ISOMO LYA 39
Oku Nnâmahanga Abona Omuko
Omuko guba gwa bulagirire. Ntaye wakalama n’omu mubiri gwage murhali muko. Bulya Nnâmahanga ye Mulemi wirhu, ashinganine arhubwire gurhi rhwakakolesa omuko. Gurhi adesire lugenda omuko? Ka rhwanagulya erhi kuguhirwamo? Na gurhi rhwakarhôla emihigo minja okubiyerekire omuko?
1. Gurhi Yehova abona omuko?
Yehova abwira abakozi bage ba mîra ntya: “Omuko bwo buzîne bwa ngasi cintu.” (Bene-Levi 17:14) Yehova anabone oku omuko bwo buzine. Bulya obuzine buba butagatifu, enaba ngalo erhenzire emwa Nnâmahanga, omuko nago guba mutagatifu.
2. Njira ehi bakolesamwo omuko Nnâmahanga aba ahanzize?
Yehova alihanizize abakozi bage ba mîra oku barhahiraga bakalya omuko. (Osome Omurhondêro 9:4 na Bene-Levi 17:10.) Acibinagalukira er’irhegeko erhi olongoza embaraza eri yalongoza oku ebwire Abakristu ‘baciyase . . . n’omuko.’—Osome Ebijiro by’Entumwa 15:28, 29, NWT.
Okuciyasa n’omuko k’okuderha gurhi? Erhi dogtere akakubwira oku ociyase n’amamvu, k’okuderha oku orhakacikaganywa. Ka wanagahira omu biryo erhi bakurhulego? Nanga. Ko n’oko, Nnâmahanga arhubwizire oku rhuciyase n’omuko, k’okuderha oku rhurhashinganini rhugunywe erhi kulya enyama efulungine muko (nyamafu). Ciru na kandi rhurhashinganini rhulye ebiryo birimo omuko.
Gurhigi rhwakaderha lugenda okukolesa omuko omu by’okubukwa. Hali okubukwa kuguma na kuguma kuvuna amarhegeko ga Nnâmahanga. Kwa lwiganyo, nk’okuhira omuntu mw’omuko erhi ebigabi by’omuko bihamagalwa: globile ndukula, globile nyeru, plakete, n’eplazma. Hali okundi kubukwa kurhabonekana n’obwalagale nka kuvunyire amarhegeko ga Nnâmahanga. Kwa lwiganyo, bulenga buguma buguma bw’ecinganga buhiziremo okukolesa orhugabi rhusungunu-ngunu rhw’omu cigabi cinene c’omuko. Obundi bulenga buhiziremo okukolesa omuko g’omuntu yenene. Mw’ezo njira zoshi rhuganirire, ngasi muguma wirhu ashinganine akolese ezamiri yage yene ly’acishoga bulenga buhi bw’ecinganga akayemera.a—Abagalasiya 6:5.
HUMBIRIRA LY’OHUGÛKWA
Olole ebyakakurhabala lugenda eby’okubukwa bihûnyire okukolesa omuko.
3. Orhôle emihigo yakashagalusa Yehova lugenda eby’okubukwa
Amango okola wacishoga eby’okubukwamwo, gurhi wakarhôla emihigo yakashagalusa Nnâmahanga? Olole EVIDEO, buzinda oganirire obulagirire bw’okujira ebi bikulikire.
Oshenge Yehova akuhe obwenge.—Yakobo 1:5.
Ojire obusagasi ly’obona amakanuni g’Ebibliya na gurhi wagakolesa.—Emigani 13:16.
Olonze gurhi balugibuka abantu emunda oba olamire.
Ohige kubukwa kuhi orhakayemera ciru byakaba gurhi.
Olole n’obwalagale erhi emihigo warhôla yakurhabala obe n’ezamiri zicîre.—Ebijiro by’Entumwa 24:16.b
Ohugûkwe oku abe balo, erhi mukawe, abagula b’omu cigamba, erhi mwalimu wawe w’Ebibliya, ntaye mulibo oshinganine akurhôlere omuhigo guyerekire ezamiri yawe.—Abaroma 14:12.
Oyandike ebi ohizire.
4. Abahamirizi ba Yehova banalonze babukwe omu njira nyinja
Ka byanahashikana omuntu arhumikire irhegeko lya Mungu lugenda omuko, anabukwe omu njira nyinja buzira kukolesa omuko? Olole EVIDEO.
Osome Tito 3:2, na buzinda oganirire er’idoso:
Bulya gurhi rhushinganine rhuganire bwinja n’omu njira y’obutûdu haguma n’abanganga amango rhulwazire?
Ebirhakayemerwa |
Ebi Omukristu akacishoga yene |
|---|---|
A. Eplazma |
Orhugabi rhusungunu-ngunu rhw’eplazma |
B. Eglobile nyeru |
Orhugabi rhusungunu-ngunu rhw’eglobile nyeru |
C. Eplakete |
Orhugabi rhusungunu-ngunu rhw’eplakete |
D. Eglobile ndukula |
Orhugabi rhusungunu-ngunu rhw’eglobile ndukula |
5. Amango bihûnyire okukolesa orhugabi rhusungunu-ngunu rhw’omuko
Omuko gubamo bigabi bini binenene k’okuderha, eglobile ndukula, eglobile nyeru, eplakete, n’eplazma. Ebyo bigabi bini bibamo rhugabi rhunji rhusungunu-ngunu rhuhamagalwa rhugabi rhw’omuko.c Rhugabi rhuguma na rhuguma rhw’omuko rhunakolesibwe omu cinganga lyo barhabala okulwisa endwala erhi ly’omuko gurhagija gwadwa.
Ngasi Mukristu ashinganine akolese ezamiri yage eri nkomereze n’Ebibliya ly’ahiga erhi akolesa orhugabi rhusungunu-ngunu rhw’omuko. Hali Bakristu baguma na baguma balahira amafumu erhi bulenga bw’ecinganga buhûnyire okukolesa orhugabi rhusungunu-ngunu rhw’omuko. Hali n’abandi baciyumva nk’ezamiri yabo erhabahanzizi okukolesa orho rhugabi rhusungunu-ngunu.
Orhanye kw’er’idoso amango okola warhôla omuhigo:
Gurhi nakahugûlira dogtere bulya gurhi ntayemiri erhi bulya gurhi nyemire okukolesa orhugabi rhuguma na rhuguma rhusungunu-ngunu rhw’omuko?
HALI OMUNTU WAKADOSA NTYA: “Ngahi obubi buli erhi omuntu akayemera okuhirwamw’omuko?”
Gurhi nawe orhanyize?
KWA BOFOFI
Yehova arhasima rhukolese omuko omu njira erhashinganini.
Okucikengeza
Bulya gurhi Yehova abona omuko oku guli mutagatifu?
Gurhi rhumanyiremwo oku irhegeko lya Nnâmahanga ly’okuciyasa omuko liyerekire okuguhirwamo?
Gurhi wakarhôla emihigo minja okubiyerekire eby’okubukwa bihûnyire okukolesa omuko?
OCIYIGIRIZE KWA BULÎRI
Bici oshinganine orhanyeko embere orhôle emihigo okubiyerekire obulenga bw’ecinganga buhûnyire okukolesa omuko gwawe?
“Maulizo ya Wasomaji Wetu” (Ilabiro ly’Akalalizi, ly’omu nsiku 15/10/2000)
Bici oshinganine orhanyeko embere oyemere okubukwa kuhûnyire okukolesa orhugabi rhusungunu-ngunu rhw’omuko?
“Maulizo ya Wasomaji Wetu” (Ilabiro ly’Akalalizi, ly’omu nsiku 15/6/2004)
Bici byarhabalaga dogtere muguma ayemere entanya za Yehova okubiyerekire omuko?
“Nilikubali Mawazo ya Mungu Juu ya Damu” (Amuka!, y’omu nsiku 8/12/2003)
Olole gurhi abagula baba omu Komite Zijira Olushangi n’Ehopitali barhabala bene wirhu na bali birhu.
a Olole Isomo lya 35, “Oku Wakakarhôlamwo Emihigo Minja.”
b Olole e nugta ya 5 edesire “Amango Bihûnyire Okukolesa Orhugabi Rhusungunu-ngunu rhw’Omuko,” n’Amahugûlo ga 3, “Obulenga bw’Ecinganga Buhûnyire Okukolesa Omuko.”
c Ba dogtere baguma na baguma banakaderha oku ebigabi bini binenene by’omuko kobinaba nka rhugabi rhusungunu-ngunu rhw’omuko. Cikone, oshinganine ohugûlire abanganga omuhigo gwawe gw’okurhahirwamw’omuko erhi eglobile ndukula, eglobile nyeru, eplakete, n’eplazma.