikolo y’omu cigamba: “Balungere n’abashamasi,” erhi barhabazi b’emikolo. (Abafilipi 1:1) Kanjikanji, wanabona balungere n’abashamasi banji omu ngasi cigamba. Mikolo mici abashamasi barhujirira omu cigamba?

Banarhabale abagula. Abashamasi bali balume Bakristu bagwerhe obuyemere bunene, bikubagirwa n’abakozi birhonzi. Baguma mulibo eba misole n’abandi baba bantu bakuzîre. Banajire emikolo minji-minji y’obulagirire oku biyerekire ecigamba n’Enyumpa y’Obwami. Omu kujira ntyo, banarhabale abagula bacikunjire bwinja-bwinja oku mukolo gwabo gw’okuyigiriza n’okulanga ebibuzi bya Yehova.

Banajire emikolo minji-minji y’obulagirire. Baguma mulibo banayankirire abayisha omu ntimanano. Abandi banahangayikire ebyombo by’okuyushula izu; abandi banalange ebitabu n’okubigabira abantu, abandi banalange enfaranka z’ecigamba, n’abandi banagabire abantu ebishagala bayalagazam’omwanzi gw’Obwami. Banarhabale n’omukucesa Enyumpa y’Obwami. Hali amango abagula babahuna barhabale abashosi n’abagikulu. Ngasi mukolo abashamasi bahabirwe, banagujire n’omurhima goshi. Co cirhuma rhubakenga bwenene bulya banarhujirire mikolo minji.​—1 Timoteyo 3:13.

Baba lwiganyo lwinja oku bandi Bakristu. Olugenzi n’obworhere bwabo bwinja byo birhuma bahikira okuba bashamasi. Ebigabi (ebipindi) byabo nkabayigiriza omu ntimanano zirhu binakomeze obuyemere bwirhu. Na kandi, kugerera oku lwiganyo lwabo, banarhurhabale okuba n’obushiru omu mukolo gw’okuyalagaza. Okuyumvikana kwabo n’abagula kunarhume ecigamba caba n’omwishingo n’obuguma. (Abefezi 4:16) Kuhwa kwa nsiku, nabo banayeneza ebihunyirwe lyo bashinganana okuba bagula.

• Bworhere buci abashamasi bagwasirwe okuba nabo?

• Gurhi emikolo yabo erhabala ecigamba?

Amandiko g’Ecigiriki g’Ecikristu gaderhirhe kanji kanji Barnaba n’entumwa Paolo. Abo balume bâli bagula bakagilambagirira erhi kutemberera ebigamba by’Abakristu omu mango g’entumwa. Bulya gurhi bakazigi zunguluka ntyo? Bali shibirire benewabo na bali babo na kandi bali lonzize babarhabale omu bunyamuka. Paolo adesire erhi: “Rhushub’ig’iji rhandula [erhi kurhangula] bene wirhu . . . rhubone kurhi bayosire.” Arhakagi yoboha okujira olugenzi luli lyo agendi barhabala bazibuhe omu buyemere. (Ebijiro 15:36) Ene, ntyo ko abagula balambagizi bali bajira.

Banayishe lyo barhuheba omurhima omu nda. Ngasi mugula w’omuzunguko anarhangule bigamba 20 erhi kulusha. Anarhangule ngasi cigamba kabirhi omu mwaka na kandi anamale mugobe muguma omu cigamba alambagirire. Rhwanayunguka bwenene kugerera oku bumanye bwabo erhi bw’abakabo, nkaba barhozire. Banacihangane okumanya emisole ciru n’abashosi n’abagikulu, na kandi banarhuluse omu mukolo gw’okuyalagaza Obwami n’okuyigiriza abantu Ebibliya. Banaluse abagula omu kugendi rhangula bene wirhu na bali birhu, kugerera oku nyigirizo zabo omu bigamba n’oku ntimanano nkulu, banazibuhye obuyemere bwirhu.​—Ebijiro 15:35.

Banashibirire ngasi muguma wirhu. Abagula b’omuzunguko banajire okwabo koshi lyo barhabala ecigamba ciyimange bwinja omu bunyamuka. Banarhimanane n’abagula n’abashamasi lyo balolereza haguma ebyagendesire bwinja n’ebirhagendesiri bwinja n’okubaha amahano g’okubarhabala bajire emikolo yabo bwinja. Banarhabale bapainiya lyo bayinjihya omukolo gwabo, banasime okubonana n’abantu bahyahya n’okumanya gurhi bagenderire. Ngasi mugula w’omuzunguko anacihane nka mukozi oku bunguke bwirhu. (2 Abakorinti 8:23) Kuli kwa bulagirire rhuyige olwiganyo lw’obuyemere bwabo n’okucihana omu kukolera Nnamahanga.​—Abahabraniya 13:7.

• Bici birhuma abagula b’omuzunguko bakarhangula ebigamba?

• Gurhi wankayunguka amango barhulambagirire?

Amango g’obuhanya nka omusisi gw’obudaka, enyishi-kuyunjula, cihonzi c’enkuba erhi mpusi nnene, rhunacirheganye honaho okurhabala benewirhu. Okujira ntyo kunayerekane obuzigire bwirhu kuli benewirhu. (Yowane 13:34, 35; 1 Yowane 3:17, 18) Burhabale buci rhubaha?

Rhunabarhabale n’enfaranga. Abakristu ba burhanzi b’Eantiyokiya bàrhumîre benewabo b’Eyudeya enfaranga amango bali omu ishali linene. (Ebijiro 11:27-30) N’omu mango girhu ene, rhukayumva aha bene wirhu bali omu bulagirire, rhunacimaramase n’okubarhumira enfaranga n’ebirugu kugerera oku cigamba cirhu.​—2 Abakorinti 8:13-15.

Rhunabahe oburhabale bushinganine. Abagula bali ah’obuhanya bwajirikanaga bagwasirwe balongereze ngasi Muhamirizi w’ecigamba cabo lyo bamanya erhi boshi bafumire obo buhanya. Abalume bayimangire oburhabale banalongole emikolo y’okugaba ebiryo, amishi g’okunywa, emishangi, amafumu, n’aha baheba irhwe. Abahamirizi banji bamanyire emikolo ehunyirwe banacihane okuja eyo munda lyo barhabala omu kuyubaka Emyumpa z’Obwami zashabusire n’enyumpa za bene wabo erhi kurhabala omu yindi mikolo. Bulya kuba ecinyabuguma cirhu ciba ca bumvikane rhunakomire okukola haguma, rhweshi rhunacimaramase okurhabala benewirhu bagwerhe obulagirire. Ntyola, rhunarhabale “bene wirhu omu buyemere,” ci nka bihashikine rhunarhabale n’abantu b’agandi madîni.​—Abagalasiya 6:10.

Rhunabarhulirize kugerera oku Bibliya. Abahikirwe n’abuhanya banabe balagirire oku burhulirize. Mw’ago mango, rhunabone emisi yirhu muli Yehova, “Nyamuzinda wa ngasi burhulirize.” (2 Abakorinti 1:3, 4) Abahikirwe n’obuhanya banaheze obulangalire; rhunabashambalire oku biragane by’Ebibliya n’okubayereka oku Obwami bwa Nnamahanga buli hofi bumale ebirhulerhera amalumwa n’amalibuko.​—Amafulûlo 21:4.

• Bulya gurhi rhweshi rhunacimaramase honaho amango bene wirhu bamahikirwa n’obuhanya?

• Gurhi rhurhuliriza benewirhu bahikirwè n’obuhanya?

Kasanzi kasungunu embere z’okufa kwage, Yezu ashambala bufunda n’abanafunzi bani egarhi k’abanafunzi bage. Abo banafunzi ali Petro, Yakobo, Yowane, na Andreya. Erhi Yezu ali abalebera ecimanyiso c’okubaho kwage omu nsiku nzinda, abadosa idoso ly’obulagirire bwenene: “Mushizi ohi oli mwikubagirwa na mwirhonzi, oyu nnâhamwabo ahâga obukulu oku bantu b’enyumpa yage mpu abagabulire ebiryo omu mango gakwanine?” (Mateyo 24:3, 45; Marko 13:3, 4, NW) Oluderho “biryo” kuli kuderha bumanye bwa bunyamuka, erhi bumanye oku biyerekire Nnamahanga. Yezu ali lonzize okubwira abaganda bage oku barhayobohaga bulya kuba yene ye “nnâhamwabo” ankacishozire abantu bw’okugenderera bagabulira abashimbulizi bage ebiryo by’obunyamûka omu nsiku nzinda. Ndi wankayishiriba oyo “mushizi”?

Ciri cikundi cisunguni ca Bakristu bashigwa. Oluderho “mushigwa” erhi “mwishogwa” kuli kuderha ocishozirwe kugerera oku muka gwa Nnamahanga. Oyo “mushizi” kali Kagombe k’Obulongozi k’Abahamirizi ba Yehova. Ako kagombe kali kagabulira abantu baharamya Yehova ebiryo by’obunyamuka. Rhulagirire kw’oyo mushizi bulya y’eri warhuha “omulengo gw’ebiryo omu mango gakwanine.”​—Luka 12:42, NW.

Bayimangire enyumpa ya Nnamahanga. (1 Timoteyo 3:15) Yezu ahîre oyo mushizi omukolo muzibu gw’okuyimangira omukolo gw’ecihande ca han’igulu c’ecinyabuguma ca Yehova, okulanga ebirugu byage, okulongola omukolo gw’okuyalagaza, n’okuyigiriza abantu bage kugerera oku bigamba birhu. Lyo arhuha ebiryo by’obunyamûka birhukwanine, oyo “mushizi mwikubagirwa na mwirhonzi” anarhulise kugerera oku bitabu rhukolesa omu kuyalagaza, kugerera oku nyigirizo rhuhabwa omu ntimanano zirhu za ngasi mugobe n’entimanano zirhu nkulu.

Oyo mushizi ali mwikubagirwa bulya anarhuyigirize okuli kw’Ebibliya n’okuhikiriza omukolo bamuhaga gw’oku yalagaza omwanzi gw’Obwami, anali mwirhonzi bulya analange n’oburhimanya boshi ebirugu bya Kristu han’igulu. (Ebijiro 10:42) Yehova ali agisha omukolo gw’oyo mushizi bulya bantu banji bali bayaka okuhungumuka n’ishali bali bayisha emunda ali. Na kandi ali amurhabala ahe abantu biryo binji bwenene by’obunyamûka.​—Izaya 60:22; 65:13.

• Ndi Yezu acishozire mpu agabulire abanafunzi bage ebiryo by’obunyamûka?

• Bulya gurhi rhwanaderha oku oyo mushizi ali mwikubagirwa na mwirhonzi?

Omu mango g’entumwa, “entumwa n’abagula” b’Eyeruzalemu, bali jijire akagombe k’obulongozi, bakazigirhola emihigo y’obulagirire y’okurhabala Abakristu bishogwa b’ago mango. (Ebijiro 15:2) Bakagi ciheba boshi haguma lyo bakula akanwa kaguma bayumvikinekwo kugerera oku muka mucese (muka mutagatifu), n’ako kanwa kaguma ko kakazigi shimbwa n’Abakristu boshi ngasi aha bali. (Ebijiro 15:25) Ntyo ko n’akagombe k’obulongozi kali kakola ene.

Ciri cikundi Nnamahanga ali akolesa lyo ahikiriza obulonza bwage. Bene wirhu bashigwa bajijire Akagombe k’Obulongozi banalole omu Kanwa ka Nnamahanga erhi barhola emihigo eyerekire gurhi omukolo gwagenderezibwa erhi mihigo eyerekire enyigirizo. Baba balume bagwerhe obumanye bunji. Ngasi mugobe, banatamale haguma balole bici bene wabo b’omw’igulu lyoshi balagirirekwo. Nk’oku byali omu mango g’entumwa, banarhumanyise emihigo eyimangire oku Bibliya barhozire kugerera oku maruba erhi oku bagula balambagizi, erhi omu zindi njira. Okwo kunarhabale olubaga lwa Nnamahanga lukole omu buguma. (Ebijiro 16:4, 5) Akagombe k’Obulongozi kanarhabale abantu boshi babe n’obushiru omu mukolo gw’okuyalagaza Obwami, kayimangire okurheganya ebiryo by’obunyamuka, n’okushimika abandi balume bajira ebikono omu bigamba by’omw’igulu lyoshi.

Ako kagombe kanalongolwe kugerera oku muka gwa Nnamahanga. Akagombe k’Obulongozi kanalongolwe na Yehova, Murhegesi Mukulu, na Yezu, Mukulu w’ecinyabuguma. (1 Abakorinti 11:3; Abefezi 5:23) Abagula bajijire ako kagombe barhacibona nka bo bakulu birhu. Haguma n’abandi bashigwa boshi, “bagenderire okukulikira omwana-buzi [Yezu] ngasi aha anajire hoshi.” (Amafulûlo 14:4) Benewirhu b’ako Kagombe basimire bwenene rhukabaheba omu masala girhu n’okusala oku biyerekire omukolo bali bajira.

• Amango g’entumwa, bandi bali jijire akagombe k’obulongozi?

• Ene, gurhi abagula b’Akagombe k’Obulongozi balongolwa na Nnamahanga?

Omu Cihabraniya, ebeteli kwo kuderha “Nyumpa ya Nyamuzinda.” (Omurhondêro 28:17, 19) Er’izino likwanine bulya enyumpa z’ebiro Abahamirizi ba Yehova bayubaka omw’igulu lyoshi ziba za kulongola n’okugendereza omukolo gw’okuyalagaza Obwami bwa Nnamahanga. Akagombe k’Obulongozi kanakolere omu biro bikulu by’Abahamirizi ba Yehova omw’igulu lyoshi biba e New York, omu Amerika. Ako Kagombe kanalongole emikolo y’ebiro by’ebindi bihugo byoshi kurhengera mw’ebyo biro bikulu. Abahamirizi bakolera omu ngasi biro by’ecihugo banaderhwe mulala gw’Ebeteli bulya haguma balama, haguma balira, haguma bayigira Ebibliya omu bumvikane.​—Ennanga 133:1.

Omulala gw’Ebeteli ciba cinyabuguma cisomerine. Omu ngasi beteli muba bene wirhu na bali birhu bacihanyire okujira obulonza bwa Nnamahanga n’okugendereza emikolo y’Obwami. (Mateyo 6:33) Barhakamarha, cikwone banahabwe ebiryo, ah’okulala n’enfaranga nsungunu z’okubarhabala oku gandi malagirire gabo. Ngasi muguma ajira omukolo gwage. Baguma banakole omu biro, abandi omu masiga, abandi banarheganye aha balira, abandi banayandike ebitabu n’okubihanga erhi kubihebakw’enjalada, abandi kucesa enyumpa, abandi banafule, n’abandi banalumule ebisherire, n’eyindi mikolo minji.

Emikolo ejirwa oku Beteli eli ya kugendereza omukolo gw’okuyalagaza Obwami. Omuhigo mukulu gw’Ebeteli guli gwa kuhisako bantu banji okuli kw’Ebibliya. Rhurhole olwiganyo lw’ehi hitabu oli wasoma. Hyayandisirwe oku bwimangizi bw’Akagombe k’Obulongozi, hyarhumwa omw’igulu lyoshi oku bigamba by’abahinduzi oku njira ye Enterneti, hyacapwa oku ma Beteli n’amashini gacapa ebitabu dubaduba, na buzinda hyarhumwa omu bigamba kulusha 110 000 by’Abahamirizi ba Yehova. Muli ebyo boshi, “omulala gw’Ebeteli” gunarhabale muli ogo mukolo gw’obulagirire bwenene kulusha emikolo yoshi, ko kuderha, kuyalagaza omwanzi mwinja gw’Obwami. —Marko 13:10.

• Bandi bakola omu Beteli, ka banakamarhe?

• Mukolo muci emikolo ekolwa oku Beteli zoshi egendereza?

Bene wirhu na bali birhu bakola oku biro b’ishami, erhi Beteli, bajira mikolo minji y’okugendereza omukolo gw’okuyalagaza omwanzi mwinja gw’Obwami omu cihugo ciguma erhi bihugo binji. Mw’eyo mikolo hali okuhindula ebitabu, okubicapa, okubihanga haguma kandi erhi kubihebakw’enjalada, okubirhuma, n’okurheganya ama CD erhi DVD, n’eyindi mikolo minji.

Ekomité y’Ishami enayimangire omukolo. Akagombe k’Obulongozi kanahebe obwimangizi bw’ebiro b’ishami omu maboko g’abagula basharhu b’obumanye erhi kulusha, baderhwa Ekomité y’Ishami. Eyo komité enaka hana eraporo oku Kagombe k’Obulongozi lyo babamanyisa gurhi omukulo gugenderire omu cihugo erhi bihugo bayimangire n’okubamanyisa nkaba hali ebirhagendesiri bwinja. Ezo raporo bayandika zinarhabale abagula b’omu Kagombe k’Obulongozi bamanye myanzi mici bàyandika omu bitabu n’omu jurnale zabo za ngasi mwezi, na bici bigwasirwe okuyigirizibwa omu ntimanano z’ebigamba n’omu ntimanano nkulu. Akagombe k’Obulongozi kanarhume mango oku gandi abagula b’okulambagirira ebiro by’amashami, lyo barhabala abagula b’Ekomité y’Ishami bahikirize bwinja omukolo gwabo. (Emigani 11:14) Amango entumwa w’Akagombe k’Obulongozi alambagirire ebiro by’ishami by’Abahamirizi ba Yehova, anajire ehotuba oku Bahamirizi boshi b’omu cihugo erhi bihugo byoshi biyimangirwe n’ebyo biro b’ishami.

Ekomité y’Ishami enarhabale ebigamba by’Abahamirizi eyimangire. Abagula b’omuzunguko banarhume eraporo oku biro b’ishami. Bene wirhu baguma oku biro b’ishami nabo banalole kushimbana n’ezo raporo erhi kobinali kushinganine okujira ebigamba bihyahya. Kandi, abo bene wirhu banalongole omukolo gwa bapainiya, bamisionere, n’abagula b’omuzunguko omu cihugo erhi ebihugo byoshi bayimangire. Banarheganye entimanano nkulu z’olusiku luguma, n’entimanano nkulu z’ensiku zisharhu, banayimangire omukulo gw’okuyubaka Enyumpa mpyahya z’Obwami n’okulola erhi ebitabu biri byahikira ebigamba kushimbana n’obulagirire bwa ngasi cigamba. Eyo mikolo yoshi ekajirikana omu biro by’ecihugo eba ya kuhikiriza buzira kavulindi omukolo gw’okuyalagaza Obwami.​—1 Abakorinti 14:33, 40.

• Gurhi Ekomité z’Ishami zirhabala Akagombe k’Obulongozi?

• Mikolo mici ejirwa oku biro b’ishami?

Rhunajire oku rhuhashire koshi lyo rhuyalagaza “omwanzi gw’akalembe” omu “ngasi mulala, na ngasi bûko, na ngasi lulimi, na ngasi ishanja.” Lyo rhuhasha okujira ntyo, rhuli rhwayandika ebitabu omu ndimi kulusha 750. (Amafulûlo 14:6) Gurhi rhuhikira okujira ogo mukolo munene? Rhunarhabalwe n’abandisi barhenga omu bihugo binji n’ecikundi c’abahinduzi, boshi baba Bahamirizi ba Yehova.

Emyanzi enarhangi yandikwa omu Cingereza. Akagombe k’Obulongozi kayimangire omukolo gw’Ebiro by’Okuyandika, ebyo biro biba omu biro birhu bikulu by’e New York. Ebyo Biro by’Okuyandika biyimangire emikolo y’abandisi bakolera omu biro bikulu n’abandisi bakolera omu biro bya bihugo bilebe. Okuba n’abandisi barhenzire omu bihugo mberuluka kunarhume bayandika emyanzi ya ngasi lubero esimisa abantu b’omu bihugo byoshi.

Enyuma ly’aho emyanzi enarhumwe oku bahinduzi. Erhi eyo myanzi eba yamayemerwa, enarhumwe oku bigamba byoshi by’abahinduzi omw’igulu kugerera oku Enterneti. Abahinduzi binahindule eyo myanzi, buzinda balole erhi eshinganine n’omwanzi murhanzi guli omu Cingereza, n’okulola erhi ebi bayandisire biyumvikine n’olulimi lwabo. Banacihangane okucishoga “enkengêro z’okunali” omu lulimi lwabo zirya zigwasire bwinja entimanya z’emyanzi eri omu Cingereza.​—Omuhanûzi 12:10.

Eordinateri zinarhabale abahinduzi okukola duba. Eordinateri yone erhanka jira omukolo gw’abandisi erhi gw’abahinduzi. Cikone, banakole duba kugerera oku diksionere ziba omu ordinateri n’ezindi ntondekanye (programe) z’okurhabala okuhindula. Abahamirizi ba Yehova bàjijire entondekanye ederhwa MEPS. Eyo ntondekanye enabarhabale okuyandika omwanzi omu ndimi nyinji caligumiza, okuhebamw’enfoto, n’okujira eyo myanzi epangwe bwinja embere erhumwe oku mashini g’okucapa ebitabu.

Bulya gurhi rhucihangana okuyandika ebitabu birhu omu ndimi nyinji bwenene? Bulya Yehova alonzize “abantu boshi bacunguke banahashimanya eby’okuli.”​—1 Timoteyo 2:3, 4.

• Gurhi ebitabu birhu biyandikwa?

• Bici birhuma rhuhindula ebitabu birhu omu ndimi nyinji bwenene?

Ngasi mwaka, Abahamirizi ba Yehova banayandike n’okugabira abantu emilioni y’Ebibliya n’ebindi bitabu buzira kuguza. Rhunayubake n’okulumula Enyumpa z’Obwami n’Ebeteli. Rhunahikirize amalagirire g’ebihumbi bya bamisionere na bene wirhu bakola oku Beteli, na kandi rhunahane oburhabale amango g’amadarhi. Nkaba wanacidosa erhi: Enfaranga z’okujira ebyo byoshi ngahi zirhenga?

Rhurhahana cakumi, rhurhanajira entulo. Ciru ankaba binahune nfaranga nyinji lyo rhugendereza omukolo gwirhu gw’okuyigiriza omwanzi gw’Obwami, rhurha huna-huna nfaraga. Miaka kurhaluka igana yamagera kurhenga amango ejurnale yirhu ederhwa Munara wa Mulinzi ya kabirhi yaderhaga oku rhuyemire oku Yehova ye cikondo cirhu n’oku “rhurhaka huna-huna nfaranga erhi kusengera oburhabale bwa bene bantu ciru n’olusiku luguma.” Na kuhik’ene ntaye rhusigi fukamira mpu arhuhe oburhabale!​—Mateyo 10:8.

Emikolo yirhu enajirwe kugerera oku burhabale bw’abantu b’obulonza bwinja. Bantu banji baba basimisibwe bwenene n’omukolo gwirhu gw’okuyigiriza Ebibliya na ntyo banahane oburhabale oku bulonza bwabo ly’ogo mukolo gugenderera. N’Abahamirizi nabo banahane n’omwishingo akasanzi kabo, emisi yabo, enfaranga zabo, n’ebindi birugu byabo ly’obulonza bwa Nnamahanga buhikirizibwa omw’igulu lyoshi. (1 Enganîro 29:9) Omu Nyumpa y’Obwami, n’oku ntimanano zirhu nkulu, abalonzize banahebe oburhabale bwabo omu rhusandugu. N’abandi banahana oburhabale bwabo kugerera oku adresi yirhu ye Enterneti, jw.org. Enfaranga nyinji mw’ezo zinarhenge oku bantu bagalaganda, nk’olya mukana w’obuligo Yezu ashambaliraga wahebaga masengi gabirhi omu mucimba gw’ecibikiro gw’enyumpa ya Nnamahanga. (Luka 21:1-4) Ntyola, ngasi muntu anabike eburhambi akantu akayishi hana “nk’oku omurhima gwage gunamubwizire.”​—1 Abakorinti 16:2; 2 Abakorinti 9:7.

Rhuyemire oku Yehova agenderera okuhuma oku mirhima y’abantu balonzize okumukenga kugerera oku birugu byabo by’akamaro kanji, bagenderere okuhana oku bankahasha ly’omukolo gw’Obwami gugenderera n’obulonza bwa Nnamahanga bujirikana.​—Emigani 3:9.

• Bulya gurhi idîni lirhu lirhashushiri agandi madîni?

• Gurhi enfaranga abantu bahana n’obulonza bwinja zikolesibwa?

Enyumpa Abahamirizi ba Yehova bashengeramwo enaderhwe Nyumpa y’Obwami, n’er’izino likwanine bulya myanzi y’Obwami yone eyigirizibwamo, n’ogo go gwali mwanzi mukulu gw’enyigirizo za Yezu.​—Luka 8:1.

Mw’ezo nyumpa mw’Abahamirizi baharamiza Yehova. Mw’ezo Nyumpa z’Obwami, Abahamirizi ba Yehova banayige enjira nyinji z’okuhikiriza omukolo gw’okuyalagaza Obwami. (Mateyo 24:14) Ezo Nyumpa z’Obwami zirhajira bunene buguma zirhana yubakwa kuguma, zirhaba nene bwenene na kandi zirhaba za kusomeza abantu. Omu ngasi Nyumpa y’Obwami wanarhimanamwo bantu ba cigamba ciguma erhi bigamba binji. Mw’eyi miaka egezire, rhwayubasire ebihumbi by’Enyumpa z’Obwami (hofi 5 ngasi lusiku) bulya ngasi lusiku abigamba biri byayushuka ciri n’abantu b’okuyalagaza Obwami. Ngahi enfaranga ziyubaka ezo nyumpa zirhenga?​—Mateyo 19:26.

Ezo nyumpa zinayubakwe kugerera oku nfaranga rhuhana z’oburhabale bw’okuyubaka Enyumpa z’Obwami omw’igulu lyoshi. Ezo nfaranga zinarhumwe oku biro b’ishami n’ecigamba c’Abahamirizi balonzize okuyubaka erhi kulumula Enyumpa y’Obwami banazihabwa.

Zinayubakwe na bene wirhu na bali birhu ba ngasi lubero bacihana okukola buzira kukamarha. Omu bihugo binji muba Ebikundi by’Abayubasi b’Enyumpa z’Obwami. Erhi ecikundi c’abayubasi n’abacihana buzira kucuhwa bamala okuyubaka Nyumpa nguma y’Obwami, banagendi yubaka eyindi omu cindi cishagala, ciru n’omu bishagala by’omu mapori. Muli ntyo, banarhabale okuyubaka Enyumpa z’Obwami z’ebigamba bya mw’eco cishagala. Omu bindi bihugo, abagula b’obumanye banahabwe omukolo gw’okuyimangira omukolo gw’okuyubaka n’okulumula Enyumpa z’Obwami omu murhundu mulebe. Aha bali bayubaka Enyumpa y’Obwami Abahamirizi bamanyire eby’okuyubaka banarhabale mw’ogo mukolo, cikwone bene wirhu na bali birhu b’omu cigamba ciri cayubakirwa bo baba banji. Omuka gwa Yehova n’obushiru bw’abantu bage byo birhuma eyo mikolo y’okuyubaka yahikirizibwa.​—Ennanga 127:1; Abakolosi 3:23.

• Bici birhuma aha rhuharamiza Yehova haderwa Nyumpa y’Obwami?

• Bici birhurhabala lyo rhuhikira okuyubaka Enyumpa z’Obwami omw’igulu lyoshi?

Izino litagatifu lya Nnamahanga liba liyandisirwe oku Nyumpa z’Obwami z’Abahamirizi ba Yehova. Muli ntyo, rhunayerekane oku rhuba rhukenzire Yehova omu kuzijira nyinja, omu kuzicesa n’omu kuzilanga zirhaharabikaga. Ngasi muguma muli rhwe agwasirwe asime okujira kw’eyo mikolo bulya eri njira y’okuharamya Yehova.

Rhunacihangane okucesa Enyumpa y’Obwami erhi rhumala entimanano. Ngasi lusiku erhi entimanano zihwa, Abahamirizi ba Yehova basima basige Enyumpa y’Obwami ecire. Liguma omu iposo, emikolo y’okucesa bwinja bwinja Enyumpa y’Obwami enajirikane. Omugula muguma erhi mushamasi anabe agwerhe akaratasi kayandisirwekw’emikolo yoshi yajirwa, ye naja wayereka abandi emikolo bajira. Baguma banahyajire, abandi banakorope erhi kuhorhola ivumbi, abandi banapang’ebirhi, kucesa omusarani erhi kabiné, okupanguza amadirisha n’ebiyo, okubulaga obucafu, erhi kucesa Enyumpa y’Obwami embuga n’endalala. Liguma omu mwaka, haba ogundi mupango gw’okucesa bwinja bwinja Enyumpa y’Obwami. Erhi rhwanka komeza abana birhu okukakola kw’eyo mikolo, rhwanabayigiriza okukenga aha rhuharamiza Yehova.​—Omuhanûzi 4:1.

Rhunacihane okulumula ebyasherire. Ngasi mwaka, Enyumpa y’Obwami enarhangulwe, n’okulola erhi hali ebisherire, embuga n’endalala. Oko kuyirhangula ngasi mwaka kunarhume emikolo y’okuyilanga yajirwa ngasi mango lyo ebera omu kanga kinja, okujira ntyo kunarhume erhalinde yasherera bwenene. (2 Enganîro 24:13; 34:10) Enyumpa y’Obwami egwasirwe ekaba ecire, egwasirwe ebere omu kanga kinja, bulya mwo rhuharamiza Nnamahanga wirhu. Erhi rhwankakola kw’eyo mikolo y’okucesa Enyumpa y’Obwami, rhwanayerekana oku rhusimire Yehova bwenene, n’oku rhuba rhukenzire enyumpa rhumuharamizamwo. (Ennanga 122:1) Kandi Enyumpa y’Obwami ecire enalanzirwe bwinja, enarhume abantu basimisibwa n’idîni lirhu.​—2 Abakorinti 6:3.

• Bulya gurhi rhurhagwasirwi rhulekerere enyumpa yirhu y’okuharamizamwo Yehova?

• Gurhi rhujira lyo Enyumpa zirhu z’Obwami zigenderera okuba zicire?

K’osimire okulonza emyanzi omu bitabu birhu ly’oyushula obumanye bwawe oku biyerekire Ebibliya? K’olonzize omanye binji oku lwandiko, oku muntu mulebe, oku hantu halebe erhi kantu kalebe Ebibliya ederhire? Erhi, k’okola ocidosize erhi Akanwa ka Nnamahanga kanakurhabala okulwisa mbaka ndebe omu kalamo? Nkaba oshuzize neci, okolese ebitabu biri omw’ibikiro ly’ebitabu ly’omu Nyumpa y’Obwami.

Omw’ibikiro ly’Enyumpa y’Obwami muli ebitabu byanka kurhabala. Nkaba orhagwerhi ebitabu birhu byoshi biri omu lulimi lwawe. Cikwone, omw’ibikiro ly’Enyumpa y’Obwami muli ebitabu binji bihyahya. Na kandi wanabuganamw’empindulo nyinji z’Ebibliya, ediksionere nyinja, n’ebindi bitabu wankalonzamw’emyanzi minji. Wanakolesa ebitabu by’omw’ibikiro ly’Enyumpa y’Obwami embere erhi enyuma ly’entimanano. Nkaba muli eordinateri, mw’eyo ordinateri mwanaba entondekanye (programe) ederhwa Watchtower Library. Watchtower Library eba ntondekanye erimw’ebitabu byoshi by’Abahamirizi ba Yehova, eyo ntondekanye eba ndembu okukolesa na kandi yanakurhabala okulonza omwanzi, oluderho, erhi lwandiko lulebe.

Er’ibikiro linarhabale abanafunzi okurheganya entimanano y’Akalamo n’Omukolo g’Omukristu. Wanakolesa ebitabu by’omw’ibikiro nka warheganya ecigabi cawe. Omwimangizi w’entimanano y’Akalamo n’Omukolo ye yimangira er’ibikiro. Agwasirwe alole erhi ebitabu bihyahya bikola bimuli n’erhi bibisirwe bwinja. Oyo mwimangizi erhi Omuhamirizi okuyigiriza Ebibliya banakuyereka gurhi wankabonamw’omwanzi walonza. Cikwone, ebitabu bya mwer’ibikiro birhaja embuga, orhakwanini okubiheka eka. Na kandi, rhugwasirwe rhubikolese bwinja rhurhana biyandikagamw’akantu.

Ebibliya edesire oku ly’ohikira okumanya Nnamahanga, ogwasirwe okulonza obo bumanye nka kula “bahumba obuhirhi.” (Emigani 2:1-5) Ibikiro ly’ebitabu ly’omu Nyumpa y’Obwami lyana kurhabala orhangire okulongereza obo bumanye.

• Bici biba omw’ibikiro ly’ebitabu ly’omu Nyumpa y’Obwami?

• Ndi wanka kuyereka gurhi wabona emyanzi omu bitabu biri omw’ibikiro ly’Enyumpa y’Obwami?

Yezu abwizire abanafunzi bage erhi: “Ntyo obulangashane bwinyu bumoleke embere z’abantu, lyo bakabona ebijiro binyu binja, bakuze Sho oli omu mpingu.” (Mateyo 5:16) Byo birhuma, rhunakolese ebitulwa (by’eteknoloji) bya gano mango girhu, ciru ne Enterneti. Oku adresi yirhu ye Enterneti emanyikine na leta, jw.org, wanabuganakw’emyanzi eyerekine emikolo yirhu n’obuyemere bwirhu. Myanzi mici wankabonakwo?

Wanabona amashuzo g’Ebibliya oku madoso bantu banji bacidosa. Wanabonakwo amashuzo g’amadoso maguma g’obulagirire bwenene omu kalamo. Lwiganyo: Wanarhola etrakti Ka hali olusiku amalibuko ganahwe n’etrakte Abantu bàfîre, ka kobinali banacibilama? oku adresi yirhu omu ndimi kulusha 600. Kw’eyo adresi wanabona Ebibliya Tafsiri ya Ulimwengu Mpya omu ndimi kulusha 130, n’ebitabu binji by’okuyigiriza Ebibliya, lwiganyo ecitabu Biblia Inafundisha Kabisa Nini? n’ejurnale mpyahya za Munara wa Mulinzi na Amuka! Wanasomakwo bitabu binji egarhi k’ebyo erhi kuyumvirhiza obusomi bwabyo. Wanapakula bitabu binji ekarhi k’ebyo, wanabirhola omu MP3, omu maandishi ga PDF, erhi EPUB. Wanarholera ciru owundi muntu ecitabu omu lulimi lwage nkaba asimisibwe n’omwanzi gw’Ebibliya. N’evideo z’ebitabu birhu wanazibona omu ndimi nyinji z’ebimanyiso erhi ndimi z’orhuduma. Wanarholakw’obusomi bw’Ebibliya buli nka mucezo, emicezo eyimangire oku Bibliya (drame), n’enyimbo z’okusimisa.

Wanabonakw’emyanzi y’okuli eyerekire Abahamirizi ba Yehova. Kw’eyo adresi yirhu ye Enterneti, wanabona evideo ziyerekine emikolo yirhu omw’igulu lyoshi, enfoto z’ebi rhwajizire n’ez’amango Abahamirizi ba Yehova bali bahana oburhabale oku bene wabo bali omu madarhi. Wanabuganakw’emyanzi y’entimanano zirhu nkulu ziri hofi zibe, n’eadresi zirhu z’ebiro by’ebihugo.

Kugerera kw’ebyo byoshi, obulangashane bwirhu buli bwamolekera abantu omu bishagala bya kuli bwenene b’igulu. Abantu b’omu bihugo byoshi, ciru n’omu Antarktike, bali bayunguka. Rhugenderire okushenga oku “oluderho lwa Nyamuzinda lulandwe lunakundwe” omw’igulu lyoshi lyo akuzibwa.​—2 Abatesalonika 3:1.

• Gurhi eadresi yirhu ye Enterneti jw.org eli yarhabala bantu banji okuyiga okuli kw’Ebibliya?

• Mwanzi muci wankasima okulonza oku adresi yirhu ye Enterneti?