ISOMO LYA 02

Ebibliya Erhuhîre Obulangalire bw’Akasanzi Kayisha

Cacapirwe

Amazibu ga ngasi lubero abantu bw’omw’igulu lyoshi bali balwisa gali garhuma bayumva oburhe, amalibuko ciru n’amalumwa. K’okola ohikirwe n’amazibu garhumaga waciyumva ntyo? Nkaba oli walibuka enyanya z’obulwala, erhi nkaba bulya omuzigirwa wawe afîre. Nkaba okola acidosize ntya: ‘Ka haciri amango akalamo kanacibe kinja?’ Ebibliya ehânyire ishuzo lishinganine kw’er’idso.

1. Gurhi Ebibliya erhuhamw’obulangalire?

Ebibliya ehugwîre bulya gurhi igulu lirimo mazibu manji ene. Na kandi erimo omwanzi mwinja guyerekine oku amazibu rhuli rhwabona ene gali ga kasanzi kasungunu na hano hofi-hofi goshi gahwa. Ebiragane biri omu Bibliya byanarhuha “obulangalire bw’ensiku zayish’iyisha.” (Osome Yeremiya 29:11, 12, Mashi Bible.) Ebyo birangane binarhurhabale okulwisa amazibu girhu, okuba n’entanya nyinja n’omwishingo g’okunali.

2. Bulangalire buhi bw’ensiku zayisha Ebibliya erhuhire?

Ebibliya eyerekine oku amango gayisha, “olufû ntalwo lwacihabê; emishîbo n’endûlù n’amababale [erhi malumwa] birhakacihabâ bundi.” (Osome Amafulûlo 21:4.) Ngasi mazibu garhuma rhwabula obushagaluke ene, nk’obukenyi, obubule bw’obushinganyanya, endwala n’olufû, birhakacihabâ bundi. Ebibliya elaganyize oku bene bantu bayish’ishagalukira okulama omu Paradizo hanw’igulu ensiku n’amango.

3. Gurhi wakayemeramwo ebiragane biri omu Bibliya?

Bantu banji banalangalire oku bintu binja bilebe byahikirira, cikone barhayemera oku hali olusiku byanahikirire. Ebi Ebibliya elaganyize byohe byanahikirire buzira karhinda. Rhwanazibuhya obulangalire bwirhu mw’ebi edesire erhi ‘rhwakakalongereza omu mandiko.’ (Ebijiro by’Entumwa 17:11) Omu kugenderera wayiga Ebibliya, wahikira aha wahiga wene erhi wanayemera ebi edesire lugenda amango gayisha.

HUMBIRIRA LY’OHUGÛKWA

Olole bintu biguma na biguma Ebibliya elaganyize byaba omu mango gayisha. Obone gurhi ebi Ebibliya elaganyize biri byarhabala abantu muli gano mango.

Enfoto: Enfoto ziyerekine akalamo abantu bali balama ene n’aka ’Ebibliya elaganyize bayishilama omu mango gayisha. Ezo nfoto zo n’ezo ziyerekinwe aha ah’idako.

4. Ebibliya erhulaganyize akalamo k’ensiku n’amango karhayishibemo malibuko goshi-goshi

Olole ebi biragane biri omu Bibliya. Biragane bihi oshagalukire bwenene? Bulya gurhi?

Osome amandiko gayerekinwe enyuma za ngasi ciragane, na buzinda oshuze kw’aga madoso:

K’orhanyize oku ebi aga mandiko gadesire bihânyire obulangalire? Ka byanaha omulala gwawe n’abîra bawe obulangalire?

Ocibone oli walama omw’igulu amango

NTA MUNTU . . .	NGASI MUNTU . . .
wanaciyumve amalumwa, wanacishosihale, erhi kufâ.—Izaya 25:8.	anabone abazigirwa bage bulya banafûke bacibilama hanw’igulu.—Yowane 5:28, 29.
wanacilwale erhi kuba na bulema bulebe.—Izaya 33:24; 35:5, 6.	anabe n’amagala nkana na misi minji.—Ayubu 33:25.
wanacijirirwe okurhashinganini.—Izaya 32:16, 17.	anabe n’ebiryo binji, anabe n’enyumpa nyinja n’akazi kinja.—Ennanga 72:16; Izaya 65:21, 22.
wanacilibuke erh’ivita lirhuma.—Ennanga 46:9.	analame omu murhûla.—Ennanga 37:11.
wanacilibuke erhi ntanya mbi zirhuma kandi erhi kukengera ebibi byagezire.—Izaya 65:17.	analame ensiku n’amango omu hali nyinja.—Ennanga 37:29.

Mwana rhabana muguma ali omu hopitali amafuma na nina ali amuhobera.

Mushosi muguma, amacibiba musole anakola agwerhe emisi y’ohusukuma oburweti buli mw’ebishogo-shogo.

5. Obulangalire Ebibliya ekuhire bwanajira akalamo kawe kabe kinja

Bantu banji bavunisire omurhima erhi kugaya enyanya z’amazibu gayunjwire omw’igulu. Banji bamulibo banajire okwabo koshi lyo balonza okushanja ebintu. Olole gurhi eciragane Ebibliya ehânyire c’oku ebintu byanacishanje ciri carhabala bantu banji muli kano kasanzi kirhu. Olole EVIDEO, na buzinda oganirire amadoso gakulikire.

VIDEO: Nalonza Okulwisa Obubule bw’Obushinganyanya (4:07)

Nfoto nguma nguma z’omu video ‘Nalonza Okulwisa Obubule bw’Obushinganyanya.’ 1. Rafika ali ahumbula ipamba haguma n’abantu b’obûko bwage amango aciri munyere. 2. Rafika asimire bwenene okubona abantu ba ngasi bûko bashagalukire okuba haguma amango ajaga oburhanzi oku ntimanano nkulu y’Abahamirizi ba Yehova.

Mw’eyi video, bubule buhi bwa bushinganyanya bwabulisagya Rafika omurhûla?
Ciru akaba obo bubule bw’obushinganyanya burhahwaga, gurhi Ebibliya yamurhabiremwo?

Obulangalire Ebibliya erhuhire bw’akasanzi kayisha bwanarhurhabala rhurhavunikaga omurhima na ntyo rhulwise amazibu girhu omu njira eshinganine. Osome Emigani 17:22 na Abaroma 12:12, na buzinda oganirire aga madoso:

K’orhanyize oku ogu mwanzi gw’obulangalire guli omu Bibliya gwanakurhabala ly’akalamo kawe kaba kinja kurhangira buno? Bulya gurhi orhanyize ntyo?

HALI ABANTU BADERHA NTYA: “Ebi Ebibliya elaganyize lugenda amango gayisha birhakahikirira.”

Bulya gurhi orhanyize oku kuli kwa bulagirire ocilolere wene erhi ebi Ebibliya edesire binaba by’okuli?

KWA BOFOFI

Ebibliya erhuhîre obulangalire enarhurhabire rhulwise amazibu girhu omu kurhulaganya oku amango gayisha gayishiba ga mwishingo.

Okucikengeza

Bulya gurhi rhulagirire oku bulangalire?
Bici Ebibliya edesire lugenda amango gayisha?
Gurhi okuba n’obulangalire kwakakurhabala ene?

Rhwayusagya er’isomo omu nsiku:

Omuhigo Gwani

Osome amandiko galimw’er’isomo ly’omanyirira ebiragane biri omu Bibliya.

Ogundi muhigo:

Ogundi muhigo

OCIYIGIRIZE KWA BULÎRI

Ociyirize eyindi myanzi eyerekine oku obulangalire bwanakuha emisi amango oli omu mazibu.

“Unaweza Kupata Wapi Tumaini?” (Amuka!, y’omu nsiku 22/4/2004)

Olole gurhi obulangalire bw’akasanzi kayisha bwakarhabala balya babà balwazire nsiku nyinji.

“K’Ebibliya Yanakurhabala Erhi Akaba Okola Ogwerhe Nsiku Nyinji Oli Walwala?” (Mwanzi guli oku jw.org)

Hano olola eyi video y’omuziki, oje wacibona nk’okola oli omu Paradizo hanw’igulu onali washagalukira amango gayisha Ebibliya elaganyize haguma n’omulala gwawe.

Orhanye oku Mango Gayisha (3:37)

Olole gurhi akalamo ka muntu muguma wakagilonza okubona obushinganyanya omw’igulu kashanjire erhi ayiga oku Ebibliya ehânyire obulangalire bw’amango gayisha.

“Sijisikie Tena Kuwa Ninapaswa Kubadilisha Dunia” (Ilabiro ly’Akalalizi, ly’omu lusiku 1/7/2013)