ISOMO LYA 15
Bulya gurhi ogenderere okuyiga Ebibliya?
1. Bunguke buci wabona okagenderera okuyiga Ebibliya?
Rhucikebirwe oku enyigirizo wayumvirhe mw’eci citabu zikurhabire okusima Yehova bwenene. Bikuhunyire ogenderere okuyiga Ebibliya ly’obo buzigire bwawe burhagizima. (1 Petro 2:2) Ly’oyishibona obuzîne bw’ensiku n’amango, ogwasirwe ogenderere okuyegera Yehova omu kuyiga Akanwa kage.—Osome Yowane 17:3; Yuda 21.
Erhi wankagenderera okuyushula obumanye bwawe oku biyerekire Nnamahanga, obuyemere bwawe bwazibuha bwenene. N’obwo buyemere bwakurhabala akajira ebyo kusimima Nnamahanga. (Abahabraniya 11:1, 6) Obwo buyemere bwakurhabala oleke ebibi wakagijira ona hindule akalamo kawe.—Osome Ebijiro 3:19.
2. Gurhi wankajira lyo abandi bayunguka n’ebi okola omanyire kuli Nnamahanga?
Wanaba mwira muzigirwa wa Yehova
Omu kalamo, omuntu akamanya omwanzi mwinja arhabula bwagubwira abandi. Omu kugenderera wayiga Ebibliya, wamanya gurhi wankayikolesa ly’oshambalira abandi oku biyerekire obuyemere bwawe n’omwanzi mwinja gw’Ebibliya.—Osome Abaroma 10:13-15.
Omu kuderha kw’ogu mwanzi gw’Obwami, bantu banji barhangirira oku bira babo na kuli bene wabo. Okolese obwenge. Orharhangiriraga oku kubabwira oku idîni lyabo liri lya bunywesi, cikwone orhangirire kw’ebi Yehova arhulaganyize. Kandi omanye oku ebijiro byawe binja byanabasimisa bwenene kulusha ebinwa.—Osome 2 Timoteyo 2:24, 25.
3. Bwira buci wankajira haguma na Nnamahanga?
Okuyiga Akanwa ka Nnamahanga kwakurhabala okule omu bunyamûka. Na buzinda wanaba mwira muzigirwa wa Yehova. Nantyo Nnamahanga anakuyankirira obe muguma w’omu mulala gwage.—Osome 2 Abakorinti 6:18.
4. Gurhi wankajira ly’ogenderera okuja embere?
Wanagenderera okuja embere omu biyerekire obwira bwawe haguma na Yehova erhi wankagenderera okuyiga Ebibliya. (Abahabraniya 5:13, 14) Obwire Omuhamirizi wa Yehova akuyigiriz’Ebibliya omu kukolesa ecitabu Biblia Inafundisha Kabisa Nini? Oku wagenderera okuyiga Akanwa ka Nnamahanga ko n’akalamo kawe kaba ka mwishingo.—Osome Ennanga 1:1-3; 73:27, 28.
Omwanzi mwinja gurhenzire emwa Yehova, Nnamahanga w’omwishingo. Wanamuyegera bwenene okaja haguma n’abamuharamya. (Abahabraniya 10:24, 25) Erhi wankagenderera okuciseza okusimisa Nnamahanga, wayishibona obuzîne bw’okuli, kandi erhi buzîne bw’ensiku n’amango. Kobinali, nta kandi kantu ka bulagirire wankajira omu kalamo kawe kalushire okuyegera Nnamahanga.—Osome 1 Timoteyo 1:11; 6:19.