Rhwanahagalika Ibilisi

1, 2. Bici rhushinganine rhumanyirire lugenda Shetani n’abazimu?

AKALAMO kayish’iba kinja omw’igulu lihyahya. Rhwayish’ikalama nk’oku Nnamahanga anal’irheganyize. Cikoki ene rhucilamire omw’igulu lirhegesirwe na Shetani haguma n’abazimu. (2 Abakorinti 4:4) Ciru akaba rhurhakababona, ho babà; banajira misi minji.

² Mw’eci cigabi, rhwabona gurhi rhwakabêra hofi na Yehova ly’arhulanga. Yehova arhulaganyize oku anarhurhabala. Cikoki, rhukwanine rhuhugûkwe enjira Shetani akolesa ly’arheba abantu n’okubagwarha mpirha.

“SHETANI ALI NKA NTALE ELI YALULUMA”

3. Bici Shetani alonzize okurhujirira?

³ Shetani anakaderha oku abantu banakaharamya Nnamahanga bulya anakabagula, mpu erhi Nnamahanga akarhulekerera rhuje omu mazibu, rhurhakacimukolera. (Osome Ayubu 2:4, 5) Erhi omuntu akaderha oku akola ayiga Ebibliya, Shetani n’abazimu banabone, ho n’aho banajire okwabo koshi lyo bamuhanza. N’erhi omuntu ahâna akalamo gage emwa Yehova, n’okubatizibwa, Shetani n’abazimu bage banakunire bwenene. Ebibliya eshushanyize Shetani “n’entale eli yaluluma, adwirhe azunguluka-zunguluka alonze oyu amira.” (1 Petro 5:8) Shetani alonzize ashereze obwîra bwirhu haguma na Yehova.​—Ennanga 7:1, 2; 2 Timoteyo 3:12.

4, 5. (a) Bici Shetani arhagwerhi buhashe bwakujira? (b) Ohugûle “okuhagalika Shetani” kw’okuderha gurhi?

⁴ Cikoki, rhurhakwanini rhuyobohe Shetani n’abazimu bage. Arhali byoshi Yehova aba amuyemerire ajire. Yehova alaganyize oku “ehitû hy’abantu” hyayokoka “omu malibûko madarhi.” (Amafulûlo 7:9, 14, NWT) Ciru Shetani akajira gurhi arhakahagalika ebyo. Bulya gurhi? Bulya Yehova anakalanga abakozi bage.

⁵ Erhi rhwakabêra hofi-hofi na Yehova, Shetani arhakashereza obwîra bwirhu haguma na Yehova. Akanwa ka Nnamahanga karhulaganyize ntya: “Yehova aba haguma nirhu akasanzi koshi erhi nirhu rhwakabêra haguma naye.” (2 Enganîro 15:2, NWT; osome 1 Abakorinti 10:13) Omu mango ga mîra, abalume n’abakazi banji bishwekerezi bahikîre aha bahagalika Shetani omu kubêra hofi-hofi na Yehova. Kwa lwiganyo; Abeli, Enoki, Nuhu, Sara na Musa. (Abahabraniya 11:4-40) Nirhu rhwanajira akabo. Akanwa ka Nnamahanga karhubwizire ntya: ‘Mulwise Shetani, mwabona oku ammuja kuli.’​—Yakobo 4:7.

“ABABISHA RHULWISA”

6. Gurhi Shetani arhugwarhamwo mpirha?

⁶ Ciru akaba Shetani amanyire oku Yehova arhamuyemeriri ngasi kantu, analonze arhusheregeze obwîra bwirhu haguma na Yehova. Hamagera myaka minji Shetani ali akolesa njira nyinji ly’arhurheba. Njira nguma na nguma Shetani akolesa zo zihi?

7. Gurhi Shetani agwarha mpirha abakozi ba Yehova?

⁷ Entumwa Yowane yayandîka ntya: “Igulu lyoshi liri omu buhashe bw’omubi.” (1 Yowane 5:19, NWT) Shetani ye rhambwire igulu lyoshi. Anakalonza okurhambula abakozi ba Yehova. (Mikeyo 4:1; Yowane 15:19; Amafulûlo 12:12, 17) Shetani amanyire oku acigwerhe hisanzi hisungunu. Anahire ngasi muguma wirhu omu mazibu ly’arhag’ibêra mwishwekerezi kuli Nnamahanga. Agandi mango anarhugwarha mpirha ho n’aho. N’agandi mango orhakamanya oku yeri wakurhega.

8. Bici ngasi Mukristu ashinganine ahugûkwe?

⁸ Rhusomire ntya omu Abefezi 6:12: “Bulya ababisha rhulwisa . . . emisi mibi y’iroho y’emalunga.” Ngasi Mukristu ashinganine alwise Shetani n’abazimu. Rhushinganine rhuhugûkwe oku balya boshi bacihanyîre emwa Yehova banabatizibwa, bakwanine balwe er’ivita. Omu maruba Paolo ayandikirâga Abefezi, abahire omurhima oku “bazibuhe.”​—Abefezi 6:11, 13, 14.

9. Bici Shetani n’abazimu bali balonza barhujirire?

⁹ Shetani n’abazimu bage bagendekire barheba abantu omu njira nyinji. Arhali mpu bulya rhwahagalisire murhego mulebe gwa Shetani kw’okuderha oku arhakacirhurhega n’ogundi murhego. Shetani agendekire alongereza ngasi kantu rhulimwo bazamba ly’amanya murhego muci akarhugwarhamwo. Cikoki, bulya Ebibliya erhubwizire emirhego yage, rhwanahasha rhwamuhagalika. (2 Abakorinti 2:11; olole Amahugûlo nomero 31) Murhego muguma muli eyi akolesa, buba bukurungu.

OYAKE ABAZIMU

10. (a) Obukurungu byo bici? (b) Gurhi Yehova abona obukurungu?

¹⁰ Obukurungu, eba nkomêdu y’okuganira haguma n’abazimu kugerera ebintu birhakabonekana n’amasu gw’omuntu. (kwa lwiganyo; okuderha ebyayisha, kujira obulaguzi, kukweba abandi kw’obuhanya erhi kulonza okuganira n’abafîre) Ebibliya edesire oku obukurungu ciri cijiro ciguma c’omu bintu Yehova “ashomba,” n’oku oli wajira obukurungu arhakaba muguma w’omu bakozi ba Yehova. (Olushika 18:10-12; Amafulûlo 21:8) Abakristu bashinganine bayake ngasi njira yoshi y’obukurungu.​—Abaroma 12:9.

11. Ngahi okulonza okulola ebirhabonekana n’amasu kwakarhuhêka?

¹¹ Shetani amanyire oku erhi akarhushumya rhujire enkomêdu z’okujira ebirhakabonekana n’amasu g’abantu, anaba n’obulyo bw’okurhugwasa omu bintu by’obukurungu. Enkomêdu zoshi z’okujira obukurungu zanashereza obwîra bwîrhu haguma na Yehova.

SHETANI ALONZIZE OKURHURHEBA

12. Gurhi Shetani ashumya oku rhurhanya?

¹² Obulonza bwa Shetani kuli kulonza abantu babule eby’okurhanya. Ly’ahikirira aho, anakuze entanya z’akarhinda omu bwenge bwabo kuhika barhondêre “baderha ehinja mpu hibi n’ehibi mpu hyo hinja.” (Izaya 5:20) Ibilisi ali alonza okuyemeza abantu oku amahano g’Ebibliya garhali ga bulagirire n’oku rhwanaba n’obushagaluke erhi rhwakaleka okukulikira amakanuni ga Nnamahanga.

13. Gurhi Shetani ajira ly’ahira akarhinda omu mirhima y’abantu?

¹³ Okurhuhira mw’akarhinda eba yindi njira Shetani akolesa, enaba egwasire. Agwerhe myaka minji ali akolesa eyo njira. Omu bustani bw’e Edeni, alonza gurhi akagwasa akarhinda omu murhima gwa Eva erhi amubwira ntya: “Ka kobinali Nnamahanga ammubwizire oku murhakalya oku malehe goshi gw’omu bustani?” (Omurhondêro 3:1, NWT) Enyuma z’aho, omu mango ga Ayubu, Shetani adosa Yehova embere za bamalahika ntya: “Ka busha Ayubu arhinyîra Nnamahanga?” (Ayubu 1:9, NWT) Enyuma z’okubatizibwa kwa Yezu naye, Shetani amusholoshonza, amubwira erhi: “Akaba oli Mwene-Nyamuzinda, oderhage aga mabuye gahinduke migati.”​—Mateyo 4:3.

14. Gurhi Shetani ajira ly’abantu barhangira bacidosa erhi kobinali obukurungu buli bubi?

¹⁴ Ene nalyo, Ibilisi agendekire agwasa akarhinda omu mirhima y’abantu. Ali akolesa enjira yakarhuma abantu barhangira bacidosa erhi kobinali okujira obukurungu kuba kubi. Gurhi ahikiramwo aho? Omu kulonza abantu barhanye oku nkaba hali ezindi njira z’obukurungu zirhagwerhi mazibu goshi-goshi. Ciru Bakristu baguma na baguma bahikire okuyibagira oku obukurungu buli bubi bwenene. (2 Abakorinti 11:3) Gurhi rhwakacilanga kuli ogo murhego gw’obukurungu? Rhulolage bintu bibirhi byakarhuma rhwarhogera omu murhego gw’obukurungu: eby’okucishagalula n’okucibukisa.

SHETANI ANAKOLESE AMARALA GIRHU G’AKABURHANO

15. Gurhi okucishagalula kwirhu kwakarhuhira omu lushangi n’abazimu?

¹⁵ Bene bantu bajira irala ly’okucishagalula linaba ly’akaburhano. Ene, abazimu, amâji n’obuhashe burhabonekana n’amsu biri byakolesibwa bwenene oku Enterneti n’omu mafilime, omu ma videyo, omu myanzi y’oku televiziyo n’omu mikeso y’evideyo. Bantu banji bashagalukira ebyo bwenene n’okubibona nka birhagwerhi mazibu goshi-goshi. Barhahugûkwa oku oko, kuli kucilerhera abazimu omu kalamo kabo. Omuntu anagwarhwa mw’ogo murhego kugerera obulaguzi erhi kulolereza ebigasha by’enfune ly’amanya ebyayisha, kugerera amakarta gw’obulaguzi erhi kugerera amacupa g’obulaguzi. Shetani anakahindûla ebyo bintu bibi bibonekane nka biri binja bwenene, byakushagalula, byakusimisa bwenene ly’abantu barhamanyaga oku biri bibi bwenene. N’omuntu anarhangira ciru arhanya oku nta bubi boshi-boshi bwakahaba erhi omuntu akalola ebizungu-zungu biyerekine gurhi bakolesa obuhashe burhabonekana n’amasu, casinga arhabijiraga. Bulya gurhi okurhanya ntyo guli murhego munene?​—1 Abakorinti 10:12, NWT.

16. Bulya gurhi rhukwanine rhuyake eby’okucishagalula bihiziremwo obuhashe burhaboneka n’amasu?

¹⁶ Shetani n’abazimu bage barhakahasha basoma omurhima. Cikoki banalabirize irala lirhu kugerera ebi rhucishoga rhwene n’ebi omulala gwirhu gucishoga lugenda ebi rhwacishagalulamwo. Shetani n’abazimu bage banamanya oku rhubasimire erhi rhwakacishoga efilime, emiziki erhi bitabu biganirire eby’obukurungu, enshanga, abali kw’abazimu, obulozi, okushunga n’ebindi bya mwenere ebyo. N’erhi babona ntyo go mango barhangira barhushumya okujira obukurungu.​—Osome Abagalasiya 6:7.

17. Gurhi Shetani akarhurhegamwo omu kulonza okukolesa irala lirhu ly’okulonza okuba n’amagala minja?

¹⁷ Shetani anakolesa irala lirhu ly’akaburhano ly’okuba n’amagala minja. Ene abantu bagwerhe amazibu gw’okuba n’amagala minja. Agandi mango, bantu baguma na baguma bali balonza njira nyinji y’okulonza okucibukisa, ci wapi, nta kufuma. (Marko 5:25, 26) Erhi bihikira aho omuntu anaciyumve arhacigwerhi bulangalire boshi-boshi, abandi banahikire aha bayemera ngasi njira bakanababwira oku yo yabafumya. Cikoki, rhwe rhuli Bakristu bw’okuli, rhushinganine rhube masu lugenda oko, rhurhakakolesa amafumu gali “m’obuhashe bw’amâji.”​—Izaya 1:13, NWT.

18. Kubukwa kwa gurhi Omukristu ashinganine alahire?

¹⁸ Omu mango g’aba Israheli, bantu baguma na baguma bakag’ikolesa “obuhashe bw’amâji.” Yehova ababwîra ntya: “Mukalambûla amaboko, nnambwikire obusu bwani ndek’ibona; ciru mwankayushûla emisengero, niono ntayiyumvirhiza: bulya amaboko ginyu gayunjwire muko.” (Izaya 1:15) Orhanye; Yehova arhakayumvirhe ciru n’amasala gabo! Rhurhakajira akantu kakashereza obwîra bwirhu haguma na Yehova. N’ebyakarhuma arharhurhabala, ci bwenene amango rhulwazire. (Ennanga 41:3) Erhi rhurhanya lyo rhumanya erhi rhwanayemera bufumu bulebe, rhukwanine rhujire obusagasi rhumanye erhi okwo rhwabukwamwo kurhagwerhi lushangi n’eby’obukurungu erhi buhashe bw’ebirhaboneka n’amasu. (Mateyo 6:13) Erhi akaba hali olushangi obo bufumu bugwerhe n’eby’obukurungu, rhukwanine rhubulahire!​—Olole Amahugûlo nomero 32.

OKU ABAZIMU BARHONDÊRAGA

19. Bulya gurhi bantu banji bayoboha Shetani bwenene?

¹⁹ Bantu baguma na baguma barhanya oku Shetani n’abazimu barhahaba. Cikoki abandi bamanyire oku Shetani n’abazimu ho babà kugerera ebi bacibwinire bone omu kalamo. Bantu banji babà balamire omu boba bunene bwenene. Abandi bahindusire bajà b’abazimu. Ciru n’abandi bagendekire bayalagaza oboba bwabo omu kuganirira emyanzi n’endibi lugenda ebi abazimu bajirira abantu. Ciru n’abandi banaciyumve bwinja n’okushagalukira endibi lugenda abazimu. Erhi abantu bayumva eyo myanzi banakaciyumva bayobohire Shetani bwenene.

20. Gurhi rhwakahikiramwo aha rhwayalagaza obunywesi bwa Shetani?

²⁰ Okengere oku Shetani alonzize ogendekere wamuyoboha. (2 Abatesalonika 2:9, 10) Shetani aba munywesi. Aba amanyire gurhi akajira ly’ayemeza abantu eby’obukurungu n’okubajira bahikire aha bayemera oku birhaba bibi. Abo bantu banakaganirira endibi ebi babonaga erhi ebi bayumvagya. Okugendekera kwaganira eyo myanzi, kwa nayijira ebonekane nk’eri y’okuli n’obo eri ya bunywesi. Rhwehe rhurhakalonza okurhabala Shetani okugendekeza obunywesi bwage, omu kugendekera rhwaganira emyanzi eyerekire abazimu n’emisi yabo.​—Yowane 8:44; 2 Timoteyo 2:16.

21. Ahali hw’okuyalagaza emyanzi ya Shetani, bici rhukwanine rhukaganirira?

²¹ Erhi akaba hali omuntu wakag’iganira n’abazimu embere abe Muhamirizi wa Yehova, anajira okwage koshi arhakag’iganira ebyakag’ijira erhi ebyakag’ibona mpu lyo ashagalula abantu. Abakozi ba Yehova barhakwanini okuyoboha ebi Shetani n’abazimu bakajira. Cikoki, rhukwanine rhuseze Yezu Kristu kw’amasu n’obuhashe Yehova amuhire. (Abahabraniya 12:2) Yezu âl’imanyire bintu binji lugenda obuhashe bwa Shetani, cikoki nta lusiku aganirire abantu lugenda obuhashe bwa Shetani. Asegeza omukolo gw’okuyalagaza emyanzi y’Obwami “n’okuderha ebintu binja bya Nnamahanga.”​—Ebijiro by’Entumwa 2:11, NWT; Luka 8:1; Abaroma 1:11, 12.

22. Bici ohizire okujira?

²² Rhurhayibagiraga oku Shetani aba alonzize ashereze obwîra bwirhu haguma na Yehova. Shetani anajire okwage koshi ly’arhusheregeza obwîra bwirhu haguma na Yehova. Cikoki, rhumanyire enjira zage zoshi rhunacihizire eluhya lyo rhuhagalika ngasi njira yoshi y’obukurungu. Rhukwanine rhucihangane ‘rhurhahaga Shetani engwarhiro.’ (Osome Abefezi 4:27) Erhi rhwakahagalika Shetani rhurhakagwarhwa omu mirhego yage, n’oko kwanarhurhabala rhuciyumve rhuli omu murhula rhunalanzirwe na Yehova.​—Abefezi 6:11.